قصص ابو بغداد

لان احبها

كلتله خوية اريد اخابر اهلي .. السالفة هيج وهيج .. الرجال بجى .. بجى والله العظيم بجى و أول سوال سألني عليكم (جهالك وينهم) من كلتله منومهم بالغرفة كام يبجي اكثر .. انقهر عليكم .. و رأسا فوتني و عافني بالصالة اخابر و راح حاجى مرته و بناته و سمعت صوت مرته كامت تلطم و تبجي .. الناس بهيج مواقف تبين معادنها .. و خطية هالعائلة جانو طيبين و معدنهم ذهب .. خابرت اهلي و رأسا جوي و طبعا مرته للرجال عافتني يم رجلها وهي راحت لبيتنا يمكم بقت بس مفاتت عليكم بقت برى اخاف انتو تكعدون هي تكون موجودة .. و جوي اهلي و نصبو جادر و امي رادت تاخذكم بس اني مقبلت .. كلتلها جهالي هنا يبقون .. لان بصراحة اني كل طلعتي من بيت ابوية من ورى المشاكل .. خواتي (عماتكم) كلش عصبيات و ميتحملوكم ..و رحت دفنت امكم و امي و عماتكم بقو يمكم .. و سويت الفاتحة و خلصت الفاتحة و بدو الناس يروحون يرجعون لحياتهم و لبيوتهم و بقيت بالاخير بس اني و امي يمكم .. طبعا انت الجبير كل عمرك سنتين .. مجنت تفتهم الوضع كله .. صح بجيت على امك و هواي صيحت ماما ماما و دورت عليها هواي .. بس امي (بيبيتك) و عماتك لهوك و اني هم شوية لهيتك لحد متعلمت على عدم وجودها .. بس المصيبة نور اختك .. صغيرة كلش .. ترضع بعدها .. كمت اني اسويلها الممه .. و بديت اتأقلم على تربيتكم بعد مجنت معتمد عالمرحومة .. أمي انتقلت عاشت وياي علمودكم .. و رجعت للشغل اني بس جنت اروح للشغل تعبان دائما .. لأن بليل انتو تكعدون هواي خصوصا نور .. و اني جنت انقهر على امي افززها لأن هي جبيرة خطية .. جنت اني اوديك للحمام واني ابدل حفاظات نور و اغسللها مرات .. و ورى ست اشهر من وفاة امك .. امي كالت انته لازم تتزوج لأن اني مدايمتلك و يرادلك وحدة تربي هالمساكين .. كلتلها والله والله والله .. لو اعرف ابطل من الشغل حتى اتفرغ للجهال ابطل هسه .. بس مال زواج ما اتزوج .. انتي من كل عقلج اكدر انام الليل يم وحدة غير شيماء .. شيماء حب حياتي الاول و الاخير و انتي بعينج شفتي شكد تعذبت يله تزوجتها .. و هسه بس راحت اروح ادورلي وحدة غيرها .. شلون نفسي تنطيني .. لو اعرف اموت هسه والله ما اتزوج .. من يومها انسد الموضوع و عرفت أمي اني مراح اتزوج .. و حلفت على كبر امكم و كلتلها للموت ما اتزوج .. و ربيتكم .. بصراحة تعذبت كلش لحد ما شوية كبرتو ..

من عمرك عبر الخمس سنين و اختك اربعة شوية ارتاحيت بس الي ساعدني على هالموضوع مو بس أمي … انت و اختك ساعدتوني .. جنتو عبالك اكو شي بيكم يخليكم تصيرون هادئين .. مرات جنت اصفن عليكم و اختنك و اطلع برى ادخن و ابجي .. جنت اكول معقولة هالجهال الي اصلا ناسين شكل امهم هسه يفتهمون و يعرفون امهم شلون ماتت .. لأن جنت اشوف حزن بعيونكم .. هادئين دائما و جنتو مو وكحيين .. جهال الناس اشوفهم حركيين كلش و هوسة بس انتو تكعدون بمكانكم و تلعبون بمكانكم و حتى ما اتذكر فد شوية شفتكم واحد ضرب الثاني .. انته جنت كلش تخاف على اختك من الصغر .. يعني انته نفسك تحاول تلعبها و مشفتك بيوم معتز بملاعيبك .. اكثر الجهال لو يموتون مينطون ملاعيبهم لاخوتهم و كلش يخافون على الاشياء الي تخصهم .. بس انته جنت بيدك تنطيها ملاعيبك و تلعبها .. جنت اختنك من اشوفكم يوم ورى يوم تكبرون و شيماء مموجودة .. و من دخلتكم مدرسة أول يوم الك انته اووووف لو تدري شصار بيا ..قبل متنولد انته امك جانت حامل بيك … فد يوم جنت اني وامك (الله يرحمها) متمددين عالفراش نسولف .. حالنا حال كل المتزوجين .. قبل النوم نسولف و نحجي .. فد يوم كالتلي تدري حبيبي اني شايله هم لشغلة .. كلتلها شنو .. كالت بس مو تضحك الله عليك .. كلتلها لا احجي ما اضحك .. كالت شايله هم اذا اجيب و يكبر ابننا لو بتنا و تروح أول يوم مدرسة .. شلون اعوفها هناك لو اعوفه هناك وحده ؟؟؟؟؟؟

يابه اني بيومها شبعت ضحك .. كلتلها من هسه تفكرين بهل الشي انتي مخبله ههههه .. كالت مو كلتلك مو تضحك اشو ضحكت ..

الحاصل .. أول يوم وديتك للمدرسة بيدي حتى بيومها مرحت للشغل .. تدري بطريق رجعتي للبيت بجيت و كل ميفوت واحد عرف ادنج حتى محد يشوفني دابجي .. و اربع مرات اوصل للبيت و ارجع للمدرسة .. بالاخير من رجعت كلت لأمي شنو رأيك ناخذ نور ونروح للمدرسة نبقى ننتظر عباس برى .. أمي اتفهمت حالتي بيومها و حضنتني و بجت هي هم .. كالت وليدي ما عليه شي .. و رجعت انتظرك برى .. الكل برى يم باب المدرسة نسوان ينتظرون جهالهم بس اني الوحيد رجال .. لأن اول يوم بالمدرسة يجون هواي جهال بصف الاول و امهاتهم ينتظروهم برى .. حتى بيومها وكفت بعيد لأن استحيت من النسوان .. و بوكفتي تخيلت امك لابسه عباية وهي تنتظرك برى و استغفرت ربي كومة حتى بس لا ابجي .. لان مردتك تشوف دمع بعيوني .. ردتك رجال تطلع وهسه انته رجال .. تدري شخصيتك هاي انبنت وتكونت من دموع مخليتك تشوفها بعيني حتى تطلع قوي .. حتى اختك بأول يوم الها بالمدرسة نفس الشي صار وياها بس الحمدلله انته جنت موجود و شوية جنت اقوى اني بوجودك .. و مشت السنين و انتو كبرتو و الحمدلله .. الله طول بعمر أمي و هي الي ساعدتني بتربيتكم .. هسه انته عرفت امك شلون توفت .. انته جنت تسمع امك توفت منتولة بس محد حاجيلك كل التفاصيل .. و هاي التفاصيل الي صارت .. بالنسبة لسوالك الثاني ليش متزوجت .. راح اختصرلك الجواب .. الي يحب من كل كلبه ميكدر يغير الي يحبه .. و لا الى نفس يشوف غيره .. ولا يكدر يمثل الحب لأن الحب مرة وحدة يجي .. كل الوراه يصير تمثيل .. يعني اني جان اكدر اظلم وحدة وياي واجيبها حتى بس تربيكم .. بس راح امثل عليها و راح اجذب اذا اكلها احبج .. لان اني حبيت شيماء و بس .. كل الي تشوفهم بالدنيا يكولون الحب الاول نسيناه و لكينا حب ثاني جذابين .. هذولة يمثلون على الناس .. و يمثلون حتى على نفسهم .. الحب الحقيقي لا يتغير ولا ينخلق حب بمكانه للموت .. يبقى هو الاول والاخير .. هسه امك مو توفت و انته صرت رجال واختك مرية .. و مشت سنين و سنين من يوم وفاتها .. والله العظيم لحد هسه ادلعها .. لحد هسه اغازلها .. اتخيلها موجودة داير مدايري .. اشوفها بكل مكان .. بكل اغنية حب اشوفها .. بكل شعر عالحب اقراها بنص السطور .. بكل قصة عشق هي تكون البطلة واني البطل .. ما اكدر اغيرها .. و لا اريد .. انتو عندي بالدنيا و اصلا انتو هيه وهيه انتو .. هسه افتهمت ليش متزوجت ..

لان احبها ..

(لأن احبها)

انتهى

اخوكم ابو بغداد سايق التكسي

#ابوـبغداد