جبروت السنين

البارت الثالث

#جبروت السنين
الكاتبة :Sarah
البارت الثالث

جنت اضحك واسولف وية هذت وذاكَ
علـه غفلة ولكيتَ الناس كلها تجور
طرت بجناح واحدَ للفرحٰ فد يـومَ
شو حتى الفرح ردنيَ بجنـحٰ مكـسورِ
ضيـعتَ البخـت وانه الجنت محضوظ
حتىٰ ويه العشك ماعشــت لحظة بنورَ
يا كلـبـ💔ـبي شكثر عذبتكَ أنتَ وياي
أحس كلبيَ اعلـه كلبيَ منَ الحزنُ مفطورّ

كال بابا : انتن بناتي وروحي من الدنيا وياريت تقدرن وضعي وتسهلن الامور عليه ومتصعبنها راح احجي ورايدجن تسمعني وتمشن بشوري

كتلة :كول بابا انسمعك

.. بوية انتن لازم تروحن وياي للناصرية تعيشن يم عماجن مايصير اعوفجن بوحدجـ

قاطعتة : بابا نبقى يم خالتي ام سالم

.. لا مايصير تبقن يم خالتج عدها ولد ورجلها رجال غريب والدنيا متتامن وعمجن حاجاني الصبح وكال البنيات يجن يمنة هناك لان الوادم تاكل وجوهنة ونصير علج بحلوك الناس شيكولون عافو بناتهم يم خالتهن ناس غربة علينه لا بوية مايجوز وكلام عمجن صح وعين العقل انتن لازم تجن ويايه للناصرية واني راح ابقى يمجن وانتن مارايحات الغربة رايحات لعمامجن وتكعدن ابيت ابوجن معززات مكرمات وشحدة ليمسجن بحجايه اكص راسه

ماتحملت كلام بابا من هيج كال كمت للمطبخ وفتحت الحنفية وكمت اذب المي ع وجهي اريد استوعب بابا شديكول
شلون اريد انسه لسمعته شلون يريدني اعوف بغداد
الكضيت عمري بيها مستحيل اروح للناصرية

شوية وسمعنه صوت الباب تندك كام بابا وفتح الباب
دخلو عمي وعماتي
وجانت وحدة من عماتي لابسه شال وردي طلعت عيوني من الصدمة يربي شهالنفاق الصبح من رحنة جانت لابسه شال اسود
وهسه لابسه الوان الهالدرجة ماحترمت اخوها ولا كأنما الميتة مرت اخوها وام بنات أخوها بقيت اطحن بنفسي خرب بهيج وكت حتى الميت مايسوولة اعتبار

لفتت انتباه بابا كاللها : هاي شلابسة
جاوبتة بمنتهى الصلافة : شلابسه يعني شلابسه شال وردي اشوو الاربعين مال مرحومة وخلص المن ابقه بالاسود وبعدين شفته هناك وعجبني فشتريتة شلون ابقه طول العمرة حزينة

ضليت مصدومة باوعت ع شهد هم نصدمت من كلام عمتنة شلون هيج مااعدها احترام لبابا ولا ذرة مستحة
صحيح أربعين ماما طلع وهي ممجبورة تحزن عليها بس الواحد لازم يقدر ويستحي ويحس ع روحة بس شكلها عمتي توازت الا تلبس الشال الوردي

خليتهم ورحت للمطبخ كعدت واجتي شهد وراية
دخل بابا وكال :سوو جاي لعمكم

كامت شهد وخلت القوري ع النار واندارتلي
لزمت ايدي وكالت : حور حبيبي ميصير الدتسوينة بنفسج صح الراحت بس مو هيج شوفي وجهج شلون صاير ادري انتي متعلقة بأمي واني هم مثلج بس حاولت اقوي نفسي واوكف ع حيلي واتغلب ع مصيبتي لتدفنين روحج هالشكل وفكري بابونة ترا خطية هو هم تعب وبداعت امي عندج كومي اكليلج لكمة والله راح تموتين