21 الموسم الثانى

للعمر حسابات اخرى

*****************************
جلست هاله فى البيت تفكر فيما جرى بينها وبين فارس كيف تخلت عن كبريائها لترضيه .. هل هى تحبه لهذه الدرجه أم تراه الفرصه الاخيره لها .
هى تعرف جيداً أنها تحب نفسها تحب نفسها وتقدمها على أى شئ ، ترى نفسها الافضل والاقوى والاذكى دائماً ما كانت الأنا عندها فى السماء .. لم تتوقع طوال حياتها ان هناك ما هو قادر على أن يهزم حبها لنفسها وثقتها وكبريائها حتى جاء فارس .. ولكن هل فارس يمتلك ما يجعله يفعل بها كل ذلك ..؟
هى تعرف الجواب والجواب هو لا فارس لا يمتلك أى شئ ليفعل بها ذلك فى الحقيقه لو تواجد فارس قبل ذلك بعشر سنين لم تكن لتشعر بوجوده من الاساس أو تنظر إليه هناك فارس اخر كان قادر أن يفعل بها ذلك فارس أخر يمتلك مايجعله قادر على أن يفعل بالجميع ما يحلو له وهذا الفارس هو الزمن .
الزمن هو الذى يسرق منك الكثير والكثير سرق منها من شبابها وجمالها سرق لتهتز ثقتها بنفسها وعندما شعر بذلك لوقت كبير حتى ظهر فارس فأعاد إليها الكثير من الإتزان حتى أصبحت لا تستطيع أن تتركه او تبتعد عنه ، فارس أصبح بالنسبه لها كالعصا الذى يتكأ عليه العجوز وبدونه سيسقط وهى لن تسمح لنفسها أبداً بالسقوط .

-مساء الخير
*نظرت هاله لمن قطع حبل أفكارها فوجدته سالم .. مساء النور أنت راجع بدرى من الشغل ايه على غير عادتك
-جلس سالم وهو يلتقط أنفاسه بصعوبه .. الاغرب أنك قاعده فى البيت
*حبيت أريح شويه ، بس أنت وشك أصفر وشكلك تعبان يا سالم
-إرهاق شويه يا هاله مفيش حاجه
*انا هطلبلك الدكتور
-مش محتاج دكتور انا محتاج أريح شويه بس
*نعاله بس هوصلك لأوضتك وبعدين هتصل للدكتور
قام سالم معها حتى اوصلته الى غرفته وساعدته فى تغيير ملابسه ثم اتصلت بالطبيب ليحضر على الفور .

كانت هاله تحب سالم ولم تكن تكرهه فى يوم من الايام  بل وتعتبره صاحب الفضل فيما هى عليه فقد وفر عليها بزواجه منها الكثير من المجهود والكفاح ، نقلها نقله نوعيه من مجتمع الى مجتمع أخر ،  جعلها سيدة مجتمع ، جعلها أقوى وأقوى ، سالم توفيق حقق جميع أحلامها فى غمضة عين .

حضر الطبيب وقام بالكشف على سالم
*ها يا دكتور طمنى
•سالم بيه محتاج راحه
*انت عارف يا دكتور أن سالم حياته هى الشغل
•مدام هاله سالم بيه مريض قلب والمفروض أنه عارف ان كفائة القلب عنده ضعيفه
*طيب احنا نقدر نسفره برا او لو محتاج عمليه نعملها
•مدام هاله سالم بيه سنه كبير جداً ميستحملش انه يعمل عمليه زى القلب المفتوح أو أى عمليه تانيه المطلوب أنه يرتاح ميتحركش كتير وكمان بلاش أى حاجه تسببله ضغط عصبى
*حاضر يا دكتور
•طيب هستأذن انا
*اتفضل يا دكتور
*******************************
-مساء الخير يا بابا
*مساء النور يا محمد .. أخبارك ايه
-تمام الحمد لله
*واخبار الشغل ..؟
-شغل المستعمل ماشى كويس جداً ومتفوق على الجديد زى ما توقعت
*فعلاً كان عندك حق احنا تقريباً محققين من شغل المستعمل الشهر ده ضعف ارباح الزيرو
-أى خدمه يا حاج مستنى المكافأه بقى
*مكفأه أيه ما كل حاجه بتاعتك فى الاخر
-ربنا يديك الصحه يا حاج
*قولى انا عرفت انكوا روحتوا لدكتور .. عملتوا أيه
-مفيش طلع عندى مشكله وماشى ع العلاج حالياً
*مشكلة أيه ؟
-ضعف فى الحيوانات المنويه بس ماشى على علاج حاليا وان شاء  الله خير
*أمسك والد محمد علبة سجائره وأشعل منها سيجاره ثم أطلق دخانها فى الهواء .. انت من أمتى وانت بتكدب عليه يا محمد
-بكدب عليك فى أيه يا بابا
*بتكدب عليه فى ان العيب منك والكلام الى بتقوله بتاع ضعف فى الحيوانات المنويه والكلام الفاضى ده
-وانا هكدب عليك ليه يا بابا
*انت ناسى ان الدكتور الى انت روحت له ده دكتور العيله وان من اول ولادتك لأصغر عيل فى العيله اتولدوا عنده وكمان صديق شخصى يعنى قبل ما أسألك أكيد سألته
-طيب ولما انت عارف يا بابا بتسألنى ليه
*عشان كنت عاوز اسمع منك الحقيقه
-الحقيقه واضح انك عارفها كويس
*طيب وناوى تعمل ايه
-هنمشى على العلاج وقصادنا كذا خطوه زى ما قال الدكتور هنمشيهم خطوه خطوه
*طيب ولو مفيش نتيجه وفضلت الحاله زى ما هى
-مفيش لو احنا كده بنسبق الاحداث
*أيوه يعنى اذا افترضنا ان الوضع مفيش فيه نتيجه
-هنلجأ للحقن المجهرى
*ولو منفعش
-وايه الى مش هيخليه ينفع
*كل شئ جايز
-يبقى قضاء الله وقدره
*محمد انا الشغل الى بعمله والفلوس الى جمعتها دى ليك واولادك من بعدك وعاوز يبقى ليك ذريه تشيل اسمك واسمى وبتمنى النهارده قبل بكره أشوف عيالك
-بص يا بابا انا اتعلمت منك الشغل واتعلمت منك حاجات كتير أوى فى الحياه انت ابتديت من الصفر وكان ممكن فى اوقات كتير انك تفشل أو تستسلم .. كنت ديماً تقولى احنا بنعمل الى علينا وبنسير الباقى على ربنا .. والكلمه دى انا اعتبرتها منهج امشى عليه فى الحياه عموما مش فى الشغل بس مفيش حاجه مضمونه ربنا أراد أبقى الولد الوحيد ليك كان ممكن اجيب اكتر من ولد بس ربنا مأرادش وانت أرتضيت بده
*بس انت يا بنى تقدر تتجوز تانى ده حقك
-انا بحب سمر يا بابا ومبفكرش انى اتجوز عليها وحتى لو فكرت مش هتجوز عليها بسبب الخلفه او مشكله مش بأديها وبعدين هل انت تضمن انى لو خلفت ولد انه يعيش وميمتش ..؟
-لا طبعاً الاعمار بيد الله
*هل تضمن انى لو خلفت خلفتى متبقاش كلها بنات
-دى حاجه بتاعة ربنا
*هل تضمن انى لو خلفت ولد ميضيعش كل الى انا وانت عملناه
-لا مضمنش
*يبقى نعمل الى علينا ونسيب الباقى على ربنا .. الى مستنيه منك يا حاج انك تكون داعم ليه متحسسنيش بهم زياده
-حاضر يا محمد انا. يماً فى ضهرك وبتمنالك الخير
*ربنا يخليك ليه يا حاج
******************************
اخذت كرستين حمام دافئ ثم لفت نفسها ببرنس ثقيل لتتقى به شتاء روما ثم جلست لتمشط شعرها أمام المرآه ..ثم دق جرس الباب .
ذهبت كرستين وفتحت الباب