Unicode
Baekhyun ၏ သူငယ်ချင်းအမည်ခံ မကောင်းစလောင်းများသည် လူငယ်ပီပီ
သောက်စားပျော်ပါးကြသည်က ညဥ့်နက်သည့်တိုင်ဖြစ်၍
Chanyeol ခမျာ ပန်းကန်ဆေး အမှိုက်သိမ်းတာဝန်ကို
အခမဲ့ယူပေးနေရသည် ။
ည 10 နာရီခွဲ 11 နာရီတီးမည့် အချိန်လောက်မှ
အရက်ဒဏ်ကြောင့်ရော ဆူညံသောင်းကျန်းထားသည့်
ဒဏ်တွေကြောင့်ပါ လုံးဝ Down သွားပြီး
အိမ်ပြန်ရန် ဖင်ကြွကြလေ၏ ။
တစ်ယောက်ပြီးတစ်ယောက် အလျိုလျို ထပြန် ကြသော်လည်း
အမှိုက်လေး အနည်းငယ်မျှ ကူပြီးသိမ်းဆည်းပေးခဲ့ဖို့
စိတ်ကူးတော့ တစ်ယောက်မျှပင် မရိှခဲ့ကြပေ ။
ထို့ကြောင့် လူကျဲသွားသော အချိန်တွင်
အားလုံးသိမ်းဆည်းရမည့်တာဝန်က Chanyeol ကိုယ်ပေါ်သာ
အလုံးလိုက် အရင်းလိုက် ပိကျလာလေသည် ။
နောက်ဆုံးကျန်ရိှသည့် ဂျုံအင်နှင့်ရှီဝူး တို့
ပြန်သွားသည့်အချိန်တွင် သူ၏ အမျိုးသားကောင်း
Byun Baekhyun လည်း ခပ်ထွေထွေ ဖြစ်နေချေပြီ ။
သို့သော် Cass 2 ဘူးလောက်သာ သောက်ခွင့်ပေးခဲ့သဖြင့်
လူစိတ်ပျောက်အောင် မူးနေခြင်းမျိုးမဟုတ်ပဲ
လေးတိလေးကန်ဖြင့်သာ သူ့သူငယ်ချင်းများ ဖွထားခဲ့သော
Tissue စ များနှင့် မုန့်ခွံအချို့တို့ကို ကောက်သိမ်းရန်
စတင်လေ၏ ။
' ထားလိုက် ထားလိုက် Baekhyun
ငါလုပ်လိုက်မယ်
ခြေလက်ဆေးပြီး အိပ်တော့ ´
Chanyeol ခမျာ ပလတ်စတစ်အိတ်စွပ်ထားသော
Mini အမှိုက်ပုံးလေးထဲ စားပွဲပေါ် ဖွထားသမျှ
အကုန်ကောက်ထည့်သိမ်းနေရင်းမှ အမြန်ချပြီး
အမူးသမားလက်က မုန့်ခွံတွေကို သွားဆွဲယူရသည် ။
ထို့နောက် ဘယ်က ဘယ်လို ငဂျစ်ခေါင်းပေါ်ရောက်နေမှန်းမသိသော
Tissue စ အမှုန်အမွှားလေးများကိုလေနှင့်မှုတ်ရင်း လက်နှင့်ခါချကာ ဖယ်ရှားပေးရ၏ ။
' အကုန် သိမ်းဆည်းဆေးကြောပြီးရင်
လာခဲ့မှာမို့ အခန်းထဲ ဝင် အိပ်နှင့်တော့နော် ´
Chanyeol ၏ အသံသည် ကလေးတစ်ယောက်ကို
ချော့မော့နေသလို အသံမျိုးဖြစ်ပြီး အနည်းငယ် ညစ်ပေချင်နေတဲ့
Baekhyun ရဲ့ ပါးလေးတစ်ဖက်ကိုပါ လက်မနှင့် ခပ်ဖွဖွ
ဖိပွတ် ပေးသွားသေးသည် ။
အမှန်တကယ် အိပ်ချင်နေပြီဖြစ်သော Baekhyun ကတော့
ပတ်ဝန်းကျင်ကိုတောင် သိပ်ပြီး အာရုံမရိှတော့ဟန်နှင့်
မျက်တောင်များစင်းကျလျှက်သာ အိပ်ခန်းထဲ လေးပင်ပင်
လျှောက်သွားတော့၏ ။
