اللؤلؤ والمرجان فى تحضير عشق الجان

العاشر (الملحمه)

[اول ما موت رمتنى مريم ع الارض وكانت عنيها بتدمع وبصت للمرده والمنبوذين لقتهم واقفين بيشاهدو الى هى عملته ...كل دول شهود على قتلها ليا ...]
[قرينك رام بيطلب الاذن يتكلم على لسانك]
[اتعهد انا يعسوب ابن الغضوب بن ال دغش بن بنو للاحمر ]
[ودومينيك بينها وبين مريم عداوه ومنافسه وهى من قبيله دغش ودى متفرعه من بنو الاحمر]
_الامر خطير جدا يا ماهر قرينك رام عايز يظهرلك بنفسه لانه هلع ومرعوب .
-اسمحله بالظهور يا خان .
_انت الى تسمحله واعمل كالاتى ....
قمت وقفت قدام المرايه ورسمت نجمه خماسيه وفضلت مركز على عنيا فى المنتصف .
لقيت شكلى بيتغير فى المرايه وبتظهرلى قرون ضخمه زى بتاعت العجول وجسمى اكتسا بالشعر وطولى زاد جدا .
ده شكلى فى المرايه ...
وشه شبهى جدا لكن كل الجسم حاجه تانيه .
معرفتش اقول ايه بس هو اتكلم :
_ماهر ! للصدفه صفاء الى انت عالجتها امبارح كانت ملبوسه بجن من ال دغش من بنو الاحمر وللصدفه انت كنت ملبوسه من جنيه اسمها دومنيك من ال دغش من بنو الاحمر ..
وللأسف انت قلت انك قاتل كيعون ابن مارق ...عالم الجن مقلوب عليك دلوقتى وتناقلت الاخبار من قبيله دغش والقاضى شمهورش عرف بالامر.
_المره دى يا قاتل يا مقتول مش هتقدر تهرب يا ماهر ...
بصلى بوجهه المطابق لشكل وجهى وقال: _غمض عنيك يا ماهر وامسك ايدى .
جسمى قشعر لما مسكت ايده ..كانت مشعره وضوافره طويله كأنها مخالب.
لقيت نفسى بتسحب جوه خندق بارد وانتقلت لصحراء واسعه ...
الرمال هنا لونها ازرق وشايف قدامى ناس متعلقه على عوارض خشبيه مربوطين من ايديهم ورجليهم ..
بصيت لرام وقلتله :
_احنا فين يا رام .
قال :
_ركز فى اشكال الناس الى مربوطه على العوارض الخشبيه دى يا ماهر .
قربت ابصلهم لقيت ست بوجه لبؤه(زوجه الاسد) .
ثوانى دى ..دى امنا الغوله او زى ما بيقولو عنها سخمت ...
والى هناك دى النداهه ...وده ابو رجل مسلوخه ...
وناس كتير شبهم ..
هو فى ايه؟ ايه الى بيحصل هنا!!!؟
بصلى رام وقال كأنه فهم انا بفكر فى ايه:
_هنا يا ماهر بيتم تنفيذ اول حكم قاله القاضى شمهورش بخصوص المنبوذين الى شهدو بأن مريم قتلتك .
بلعت ريقى:
-واتحكم عليهم بأيه ؟
بص عليهم وهتعرف الى هيحصل..
لقيت انوبييس الذئب الفرعونى واقف فى مكان عالى وبيفرد مخطوط من الجلد وقال :
_الان نبدأ بتنفيذ حكم القاضى شمهورش بأعدام كل الشهود الزور فى امر قتل بنت ال النفر للبشرى .
لقيت اول حاجه شخص واقف وماسك سيف وقام قطع ايدين ابو رجل مسلوخه وهو بيصرخ وبعدين قطع رجليه ...
ببص بعيد لقيت الى بيعدم مارد بنفس الطريقه ..
ولقيت شخصين ماسكين منشار بين رجلين النداهه وبينشرو جسمها وبيقسمو نصين وهى تنوح وتصرخ وصوت صراخها بيرج الصحراء ...
وكذلك مع اخرين بنفس الطريقه ...
ولقيتهم ماسكين امنا الغوله من اطرافها وكل واحد بيسحب فى اتجاه لحد ما مفاصلها تتكسر ويرموها ..
ولقيتهم بيحرقو اشخاص وبيولعو نار تحت العوارض الخشبيه بتاعتهم ..
وربطو ١٠ اشخلص ورموهم فى حفره ببص فى الحفره لقيت فيها جسد حيوان ضخم وشكله غريب رام قالى انى دى السلعوه ...
اجهزت عليهم وقطعتهم ...
واختلفت اساليب التعذيب ..
كان فى الى بيقتلعو عيونه ولسانه ويتركو بلا حول ولا قوه ...
الوحوش الى اتسببت فى كوابيسنا طول عمرنا وخوفتنا شايف فى عيونها الخوف وهى بتتعاقب كده.
بصيت لرام:
_اذا كان ده عقابهم عشان افتكرو انى موت وشهدت بكده ....عقابى انا هيكون ايه ؟؟؟!
بص رام للارض بحزن :
_هتعرف كل حاجه يا ماهر ..
-رام هو كام عدد الاحكام الى قالها شمهورش المرادى ..
_ثلاثه وغمض عنيك عشان هنروح نشوف تنفيذ الحكم التانى والتالت فى المحكمه قدام شمهورش بنفسه .
غمضت عنيا وانتقلت للمحكمه كانت مريم مربوطه وعمالين يجلدو فيها وهى بتصرخ وتقول :
_قتلته ...قتلته ....انا معرفش هو عايش ازاى ..
بص شمهورش لانوبيس وقال :
_القى بحكمى ..
الحكم الثانى :
_يتم تجريد البشرى ماهر من خدامه من الجن .
نزل الخبر عليا زى الصاعقه ... بدون خدام ؟ طب هحمى نفسى ازاى !!!!
وقال شمهورش :
واما امر قتله سأوكله لابن عمى الطيار ساكن المياه والبحار.
رفع انوبيس صوته :
الحكم الثالث:
_يتم اعدام مريم امام جميع الماثلين فى المحكمه رميا بحجاره سجيل ..
قام شخص فارع الطول وصرخ وقال :
_ذلك لن يحدث يا شمهورش...كل هذا لانك من بنو الاحمر ونحن من ال النفر .
بصله شمهورش وقال:
_من يتكلم ..
رفع الجنى صوته وقال :
_انا مالك بن ال النفر من نسل الاشراف ايها النجس ..
ضجت المحكمه باصوات الناس ..
رد شمهورش ببرود :
_النجس من يتركه بنته لتمارس الرزيله مع البشر..
ارتفعت الاصوات بالمحكمه واخرج مالك خنجر مرصع بحروف اعجميه ..
ولقيت رام فتح بوقه :
_خنجر النبى سليمان !!!
اتجه مالك لشمهورش امام الجميع.. كل الى فى المحكمه قامو من مكانهم مرعوبين ...
عتريس شفويل وقلقوس ...
قال شمهورش التلات اسماء دول وخرجت اجسام ضخمه من الجن قيدت مالك بالسلاسل ...
ضحك شمهورش وقال : ابدأو بتنفيذ الحكم .
وبدأو يرجمو مريم بحجاره حمرا زى الجمر ومريم بتصرخ وتتألم ونظرت لعينى بتستنجد بيا ...
وصرخت بصوت عالى ...
وقال شمهورش :
_ يا ابن عمى الطيار ساكن المياه والبحار لديك جيشى كله من الجن الاحمر لقتل هذا البشرى لن نستهون به مره اخرى..
ولقيت نفسى رجعت للحمام تانى فى بيت صفاء ..
فضلت افتكر فى الى شوفته والعذاب الى حل بسببى ونظره مريم وهى بتصرخ وفضلت اعيط بسبب الى حصل بسببى والى هيحصلى .
حط رام ايده المشعره على كتفى وقال :
كان نفسى اقولك متخافش يا ماهر بس خاف ...انت لازم تخاف عشان تدرك عظمه العذاب الى هتواجهه..
انا فى ورطه ومش عارف اعمل ايه من البدايه التعامل مع الجن غلط مكنش لازم اعمل كده خرجت من الحمام وخرجت م البيت وصفعت الباب ورايا ...
مكنتش عارف اهرب اروح فين ..
اروح البيت ؟ لأ كده هسبب الاذيه لأهلى..
نفس المكان رغم فقدان الشخص الى بروح المكان ده بسببه ..بيت الشيخ ..
نزلت على الشارع وشاورت لميكروباص رايح البلد الى جمبنا لقرب المسافه ٥ دقايق وكنت وصلت ..
نزلت روحت على بيت الشيخ ..
_رام انت لسه موجود وينفع تتواصل معايا ؟
مردش !!!
اوف دخلت المطبخ جبت ملح ورشيته دايره حوالين البيت وقفلت الشبابيك ..
وقفلت بابا الحمام ..
هستخبى هنا على امل ان محدش يلاقينى ...
بس سمعت صوت كركبه فى الدور الى فوق ..
طلعت لقيت الصوت جاى من اوضه الشيخ ..
ببص لقيت واحده فى طولى بيفتش فى الصندوق ووالتفتلى وانا بفتح الباب ..
_داغر ؟! انت بتعمل ايه هنا ..
-نفس الى انت بتعمله هربان من الحكم الى عليا ..
دخلت وانا واخد حذرى منه لان اخر مره شوفته كان عايز يقتلنى ..
بصلى وكأنه فهم انا بفكر فى ايه وقال:
_متخافش انا مش عايز اأذيك انا جاى هنا عشان انقذك لان للأسف حكمك مربوط بحكمى ..انا كان هيتم اعدامى بطريقه بشعه ...كانو هيحطونى جوه بقره من النحاس مجوفه من جوه ويولعو نار تحتها ويسيحونى ..
-طب وبتعمل ايه هنا ...
رفع كتاب فى وشى (اللؤلؤ والمرجان فى تسخير ملوك الجان)
_الشيخ عنده مخطوطات سحر كتير..عكس الكتاب الالكترونى الى متحرف حتى فى اسمه (اللؤلؤ والمرجان فى تحضير ملوك الجان) ..
رد صوت من بعيد :
_مفيش اى قوه هتساعدك ضد الجن الاحمر ولا فى قوه تقدر ..
بصيت لمصدر الصوت لقيته خان!!
_خان انت لسه موجود انا افتكرت ان مبقاش عندى خدام ..
-انت فعلا مبقاش عندك خدام انا هنا عشان اتفرج من بعيد معادش فى حاجه فى ايدى اعملها ...
قال داغر :
_والى قدرت تقوله ان محدش يقدر على الجن الاحمر ..
رد خان عليه بهدوء :
_محدش يقدر دول من اقوى الجن وشمهورش مش قاضى الجن وبس ده ملك الجن الاحمر ده غير ان معاه حراسه العتاوله عتريس وشفويل وقلقوس غير ابن عمه الطيار ساكن المياه والبحار محدش كان يقدر عليهم غير ....
عاجلته بسرعه :
_غير مين مين انطق ...
وحسينا بزلزال والارض بتتهز بصينا من الشباك..
لقينا جيش من مئات الالاف من الجن متعرفش بدايه جيشهم من نهايته ..
جن طوال القامه جدا وجن قصار القامه وجن طيار ليه اجنحه ووجهه زى البعير .
وكان فى جنى بيحملوه على عرش وطايرين بيه...
_انطق بسرعه يا خان مين يقدر عليهم .
-مش ممكن دول اختفو من ايام موت سيدنا سليمان..
قال داغر والخوف باين فى عنيه :
_هما مين يا زفت انطق ..
-العفاريت ..، العفاريت هم الاقوى بس دول اختفو والتزمو بعهدهم مع سليمان النبى...عمرك ما هتلاقيهم ..
ظهر قرينى رام وصمتت معاه الاصوات بره وكان ماسك فى ايده خنجر وقال : لا ممكن وده خنجر سيدنا سليمان وادانى مخطوط معاه وده بيقدر يستحضر العفاريت الاربعه لهشطش مشهش قطوش كهيوش ...
قال خان :
_بس تحضيرهم هيستنزف طاقه الشخص الى هيحضرهم وممكن تموته ..
قلت مش مهم وخدت المخطوط كانت التعليمات ان فى بعض الكلام مفروض اقوله وحجات انفذها .
قعدت اتربعت ، وداغر عند الشباك متفاجئ من الصمت المفاحئ ده :
دى دومنيك يا ماهر واقفه ومانعه اى حد يدخل البيت ....بس ايه دخل الاميره دومينك بنت شمهورش بيك ..
مهتمتش وفردت المخطوط ومسكت الخنجر بأيدى اليمين وبدأت:
"اللهم انى اسألك بهذه الارواح الروحانيه الكرام ان تسخر لى العفاريت الاربعه بقدرتك وجلالك لهشطش مشهش قطوش كهيوش ججح اجيبو وتوكلو وافعلو "
وسحبت الخنجر على ايدى والدم غرق الارض ...وده كان الشرط لازم دم بكميه كبيره بعد الكلام الى هقوله واجرح نفسى بالخنجر فأضطريت اقطع وريدى ..
حسيت بالمكان بيلف بيا وعمال اطلع وانزل والدنيا ضلمت .
كنت بشوف حجات حصلت قبل كده .. [قال شمهورش : حسنا يمكن ان نرفع عنها تهمه التمرد وتعود لتكون جنيه مسلمه من ال نفر ..ولكن اذا قتلتى الشخص الذى قتل ابن عمك كيعون ابن مارق ...وامامك ٢٤ ساعه لذلك بتوقيت عالم البشر ..
اتوافقين يا مريم ؟
بصت للارض وكانت بتفكر وقالت: موافقه ..]
[مريم احتوتنى ]
[انا خسرت كتير بسببك يا ماهر حبى ليك خسرنى اهلى وعشيرتى وبنى جلدتى واتسبب فى نبذى ]
[وبدأو يرجمو مريم بحجاره حمرا زى الجمر ومريم بتصرخ وتتألم ونظرت لعينى بتستنجد بيا ]
كنت فى منطقه اللاوعى فى مكان مظلم بتمر عليا الاحداث دى وبفتكر احكام شمهورش الى غرضها تضعف من ال النفر فى عالم الجن ..
مريم كانت بتحبنى ...شمهورش الى قتلها.
فتحت عينى مره واحده وانا بصرخ :
_مريااااااااااااام .
اتكسر ازاز الشبابيك وانا بصرخ وكان الامر كأن قنبله ذريه انفجرت فى المكان .
كنت بطفو فى الجو وانا واقف عنيا لونها اسود تمام بدون بياض واوردتى كانت خاليه من الدم ولونها ازرق .
قولت بصوت خشن غير صوتى :
_فليحضر كل من
لهشطش
مشهش
قطوش
كهيوش.
ردو فى صوت واحد :
-من المنادى ..
_سيدكم ماهر .
كان شكلهم مرعب وضخم ولكنهم كانو خايفين منى ومن شكلى وانا ماسك فى ايدى خنجر سليمان انا اقدر ابيدهم كلهم خرجت .
طاير من البيت وهما ورايا وقلت :
_اقتلو الجيش كله عايز يتم اباده كل جيش بنو الاحمر الى قدامى .
بمجرد ما قلت كده لقيت حمم بركانيه واعاصير بتحيط بالجيش.
وابن عم شمهورش طاير فوق عرشه مصدوم .
اقتربت منه ووقت قدامه.
ورفعت الخنجر وقطعت راسه..
راسه كانت عليها علامات الرعب بعد ما قطعتها ..
نزلت وسط المعركه وكل الجنود مرمين على لارض بيصرخو وعلى وشوشهم البشعه المخيفه علامات الرعب .
ببص لقيت دومينك لسه واقفه عند الباب ..وخان وداغر وقرينى بيبصو عليا من البيت ..
تم اباده جيش بنو الاحمر وبعلو صوتى قلت :
_انقلونى لمحكمه الجن..
وفردت دراعاتى وبصيت للسما والتف حواليا اعصار ترابى ..
وفى لمح البصر كنت فى المحكمه وجسمى بيطفو ورميت راس الطيار ابن عم شمهورش قدامه ..
_ايها البشرى اللعين ..
بصتله وانا بفتكره وهو بيقتل مريم ورفعت ايدى وانتقلت عنده وقفت فوقه وهو غاضب ومش باين عليه الخوف ودبحته كانت رقبته ودمائه الصفرا بتسيل ..
وبيثور وبيحاول يزوقنى من فوقه ..
بدأت احس بالضعف ونزلت وقعت على الارض ..
هبوط ضغط جسمى خالى من اى دماء ..
اخر حاجه قولتها وانا بغمض وشايف الناس بتصرخ فى المحكمه والى هيهجم عليا :
_انقلونى للمستشفى ...
__________________
حاسس ببرد المكان ابيض فى ابيض ونايم على السرير ..
ومتعلق دم بيسرى فى عروقى وشايف داغر فى السرير الى جمبى وباين ان هو الى نقلى الدم ...
بيسرى فى جسمى دم كيان نصف جنى ونص بشرى ..

يتبع ما بعد الملحمه.......