One-Week Date Project

Chapter Eleven

Na-bo-bore si Pia habang hawak ang remote at pinaglilipat-lipat ang channel sa TV. Nang walang mapanood ay nagsalang siya ng pelikula. It was already 11PM at hindi pa rin siya makatulog. Si Trisha naman ay hindi pa rin dumadating ng bahay.

Naiinis pa rin siya simula nung mahuli si France na may kahalikang babae. She was supposed to be with France dahil ikatlong araw na ng date, pero nawawala ito. Siguro ay hindi na nakatiis at sumama na sa mga babae nito.

"At ang kapal, ha. Sa labas pa talaga ng mall nakipaglandian ang bruho." Naalala na naman ang eksenang inabutan kasama ng magandang babae. "Kinakapatid daw. Napaka-sinungaling talaga. Ugh!"

At ang lalo pa kasi niyang ikinaiinis ay ang kaalamang naaapektuhan siya. Hindi naman siya dati affected ni France kahit na kalat na kalat na ang reputasyon nito bilang palikero. Akala niya kasi ay may nagbago na dito. Asa pa siya.

Nasa gano'n siyang pag-iisip nang may bumusina sa harap ng apartment. Hindi naman siguro sa kanila 'yon dahil gabing-gabi na. Inignora lang niya ito. Pero makalipas ang saglit ay bumusina na naman ang sasakyan. This time, sunod-sunod pa.

Dali-dali niyang binuksan ang front door. Nakahanda na ang dila niya na tarayan ang may-ari na nambu-bwiset pa ng tao gayong gabing-gabi na.

"Will you stop tha—France! Ano'ng ginagawa mo dito?"

Bumaba si France ng sasakyan. May dala-dala itong kumot.

"Kumuha ka ng unan," utos nito sa kanya.

Inilatag nito ang kumot sa ibabaw ng hood ng kotse nito. Nang mapansin siguro nito na hindi siya kumikilos ay ipinagkrus nito ang mga kamay sa dibdib.

"Do you want to continue with the project or not?"

Pagkarinig sa salitang 'project' ay saka pa lang siya parang natauhan. She ran to the bedroom and picked two beaded pillows. Lumapit siya kay France at ibinigay iyon.

Pia watched him as he arranged the pillows on top of the hood. Pagkatapos ay sumampa ito sa hood at humiga sa kumot. He looked at her.

"What are you still doing? Come up here and lie with me."

Naghihinalang tiningnan niya ito. Humalukipkip siya. "Ano'ng balak mo'ng gawin sakin, ha?"

Walang salitang bumangon si France at hinila siya palapit dito. She ended up in his arms habang nakasandal siya sa dibdib nito. She could feel the lean muscles on his chest and the beating of his heart against her ears.

Tumingala siya. She saw him looking at her eyes with something indefinable. Napalunok siya. Whenever he looked at her, it seemed like there was always a giant force that trapped her inside his eyes. Ang pakiramdam niya ay para siyang laging naliligaw kapag tumitingin ito sa mga mata niya. Sigurado ay sanay itong ginagawa iyon sa lahat ng babae dahil ilang beses na siya nitong nagagamitan no'n. She had no power to counter the effect of those eyes.

Sa sobrang inis niya dahil nahihirapan siyang labanan ito sa titigan ay dinutdot niya ang mga mata nito. Dahil doon ay nabitawan siya ni France at sinapo ang mga mata.

"Aww! Pia! What did you do that for?" angil nito, pilit iminumulat ang mga mata.

Binelatan niya ito. "Dapat lang iyan sa'yo. Ginagamitan mo na naman ako ng alas mo dahil alam mo'ng inis pa rin ako sa'yo."

"That's unfair. I didn't even do anything." Nakita niya na bumaba ito ng hood at tinangkang lumapit sa kanya. Mukhang gaganti pa.

Nanakbo siya pabalik ng apartment. Kinuha niya ang walis-tingting na nasa tabi ng pinto. Iniharang niya iyon sa mukha nito.