اللؤلؤ والمرجان فى تحضير عشق الجان

الجزء الاول

زى اى بدايه روتينيه مضطر اقول اسمى وسنى وعنوانى قبل ما احكى .
عموما انا ماهر عندى ١٦ سنه تاريخ ميلادى ٧/ ٣ /٢٠٠٤ ، برج الجوزاء..
من اسوان بالتحديد من النوبه بالمناسبه حابب اوضح معلومه النوبه تعتبر جزء من اسوان ، مش كلنا بشرتنا سمره يعنى الناس متصوره ان احنا كلنا سمار البشره لكن لا احنا فى النوبه بس اغلبيتنا كده، واحنا محافظه كبيره ومراكزها والقرى الى فيها كتير فبوضحلكو ان الصوره الى مديهالكو الاعلام غلط .
والى مديهالكو فيلم مافيا بتاع احمد السقا لما حسين فهمى يجى اسوان على انغام اغنيه ( زى ما هى هيبها بحلوها ومرها ) ها ها ها عموما هختصر وابدأ احكى .
من فتره كده كنت بدأت اسمع البرنامج الاذاعى (كلام معلمين) بتاع احمد يونس اكيد عارفينه فى البدايه كنت بخاف وانا بسمع القصص بتاعته خصوصا القصص الحقيقيه وكنت مبعرفش انام وبيجلى ارق وبفضل افكر كتير فى الحجات الى بسمعها .
الجن ...المقابر ...المريات ...عمار المكان ...العفاريت ...الناس الملبوسه ... القرين...السحر ..وحجات كتير تانيه انا مكنتش بقدر افوت حلقه والحلقه الى بتفوتنى كنت بسمعها على اليوتيوب .
ده غير افلام الرعب الى بقيت بتابعها اول باول ..
الافلام واحمد يونس بقو متعه بالنسبالى مش خوف بقيت بستمتع وانا بحس بالادرينالين وهو بيندفع فى جسمى وضربات قلبى بتتسارع من الخوف ..
كنت بحس بنوع ..نوع من النشوه ...
بس رغم كل ده مكنش ليا اى تجارب تخوف او اى تجارب فى حياتى عموما ..
بس كان نفسى اجرب حاجه زى باقى الناس ..
كانت الفكره دى بتلح عليا كتير ..
بس كنت بتناساها واتابع الافلام والقصص الاذاعيه ..
لحد ما جه وقت ما بقتش الحجات دى تخوفنى .
اتعودت على كل حاجه ..
وكان لازم التغيير ..
كنت عايز احضر جن واتواصل معاهم ..
اقرا فى كتب السحر ..
اروح المقابر بليل ..
كنت عايز اعمل اي حاجه من دى لكن ايه بالظبط معرفش عايز اجرب وخلاص ..
والصدفه وقعتنى فى شخص ممكن يساعدنى اسمه ( g نيمسيز) ده اسم صفحته على فيسبوك ، اتعرفت عليه فى جروب قصص رعب ..
حكالى تجاربه مع الجن ..والاسقاط النجمى ..الخ...
كنت بسأله هل الحجات دى حقيقيه؟ ..
قالى انه بيتعامل مع الجن والخوارق اكتر ما بيتعامل مع الناس ..
بس صفحته غريبه متخلكش تعرف اى معلومات عنه ..
قالى انه هيساعدنى ، وادالى كتاب اليكترونى اسمه (اللؤلؤ والمرجان فى تحضير ملوك الجان ) *كتاب سحر*
الكتاب مليان برسومات هندسيه وكلام غريب كتير مفهمتوش ...
بس بدأت اقرى فى الكتاب من ع الفون ..
وكان فى حجات مفروض اقراها واكررها يجى ٣٠٠ مره فى اليوم ..
ابتدى يحصلى حجات غريبه كتير ..
اولهم الاحلام دايما يجيلى فى الحلم بنتين واحده حلوه ووشها منور والتانيه وحشه وملامحها بشعه الاتنين كانو بيتخانقو عليا ...
معرفش ليه ، بس كانو عايزينى ودايما بيخيرونى بينهم هما الاتنين ..
علطول بصحى مخضوض م الحلم ده وعرقان ومغرق السرير وحلقى جاف جدا وضغطى منخفض ...
كنت عايش فى عالم تانى وفى الواقع لما بصحى بنعزل فى اوضتى بعيد عن اهلى وعن صحابى ع الفون وكنت بحكى ل( g نيمسيز) كل حاجه من الى بتحصل ...
وبيقولى اقرا عزايم معينه وارسم طلاسم على مرايه الحمام ..
كنت بحس بهوا ساقع بيلفحنى وانا بأدى الطقوس دى .
وفى مره من المرات قابلنى واحد صاحبى اسمه (....) همتنع عن قول اسمه او تعريفه بس قالى بوضوح : بطل الحجات الى بتقراها دى ..
قلتله انت ايه عرفك ..
قالى انت بتشوشنا واحنا بنقرا الورد _بكسر الواو_ كل يوم وقلت اجى احذرك من ال بتعمله ..
صاحبى كان بيتبع جماعه من المتصوفين وبيحضر حلقات ذكر وهو شخص متدين ما شاء الله ...
بس كان ماشى ورا شيخ مش مظبوط .
لان الى اعرفه عن الصوفين ملوش دعوه بالى بيعمله هو وجماعته المغيبين ..
فى ليلتها نمت وقريت العزيمه ..
قابلت البنتين الحلوه ام وش منور الى عرفت يومها ان اسمها مريم وهى مسلمه والتانيه ام شكل وحش الى بتئذينى وبتعذبنى قالت انها كاثولوكيه واسمها دومينيك..
وعرفت بعدين انى دى طائفه من المسيحين ..
يومها الاتنين قالولى هناخدك للعالم بتاعنا ..خوفت !!!! ...بس وافقت ..
المكان يصعب وصفه كان خيالى زياده عن اللزوم ..
الاتنين اكلونى اكل شكله غريب جدا بس طعمه حلو اوى .
كنت مبسوط بكل حاجه بس الى عكر صفو المياه هو التنافس الى بينهم عليا الاتنين بيحبونى وكل واحده عيزانى ليها لوحدها ولما خيرونى بينهم اختارت مريم لانى حاببها م الاول فا دومينيك احتجت وغضبت عليا وضربتنى وعذبتنى ومريم كانت بتحاول تحمينى منها بس لما كانت بتزعق كان شكلها الوحش ده بيبقا احلى ١٠٠ مره من الشكل الى بتتحول ليه فى ثورتها ..
بتبقى قصيره اوى شبه القرود وجسمها كله شعر بس ايديها طويله ضعف جسمها وليها قرنين صغيرين زى قرون العجول والجواميس ، وعنيها مشقوقه زى القطط ...
ومن هنا بدأ عذابى بقيت اصحى من النوم الاقى نفسى فى الشارع وجسمى كله متغطى بالتراب ..
لما رجعت البيت امى فتحت وكانت مخضوضه سألتنى :كنت فين وايه الى مبهدلك كده انت كويس ..
كنت مرعوب مقدرتش احكى...
نمت وفى الصبح حكتليهم كل حاجه ...
امى ودتنى لشيخ فى البلد الى جمب مننا ، حط ايده عليا وقرا كنت بسمعه يهمس ويرفع صوته عند اى ذكر لله او اى ايه قرأنيه ، كان مغمض عينه وهو بيقرأ حسيت بأيده بترتعش عليها وفتح عينه وشهق مره واحده .
وسألنى انت بتقرا يا ماهر ..
قالى بتقرا ايه ..
قلتله انى بحب ادب الرعب ، ضحك واتكلم معايا وحادثنى
وقالى :حتى نجيب محفوظ ليه قصه قصيره فى ادب رعب فى واحده من مجموعاته القصصيه ..
وسألنى بقا بما انى بقرا كتير هل فتحت اى كتاب غريب ...
مقدرتش اكذب عليه وحكتله الى بقراه فى كتاب (اللؤلؤ والمرجان فى تحضير ملوك الجان ) ...
سالنى كنت بتشوف ايه ؟ .
قلتله بنتين واحده اسمها مريم وواحده اسمها دومينيك ..
تعرف الجن العاشق يا ماهر ؟ ...اه اسمع عنه بيجى عند البنات سمعت عنه ..
كنت مبسوط انى بجاوب بسرعه لما هو يسال وباين قدامه انى عارف كل حاجه ..
الجن العاشق مش للستات والبنات بس يا ماهر وبما انك فاهمنى الجن العاشق ده بيبقا حاله شاذه جدا فى عالم الجن لان مثلا انت لا يمكن يعجبك شكل قرد صح ..اكيد صح وده بسبب قوامه وشكله المقرف وشعره الغزير بالنسبالك، هل الجن بشكله ده من قرون لسواد لشكل بشع هيشوفك حلو؟ لا طبعا دى حاله شاذه جدا وانحراف عن المسار ومحدش يقدر ينحرف عن المسار بكل حريه غير الامراء والملوك فى عالم الجان لمكانتهم ...والامير او الاميره بيكون حاسس بغرور ومستحقر لكل الى تحته فبيميل للاختلاف بيعشق البشر ...
مش اى بشر لا ! بيعشق البشر الى بينحرفو عن المسار ويبعدو عن ربنا،، عشان كده حصلتلك حاله تلبس من جنيه اسمها مريم من قبيله النفر ودول من الجن الى سمعو القرأن من سيدنا محمد (صلى الله عليه وسلم ) ..
بِسْمِ اللَّهِ الرَّحْمَنِ الرَّحِيمِ
قُلْ أُوحِيَ إِلَيَّ أَنَّهُ اسْتَمَعَ نَفَرٌ مِنَ الْجِنِّ فَقَالُوا إِنَّا سَمِعْنَا قُرْآنًا عَجَبًا (1) يَهْدِي إِلَى الرُّشْدِ فَآمَنَّا بِهِ وَلَنْ نُشْرِكَ بِرَبِّنَا أَحَدًا (2)..صدق الله العظيم .
وتلبستك ايضا جنيه نصرانيه بينها وبين مريم عداوه ومنافسه وهى من قبيله دغش ودى متفرعه من بنو الاحمر ..
مريم بتحاول تبعدك عن المسار السئ ده بس مكنتش عارفه ازاى دومينك عرفت تجرجر رجلك رغم كل حاجه فى الاخر ..
خوفت الظاهر انى اضعف من انى استوعب ده كله : ايوه دخلو جسمى ازاى وهيطلعو ازاى انا مرعوب ..
رد عليا وهو بيحاول يهدينى ..
دخلو زى اى طفيلى ما بيدخل جسم الانسان زى البلهارسيا والسركاريا والاترفيرس..
كلها امراض وبتتعالج ، اعتبر الى انت فيه ده مرض ودواه عندى بأذن الله ..
رحت عنده على جلسات بعد كده كنت بنازع فى كل جلسه كان جسمى عمال ينحف ووزنى ينقص..
الشيخ حذرنى وقالى اوعا واحده تستميلك وتخليك تنام معاها ..
بس ..بس انا بالفعل نمت مع واحده منهم ..
والحمدلله تحسنت حالتى مع انتظامى فى الجلسات مع الشيخ ..
بس فى وقت قريب كنت بغسل وشى قدام مرايه الحمام ، لقيت ملامح مختلفه ملامح قرد ، والقرد ده فيه شبه من دومينيك ...!!!!

يتبع..................