الي جنت عازمهم يمي ٣ اصدقاء بس … ٣ اصدقاء همه و عوائلهم .. يعني همه و زوجاتهم .. اصدقائي من ايام المتوسطة … علاقتي بيهم كلش قوية و كل اسراري و اسرارهم يمي .. بمرور السنين الفاتت كل واحد من عدنا وكع بظروف مادية او معنوية او أي ظرف جان .. و الحمدلله تخطينا هالظروف سوى .. مو شرط جانت كلها ماديه لان تلاثتنا ظروفنا المادية زينه .. بس اكو ظروف هواي البشر يوكع بيها خصوصا لو جان مولود ببلد مثل العراق الي يوميا بي سالفة جديدة و وضع جديد ..
عالعموم كلها مشت و صارت سوالف .. بس ورى هالسنين لأول مرة بحياتي احس بروحي خايف .. اول مرة اكول هالكلمة كبال اصدقائي ثنينهم الي عمري كله جبته وياهم اني جنت اقويهم من يوكعون بمصيبه .. و جنت دائما اعلمهم اسلوبي و اخليهم يطبقوه .. هو اسلوب اللا مبالاة .. يعني بالعراقي غلس يمعود قابل شراح يصير .. بس حاليا كل شي تغير و صارت بيا خوفه .. و هالخوفه هي من بنتي الي بدت تكبر .. صار عمرها حاليا ١٤ سنه .. خفت من سمعت امها تكلي صديقة بنتك مصادقة ولد و اهلها عرفو و بسطوها و حتى مدرسة ميخلوها تروح وهي عدها تلفون ثاني حاجت بنتنا من عنده .. اني اعرف تربيتي لهل البنية صح .. و اعرف زوجتي تربيتها لبنتي صح لان مرتي انسانه محترمه و اهلها ناس محترمين فوك التصور …
بس الي مخوفني هو الي جنت مسوي بفترة شبابي و قبل ما اتزوج و حتى ورى متزوجت بالبداية .. هالحجي انفتح بعد ما سألني واحد من اصدقائي الاثنين .. كالي شبيك شكلك مو طبيعي .. كلتلهم رأسا على الي صار و كالو يمعود بنتك فقيره ترى .. كلتلهم هو هاذا الي مخوفني بنتي فقيرة .. كالو شبيك يمعود .. كلتلهم كل الي عرفتهم بحياتي جانو فقيرات و من ورايه طلعت عيونهم .. كالو شنو هالحجي .. كلتلهم تعرفون شنو امنيتي هسه .. كالو شنو ؟
كلتلهم اني اعرف هالامنية مراح تصير بس اذا صارت اول شي اسوي اروح لفلانه تذكروها .. كالو اهو غير قديم مو هاي البنية الي جانت تشتغل وي ابوها بالصيدليه و انته جنت تشتغل بالمكتبه و صادقتها فترة و تعاوفتو .. كلتلهم اي تذكروها يعني .. كالو اي .. كلتلهم مو بس هي حتى فلانه و فلانه و فلانه هم .. كالو اي نتذكر هيج اسامي جنت انته مصادقهم بس هالحجي مر عليه زمن .. كلتلهم اروح لوحدة وحدة بيهم .. اول متصير عيونهم بعيوني من اول لقاء اروح اتقرب على وحده وحده بيهم و اكلها .. تعرفين اني شنو الي داشوفه هسه .. اكيد راح تكلي شنو دتشوف .. اكلها داشوفج بغرفتج و ساده بابج عليج و نايمه على عالمخده و حاضنتها بوجهج و تبجين بحركه .. بقهر .. بوجع .. بألم .. بدموع و كل دمعه تنزل عالمخده بذكرى ..تبجين بأنين خافت .. أنين صامت .. صامت لان تخافين لا اهلج يسمعون برى صوتج و يجون يسألوج الف سوال و يستجوبوج ليش دتبجين فلانه .. تبجين بوجع لان راح اعوفج بعد ما تتعلقين بيا .. بعد متحبيني و تصدكين كل كلامي عن المستقبل و الارتباط .. بعد متخيلتي انتي راح تصيرين زوجتي بس بالنهاية اني مراح اتزوجج و راح اتزوج كرايبي .. و راح تدخلين بدوامة قهر .. و الثقة عندج تنعدم بالكل .. و راح تفكرين تكصين شعرج .. و تفكرين تسوين شي بنفسج .. و راح تحاولين تتواصلين وياي بس اني راح اتهرب و بالبداية راح تحاولين يوميا مرات و مرات و مرات .. و بعدين مثل زخات المطر بالبدايه قوية و بعدين تبده تقل و تقل و تقل و تصير قطرات و القطرات تنتهي بالنهاية و الجفاف يوصل لكلبج .. و راح تكرهين شكو شخص اسمه مثل اسمي .. و راح تقارنين شكو شخص يحاول يتعرف عليج (حتى لو جان صادق) راح تقارني بيا .. و راح تصير بيج خوفه لا يطلع مثلي .. و احتمال بالاخير تقبلين بأي شخص يتقدملج حتى بس تنسيني حتى لو هالشي مبني على تعاستج .. بس المهم تنسيني .. و راح تدعين عليا بداخلج .. و راح بكل اغنية هديتها الج راح تنهزمين من كلماتها لان صورتي راح تنرسم بمخيلتج .. و الشوارع الي راح نمشي بيها راح تصيرلج مثل السجن و بس تفوتين بيها (لوحدج لو وي اهلج لو وي صديق او قريب)بس تفوتين بيها راح تحاولين تنهزمين بسرعة منها ………..
طبعا بنص حديثي اكيد راح تكطع كلامي و تكول دقيقه انته شدتحجي ليش اني اعرفك اصلا .. راح اجاوبها و اكلها بالضبط انتي متعرفيني بس اذا جيتج بيوم و ردت اتعرف عليج ترى هيج راح يصير مصيرج لان مراح اتزوجج و هالابتسامة الحلوة الي بوجهج راح اخذها منج و بعد مترجع ابد .. وحتى اذا ترجع هالابتسامه راح ترجع مكسورة و اذا ضحكتي راح تنزل دمعه وي الضحكه ..
و اكيد ورى ما اكول هيج لكل وحدة عرفتها راح تكرهني قبل متعرفني اصلا … هاي امنيتي والله ..
امنيتي يرجع بيا الزمن و اروح احجي هالحجي بوجه كل وحدة عرفتها ومصارت من قسمتي .. لأن سنه ورى سنه تمر و اني كل وجوه هالبنات تطاردني بكل مكان .. مو لان حبيتهم و ما اكدر انساهم .. لان جذبت عليهم و وعدتهم وعود مو حقيقيه .. حتى من تزوجت هم ما بطلت .. و هم صادقت و انكشفت بمرور الوكت و جنت دائما اكول طز عادي شيصير خلي يصير .. صعب من اصفن بيني و بين نفسي واكول .. ليش اني بجيت انسانه مو من عائلتي .. لا اختي لا امي .. انسانه اني رحت دخلتها بحياتي وخليتها تتعلق بيا .. انسانه لو اني باقي بعيد عنها مجان بجت و لا انقهرت ..
المصيبه ليش سويت هيج اني .. مو بس اني .. هواي اكو شباب دخلو بهيج مواضيع و راح يدخلون .. بس ليش .. ليش انسانه تبقى بكل الطرق تحاول تتقربلها و من تتقربلها و تقبلك و تعيشها بحلم وردي الي هو الارتباط .. بعدين فجاءة تعوفها … ليش .. ليش تبجيها اصلا .. ليش و على يا مال من .. بنات طيبات و كلوبهم طيبة خليت ضحكتهم تنكسر بدمعة ليش .. القاتل مو شرط يكون قاتل بشر … قاتل ضحكة .. قاتل ابتسامه .. قاتل امل .. قاتل حلم .. واني قتلت ضحكة فلانه و حلم فلانه و ابتسامة فلانه .. و هسه خايف لا يجي واحد مثلي هم قاتل .. يقتل اشياء ببنتي .. تدرون .. اكو بنات عوائل مرات يصيرون مو زينات و السبب الي مثلنه ..
يعني مثال .. واحد يتقرب من وحدة (بالكلية .. بالوظيفة .. بالعمل .. بأي مكان مو مهم) و يوم ورى يوم يحاول و يحاول لحد متصدك هالمسكينة بي و بنوايا .. و بعدين فجاءة يعوفها .. هو راح يكون سبب من الاسباب الي يخليها تصير مو زينه وتصادق واحد وثنين و تلاثه .. لان هو جان البداية .. ثقت بي و لو باقي وياها من صدك جان مصارت مو زينه و تعرفت على غيره .. لان هو جان اول واحد بحياتها و كسر حاجز خوفها من شي اسمه رجال .. يعني لو متزوجها جان كعدت وياه و انسترت و الحلم الي حلمته صار حقيقه .. بس من تنعاف راح تحاول تلكى شخص زين .. واكو احتمال الرقم ٢ بحياتها هم راح يطلع نفس نوعية الاول .. و هاي ثنين مو زينين .. و يجوز رقم ٣ هم مو زين .. و البنيه بالمجتمعات العربية اذا تصادق واحد راح الناس تحجي عليها بالمو زين .. زين اذا صادقت ثنين و تلاثه .. و السبب هو الاول ..
اني هسه هاي امنيتي .. واعرف مراح تتحقق ..
و ياريت اذا واحد يريد يدخل بعلاقة و يعرف مراح يكمل لا يعيش الطرف الثاني حلم مراح ينتهي على خير .. و يتخيل المقابيله في حالة روحته شراح يصير بي .. يشوف ضحكة هالبنية المقابيله راح تنكلب دمع و بجي .. و من البداية يسحب روحه و يخليها بحال سبيلها .. لا تبجون غيركم و تقتلون احلامهم .. لا تقتلون فرحهم .. لان ببساطة .. راح يجي يوم مثل اليوم الي اني بي هسه و كاعد بنص اصدقائي و اكو خوفه بداخلي .. خوفه على قطعه مني .. خوفه جبيره .. صح اني غلطت و اعترف بغلطي .. بس ياريت قبل البداية .. نفكر بالنهاية .. ياريت ..
(فكر بالنهاية)
انتهى
اخوكم ابو بغداد سايق التكسي
#ابوـبغداد
