جانت عندي شغلة بس هي مو خوفه .. هي حذر من الصداقات .. يعني عندي صديق او صديقين بس … بوقت المتوسطة و بالاعدادية زاد العدد صارو خمسة … هالخمسة مكتفي بيهم … اكو طلاب ويانه جانو كلش يكرهوني .. و السبب اني شوية ما انحب و اعترف بهل الشي .. لان حدي كلش .. و الانسان الحدي يصير ممقبول من الكل .. يعني شقى ما احب شقى بكلمات محلوة .. و اكو شباب بذاك الوكت ميعرفون يتشاقون اذا ميغلطون .. ولان اني اتعارك رأسا و ما اقبل احد يسوي وياي ميانه جنت مرفوض قلبا و قالبا .. و هالشي خلاني اصير حذر بعلاقاتي .. علمود هالشي كل اصدقائي تقريبا نفس نوعيتي .. و جانو حتى مطلعين علينا لقب (شلة الغربان) يعني يوصفونه بالغربان .. و هالشي مجان يضوجنه بالعكس نضحك عالتسمية هاي .. بس بليلة و ضحاها صرت اكثر واحد محبوب بين الكل .. و الكل كام يجي يمي و ميتشاقى وياي .. طبعا اذا اكول ليش هيج انكلبو الشباب وياي بالتعامل محد يصدكني .. بس الحقيقة هي .. ابوية باع بيتنا و اخذ بيت بنفس المنطقة بس البيت موقعه وين .. مقابيل اعدادية مال بنات … و طبعا الي جانو يجون يمي يوكفون يعرفون حتى لو جتي الشرطة متحاسبهم عالوكفة ليش ؟؟
لان اذا سالوهم شعدكم هنا .. راح يكولوهم يم صاحبنا هذا و صاحبنه هذا بيتهم هنا … و طبعا هالحجي صحيح و مكاعد يجذبون .. اني بالبداية عبرت عليا السالفة لان (فطير) .. بس بعدين افتهمت الفلم .. لان حبهم الي موسمي مثل محصول البطيخ و الركي .. بوقت دوام المدرسة محبوب اني و يجوني قبل نهاية الدوام بساعة .. و بس تجي العطلة ما اشوف منهم ولا واحد .. و طبعا كطعت علاقتي بيهم نهائيا .. بس بقت شغلة براسي .. صح اني ما انطاق بالنسبة للشباب لان حدي و ما احب الشقى .. بس يجوز البنات يحبون هيج شاب .. زين ليش الشباب هيج كاتلين نفسهم عالوكفه يمنا (قبل ما اعوفهم يعني و اكطع علاقتي بيهم) .. هيج الحب حلو ؟؟؟
اني بذاك الوكت مجانت عندي اي تجارب وي الطرف الثاني (البنات) .. بس عادي حالي حال كل الي بعمري عجبني ادخل بعلاقة … و اكيد مرهمت .. لان جسارة ماعندي .. العلاقات وي الطرف الثاني يرادلها واحد جسر .. واحد ميستحي و يبقى يجرب .. و يرادلها واحد من الاخير ميخجل ليش ؟؟
لان الي يحاول يتعرف على بنيه معرض للرزالة دائما .. و طبعا اكو رزالة عامة و اكو رزالة خاصة .. العامة الي هي مقابيل الناس احتمال ترزله البنية او تغلط عليه .. الخاصة هو يكون لاحكها بس بشارع مابي ناس وهم راح يترزل احتمال .. هنا راح تكون الرزالة خاصة .. اني جنت لا اريد عامة ولا خاصة .. و هالتفكير خلاني ابد ما افكر بيوم الحك بنيه لو اصارح بنية .. لدرجة اكو بنية جانت هواي تباوع عليا و تبتسم .. لان جنت مرات اطلع اغسل السيارة مال ابوية برى .. و هي من تطلع من الدوام تبتسم من تشوفني .. جنت اكول بيني و بين نفسي .. يابه يجوز البنيه هاي طبيعتها .. جان عقلي يخوفني من سالفة احاول اصادقها ..
عالعموم .. البنية هاي راحت و انتهت سالفتها .. و اني من خلصت اعدادية دخلت كلية … بالكلية عبالي راح اعيش قصة حب محد معايشها .. و اكتب قصائد و رسائل غرام .. واهدي اغنية و تنهديلي اغنية اسمعها و اتصفن .. بس لا كتبت و لا حتى سمعت و لا تصفنت .. هم ما عرفت اصادق و هم جنت استحي لا اترزل … انوب اكو تفكير اعظم و ارهب من تفكيري بالرزالة العامة و الخاصة .. التفكير الجديد الي سيطر عليا هو اذا انفضح هنا الفضيحة تصير دائمية .. يعني تبقى الفضيحة تلاحقني لحد يوم تخرجي .. من الاخير ما حاولت اصلا .. اشتريت احترامي بين الكل .. و بقيت وحيد مع العلم جنت احب بيني وبين نفسي طالبة .. و جنت اراقبها من بعيد لبعيد .. و حتى مرات اتخيل هي تحبني .. جنت اقنع روحي بشي اصلا مموجود .. و هي ولا ببالها اني اصلا .. و المضحك المبكي .. فد يوم شفتها تمشي وي ولد (انقهرت) وعشت حالة واحد متعرض للخيانه .. و حتى واحد من اصدقائي بيومها سألني شبيك مدلغم (كلتله سد الموضوع رجائا عندي حسبه براسي) ..
و خلصت كلية الحمدلله بلا أي قصة حب تذكر .. و طبعا ورى متخرجت لا توظفت و لا استخدمت شهادتي .. رحت اشتغلت وي ابوية … ابوية عنده محلات ثنين مال صيانة سيارات .. هو ميشتغل بيده .. عنده كادر يشتغلون وهو بس يشرف على ادارة الورشة .. بس هو يفتهم كلش بسوالف السيارات .. السيارات الي جانت تجينا سيارات حديثة .. و الاسعار الي يصلح بيها غالية نار .. اني لزمني ورشة و هو راح بورشة ثانية .. طبعا الشغله مو صعبه لان ادارية .. بس من بديت اشتغل وي ابوية تحسفت على كل ساعة خلصتها بالدراسة لان الشهادة ابد مستفاديت منها .. ابوية مو من النوع الي يلوم احد على اختياره … يعني ما فد يوم كالي او فرض عليا شي .. حتى الكلية الي اختاريتها هو متدخل ابد بأختياري الها .. و ما فد يوم كالي هااا لو جاي وياي هنا من البداية مو احسن الك …
بالعكس جان يفتخر بيا كبال الناس الي يشتغلون وياه و حتى كدام اصدقاءه ومعارفه .. و طبعا الرجال للأمانة جان مخلي فلوس الورشة الثانية كلها تحت تصرفي و ابد ميدقق على الحسابات لان اني ابنه .. و بالمناسبة اني الجبير .. اكبر واحد بأخوتي .. عندي خوات ثنين و عبودي الصغير .. اخر العنكود .. بالورشة صارت عندي علاقات صداقة قوية بيني و بين الشباب الي يشتغلون ويانه .. بيهم واحد من عمري بس الولد ممكمل دراسة .. واصل ثاني متوسط و مبطل .. هالولد جان ذكي .. ذكي لدرجة من الاسطة الي يشتغل ويانه ميعرف يصلح شي بسيارة يصيحه .. و الولد بس يشوف السيارة يعرف شبيها و يعرف العطل وين … مو بس هيج .. لسانه حلو و الناس تحبه من اول مرة تحجي وياه .. وهو اول واحد بحياتي تصير بيني و بينه ميانه قوية .. جنت اكله انته متعدد المواهب .. يضحك يكلي اي اي استاذ فيصل .. منو استاذ فيصل ؟؟
مدرس اللغة العربية مالته بصف الثاني متوسط .. الولد اسمه أكرم .. هالولد فتح عيوني على هواي سوالف .. كمت كل جمعة نطلع اني وياه نروح مكانات مال هدوم لو نروح مطعم لو نروح لباب الشرجي .. نفتر .. بس شفت بي شغلة غريبة .. هو يعرف وضعي المادي زين .. و هو اصلا يشتغل يمنا .. بس من نطلع اني وياه ميقبل ابد ادفع فلوس الاكل مثلا .. مع العلم هو الولد وضعهم المادي مو تمام .. بس ميقبل ابد .. هالشي حببني بي اكثر و بصراحة احجيها و بدون خجل او مكابره .. جنت اتمنى اصير مثله .. مفتح بالدنيا .. يعني مرات جنت اكعد وياه ساعتين لو ٣ .. بس استمع منه للسوالف .. و كل مرة اكله احجيلي احجيلي .. تعلمت منه هواي شغلات .. و كمت مرات حتى بسوالفه اقلده .. حتى سالفة تصليح السيارات كمت اخذ خبرته .. علمني على شغلات كومة .. مع العلم مجان يقبل يعلم اي واحد .. بس لان حبني كلش كام يعلمني كلشي .. صار مثل اخويه والله … و بيوم من الايام رحت وياه لبيتهم … طبعا هاي جانت اول مرة الي اروح ازوره لبيتهم … لان كل مرة نلتقي بيوم الجمعه يم الورشة مالتنا لان بنص بغداد .. و مناك نطلع .. بس هالمرة هو عزمني على غده من طبخ امه .. لان دائما يسولف بطبخ امه .. رحت .. طبعا همه ناس على كد الحال .. اخوه الصغير عنده فيشه برى يم حايط بيتهم مخليها يلعبون بيها الجهال و ينطوه فلوس على كل (كيم) .. و اخوته الباقين الي اكبر منه كلهم يشتغلون .. و ابوه متوفي .. امه ورده .. طيبه كلش .. و خوات ماعنده يعني بس اخوه عنده .. الي عجبني بهل العائلة .. الولد رغم ما همه رياجيل و من اكول رياجيل احجيها بترس حلكي .. زلم عليهم الاعتماد .. بس يساعدون امهم حتى بالكنس و غسل الهدوم و حتى غسل المواعين همه يغسلوها .. مع العلم امهم الله ينطيها الصحه قوية و بحيلها .. حتى الطبخ يعرفون يطبخون .. طبعا بيومها امهم سوتلنه برياني و دولمه .. يابه ولا ينشبع من اكلها .. و عرفني طبعا على شباب المنطقة .. حسيت بيومها من صدك صار عندي اصدقاء .. مو بس اصدقاء اخوه هم .. و من ذاك اليوم زادت علاقتي بهل الولد ..
الحاصل .. اني ادخن .. مرة رحت يم بيت اكرم كالعادة .. و جنت مخلص جكاير .. كلتله خلي نشتري جكاير و شوية نتمشى .. وكفت يم محل اشتري جكاير و طبعا المحل صغير مطلعي من بيت .. ام المحل مرية جبيرة و بنتها جانت كاعدة يمها .. البنية من شفتها يا سبحان الله فاتت بكلبي رأسا .. البنية لا حلوة لدرجة الكمال .. ولا بيها مواصفات تسحر المقابيل .. بس من الله عبالك انزرعت بيا .. و رأسا سألت اكرم بس شفت جوابه جان ناشف وياي .. حتى بيومها كلتله اخاف عندك شي وياها كالي بابا اشو انته تخربط وهاي جانت اول مرة يحجي وياي بيها بهل اللهجة من يوم عرفته لليوم .. كلتله شبيك .. كال عيب عمي هذولة جوارينه .. من كالي هيج استحيت بصراحة .. و حسيت بي مثل الزعل .. عاد بوسته كلتله يابه هسه قابل شكلت .. كالي لك بابا هاي امها ماكو واحد بالمنطقة ميحلف براسها .. ربت اربع يتامى و ما مدت ايدها بيوم للناس .. رجلها توفى و بقو ٣ بنات و ولد بركبتها .. ابنها مع الاسف مو زين و عركة تجيبه و عركة تودي .. بس شنسوي محسوب علينا .. و كلنه نمشيله لخاطر امه .. و خواته قمه بالادب و الشرف .. و كلش محترمات و كلهن دارسات .. هاي الي شفتها طالبة كلية بس ماعرف ياكلية .. و تساعد امها بالمحل دائما لان امها جبيرة .. كلتله زين مخطوبات .. جان يضحك كالي انته شبيك .. كلتله والله داحجي صدك .. كالي الجبيرة اي .. بس الباقيات الاثنين لا .. كلتله زين اذا اكلك اريد بعد تفاصيل عنها لهاي الكاعدة وي امها حتى اتقدملها تساعدني .. كالي والله اذا نيتك هيج تدلل و ياريت افرحلك انته اخوية .. و صدك والله جابلي تفاصيل عنها و حجيت لأبوية و أبوية ما جان عنده اي اعتراض .. و تقدمت للبنيه و طبعا شرطت البنية تكمل دراستها حتى لو نتزوج .. واكيد اني مجان عندي أي مانع .. و تزوجتها لان الحمدلله مناقصني شي .. من تزوجتها شفت عدها اصرار عجيب ان تكمل دراستها حتى تتوظف .. و اكيد من صرنا جوى سكف واحد حجتلي ليش تريد هالشي .. تكول اني اريد ارد ولو جزء صغير من الي سوته النا امي .. و اني هسه بعصمتك و ممحتاجة شي صح .. بس امي لاخر نفس بيا لازم ابقى اساعدها لان ماعدها غيرنا احنا البنات … اخوية امي غاسلة ايدها منه واحنا هم غاسلات ايدنه منه ..
طبعا احترمت وجهة نظرها و كمت اني اساعد امها لان بصراحة ما قبلت تتوظف بس قبلت تحصل شهادتها و تكعد بالبيت .. اخوها حاولت اشغله وياي و قبل بس باول اسبوعين صارت عركة جبيرة و بطل .. يابه الولد ابو مشاكل .. ميعرف يحجي و رأسا يتعارك .. و ميحترم ابد .. بس البنات و امهم مسكينات .. ميكدروله ..
عالعموم .. اني هالحجي كله قديم .. وحاليا اني عندي ٣ اطفال من زوجتي و علاقتي ما زالت مستمرة بأكرم .. وهو هم تزوج و هسه هو لازم الورشة الثانية لان ابوية اسم الله عالسامعين صار عنده كومة امراض و ميكدر يروح للشغل ابد و خطية بس كاعد بالبيت و طلعاته اكثرها وياي لو نروح للدكتور لو نروح لبيت عمتي لان يحب عمتي هو و دائما يحب اودي يكعد يمها من الصبح لحد ما اعزل ارجع اخذه وياي .. قبل يومين جنا كاعدين اني واكرم دنسولف عالقسمة و النصيب .. كلتله اكثر شي جنت ما اصدك بي هي سالفة القسمة تجيك صدفه لو تجيك على غفله .. كالي شلون يعني .. كلتله اني هسه ابسط مثل .. كل اصدقائي تقريبا عدهم صديقات جانو .. و جانو يجون براسي يصادقون لان كبالنه اعدادية مال بنات .. واني هههههه كلشي ممحصل من هالاعدادية غير بس اصرف نظر .. و دخلت كلية و هم تقريبا كل الي اعرفهم حبو بهل الكلية و حتى بيهم تزوجو .. واني فتت ابيض و طلعت ابيض .. و صدفه جكارة جابتلي قسمة .. ضحك هو كالي صدك انته بيومها خلصت جكاير و شفت ام علي صدفه (طبعا علي ابني الجبير) … كلتله اي تذكر هههههه ضحك .. كالي بس لاتنسى لو مو اني اجيبلك معلومات جان هسه بعدك ابيض .. كلتله اي والله خلف الله عليك ما قصرت … صدك والله .. الدنيا غريبة هاي .. يعني لو لو .. بيومها عندي جكاير و باكيتي متروس جان مشفتها لزوجتي (الله يخليها اليا) .. و جان متزوجتها .. بس للأمانة اكثر شي حببني بسالفة زواجي بيها .. هو حجي اكرم عن عائلتها الاصيلة .. هاي الدنيا .. جكارة خلتني اتزوج و فوكاها يكولون التدخين يضر بالصحة ..
(شلة الغربان)
انتهى
اخوكم ابو بغداد سايق التكسي
#ابوـبغداد
