قصص ابو بغداد

ليش

موظف بدائرة .. محترم و اقدر الناس و انطيها اكثر من حقها و زيادة بالاحترام … ما اذيت بشر بحياتي … اهلي يحبوني و ممقصر وياهم .. معارفي كلهم يقدروني و يحترموني و هم ممقصر وياهم و احاول بكل الطرق ارضي كل الناس … ما احب اسمع احد يكرهني .. ابتعد عن النقاشات العقيمه حتى ما انطي وجهة نظر تأثر سلبا على علاقتي بأي انسان … اروح لدوامي و ارجع اكابل مواقع الانترنت لو اباوع اخبار لو شوية العب العاب بالتلفون و الف راسي و انام حتى اتهيئ ليوم جديد … كونت نفسي بسبب الوظيفة .. و حضرت روحي حالي حال أي انسان للزواج .. و بديت ادور على شريكة حياة من ضمن المعارف او الاقارب .. امي لكتلي وحدة من كرايبها و هلكد ما مدحت بالبنيه حسيت هالبنية ملاك نازل من السماء … و توكلت على الله و تقدمت للبنيه .. اهلها رأسا وافقو و بشروط طبعا مال مقدم و مأخر و هالسوالف و كلها وافقت عليها لان احمدالله عندي الاشياء الي انطلبت مني .. و تزوجت .. زواجي مشى اول اشهر حلو و اي مشاكل ماكو .. البنيه مثل مكالت امي خوش بنيه و اي مشاكل ماكو .. بس هالبنيه حالها حال كل الي من عمرها يعجبها تفوت عالانترنت وعدها تلفون خاص بيها .. على الرغم من اني زوجها بس ابد مفكرت اشك بيها تحجي وي غيري و ابد مكلت تسوي شي غلط بهل الجهاز .. و طبعا مر على زواجي ٣ سنوات وعندي طفل منها … و صار حمل بالطفل الثاني و هم جابتلي بنوته حلوه .. صار عندي جهال ثنين و لهنا كل شي حلو و اني مرتاح بحياتي الزوجيه .. و بيوم من الايام صار عدها مرض و ماكو داعي لذكر نوعية و اسم المرض .. و هالمرض تطلب تدخل جراحي .. رحنا و اخذنا موعد وي الدكتور و طبعا العملية سويناها بمستشفى معروفة و من خوفي عليها اخذت اجازه شهر حتى اتفرغ لرعايتها .. هي بيوم العملية طلبت خواتها يبقون وياها .. و اني كلتلها هم ابقى لان احبج و قبل العملية ابوس بيدها و خايف عليها وكلبي ماكله النار عليها .. ولو العملية سهله بس خفت لان بنج عام .. دخلت للعملية و طبعا جهالي بقو يم أمي .. و كملت العملية و نجحت الحمدلله .. بس طلعوها رحت يمها و جان البنج عليها .. بدت تهذري و تحجي حجي ممفهوم و من ضمن الحجي ذكرت اسم رجال ماعرفه اني و بقت تحجي عليه و طبعا خواتها انكلب شكلهم و كامو يحجون بصوت عالي حتى ما اسمع الحجي اني .. يعني (يريدون يغطون عالكلام مال اختهم الي اصلا سمعته كله وجنت مركز بي) والله والله والله .. والله وداعة امي وابوية و داعة جهالي .. على الرغم من اني سمعت الكلام بس اعتبرته مجرد خرط مال واحد صاحي من البنج … بس الي خلاني اشك هو طريقة تعامل خواتها وي الموقف .. و كامت بخير و سلامة و رجعتها للبيت و محجيت ولا كلمة بخصوص الموضوع ..
و طبعا وراها بيومين هي الي فتحت الموضوع … لان خواتها كالولها انتي هيجي حجيتي و جبتي طاري اسم ولد .. كالتلي اريد احجي وياك بهل الخصوص .. كلتلها ماشي و سمعت منها .. كالتلي قبل منتزوج جنت احب واحد و مصارت قسمتي وياه و انتهى كل شي .. كلتلها ليوين وصلت علاقتج بي .. كالت بس تلفون والله و تعرفت عليه عن طريق الانترنت .. بس اني مراح اجذب عليك جان عندي مشاعر تجاهه و للاسف طلع جذاب وابو نسوان و يدور علاقات .. كلتلها زين .. كالت اني لو داخله وياك بعلاقة جان حجيتلك كل شي بس تعرف زواجنه زواج تقليدي و كبل امك تقدمت على امي و تزوجنه و حتى لا طلعنه و لا طبينه كل شي صار بسرعه .. لذلك اني محجيت و اصلا هو شي منتهي .. كلتلها ماشي و هي حلفت بداعة جهالنه هالشي منتهي .. اني هم على حجيها صدكت و كلت يجوز هالشي صح و خلص المرية صارت زوجتي وام جهالي و هالشي ماضي ولو مصايرة سالفة البنج جان اصلا مسمعت هالاسم ولا هالكلام .. و كلت خلي امشي بحياتي و نسيت هالشي .. و تناسيت هالموضوع .. بس حتى اكون صادق كدام الناس بقى شك بسيط بداخلي و الشك سببه طلبها قبل العملية (ليش طلبت خواتها يروحون وياها واني جلبت الا اروح) هالشي جان زارعلي شك بسيط بداخلي .. و قررت افتش تلفونها .. مع العلم بالله العظيم و داعة جهالي مو من هالنوع اني .. و طلبت اشوف تلفونها بحجة اريد اشتريلها جهاز حديث .. فتحت البرامج و الصور ما لكيت كل شي .. محادثات بينها و بين خواتها .. و فتت عالمحادثات كلها طبيعيه و الصور كلها طبيعيه .. ارتاحيت كلش .. و اخذتلها جهاز جديد صدك و طلعت هالشك من داخلي .. و بيوم من الايام اني بالغرفة نايم وهي جوى دتنظف .. ابني جان نايم يمي و كعد يلعب بالغرفة .. جنت اسمعه ديلعب بالغراض بس اتعاجز اكومله و اتعاجزت اصيحها .. كلت هسه قابل شراح يسوي و هو كله هالكبره .. خلي يلعب .. بعدين سمعت طبه قوية و كام يبجي ابني .. هنا بعد ما اكدر ابقى نايم و كمت شفته موكع التعلاكه مال هدوم بالكاع و ضاربته برجله ..سكته و كمت ارجع التعلاكه جان اشوف يم التعلاكه بظهرها بالضبط ورى الكنتور صفح سويج مال كهرباء ملغي .. و طبعا احنا  لازكين عليه شغله تضم الوايرات مال كهرباء حتى لحد ينتل  .. لزكه بلاستك .. بس جانت شويه مفتوحه … كلت خلي اسدها زين .. جريت الكنتور و لزمتها داعدلها جان تنجر بيدي .. من انجرت وكعو سم كارتات ثنين .. رأسا حسيت اكو شي مو طبيعي … رجعتها بسرعه لمكانها و شكلت واحد من السم كارتات بالتلفون .. بي رقم و اسم واحد .. اسم نفس الولد الي ذكرته بالمستشفى .. اتصلت جان يرد عليا و اول كلمه كالها ها حبيبتي … لان الرقم طلع يمه مالتها .. هنا اني الدنيا وكفت عندي .. سديت التلفون بوجهه و هو كام يتصل جان اصيحها ..فاتت للغرفة و طلعت ابني برى الغرفة و سديت الباب وراه … دك دك الرقم جان اجاوب و افتح سبيكر و لزمتها من ايدها و كلتلها كولي الو .. هي كالت الو و هو بقى يحجي الو حبيبتي شبيج وينج يمعودة ..
جان اسد الخط و كعدتها كبالي .. كلتلها شوفي و طبعا اني مبتسم احجي وياها ..
كلتلها شوفي .. هسه اني بس راح اسألج سوال واحد و جاوبيني .. اول شي تعرفين اني شكدر اسوي هسه .. اكدر كل شي اسوي شكو شي يخطر على بالج اكدر اسوي بس مراح اسوي شي غير بس ننفصل و انتي تروحين بدربج واني بدربي .. بس قبل كل شي سوال اسألج .. ليش و اني شقصرت وياج .. مجاوبتني و بس تبجي .. بقت تبجي .. اني مرحت فضحت نفسي كبال اهلي و كبال اهلها و كبال الناس .. و حتى هسه الي يقرون القصة ميعرفون اني منو ولا هي منو .. لان يوميا الاااااف الحالات تصير و راح تصير .. كومة ناس تنفصل .. بس الي اريد اعرفه ليش .. و الله ماقصرت وياها بشي .. رادت سفرة لتركيا وديتها .. رادت تسوي عمليات تجميل كلت ماشي .. لبنان وديتها … ذهب اني اجيبلها قبل متطلب والله العظيم .. ميفوت شهر اذا ممطلعها مطعم هي والجهال اقل شي اقل شي اربع مرات … ملابس ابو التوصيل اقل شي بالاسبوع يوصل شغلتين ٣ من عده الي تشتريهم من نطلع اني وياها … كل هالشي حقها و من ضمن اطار شي اسمه اني رجال ولازم اصرف و اداري زوجتي .. و مدام الله موفقني ليش ما اداريها .. زين بالمقابل اني شنو اريد غير بس تصوني و تربي هالجهال على كل خير .. هسه حلوه  من انفصلنا و جهالي فترة يمي و فترة يمها … و طبعا المصيبة الكبرى محد يعرف سبب انفصالي من اهلي … لان ماريد اطلع امي غلطانة باختيارها .. لان اذا كلت السبب الكرايب و المعارف كلهم راح يكولون امك صوجها هي جابتها الك و شي ثاني هي ام جهالي و ماريد باجر عكبه جهالي من يكبرون يعرفون امهم خاينه .. مجرد كلمة خاينه هي جبيره بحق جهالي .. لذلك بلعت المر و سكتت و احتفظت بهل الشي لوحدي .. و شكد سالوني و راح يسألون راح اجاوبهم مصار توافق بيناتنا .. و حتى القصة هاي متعتبر تشهير لان محد يعرفني اصلا … و لا يعرفها .. ولا اهلي يعرفون هالتفاصيل .. و هسه هي ببيت اهلها و جهالي يمها .. و منتظر يوصلون لعمر معين و اخيرهم بيني و بين امهم .. اني خوفي من شي واحد .. خوفي من المستقبل … اذا جهالي كبرو و جوي يحاسبوني ليش طلقت امنا .. شراح اجاوبهم .. راح اجذب مثل مجذبت على الكل و محجيت الحقيقة .. و راح ابقى بنظرهم ذاك الاب الي خرب العائلة بسبب طلاقه .. و يجوز راح يكرهوني .. لو اكلهم امكم هيج سوت و اخليهم يفقدون الثقه بكل شي .. بس هالشي مخوفني والله و زارعلي رعب بحياتي … خايف كلش من اللقاء المستقبلي بيني و بين جهالي .. لان ميه بالميه راح يسألوني .. عالعموم .. اتمنى محد ميوكع بنفس الموقف الي اني وكعت بي … لان كلها بجفه و هالتفكير بجفه ..
(ليش)
انتهى
اخوكم ابو بغداد سايق التكسي
#ابوـبغداد