اللؤلؤ والمرجان فى تحضير عشق الجان

الجزء الثالث (المارد)

بخبط على باب خشبى بعنف والتخبيط بتاعى بيصدر صدى جوه البيت على امل ان الشيخ يصحا ..رشيت ملح قدام البيت عشان لو حاجه قطرانى..
كنت خايف ومرعوب جاى من بلدنا لحد بلد الشيخ جرى وعمال اخبط على امل انه يفتحلى .
وفجأه الباب انفتح كان الشيخ ...خيط من الامل رجعلى اول ما شوفته ..
_ماهر بتعمل ايه هنا الساعه دى ومالك متبهدل كده يا ابنى ..
-ارجوك دخلنى وبعدين نتكلم ..
_اكيد ...اكيد اتفضل يا ابنى ..
تقريبا كنت ناقص ازوقه وانا داخل من الهلع .
_اقعد يا ماهر اهدى كدا مالك شكلك نهجان ...
-واقع فى مشكله يا شيخ اسود من المشكلتين الى فاتو..
_ان شاء الله خير يا ابنى ده انت ليك وحشه بس اهدى دى اخر مره شوفتك من سنتين..
-منا مفيش من ورايا الا المصايب ارجوك اسمعنى يا شيخ انا هحكى واسمعنى رجاء.
المرحله الاعداديه خلصت الحمدلله بكل قرفها ده الى كنت فاكره مكنتش عارف انى هفتقد فتره الاعدادى وانها من احسن المراحل الدراسيه فى حياتى بجد ..
_احم احم ..انا مراعى الى انت فيه بس انت جايلى فى نص الليل ومصحينى عشان تحكيلى عن اشتياقك للاعدادى ما تحكى الكلام المهم ..
شاورت براسى علامه على الموافقه ...
زى ما تقول يا شيخ كنت داخل اولى ثانوى حامى بكل نشاط والى هو مرحله جديده عشان اتفوق وابقا دكتور ، اى نعم مفيش سبب محدد لانى عايز ابقا دكتور او غاويها ، بس حابب يبقالى مركز فى المجتمع لما ابقا دكتور ..
المهم انى فى الدروس الى هى كانت حرفيا طحن ليا وفرهده واجهاد وتعب وروحه وجيا ، كنت ببقا قادر استوعب المعلومات وافهم فى اول نص ساعه من الدرس والدرس اصلا ساعتين الى هو صعب اركز فى الباقى وصعب افضل قاعد فى نفس الوضع ساعتين ..
بس بالرغم من كده كنت بتعب وبجهد نفسى .
كانو كتير من صحابى متفوقين عليا ونوعا ما انا م النوع الى بيبقا عايز يكون الاول ...الذكى ...الشاطر ...ولو اعجب البنات فى الدرس يبقا كده اتعشت ..
_يا ماهر انت جاى تحكيلى مشاكل مراهقتك و تقلب هرموناتك الساعه واحده بليل ..
حاضر حاضر جايلك فى الكلام اهو ، اتكسفت وبصيت فى الارض م الكلام الى هقوله ..
قبل الامتحانات كنت بتوتر وانا بذاكر ودايما المعلومات بتطير من دماغى ..
كنت بأجل المواد كمان ،واقول اريح النهارده واخلص الماده بكره ، اريح النهارده واضغط مادتين على بعض ، اذاكر الماده الاقى الوقت ضاق ومش متصور انه يكفى لباقى المواد .
_وعملت ايه ؟؟؟؟؟!
مكنتش عايز مجرد انى انجح لا عايز اتفوق الاول على الدفعه ، عملتها مره فى الاعدادى ، وهعملها دلوقتى اياً كانت الطريقه اياً كانت يا شيخ ..
-فاكر كتاب اللؤلؤ والمرجان فى تحضير ملوك الجان؟*كتاب سحر*
بان على وشه الاهتمام وعلامات الدهشه وصابتنى رعشه من نظرته .
كانت فى فكره خياليه بتصيبنى لو الزمن وقف فى الامتحان وانا بقدر اتحرك وابص فى ورق صحابى مش ده ينجحنى .. الفكره جاتلى بسبب استطلاع اراء فى الفيسبوك عن ايه القدره الخارقه الى حابب تمتلكها ..الاختفاء ...اوقف الزمن الطيران ...العبقريه !!!..
كنت بتحمس لما افكر فى كده، وبدأت افكر انه ممكن وممكن اعمل ده...
رجعت ادور فى الكتاب الالكترونى من على فونى لانى تقريبا محذفتوش ولسه فاضله نسخته فى التنزيلات ..
لقيت حاجه كده فى الكتاب اسمها *تسخير الجن لخدمتك*
كنت محتاج جنى واحد بس يساعدنى ، جنى واحد بس ...
_مين ..
بصيت فى الارض اقول ولا لأ اعترف انى غبى ومبتعلمش من اخطائى ولا اسكت..
_ماهر لازم تساعدنى عشان اقدر اساعدك..
-(مريم بنت مالك بن ابو سن ابن ال النفر الذى يدين لملوك الايام السبعه الذين يدينون بدورهم للملوك العلوين)
_تانى يا ماهر ..
-كانت صعبانه عليا بسبب الى اتعرضتله من ورايا كنت عاوز مساعدتها وعاوزها تتحرر .
-وحررتها ؟
حضرت الطريقه واستخدمت كل الى اتعلمته م الكتاب فى السنين الى فاتت .
صرفت عمار المكان وبدأت اتلو التعازيم (بحق الملوك العلوين الذين لا يدينوين سوى للواحد الاحد الصمد ، القادر ، الجبار،القهار ،مالك الملك ، سخرو لى مريم سخرو لى مريم بنت ال نفر ام داغر الهجين لخدمتى وتحت امرتى ، واذا عصت ، فلينزل ملائك مسخرين بأمر الخالق ليخطفونها الى اقصى ما قسى ، ايها الملوك العلوين بحق الخالق ،القادر ، سخرو لى مريم ابو سن )
بدأت كل حاجه فى الاوضه تتهز بحركه بطيئه ثم زادت درجه حدتها تدريجيا حتى بدأ الاثاث يقع ، وظهر سكين بيشق السجاده من تحت زى زنب سمكه القرش حسيته جاى ناحيتى وهيطلع مكانه حاجه لكنه دار لورا على السجاد ولقيته بيرسم نجمه سداسيه وبعدين اشتعلت النجمه بالنار .نار زرقا هاديه حسيت بشعور خفيف بالراحه بعد كده ظهرت مريم متكومه فى منتصف النجمه السداسيه .
معرفتش اقول ايه ، بس بصتلى وكان فى عنيها شوق ليا وكما قال احدهم 'ان لم يذدك البعد حباً فأنت لم تحب حقا'
ان جيت للحق يا شيخ كنت مشتاق للنزوه المشينه دى ..
احتضنتها ، وحكتلها عملت ايه عشان ارجعها وحكتلها مستجدات حياتى ، خاصه مشاكل الامتحانات ...مريم احتوتنى ...
فى الامتحانات كانت واقف جمبى بتقولى الاجابات من ورق وكتب حفظتهم ، غيبا .
دايما نهايه قصتى بتكون بأنى نجحت وبقيت الاول بس دى كانت البدايه حسيت بروعه انك تكون الاول ، وغيرت نيتى فى انى ارجعها لعالمها ..
وتناقشنا فى موضوع ابنى داغر الى انجبته منها وانت قتلته...
سألتها ازاى ده حصل وازاى ممكن بنى ادم يقتل جن او بنى سوميا (سوميا هو ابو الجن كما ادم ابو البشر)
قالتلى ان داغر كان هجين نتاج بشرى وجن وده خلاه ضعييف ، لان دى طبيعته بشرى ، والجن مثلا يا ماهر لو تشكل فى شكل بشرى بيفقد 99 % من قوته وممكن لسعه نحله تقتله ..
كانت صحبه مريم مثاليه خاصه وانا ليا اليد العليا وانا المتحكم فيها ، ولكن لا تسير الرياح كما تشتهى السفن ..
عمود نور الشارع كنت بشوف عليه بليل زى تعبان اناكوندا ملتف عليه من اوله لاخره ، اشرت لمريم فخافت ،
فى ايه يا مريم ؟
سألتها وقالت ان ده مارد ابن عمها المارد(والمارد هو نوع من الجن متمرد على قبيلته واهله فبيتم نبذه بسبب افترائه وبطشه )، والمارد ده ابن عمها (كيعون بن مارق) ....حياتى انا ومريم تحولت لجحيم ، كان دايما بيسببلنا مدايقات ، وانت ادرى يا شيخ الجن ازاى ممكن يدايقك ..يخوفك فكره انه موجود ومحاوطك وممكن يئذيك دى ترعب لوحدها .
فضل يلعب معانا الاعيب دى ويضعفنى نفسيا لحد ما قرر الهجوم النهارده مريم هاجمته وقالتى اهرب معرفتش اعمل ايه ولا اروح فين غير عندك حكاياتى كلها بتبتدى وتنتهى عندك انت الى بتنجدنى ..
لقيته باصص للارض ومبتسم ابتسامه تكشر عن سنانه الصفراء .
-شيخ !
_تسمع قصه ليلى والذئب يا ماهر ؟
-جاوبت بتوجس اه اتحكتلى وانا صغير.
_اسمحلى افكرك بيها يا ابو داغر ..ليلى بنت جميله ولطيفه وكان الناس كلها بيحبوها لرقتها وبرأتها وطيبه قلبها ، وكان بيلقبوها بذات الرداء الاحمر لحبها ارتداء رداء صبغته باللون ده ،جه فى يوم مامتها عملتلها كعك وقالتلها وديه لجدتك فى كوخها فى الغابه ، بس اوعى تكلمى الغرباء ..
راحت ليلى وقابلت الذئب وطبعا لطيبه قلبها تحاورت معاه لطيبتها وحكتله هى بتعمل ايه ورايحه فين ، قالها تسابقه لبيت جدتها ويطلع هو من طريق وهى من طريق ،راحت ليلى تنتقى زهور لجدتها فى الطريق ، والذئب لدرايته بالغابه مشى فى طريق مختصر ووصل قبلها ، وخبى جدتها فى الدولاب وارتدى هو ملابسها .
فى الوقت ده كانت ليلى جات وخبطت على الباب والذئب قالها ادخلى دخلت احتضنته لانها معتقده ان هو جدتها كانت مستغربه شعرها الكثيف بس تغاضت عن ده لانها بقالها فتره مشافتش جدتها وسألتها جدتى هى عنيكى كبيره ليه ؟ عشان اشوفك كويس يا ليلى ،جدتى شعرك كثيف ليه ؟ عشان ادفيكى فى حضنى يا ليلى ، جدتى انتى بوقك كبيره ليه ؟ عشان اكلك يا ليلى! وقام يهجم عليها وجدتها خرجت م الدولاب ، بس الصياد سمعهم وجه قتل الذئب .
بس ماهر هنا مفيش صياد!؟
سمعت صوت تأوهات غرضها التحذير من الدولاب فى الطرقه قدامى وفجأه سقط منه الشيخ !!!
واحمرت عنين الشيخ التانى قدامى وقام اشار بصباعه عليا وحسيت انى بتخنق ولسانى اتربط مش اعرف اقرى آيه الكرسى حتى ...
_كيعون بن مارق الحارق يا ماهر ..
ورفع صباعه وطرت فى الهوا بتخنق وحسيت بروحى بتتسحب وتذكرت حاجه قالتها مريم اتسرسبت مع روحى.
***فلاش باك
والجن مثلا يا ماهر لو تشكل فى شكل بشرى بيفقد 99 % من قوته وممكن لسعه نحله تقتله ..
***
جسمى شد وحلاوه الروح الى فاضله منى خلتنى انط عليه واخنقه واضغط على حنجرته ، وقلت بغل :
_ اياً كان يا كيعون الحارق هتتحرق بنارى..
وطيت جنب ودنه وهو بيخلص .
_مش مهم عدم وجود الصياد فى الحكايه حبكه القصه ان الشر بيموت يا كااااايعون.
وصرخت اثناء ذكرى لاسمه ، الشيخ الحقيقى فضل يحذرنى ..
_سيبه يا ماهر متقتلوش ..
فكيته وتلفظ انفاسه وقال كيعون وهو بيلهث ...
_لازم حد يموت مننا يا ماهر عشان يحصل مريم هتكون وحيده جدا فى عالم الاموااات .
وكانت تلك القشه التى كسرت ظهر البعير.
بكل غل اقتلعت عنيه من مكانه وحطيتهم جوه بوقه وشفته بيشهق وجسمه همد ثم تحول لرماد بين اديا ..
-انا قتلته قتلت المارد كيعون بن مارق ..
فضل الشيخ يصرخ يا غبى يا غبى ؟ واهله مش هيثأرو منك انت فى عداء مع ال نفر كلهم دلوقتى ...

يتبع................