جنت فترة اشتغل عماله و حالي حال اغلب الشباب العراقيين بفترة التسعينات .. لأن شغله على كد الايد و يرادلها بس جهد عضلي .. و شغله تقريبا دائما متوفرة في حالة انقطع شغلك الاصلي .. يعني مثلا جنت اشتغل بمعمل مال شعريه و بطلت و بهل الفترة الي مبطل بيها اشتغلت عماله … الشغل جان بالصيف .. طبعا تفكير كل انسان (طبيعي) هو ان يكمل شغله حتى يرجع للبيت يرتاح … يرتاح و يجمع طاقته بهل الراحه حتى يصبح ثاني يوم (مرتاح من الجهد) و يتوكل على الله و يروح يشتغل هم ثاني يوم .. زين .. تخيلو .. ارجع جسمي يجكجكني من بقايا الاسمنت و الرمل الي يدخل غصبا ما عليك و يتغلغل بالهدوم .. على الرغم انو اني غاسل رجليا و ايديناتي .. و وجهي .. و راسي (يعني شعري) بس هم تبقى حبات رمل و اسمنت بين الهدوم .. زين اتحمل عادي لحد ما اوصل للبيت و اسبح .. و بالطريق هم اتحمل بنص الكوستر الجكات مال هالرملات و هالاسمنتات .. و بصراحة هي مو تحمل .. هي سالفة اني اصلا تعبان و بس اريد اوصل للبيت .. و الحاله اذا اريد اوصلها مثل الدك ( تاتو .. وشم) من واحد يدكلك بالبداية المكان الي يدكلك بي (يعني يوشملك) تحس بكل دوسة ابره بي .. بس شوية شوية
المكان يخدر و تصير السالفة عادي .. اني من التعب مكمت احس بهل الحبيبات الرملية و الاسمنتيه ..
المهم ..
اوصل للبيت اشوف اهلي كاعدين بالطرمة و لازمين مهفات .. و طبعا مختارين مكان بي فيي .. كل احلامي تطير لان واضحه السالفة .. الكهرباء مطفيه و اكيد المي مال التانكي يجوي .. يجوي .. المي واصل لدرجة الغليان … لان المي من التانكي راح اسبح بي .. بس من اكو كهرباء .. اسبح بمي الماطور و راح يكون شويه ابرد .. اكعد يمهم و انتظر تجي الكهرباء و تجي الكهرباء و اسبح و سالفة واحد يعرك وهو يسبح هاي سالفة قديمة ترى .. وداعة اهلي و اهلكم اعرك واني اسبح .. و بعدين اذب روحي مقابيل المبردة و اكيد هوى المبردة حار … سالفة النوم تجي مو لأن اني مرتاح بنومتي و بالتنقل على الكاشيات الباردات .. سالفة النوم تجي لان اصلا اني تعبان من الشغل .. زين … هاي السالفة صارت و دتصير و راح يصير .. وعلى مدة اكثر من ٢٠ سنة سالفة الكهرباء ما نحلت مع تغيير اكثر من خمس حكومات … يعني حكومة تروح حكومة تجي .. و الحال هو الحال … لشوكت ؟؟
يعني الانسان يعيش حياة وحدة .. تخيل يا انسان ياصديقي و ياخويه و يا ابن امي وابويه .. اني وياك نعيش مره وحده .. اذا هالحياة نعيشها هيج و مراح اتطرق للسياسه ابد لان اذا احجي بالسياسة هسه اسطرهم واحد واحد من يوم انولدت لليوم .. زين هسه … ناس تكول المشكلة بالبعثية .. ناس تكول المشكلة بالدعوجيه … ناس تكول المشكلة بشكو حزب و شكو سياسي بالعراق من الثمانيات لليوم … و اني وي الناس الاخيرة …زين .. عرفنا سبب المشكلة .. العلاج وين ؟؟؟
شلون اعالج مشكلة صارلها سنين و لحد يكلي الحكومة سوت عقود وي ايران لو وي السعودية لو امريكا لو وي روسيا لو وي الصين (هالخرط سامعه من سنين و ماكو تحسن) .. اريد علاج .. العلاج تعرفون وين .. احجي طك بطك بدون زعل .. العلاج بالعراقي نفسه .. العلاج بيكم و بيا احنا .. كتبو باليوتيوب لو بأي موقع بي فديوات .. كتبو اهازيج استقبال صدام لو المالكي لو اياد علاوي لو سليم الجبوري لو أي سياسي كعد على أي كرسي و انعرف اسمه .. راح تشوفون و تعرفون السبب .. السبب هو صناعة هالسياسين الي جينا و صنعناهم بيدنا هاي .. بالصفكات و بالروح و بالدم و بالهوسات .. شيوخ عشاير تكمز كبالهم .. شيوخ كل شيخ عنده عشيرة جواه يكمز مثل الارنب كبال السياسي و يهوس بعكاله .. هيج صنعناهم .. هيج جبناهم و ركبناهم فوك ظهورنه .. انتو عبالكم هالفيس بوك او اي موقع ثاني من ننشر بي حجي عليهم راح يهتمون .. اصلا همه عايفين هالمواقع حتى الناس تطلع البيها .. تجي الناس تفرغ شحنات الغضب و القهر و التعب هنا و تكتب الي تكتبه .. واقصى شي راح يصير هي تعليقات و اعجابات .. بس هالتعليقات و الاعجابات مو هي العلاج .. ولا الفيس بوك هو العلاج .. العلاج من تربي جيل ميعرف يعبد سياسي و يخلي رب اله .. يعني شوفو ليا درجة وصلت بينا المواصيل .. زمن صدام حسين صارله شكد منتهي و ورقة صدام حسين منتهيه و صار سنين حكمه انتهى .. يجون ناس يحجون بي و يتفاخرون بي و اعمارهم كلها صغيرة .. زين ماشي مراح اختلف وياك .. اني ضد صدام و ضد شكو سياسي من الثمانينات لليوم … بس مراح اختلف وياك وراح اتناقش وياك نقاش حضاري و احترم رأيك حتى لو ضدي .. بس احجيلي حجيك هذا راح يغير واقع .. راح يعدل الغلط .. و بالمناسبة بمرور السنين طلعو ناس مثلك .. يحجون بالمالكي و بأياد علاوي و بعادل عبد المهدي و هم اسألهم .. حجيكم راح يغير شي .. حجيكم و تفاخركم بهل الاسماء راح يجيب حياة كريمة للعراقيين .. يا اخي انته من اسمك عراقي .. ساعدني بالعلاج مو تحجيلي بشغلات مراح تأثر بالواقع .. علقت هسه انته و تعصبت و تعاركت بالتعليقات .. وبعدين شنو الي تغير ؟؟؟
انطيني شي تغير .. و راح تحجيلي باسماء الطوائف و برجال الدين و بعدين .. شراح يفيدني حجيك بالطائفية و شراح يفيدوني رجال الدين بالواقع الي اني عايشه (مره) مره بس حياتي و حياتك مره نعيشها وبس .. شراح يتغير بهل الحياة الي كاتلها الظيم .. و اذا انته وضعك المادي زين و ممتعرض لأذى مادي هم فكر بغيرك الي وضعهم تعبان .. صيرو مره منصفين بحياتكم .. فكرو بالفقير .. فكرو بالناس الي هسه بنص الليل و ميكدرون ينامون من الحر و من الجوع و من الخوف .. حالات انتحار دتصير و حالات قتل كلها بسبب الوضع بالعراق .. تخبلت الناس عمي .. يعني فوك كورونا وفوك الحر و فوك الجوع ماعرف شكول .. هسه على الاقل باشرو بالعلاج مو الكم للاجيال الي راح تنولد .. عالجوهم .. فهمومهم انو السياسي هو بشر و رجل الدين بشر و كل الي يطلعون بالتلفزيون همه بشر مثلنه .. لا تخلوهم يعبدون بشر مثلهم .. السياسي الفاسد و رجل الدين الفاسد يدور على بيئة هشه حتى يصعد على ظهورنا و يمد رجليناته .. اذا ما لكه هالبيئة و لكه كباله ناس واعيه و تعامله على انو هو بشر مراح يكدر يسوي شي .. راح يدير وجه و يرجع لوووووو يمشي مثل ميل الساعة .. كافي قبول كافي رضوخ .. كافي .. يعني حياتنه كلها تلزيك بتلزيك وفوكاها ابسط حقوقنا مسلوبه بسبب الرضوخ و الاستعباد .. اني شراح يفيدني التاريخ .. شراح يفيدني احنا حضارة سومر و احنا اخترعنه الكتابة بكد متفيدني كهرباء بالقرن الواحد و عشرين تدك ٢٤ ساعة على جهالي و تخليهم مرتاحين .. شراح يفيدني كلكامش اذا اكعد اسولف بي و اني لازم مهفه و اهفي لأبني بحضني كاتله العرك .. شراح تخدمني المسله مال حامو رابي و اني مستشفى حكومية ما بيها حظ عندي ؟؟؟
احجولي يلي تتفاخرون برجال السياسة شراح تفيدني تعليقاتكم .. اصلا الفيس بوك كله شراح يفيدني .. عركاتكم و دفاعكم عن صدام والمالكي و علاوي و غيره وغيره من اربابكم شراح تخدم الجهال المطشره بالاشارات المرورية .. شراح يفيدني رجل السياسه و رجل الدين الي كاعد عالبخيخ هسه .. كاعد و التكييف مالته من (الله) ميطفى .. كهربائنه للسياسين و رجال الدين مقدسه .. لا يمسها سوء و يخدشها ضرر .. بس احنا و اهلنا وناسنه بالعراق السوء و الضرر ينام و يكعد ويانه .. و ما اوصيكم عبدوهم .. و عوفو العلاج .. و ما اوصيكم عبدوهم زين .. بالمناسبة قبل يومين كملت مسلسل لتاجر مخدرات اسمه بابلو اسكوبار .. من كولمبيا .. هو قاتل وعنده عصابة و شكو واحد يصير ضده يغتاله .. و صارت عنده شعبية بفلوسه طبعا .. و بفلوسه و بخوف الناس كدر يوصل لمجلس النواب .. قبل ميرشح نفسه كاعد هو ومجموعة من التجار مال مخدرات .. طرح عليهم فكرة انو راح يرشح لمنصب سياسي .. تعرفون شكالوله جماعته تجار المخدرات .. كالوله ديربالك انته راح تدخل وكر الافاعي برجلك .. ههههههه تجار مخدرات (قتله ومجرمين) يكولون على مجلس النواب و الحكومة (وكر الافاعي) .. و هاي هي .. وبقت يمكم بعد .. العلاج بيدكم .. وسهل .. انته بشر همه بشر .. وخلصت ..
انتهى
اخوكم ابو بغداد سايق التكسي
#ابوـبغداد
