ورى كومة بجي و وعود و حلفان بكل الانبياء و الرسل و كل الكتب السماوية وافق ابوية بذاك الوكت ادخل كلية … مع العلم جان رافض الفكرة تماما .. عماتي و حتى رياجيل عماتي و امي و خالاتي كلهم توسلت بيهم حتى يقنعون ابوية يخليني ادخل كلية .. ابوية جان شوية قديم .. يعني ميحب بنية تكمل ورى السادس .. يكول البنية مترهم تداوم كليات و تكعد وي رياجيل غرب .. وافق ابوية .. بس خلى شروط كومة و كلهم جانو سهلات لان من الاخير لازم اطبقهم حتى اداوم .. بالمناسبة اني اليوم عمري جبير و بنتي قبل يومين اجاها واحد يخطبها .. عمرها ٢٢ سنة .. و مرادته و ابوها (زوجي يعني) طبك وياها و كال هي تختار .. اني مولودة بعائلة محافظة كلش .. بس محافظة لدرجة انو قرارات الاب متتحمل نقاش و لا حتى سوال و جواب .. بس مرات يصير تأثير على هالقرارات بس لازم الكل يتوسل و كومة ناس تروح وتجي يله عود يقبل .. خلي ارجع لأيام الكلية … دخلت كلية بذاك الوكت .. و جانت بالنسبة اليا شي حلو لان اني من صغري احب الدراسة و اموت على شي اسمه نجاح بدرجات عالية … بالكلية جانو اغلب صديقاتي من الطالبات يطلبون مساعدتي بالشرح اذا اكو شي ممفتهماته .. و الشباب نفس الشي بس ميجون وجه لوجه لان يعرفوني ما احجي وي الشباب بس وي البنات … جنت كلش مكيفة بالكلية و درجاتي كلها عالية كالعادة .. و صار عندي صديقات كومة و كل وحدة كامت تحجيلي عن وضعها الاجتماعي .. جنت اسمع قصصهن بس اني ماحجي قصتي مو لان ماعندي ثقة بالبنات صديقاتي .. بس اصلا اني ماعندي قصة و ممارة ببحب مثلهم و لا اعرف شي اسمه حب … و الاغلبية بيهم جانو يكولولي معقولة محبيبتي منعجبتي بشخص ؟؟
جنت اكلهم لا والله .. و بيوم من الايام صار موقف بالدوام و انجبرت احجي وي ولد طالب ويانا .. الموقف جان يخص تسجيل معلومات و امور بخصوص العائلة شي مثل الجرد و جان الاستاذ موكل واحد من الطلاب بهل الشي .. حسيت بشعور من جنت احجي وي الولد مجنت مفتهمته شنو .. لان اكو مشاعر من تجي اول مرة و واحد ممجربها قبل تكون جديدة بكلشي بيها .. هو بقى مركز بعيوني من يحجي وياي واني جنت اتهرب بعيوني يمين و يسار حتى ما ابقى عيوني بعيونه .. هو ابتسم كالي شنو رأيج بلونها حلو .. كلتله شنو ؟؟؟
كال الحياطين و البنكة حلوه الوانهم .. اني ضحكت كلتله شنو .. كال يابنت الحلال من بديتي تنطيني المعلومات لحد هسه تتصفنين بالسكف و الحياطين هههه .. و من يومها كل ما اشوفه برى يصير بينا سلام بس بالعيون .. حسيت بي مركز وياي .. يعني دائما من يفوت لازم يخفف بالمشي اذا يشوفني و يحاول يكرر المشي مرة مرتين من يمي .. و مرة سلم عليا واني رديت السلام … و يوميا كام يكرر السالفة .. اني بوقتها جنت كلش كلش خوافة من ابوية .. و حالفتله بس كسرت حلفاني لان حجيت وي ولد .. بس بررت هالشي بأن الحجي جان طبيعي و مابي شي مو زين .. هالحجي اني جنت صيدلة مرحلة ثانية .. و بيوم من الايام اجاني بحجة سوال و جواب و بديت من ذاك اليوم اسولف وياه و السالفة تعدت مرحلة بس سلام .. صار بيناتنا حجي .. حسيت بي كام يعرفني على وضعه و اهله بطريقة غير مباشرة .. يعني مرة يحجيلي عن اخوه الوحيد المتزوج .. و يحجيلي عن خواته الصغار الي همه بمرحلة المتوسطة .. و على والده الموظف و امه البسيطة .. على بيتهم .. و مرة بدون سابق انذار كالي احبج .. جانت مثل النتله الكهربائية ههههه من سمعت كلمة احبج .. عبالك انتلت .. ماعرف شعور حلو على شعور مخيف على شعور غريب .. لخبطة .. بس بالنهاية حلو جان الشعور هذا … و اول مكالي احبج كلتله ترى اني غير البنات اني اذا حبيتني تعال لاهلي مباشرة و شرحتله ظرف ابوية شنو هو و شلون يعني انسان محافظ و شوي قديم بافكاره و حتى حجيتله عالكلية شلون دخلتها بالتواسيل لان جان رافض .. الولد تفهم الفكرة و كالي اني نيتي وياج زواج .. ارتاحيت كلش و طبعا ابصم بالعشره جان الولد صادق بكل كلمة يكولها لان (رجال) رجال و من اكول رجال اعني الكلمة بكل حرف بيها .. يعني مو من جماعة العلاقة و الصداقة وهاي هي .. و هالشي بين بالمستقبل .. المهم .. علاقتي بي اربع اشهر بقت ورى كلمة احبج .. و فد يوم رجعت من الكلية لكيت امي شكلها مكلوب .. و طبعا حالي حال كل الناس من نظرة يعرفون شكل اهلهم اذا فرحان لو ضايج لو حزين .. كلتلها شبيج يمه خير .. كالت ابوج راح يزوجج لأبن فلان .. طبعا ابن فلان ماعرفه و مشايفته بحياتي بس ابوه صديق ابوية ومن نفس عشيرتنا .. يعني كرايب .. متت من البجي و كلت لامي اني ماريدة بس خفت اكلها اني اكو شاب بحياتي …
خفت لا تروح تكول لابوية و يذبحني والله .. و صدك والله بليل بس ابوية رجع .. صاحني كالي اني قبلت على سالفة زواجج و خلص ماكو داعي بعد للكلية .. من باجر تكعدين بالبيت .. بجيت كباله بس ابوية كلمته وحدة .. ولا اهتم ولا عبالك اني بنته و ابجي .. و بطلت من الدوام و طبعا احنا بذاك الوكت مجان عدنا تلفون ارضي اصلا … اكو بنية وياي طالبة .. وصلتلي للبيت عن طريقه هو .. طلعو عنواني و كدرو يوصلولي .. جتي البنية و حجيتلها كلشي و هي صديقتي اصلا .. والله العظيم ورى اسبوع من جية صديقتي اجه هو واهله يطلبون ايدي … ابوية رفض و كالهم البنية مخطوبة .. مع العلم اني مجنت مخطوبة … و الولد حاول يتصل بأبوية بس مو بالبيت راحله للشغل وابوية مطرده و طبعا هالحجي كله عرفته بعدين … و تزوجت .. زواج تقليدي مفروض عليا غصب عني .. الرجل الي تزوجني نفس ذبة ابوية بالضبط .. هم حجايته وحدة و ميحترم شي اسمه امراءة و قرار مشترك و هالسوالف … الي براسه يمشي .. طبعا من يوم تزوجت اني قررت انسى الولد الي جان بحياتي .. لان خلص اني تزوجت .. رجلي جان مو محترم كلش .. يعني رزايل بالطلعه والطبه و خصوصا سالفة انو اني دارسة جانت مثل الي تخلي يغار لان هو ممكمل دراسة .. صف خامس ابتدائي و مبطل .. مرات جان يعجبني اتناقش وياه بمواضيع عامة .. يسكتني رأسا لان ميعرف اصلا يحجي بمواضيع عامة .. تحملت بس تحملت مو لأن احبه .. تحملت لان خلص اني لازم اكون مثل امي و خالاتي و نسوان المجتمع كلهم .. نتحمل و نسكت و هاي هي .. و صار عندي منه بنات ٣ و هو يدور على خلفة الولد .. يريد ولد .. ربه دينه يصير عنده ولد … و فوكاها هههههه مشايفة هيج تخلف يكلي زوجة فلان و زوجة علان صار عدهم اربع ولد وانتي متكدرين تجيبيلي ولد … و تزوج عليا و زوجته اول طفل الها جان ولد .. اني كيفت بوقتها .. لان خلصت منه و من سوالفه وكل وقته كام يكظي ويامن ( بالضبط وي ام الولد الي حققتله حلمه ) .. طبعا ورى مصار عندي ٣ بنات هو اشترالنه بيت و طلعنه من بيت اهله .. و اشترى للجديدة هم بيت .. اني جنت مرات شهر كامل ما اشوفه .. حتى المصرف مرات يدزه بيد اخته لان بيت اخته قريب من بيتنا .. كمت اتواصل وي طالبة وياي بالكلية جانت شفتها صدفه و تذكرتها و اخذت رقمها … طبعا هي تزوجت و هم عدها كومة جهال .. جان عندي تلفون بذاك الوكت .. و رجعت علاقتي بيها و مرات كامت تجيب جهالها و تجيني للبيت يكعدون لليل و رجلها يجي ياخذها ..
مرات جنا نسولف على ايام الكلية و هي تدري علاقتي جانت بطالب .. كالت تدرين هو المن تزوج .. كلتلها منو ؟؟؟
كالت نفس البنية الي دزها عليج للبيت تزوجته .. حبته و ساعدتها يطلع من القهر الي بقى بي من وراج … كلتلها الله يسعدهم .. و كالت علساس مفتحين صيدلية ورى متخرجو ثنينهم .. كلتلها خطية .. بالخير عليه و عليها .. و انسد الموضوع .. بعد ولا فكرت بي واصلا اني مجنت افكر بي شاهد الله .. بس يعني هو الانسان عبارة عن ذكريات و هاي ذكرياتي و حياتي الي مريت بيها .. المهم .. مرت سنين و صديقتي الي جانت تجيني صارتلهم هي ورجلها فرصة سفر و سافرو .. و اني كبرت و بناتي كبرو .. و رجلي طلك زوجته بسبب اخوتها بصراحة .. يعني هاي دنيا و اني ماريد احجي حجاية اتحاسب عليها .. اخوتها وكعو بمشكلة جبيرة و خسر كومة فلوس و صارت مشاكل جبيرة بينهم و طلك زوجته بس ابنه يجي يمنا مرات يبقى شهر شهرين و يرجع .. ابنه هم كبر مو صغير .. الحاصل
.. قبل مدة زوجي سوى عملية و ميكدر يسوق سيارة .. المستشفى الي سوى بيها عملية بنفس المنطقة الي بيها الصيدلية مالت الي راد يخطبني قبل كم سنة .. حتى ماكول صدفة لا هي مجانت صدفة ابد بس جانت فضول .. اني سألت عالصيدلية و رحت اجيب العلاج لرجلي من نفس الصيدلية .. بس والله العظيم و داعة بناتي جان مجرد فضول اشوفه لا اكو مشاعر ولا اي شي من هالقبيل .. وصلت للصيدلية و ترددت هواي ادخل … طبعا هو و ولد صغير بالعمر يشتغل وياه جانو بالصيدلية .. فتت و اني متغير شكلي و سمنانه .. هو هم متغير بس مو هواي .. هو كاعد ورى الميز يقرأ و لابس نظرات طبيه .. و العامل هو الي يبيع وكف رأسا من فتت .. انطيته الورقة مال وصفه .. و وكفت .. هو ابد مرفع راسه من الي ديقرا بي .. العامل انطاني العلاج و كاعد يشرحلي .. اني لان درست صيدلة طبعا اعرف كلشي سألته على علاج ثاني نفس مفعول العلاج هذا الي بيدي بس يختلف اقوى .. و كلت الاسم بطريقة مال واحد يعرف .. هو عاف الي بيده و من ورى الميز كال ترى ثنينهم نفس الشي و كعد يشرح واني اباوع بوجهه وهو يباوع عليا .. طبعا من كاعد يشرح كام يخفف بالحجي شوية شوية شوية قلت كلماته … جان يكوم يوكف يريد يعرف اني لو مو اني .. اني عيني بعينه جان يسكت و كطع الشرح و رجع كعد و كال وانتي اعلم بعد لينا .. بس اختنك والله العظيم اختنك .. حتى العامل الواكف بنصنه بقى يباع عليه و يباع عليه يريد يفتهم شنو الصار .. جان اخذ العلاج و دفعت الحساب و طلعت .. طلعت بس ابد متوقعت راح يتذكرني .. اني اسمي مو لينا بس هو جان يكلي قبل بياضج نفس بياض لينا صديقة عدنان بالكارتون …
مرات اكو اسرار اذا نحجيها الناس تطلعنا خائنين و ممربيات .. و خصوصا اذا متزوجات .. و مرات يكولون المراءة حتى بالتفكير اذا تفكر برجال ثاني غير رجلها تصير خاينة .. اني بصراحة هاي جانت اول مرة الي اشوفه بعد كومة سنين و بعد متعاوفنا .. بس جنت من اختنك اروح لنفس الاماكن الي جنا اني وياه نروح الها .. والله مو لان تذكرني بي .. بس اكو مكانات واحد مرات حس بيها براحة نفسية .. يحن يرجعلها .. و يحن يكون بيها .. اني ذيج الاماكن الي جنت اتردد عليها من جنت اختنك لو اتاذى من زوجي .. استذكر بيها ايام جنت ممتزوجة و جانت حياتي عبارة عن دراسة و مستقبل جبير ينتظرني .. و ارتاح و ارجع .. و روحتي للصيدلية نفسها الي هو ماخذها .. جانت فضول .. فضول اشوف الرجل الي رادني بس مصارت قسمتي وياه و السبب مني .. ابوية هو الرافض .. مجرد فضول لا اكثر ولا اقل .. يجوز اني غلطان و كل الي داحجي ابرر لنفسي روحتي لنفس الصيدلية .. بس لو كايلة صدفة صارت السالفة .. يمكن جان الناس كالت الله شلون صدفة ..عالعموم .. اني اتمناله كل الخير هو و زوجته الي هي جانت صديقتي اصلا .. و انقطعت اخبارها فجاءة .. واني متاكدة بسبب ارتباطها بي .. و الله يخليلي بناتي و زوجي و ابن زوجي هم لان الولد جدا فقير و مداري خواته كلش كلش مع العلم هو اصغرهم .. وخلص ..
(لينا)
انتهى
اخوكم ابو بغداد سايق التكسي
#ابوـبغداد
