عشق الشيخ ملكني

part:26

هند:
من بعد اخر موقف بيني وبين جود صدگوني من اگللكم اني هايمة بحب 3 كلمات ساحراتني وهن:
_احبج هند افهميني.
بس اجذب نفسي واگول لأنه كان مريض ما كان واعي على نفسه ومن ذاك الموقف اني اتجنب جود وما اباوع عليه من يجتمع هو والشباب او بالجمعات العائلية واعرفه هو يباوع علي بس ما ابادله النظرات بس اليوم كيان ورزان راحوا لبغداد علمود شغل صار وقت الغدة امي گالتلي:
_هند بنتي انتي وفاتن صبن غدة بالحافظات وروحن ودنهن لجود لأنه عمر والشباب طلعوا لشغلة ومحد اكو يودي الغدة لجود انتن ودنه.
بالعادة عمر ياخذ الأكل لجود او ايعزموه ياكل يمنا بس لأنه الشباب طالعين محد اكو يوديله الأكل وهو ميجي اذا الشباب طالعين رحنا اني وفاتن وصبينا الأكل ولبسنا شالاتنا وعباياتنا وطلعنا اخذنا كرم ويانا وصلنا للبيت ودگينا الجرص دقايق وفتحه جود شافنا استغرب وگال:
_اهلا وسهلا شسون هنا اكو شيء؟
كان لابس تراكسود وقلم بأيده ورغم بالبيت وحده بس كان مرتب ونضيف والهيبه تنگط اني محچيت شيء ضليت صافنه بوجهه ما حسيت غير من فاتن نغزتني (گرصتني) بخصري وگالتله:
_خالتي دزتلك الغدة نگدر انفوت انصفيلكياه؟
هو ابتعد وفتحلنا مجال حتى ندخل وگال:
_اتفضلوا هلة بيكم.
دخلنا هو سد الباب ورانا ودخل للصالة كان يگلب بأوراق ما اعرف شنو وكرم دخل گعد يمه واني وفاتن دخلنا للمطبخ فاتن گالت:
_اني راح ارتب الأكل انتي روحي عدلي غرفة الضيوف اكيد ينام بيها ومخربطة هسة والملابس الوصخة عزليهن ناخذهن ويانا نغسلهن بالبيت.
اني اومأتلها ودخلت للغرفة كانت مرتبة وريحتها طيبة فتت للحمام اشوف اذا اكو ملابس تحتاج غسل ملگيت شيء جاي اطلع بس سمعت صوت باب الغرفة ينسد اني طلعت من الحمام مفزوعة لا انقفل الباب علي (الميعرف راح اگللكم اني اخاف من الأماكن المغلقة والظلمة عندي رهاب منهن) وجود شافني وگام يتقرب مني واني ارجع ليورة لحد ما ظهري اصطدم بالحايط وگلتله:
_ليش قفلت الباب خلي اطلع.
هو گال بعد ما صار كلش قريب مني:
_راح اطلعين بس عندي كلام وياج اول شيء اسمعيني واطلعين.
اني محچيت شيء وردت ادفعه واطلع هو ما اتحرك وحاصرني بثنين اديه على الحايط وباوع بعيوني وگلي:
_الكلام لگلتلجياه قبل يومين....
ما خليته يكمل وگلتله:
_اعتبرني مسمعت شيء اعرف كنت مريض وما واعي على كلامك انسى الموضوع.
هو ابتسم وگلي بهدوء وبصوت يخدر:
_ومنو گلج ما كنت واعي؟
اني باوعتله بصدمة هو باسني بخدي وگلي بهيام:
_هند انتي اتحبيني؟
اني محچيت شيء ودنگت راسي ميته خجل اشلون باسني 😳 هو رفع راسي وگلي:
_جاوبيني لا اتسكتين؟
اني محچيت شيء وهو گال صدمة عمري:
_اذا اتقدملج توافقين؟
اني باوعتله بصدمة هو ابتسم وغمزلي 😉 اني متت من الخجل ودفعته وردت اطلع نجحت بس مطلعت لأنه سحبني وحضني ظهري صار على صدره وهو همس يم اذاني:
_جاوبيني واخليج اطلعين اتحبيني هند؟
اني ابتسمت وخجلت گلتله:
_خليني اطلع فاتن هسة تنتظرني.
هو گلي:
_جاوبيني واطلعين.
اني همهمتله هو گلي بعد ما فرني عليه وباوع بنص عيوني اني خجلت ودنگت:
_ما افتهمت شنو همم.
گلتله:
_يعني اي احبك.
وغطيت وجهي بثنين ادي من الخجل 🙈 هو سمعته ضحك وصدمني من حضني فتحت عيني ولفحتني ريحة عطره خدرت اووووف ريحته اتجنن حسيت على الوضع ودفعته بس ما اتحرك وگلتله:
_خلي اطلع جود اتأخرت لا اتشك فاتن.
هو عصرني بحضنه وعافني وصلت يم الباب وقبل لا اطلع گلي:
_انتي من اليوم الي هند متصيرين لغيري احبج يا رويحتي.
اني ابتسمت وخجلت فتحت الباب وطلعت وهو طلع وراي ابتسملي وراح للصالة اتمالكت نفس ورحت للمطبخ بهدوء وگلت لفاتن:
_الغرفة نضيفة وماكو ملابس تحتاج غسل.
هي ابتسمتلي وشالت الصينية للصالة وجود شافها وخر الأوراق واخذ الصينية منها وايده طخت بأيدها بس بسرعة وخرها اني فرت من الغيرة هو گاللها:
_اعتذر اختي شكرا اني اكمل الباقي.
هي گالتله:
_مصار شيء احنا نترخص هسة حتى تاخذ راحتك.
هو اومألها وصلنا للباب وطلعنا اني خليت تليفوني بجيب بنطلوني وگلت لفاتن:
_انتظريني هسة اجي نسيت تليفوني جوة.
هي اومأتلي اني دگيت الباب وهو فتحلياه دخلت وهو دخل وراي عاف باب البيت مفتوح فتت لغرفة الضيوف هو بس دخل وراي اني سديت الباب هو انصدم وباوع علي اني خزرته وگلت واني راصة على سنوني من العصبية:
_اشلون تلزم ايدها هااا لا وگدامي هم؟
هو ابتسملي وحاصرني على الباب وگال:
_يعني افتهم العسل لگدامي ايغار موووو.😉
وغمزلي اني استوعبت نفسي ردت اطلع مخلاني گلتله:
_وخر مني خلي اطلع بعد لتحاچيني.
هو گال بهمس يم اذاني صوته خدرني:
_اتغارين هند؟
اني باوعتله بعصبية وجريته من تشيرته صار كلش قريب علي وگلتله واني اباوع بعيونه:
_مو بس اغار لا واحرگ السبب بغيرتي اذا اتجاوز حدوده انت الي جود بس الي.
ودفعته وردت اطلع هو جرني اله وباسني 💋 بشفايفي واني جمدت مكاني وعيوني فاتحتهن على وسعهن من الصدمة ابتعد عني وباوع بعيوني وگلي:
_ما كنت متقصد الزم أيدها صارت فجأة اصلا اني ما اشوف غيرج مالية عيني حبيبتي.
اني خجلت ودفعته وطلعت وقبل لا اوصل للباب مال البيت جود گلي بصوت ناصي:
_طلعي التليفون حتى فاتن لا اتشك بيج واذا سألت ليش اتأخرتي گليلها نسيت وين حطيته.
اومأتله بتفهم وطلعت التليفون من جيب بنطلوني وطلعت فاتن سألتني مثل مگال جود وجاوبتها هي افتهمت ورجعنا للبيت واني اليوم كله معلگة تفكيري بجود والي صار وميته خجل ومرام قبل لا انام بليل گالتلي:
_اكو شيء بيج مدغير شنو هو؟
اني باوعت عليها وگلتلها:
_شنو؟
هي گالت:
_وجهج امورد وحليانة شمسوية؟
اني خجلت لهاي الدرجة مأثر علي جود گلتلها:
_ما امسوية شيء بس يمكن لأنه استخدم مرطب جديد لوجهي اتشوفي هيج.
هي گالت:
_ما اعرف امشي خلي انام راح اروح لغرفتي تصبحين على خير.
اني گلتلها:
_وانتي بخير حبيبتي.
اني غرفتي بالطابق الثاني بصف غرفة سحر الله يرحمها كلش اشتاقيتلها دخلت للغرفة واني افكر بجود ثاني يوم الصبح گعدت غسلت وبدلت لفيت الشال ونزلت اساعد البنات بالريوگ كملنا وتريگنا ورزان گالت للشيخ:
_اعذرني شيخ بس عندي كلام وياك والكل لازم يسمعه.
اني عرفت شتقصد اجت ساعة الصفر يا فاطمة.
جدي گللها:
_گولي بنتي اسمعج.
هي باوعتلي اني ابتسمتلها هي اتنهدت وگالت:
_راح احچي بس لازم توعدني بعد الي راح اگوله الموجهتله كلامي ميتأذه ومتسويله شيء.
هو گللها:
_ان شاء الله گولي اسمعج.
هي باوعت على كيان وگلتله:
_وانت هم كيان اوعدني متسوي شيء؟
هو گللها:
_ان شاء الله گولي.
وبدت تحچيلهم السالفة.