فد يوم شلت كروه مرية جبيرة بالعمر … اجرتني من المنصور يم الاقواس ليم معمل الجكاير (شماعيه) .. جبيرة بالعمر هي … هالحجي قديم شويه .. صعدت وياي ليوره و ورى ما مشيت بخمس دقايق كامت تبجي .. وكفت سألتها كلتلها شبيج يمه خير .. كالت ماعرف شكلك وليدي .. كلتلها شبيج احجي اني مثل ابنج … كالت ابني حارس ببيت هنا بالمنصور و عنده ٣ اطفال و زوجته تكرهني … و هو شوية مو طبيعي يعني حرفيا كالت (بي خيط) و فوكاها يشرب .. طردني و حلفت بعد ما ارجعله و عندي بس فلوس الكروه الله وكيلك وليدي .. واهلي (بيوت اخوتي) محافظات مو ببغداد ساكنين .. ماعندي فلوس اصلا اوصللهم .. و علمود هالشي اريدك تذبني بدار المسنين .. من كالت هيج كبل بجيت اني .. كلتلها وديني على ابنج هسه .. كالت لا يمه وديني لدار المسنين .. كلتلها انتي شتحجين خاله .. كالت والله اني مو بنيتي اروح هناك بس ماعندي فلوس كروه اروح لبيت اخويه خارج بغداد .. كلتلها امشي عيشي يمنا يم امي .. كالت لا يمه البشر ثكيل .. كلتلها والله ماوديج لدار المسنين و اخذتها للعلاوي انطيتها فلوس الكروه و شكو فلوس مشتغل بيها بذاك اليوم و حاجيت ابو التكسي بالعلاوي (بوقتها جانو التكسيات كله سوبرات هارتوب و دولفين) حاجيته كلتله فدوه وصلها قريب لبيت اهلها لان صاير عدها حاله بس استحيت احجيله الي صار … و انطيتها الفلوس و رجعت اشتغل بس اليوم كله طلع من عيني و كل شويه من ماكو احد وياي بالسيارة ابجي .. و وراها بكم يوم اخذت كروه للمنصور و شفتها صدفه بس مصعد وياي عائله مكدرت اوكف حتى احاجيها .. و شفتها قريب من المكان الي شلتها من عنده … كيفت طرت من الفرحه كلت همزين رجعت لأبنها … و راح الموقف بس ابد منسيتها و تمنيت التقي بيها .. بس ما التقيت ..
عالعموم ..
بالأزمة مال البانزين اني واكف سرى على البانزين خانه مال ابو اقلام الي بالكرادة … طبعا كلنا السواق من الحر جنا واكفين يم عمارة خاتلين من الحر و كاعدين نسولف لان صار عطل على حظنا و توقف التوزيع اكثر من ساعتين … بالعمارة نفسها الي واكفين يمها اكو شقق سكنيه .. صارت عركه بالشقة الفوك و صياح و بعدين هدأت العركة .. وطلعت مريه جبيره و بنيه صغيرة بيدها عبرت عالسايد الثاني تأجر تكسي .. عرفنا هاي المرية زعلانه اني والسواق (اصحاب السيارات الواكفين سرى يعني) .. اكو سايق تكسي من الواكفين شاف الموقف مال العركه الي بالعمارة .. فتح موضوع .. كال تدرون جنت ما اصدك واحد يذب امه بالشارع لو يطردها وعبالي هالحجي بس بالافلام المصرية و الهندية .. بس من صار وياي موقف و بعيني شفت هالشي صدكت .. كلناله شلون .. كال مره بالمنصور مريه جبيره ابنها حارس طردها من البيت و اجرتني و خطيه جان ماعدها فلوس كروه تروح لاهلها لان اهلها محافظات و رادتني اوديها لدار المسنين .. طبعا هو يحجي و اني اباوع عليه و فاتح حلكي حتى كمت اتقرب عليه كلتله اي !! ..
كال اني وديتها لكراج العلاوي و انطيتها فلوس الشغل مالتي و عفتها ورحت .. كلتله بس سوال يرحم امك هيج شكلها و سمينه .. كال اي اي .. كلتله و شلتها من يم الاقواس .. كال اي .. كلتله يمعود اني قبل مده هم هيج صار وياي و نفس المريه يمكن هاي نفسها المكسينه كل مره ابنها يطردها ..
واحد من الكاعدين ضحك .. كال يا ابنها .. هاي قفصت عليكم ومشى عليكم المي .. كلتله شلون .. كال يمعود انته من كل عقلك تحجي و بعدك مصدك هاي ابنها كل مره يطردها و تحجي نفس الحجي .. كلتله شمعرفني .. كال هاي دروب يمعود .. و حجالنه على سوالف تقفيص كومه صايره على سواق التكسي .. و بيهم مشابهات للي صار وياي .. و كالي اذا تريد تصدك كلامي روح لنفس المكان بس احتمال هسه غيرت المكان يجوز ما تلكاها اصلا… لو روح لأبو السيارة الي بكراج العلاوي سأله صعدت وياك لو لا .. اني كلت حتى اكطع الشك الي براسي و ما اخذ غيبتها خلي اروح للعلاوي من تجيني كروه قريبة … امر هناك لان اتذكر ابو السيارة كلش زين بقيت كومه اوصي عليها .. و رحت ما لكيته بأول مره .. وراها بيومين هم جتني كروه قريبة من العلاوي نزلت جان الكاه بمطعم صغير يجتمعون بي السواق .. كلتله تذكرتني .. كال لا والله خويه .. ذكرته بالموقف كال اي اي تذكرتك .. كلتله وصلتها لبيت اخوها .. كال لا والله نزلت بوقتها من السيارة كالت ناسيه اوراق مهمه و راحت .. ضحكت اني و تشكرت من الولد و مشيت .. و شكد ردت اشوفها بعد يم الاقواس ما شفتها … اني ردت اشوفها مو علمود اكلها انتي ليش هيج تسوين .. ولا حتى اشوفها علمود اتعارك وياها .. ردت اشوفها حتى بس اسألها متحتاج سواق لو حراس شخصيين لان بذاك الوقت عرفت هاي الها مستقبل رفيع المستوى بالحكومة و يمكن هسه هي بالبرلمان و من هذا المنبر الصغير منبر ابو بغداد سايق التكسي اوجهلها تحيه و اكلها شلونه البرلمان مرتاحه بدوامج الجديد … مرتاحه عالبخيخ مال التبريد هههههه .. لا عوفكم من الشقى …
ردت اشوفها حتى بس اكلها خلف الله عليج على الي سويتي .. بس والله لو كايلتلي محتاجه بدون هالفره كلها و هالبجي الي بجيته جان انطيتج الفلوس واني الممنون ..
عالعموم .. هالحجي قديم بس قبل شويه شفت صور هاذا الي يلزم كلبه كل شويه و يسوي نفسه مريض و ياخذ مساعدات من الناس و تذكرت القصة .. و كلت خلي اكتبها .. تحياتي ياطيبين و اتمنالكم الصحه و السلامة .. و اذا الحجيه شافت المنشور و بالبرلمان هسه اهديلها اغنية مشكورة .. تردين الصدك ما قصريتي ..
(مشكورة)
انتهى
اخوكم ابو بغداد سايق التكسي
#ابوـبغداد
