قصص ابو بغداد

ابو الأقساط

عدنا محل صغير بالسوق الشعبي .. المحل بي شغلات هواي … من غير الملابس .. يعني نبيع تراكسودات نبيع كهربائيات بس صغار يعني مو ثلاجات لو مجمدات .. بس نبيع مسجل مثلا .. فديو سيدي .. بذاك الوكت جنا نجيب غراض عالتوصية .. يعني الي يوصينا نجيبله شي كهربائي (اقساط) نروح نجيبله الشغلة و ننطيهياه و نخلي فوكاها ربح يعني و نقسطها .. بصراحة حتى مرات جنا نجيب ثلاجات لو مجمدات بس منجيبهم للمحل .. نجيبهم مباشرة للي طالب من عدنا الشغلة .. اكثر معاميلنه جانو نساء .. المتزوجة جديد .. الجبيرة بالعمر و مزوجة ابنها لو بنتها .. وهيج ماشية الامور .. اهم شي بشغلتنا هي السمعة .. لان بدون سمعة ولا وحدة تجينا .. المحل جنا اني واخوية بي .. السوك جان بي هواي نسوان يفوتون و يطلعون .. يعني هو بعد سوك … مرات تصير بي مشاكل بسبب الشباب الصغار الي يصجمون بنات وهالسوالف .. بس مرة مرتين اترزلو و حتى بيهم الي انضربو و بطلو هالسوالف .. صارت بيهم خوفة ولان منطقتنا شعبية و الخبر يتنقل من واحد لواحد .. السوك الشباب الصغار مكامو يفوتوله لان سمعو اكو احد انضرب لو اكو احد ترزل …
عالعموم .. اني بذاك الوكت جان عمري ٢٩ سنة .. خريج و ممتعين و شغلي وي اخوية … اخوية الله وفقه و طلع بمحل ثاني و اني بقيت بهل المحل … اخوية متزوج .. اني جنت بحياتي مار بعلاقة حب وحدة بالكلية بس متوفقت بيها و افترقنا ..سبب نهاية علاقتنا مو مهم لان اصلا لا اني مهم للبنية حاليا ولا هي مهمة اليا .. يعني لا احبها اني حاليا ولا حتى اكرهها .. وهي بالمقابيل هم لاتحبني حاليا ولا تكرهني .. لذلك السبب مو مهم اصلا .. بس رباط السالفة انو اني جنت مار بعلاقة وحيدة بحياتي بذاك الوكت … و كم سنة بقيت بدون حب ولا علاقة .. اكو بنية جانت تجي وي مرية جبيرة … هالبنية كلش حلوة و ناسكة .. عيني جانت عليها بكل مرة تجي .. طبعا همه مياخذون اقساط من عدنا يعني يجون للسوك يشترون و يروحون .. ومرات يجون يمنا ياخذون شغلات .. احنا حتى شامبوات جنا نجيب و نجيب هم معطرات و مكياج .. المحل بي هواي سوالف .. البنية ردتها من صدك .. جنت كلش معجب بيها .. فد يوم جتي هي وبنية ثانية … اني شفتهم من بعيد و عرفت راح يجون لمحلي .. لان همه كل ميجون يجون للمحل … وجوي والله .. كلبو و البنية اشترت شغلات ..و بقى للبنية فلوس (باقي يعني) .. اني انطيتهم ظهري للبنات ثنينهم و كتبت رقمي واسمي عالباقي  .. بدون ميحسون ثنينهم .. و رجعت الباقي للبنية و اشرتلها عالفلوس بعيوني بدون صاحبتها متحس .. البنية اخذت الفلوس وراحت … و انتظرت نفس اليوم التلفون يدك بس للاسف مادك .. ثاني يوم هم مادك .. ثالث يوم هم مادك .. اني كلت هاي متريدني .. و نسيت الموضوع .. ورى اسبوعين اجاني اتصال منها .. طبعا اخوية الصغير رد و هي سألت فلان موجود .. اخوية صاحني و عرفتها رأسا .. كلتلها ليش مخابرتي صار اسبوعين انتظر تلفونج .. كالت مو انته متدري اهلي شلون يراقبون التلفون .. اني هسه بالكوه داخابرك بس اذا تكدر انتظرني ورى ١٢ … كلتلها انتظرج .. و بقيت انتظرها لورى ١٢ .. طبعا هالحجي قبل مينزل الكاشف و رقم التلفون يظهر … حتى حاولت اخذ الرقم مقبلت كالت والله يذبحوني اهلي … و خابرتني ورى ١٢ … بيومها بقينا نسولف للخمسة الصبح .. كلتلها اني صار فترة معجب بيج و هي كله اي و اي و من جنتي تجين انتي والحجية تتسوكون مني … عيوني عليج بس انتي متباعين عليا …  هي جانت اكثر اجوبتها اي اي … كالت والله اني ماعرف احجي وي ولد ومداعرف شلون هسه داحجي وياك .. كلتلها بنتي اني اريد اتزوج والله و مال سوالف مكسرة .. بس اريد اعرفج اكثر .. كالت زين انت احجيلي كلشي عن نفسك واني وراها احجيلك … كلتلها زين ..
و طبعا هذا اول يوم بدينا نحجي بي … حجيتلها كلشي .. حجيتلها عالكلية و حتى على علاقتي الوحيدة و شلون بديت وي اخوية بالمحل بالسوك و بعدين صار المحل اليا و حجيتلها على وفاة ابوية و شلون اني واخوية شلنا المسوولية .. حجيتلها عالتعيين الي راح اتعين بي بالجديد و شلون مقرر اجيب ولد كرايبي يلزم المحل الصبح … و هي جانت تسمع مني وتكول اي .. حجيتلها شلون جنا بالبداية بمنطقة و بعدين انتقلنا لهل المنطقة .. و كلتلها انتي احجيلي .. كالت باجر لان الوكت تاخر .. بس قبل ما اروح اطلب منك طلب .. كلتلها شنو ؟؟
كالت ترى امي كلش ذكية اخاف نجي للمحل نشتري منك ابد لاتباوع عليا ولا تحسسها انته حاجي وياي عفية الله يخليك ترى اني اخاف كلش انته متعرف اهلي شنو .. كلتلها صار وانتي هم سوي نفسج متعرفيني .. كالت اي الله يخليك ترى اني جبانة .. كلتلها زين باجر تجون للسوك ؟؟
كالت والله ماعرف لان امي على غفلة تكول امشي للسوك يعني ابد ماكدر انطيك موعد .. كلتلها بس بيوم الي جيتي وانطيتج الرقم امج مجانت وياج جان صديقتج مادري اختج … كالت لاااا امي موجودة جانت بس واكفة يم غير محل .. كلتلها اهااا .. كالت اي ابد متخليني اطلع وحدي .. كلتلها زين .. وصدك والله ثاني يوم جتي هي وامها وهي ولا باوعت عليا ولا اني باوعت عليها … و ورى ثنعش هم رجعت اتصلت بيا … كلتلها تخبلين اليوم … كالت اي و ضحكت … كلتلها شفتي شلون اني ملتزم بتعليماتج .. كالت اي الله يخليك هيج اريدك لا اعرفك ولا تعرفني من تشوفني فدوه لعمرك … كلتلها زين .. و بقت تسولفلي عن وضعها … تكول اني اخوتي مبطليني من المدرسة .. و اربع وعشرين ساعة بالبيت ..و هاي مرات من امي تطلع للسوك تاخذني … ماعندي علاقات وي بنات هواي .. جوارينا البنات مرات يجون يمي .. و حياتي بسيطة … و حبيتها للبنية يوم ورى يوم وهي حبتني .. كمنا يوميا موعدنا ورى ١٢ بليل نحجي .. و مرات من جانت متكدر تحجي تخابر بسرعة تكلي ترى ماكدر اليوم احجي .. و جنت مثل ما هي تريد اسوي بالضبط يعني من اشوفها بالسوك ولا عبالك اعرفها … وهي هم ولا عبالك تعرفني …. بقينا نحجي فترة طويلة و بديت احجي لاخوية الجبير و لامي عالموضوع و كلتلهم داحب .. و طبعا توظفت بس الوظيفة رمزية .. و شغلت اقربائي بالمحل وياي … و جنت من وراها اروح نعسان للدوام بس تعلمت ههههه .. لان احلى شي بحياتي هي … و يوم ورى يوم بديت افكر بالزواج و طبعا اني جانت عندي الامكانية للزواج … بديت احجيلها عالارتباط وهي تتجاوب وياي بس مرات احسها تتهرب … لحد ما فد يوم حصرتها بالحجي كلتلها اكلج اني اريد ارتب اجيب اهلي ونجيكم … كالت اكو سر ماعرف شكلك والله و خايفة كلش … كلتلها شنو السر .. كالت ماريد تعوفني الله يخليك … سكتت اني و الف حسبة جتي براسي … ماعرف شحجي بس جنت اردد كلمة وحدة شكو احجي ماعوفج والله … كالت اني عندي صديقات و بيهم المخطوبات و بيهم الي عدهم اصدقاء و بيهم الي مرات اطلع وياهم بالسوك لو بأي مكان ثاني جانو الشباب ينطوهم ارقام و اني لأن محلوة مجان احد يباوع عليا ابد … جنت اتمنى اصادق واحب وانحب .. كلتلها بس انتي حلووووه شدتحجي جان تعيط اسكت خلي اكمل و كامت تبجي بصوت عالي …..
سكتت اني وخليتها تكمل ….. كالت انت اول ولد بحياتي والله … لا اعرف قبلك واني ادري مراح اعرف بعدك .. لان اني شكلي محلو .. اني حبيتك بس اعرف راح تعوفني لان راح احجيلك الصدك … اني ابوية فد يوم رجع من السوك .. واني جنت اريد ادز اخوية الصغير يجيب روبة للعشا .. ابوية جان بالحمام و قبل ميفوت كلتله انطيني فلوس اريد ادز حمودي يجيب روبه .. كالي اخذي مني جيب القميص بالغرفة معلك .. وهاي مو اول مرة جانت اخذ فلوس من جيب ابوية يعني عادي دائما يكلي اخذي من جيبي لو طلعي من البنطرون .. رحت اخذ فلوس و شفت من بين الفلوس وحدة مكتوب عليها رقم تلفونك و اسمك .. اخذتها و خليتها جوى مخدتي بالغرفة … و انطيت فلوس لحمودي راح جاب روبة .. و بليل طلعت الفلوس و خابرتك و مجنت اعرف ويامن داحجي اصلا … و انت حجيت كلشي عن نفسك و افتهمت انته منطي الفلوس لبنية لان انته جنت تشرح كلشي بدون ما اسألك و اني بس اكلك اي اي … و خفت لا تعرف انو اني مو نفس البنية لان حبيت اعيش هالمشاعر وياك و حبيت طريقة كلامك عن نفسك و شلون انته رجال طيب .. كلتلك اذا تشوفني كأنك متعرفني لان خفت لاتحس من تشوف البنية متباوع عليك .. لان اصلا هي ممهتمه بيك و متعرف يمكن اصلا انته كاتبلها رقمك واسمك عالفلوس و الدليل ابوية من متسوك مرجعيله الباقي ومن ضمن الفلوس جانت فلوسك .. يعني هي صارفتها بدون متتنبه اصلا و بنفس السوك اصلا و يجوز بنفس اليوم  …
اني طبعا ورى هالحجي انصدمت .. لان صدك البنية مجانت تباوع عليا و حتى لو تباوع اني جنت مااباوع لان هي معلمتني هالشي بحجة تخاف من امها … كلتلها وانتي شسمج لعد يعني كل هالشي جذببببب .. كالت اسمي حقيقي الي كلتلك عليه و كلشي حقيقي بأستثناء سالفة اخوان هواي ….
اني عندي اخت وحدة و متزوجة و اخ صغير بس .. وامي متوفية و والدي عايش و يشتغل سايق كوستر … و بيتنا بنفس المنطقة و بالمناسبة اني جنت اجي اشوفك بالمحل دائما و اكثر من مرة مشترية منك بس انته ولا تباوع عليا … مو بس انته اي واحد ميباوع عليا لان شكلي محلووووووو .. و اني اعرف هسه راح تسد التلفون وتعوفني بس اريد اكلك شي اني احبك .. والله احبك و روح امي احبك و داعة ابوية احبك … كلتلها دقيقة اني اريد اشوفج … كالت والله مراح تحب شكلي والله .. كلتلها بابا اني كل هالفترة احبج و اني اصلا احبج اني رايدج .. كالت اخاف والله اخاف اجي وتشوفني وهم تعوفني خلي ننهي كلشي من هسة الله يخليك لاتكسر كلبي لان هو اصلا هسة مكسور واني الغلطانة اني الجذابة .. طبعا هالحجي هي تبجي قوي .. كلتلها لا اريد اشوفج .. و ثاني يوم جتي للمحل .. المصيبة اني شفتها حلوة … صح هي سمينة و كصيرة بس ماعرف ليش من شفتها والله العظيم حبيتها اكثر من البنية الحقيقية الي انطيتها رقمي … حسيتها صادقة وياي كلش .. و بقيت بعلاقة وياها واخذت امي و خطبتها و طبعا امي مجانت مقتنعة للأمانة .. بس اخوية كالها هاي حياته و هاي حبيبته ولاتدخلين نفسج .. و طبعا البنية كلبها ابيض كلش و كلش فقيرة .. و ابد مهتميت للشكل .. ابد مفكرت .. و بصراحة اني شكلها بالنسبة اليا كلش حلو .. معليا بالناس شلون تشوفها اصلا .. و بالمناسبة اني محجيت لاهلي انو خطيبتي مو نفسها البنية الي حجيتلهم عنها قبل .. لان همه يدرون اني جنت احبها بس مكلتلهم هاي مو نفسها … و الحمدلله على كصتها توفقت بهواي امور و تزوجتها ورى فترة من الخطوبة و راحت سنين و جتي سنين و هسه عندي اربع اطفال هههههه .. بس حبيبتي وام اطفالي تغيرت سوت عملية لسالفة السمنه و ضعفت بس والله والله والله اني مطلبت منها هالشي … بس هي سوته علمود الصحة .. اني جنت و ما زلت و للموت راح اشوفها احلى بشر .. لان ببساطة تحبني بكل ما تملك من احساس .. ولو تعرف هسه تنطيني روحها والله تنطيني بدون تردد .. حبيبتي ..
(ابو الاقساط)
انتهى
اخوكم ابو بغداد سايق التكسي
#ابوـبغداد