اللؤلؤ والمرجان فى تحضير عشق الجان

الجزء الثانى

مرت كل حاجه رغم انه استمر يحصلى حجات واشوف حجات ، وامى كانت بتقول انى بتكلم بكلام غير مفهوم وانا نايم وصوتى بيتغير بس الحمدلله مع زياراتى للشيخ كل حاجه اتحسنت ..تقريبا اتحسنت..
معدتش بشوف لا مريم ولا دومنيك وحتى(g نيمسيز ) بدخل ع الشات بينا لقيته(مستخدم فيس بوك) ..
اما صفحته اتقفلت او عملى بلوك ، بس الاحتمال الاول اكيد لانى بحثت عنه بصفحه تانيه مش موجود ! ..
تانيه اعدادى مع الى حصلى ده خرجت منها بمجموع مش حلو قوى رغم انى دايما بطلع م الاوائل ..
اتعرضت لضغط نفسى م الاهل غير الى كان بيحصلى ومعرفش ليه مقدروش ظروفى خصوصا امى الى كانت بتاخدنى للشيخ بنفسها ..
بس كل حاجه عدت ..
وبدأت سنه دراسيه جديده (الصف الثالث الاعدادى) محدش يستقل بيا ولا يقول اندر ايدج عليا كلكم كنتو شايفينها حاجه كبيره وسنه مجموع لما كنتو فى سنى ..
وكنت ناوى اجتهد واجيب مجموع حلو..
ولكن !
لا تجرى الرياح كما تشتهى السفن ..
فى الفصل فى حصه الدراسات الاجتماعيه وانا مركز مع الاستاذ ..
ومع الخريطه الى بيرسمها على السبوره.
فجأه حسيت بغثيان وعنيا كانت بترمش بسرعه لا ارادياً..
وسامع صوت طنين وبوقى عمال يترعش ..
وجسمى اتشنج وشد عليا والدنيا ضلمت ....
واخر حاجه شوفتها زمايلى والمدرس وهو بيجرى عليا ..
لما صحيت لقتنى فى المستشفى وابويا وامى حوليا ..
وامى عماله تعيط ..
الدكتور قال انى عندى صرع ..
بس كان مستعجب ازاى؟؟ قال ماهر مفيش اى حاجه تأهله للصرع ولا حتى وراثيا ...
كانت فى توجيهات خاصه لابويا وامى قالها الدكتور عشان يتعاملو مع مرضى.
بس غضيت الطرف عنها لانى كنت حاسس بغصه فى حلقى ..
وعايز اعيط من الى انا فيه ..
الممرضه الى كانت بتديلى العلاج ..
كأنها حاسه بيا فهمتنى ان ده مش هيوقفنى عن الدراسه ..
وان بس فى تعليمات للمدرسين الى هيتعاملو معايا ..
زى معرفه المدرس بالادويه ورقم الدكتور المعالج ومسموح ليا اشارك فى الرياضه..
وحصل زى ما قالت ورحت المدرسه رغم خوف اهلى عليا ...
فى المدرسه كنت حاسس انى بخوف ..
والناس كلها بتتجنبنى ..
لمجرد جهلهم بمرضى ..
وده زود همومى ..
فى مره وانا سهران ليله الخميس ..
كنت قاعد برسم ع المكتب صوره بنت لانى اتعودت ارسم ملامح الوجوه من على اليوتيوب ..
بعرف اظبط استداره الوش والعيون والدقن بالقلم الرصاص ..
بس وانا برسم حسيت بغثيان وسمعت صوت طنين واغما عليا ...
كنت قدام بيت كبير ومن بعيد شايف ناس اشكالهم غريبه بيتخانقو مع بعضهم وصوتهم عالى وسمعت كلمه فرت منهم:
الواد ده لا يمكن نعترف بيه ده مش من نسلنا ده مهجن ولازم ... لازم يموت..
ده عار على انا (مالك بن ابو سن ابن ال النفر الذى يدين لملوك الايام السبعه الذين يدينون بدورهم للملوك العلوين )
وفجأه اختفو وظهر قدامى وش مريم!
كانت منوره وجميله زى عادتها وشايله بين اديها لفه فيها طفل رضيع قربت الصوره على الطفل كان شكله بشرى بس عنيه بقت مشقوقه زى القطط فجأه واحمرت..
ومريم بصتلى بصه ليها معنى وفى دمعه سرت على خدها وعنيها بقت مشقوقه زى القطط واحمرت ...
شهقت من الخضه فجأه ببص حوليا لقتنى فى اوضتى وعلى سريرى ..
لكن حاسس بألم فى صدرى وهدومى غرقانه من العرق وحلقى جاف وعطشان ..
قومت علشان اشرب اتكعبلت فى حاجه وانا ماشى (كشكشت) كانت ورقه ببص فيها..
واترعبت م الى شوفته ..
صوره مريم وفى دمعه من عنيها على خدها ..
نفس استدارت العين ورموشها المرسومه بأدين ملائكيه بشرتها الى ناصعه زى بياض الثلج لولا ان الرسمه بالرصاص ..
انفها الصغنن ، شفايفها الى بيشبهو ورده متفتحه مع شروق الشمس والندى مديها لمعه بقطراته عليها ..
جمال مش معقول اكون انا رسمته ..
رجعت اوضتى مش فاهم ازاى كده ..
حطيت الصوره جمب للتسريحه وفضلت باصصلها ومستغرب ...
ومحنى رقبتى باصص للصوره ..
لكن صورتى للمرايه شوفتها بطرف عينى واقفه مستقيمه ..
ببص فى المرايه عنيا بقت مشقوقه زى القطط واحمرت بحرك ايدى قدام المرايه بشاورلى مش مستوعب !! .
فجأه خرج شبيهى راسه من المرايه ووقعت على دماغى وجسمى اتشنج ...
فى الصبح لقيت امى بتصحينى ..
_ يلا يا ماهر عشان تروح المدرسه ..
قمت وانا بفرك فى عينى وقلتلها:
يا ماما النهارده الجمعه مدرسه ايه ؟
_الى واخد عقلك يا ماهر النهارده التلات يا حبيبى ..
التلات ازاى ؟؟؟ ده امبارح كان الخميس ..
امى قالت ان الفطار هيجهز لحد ما ادخل الحمام وسابتنى مستغرب ..
لبست ورحت مدرستى ..
لقيت الكل متغير معايا فى التعامل ..
الكل بيحاولو يتقربو منى ويصاحبونى..
حتى الى كانو بيتنمرو عليا ..
كنت مستغرب مع ان ده الى كان نفسى فيه ..
غسلت وشى فى الحمام برفع راسى ابص للمرايه ..
لقتنى مبتسم وشفايفى اتحركت وصوتى مختلف : ازيك يا بابا ..
اتخضيت وبعدت وشكلى فى المرايه..لسه واقف قدام الحوض ..
تماسكت وقلت بخوف : انت مين ..
رد عليا : سؤال غلط انت الى مين انا( داغر بن ال نفر) الى اتنبذ من عالم الجن بسببك انت بتعمل ايه فى جسمى ..
جسمك !!
قال بصوت يخوف اجش وشعره وقف وعنيه انشقت زى القطط وبقت حمرا : ايواع جسمى ...وده عالمى الجديد..
حسيت بجسمى بينمل ..
استمرت الامور لحد ما حكيت لاهلى ان بدأ يحصلى الى كان بيحصل السنه الى فاتت ده غير الصرع فأمى ودتنى للشيخ ال فى البلد الى جمب مننا ..
حكيت الشيخ الى بيحصلى فسألنى بوضوح :
_ ماهر السنه الى فاتت هل مريم او دومينك واحده منهم خلتك تنام معاها ..
بصيت للارض فى حياء ..
*
فلاش باك (الجزء الاول)
الشيخ حذرنى وقالى اوعا واحده تستميلك وتخليك تنام معاها ..
بس ..بس انا بالفعل نمت مع واحده منهم ..
*
سكوتك رد كافى يا ماهر ..
داغر ده يبقا ابنك من مريم ..
قلت : ابنى ازاى ؟ ده كل حاجه حصلت من سنه .
بصلى وقال : السنه فى عالم الجن يا ماهر ب ١٦ سنه من عندنا ..
يعنى ابنك ده من سنك ..
ونظرا لانه هجين مريم خلفته من مخلوق ابن طين ..
اتنبذ وبعدوه من القبيله واكيد مريم اتعرضت لعقاب شديد واتحبست ..
فدلوقتى (داغر) بيحاول ياخد القصاص منك و يعيش فى جسمك وتبقا انت على الهامش ملكش وجود ..
لساك يا ماهر ضعيف الايمان ومبتصليش ولا بتقول اذكارك عشان تحصن نفسك ..
عنيا دمعت بندم ..
ورفعت رقبتى لا اراديا وقلت بصوت عالى غريب..
_ وهل الصلاه والاذكار هتحميه منى ؟ انا نصف بشرى مش من الجن عشان تنزل الملائكه تخطفنى لو اقتربت منه انا ليا وجود مادى فى عالمكم ..
اذا كان ليك وجود مادى اخرج انت مش محتاج جسم ماهر ؟..
لأ لازم اخد مكانه زى ما اتسبب فى الى انا فيه ..
اخرج من جسمه وهاخد عليك عهد بعدم ايذائه مره تانيه والا هأذيك ..
تبسمت وانا ببص للشيخ بسخريه ...
فقال الشيخ ( بحق سليمان وبحق العهود السليمانيه وبحق رب سليمان اترك هذا الجسد )
اتعصبت وحسيت عروقى فطت وبتتحرك ..
_(ولسليمان الريح غدوها شهر ورواحها شهر واسلنا له عين القطر)
_ اخرج يا داغر .
مش خارج ...
_ (ومن الجن من يعمل بين يديه بأذن ربه)
صرخت وانا حاسس بكل حاجه بتتهز والنار بتعلا قدام الشيخ ..
_ (ومن يزغ منهم عن امرنا نذقه من عذاب السعير)
صرخت بكل ما اوتيت من قوه وحسيت بحرق فى جنبى ..
قلتلك مش هتأثر معايا الحجات دى انا مختلف عنهم ..
_(وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ).
تشنجت ودخلت فى حاله صرع اخرى واترميت على جنبى .
وفضلت اتقيأ اشياء لونها اسود واغما عليا ..
فضلت اروح للشيخ كل يوم بدون انقطاع وهو بيعالجنى ..
ده حتى نوبات الصرع بطلت والشيخ قالى ان سببها مكانش مرضى بل الصرع كان رد فعل من جسمك فى محاوله للتخلص من داغر ..
حتى الدكتور المعالج استغرب انا ازاى خفيت ومكنش مصدق بتاتاً ..
ولكن كنت فعلا بقيت احسن ..
رغم كل الى حصلى الا انى فى اخر شهر قبل الامتحانات مبطلتش مذاكره وكنت بجهد نفسى وبطبق بالايام وخايف ان الى حصل يتكرر وحاسس انى هجيب مجموع وحش ويمكن اسقط ...
امتحنت وخلصت ..
وجبت ٢٧٨ من ٢٨٠ وكنت الاول على المدرسه ..
ان بعد العسر يسر ..
كان يوم سبت يوم ٦/٦ يوم اما عرفت النتيجه ...
فضلت فرحان حتى لما نمت و بصيت للسقف .
وشفت شقوق جديده فى السقف مش عارف بيتهيألى ولا لا لكن الشقوق كانت بتكون اسم (داغر ) ...
عنيا كانت بتغمض تلقائى بدون اراده وبتقلب بحاول اقوم عشان منامش لمحت على المرايه عباره(سأعود) بلون احمر قانى ..

يتبع..................