عشق الشيخ ملكني

part:23

زينب حسب ما عرفنا من امها اتميل لجهة بنات عمامها وعماتها اكثر منا كنا گاعدين بالصالة وانسولف اني ومرام وفاتن على ذكاء رزان وتصرفها اليوم كلش انبهرنا وانعجبنا بيها اكثر وفاطمة اخت سالم گالت:
_هي دائما هيج اذا واجهتنا مشكلة وما عرفنا انحلها بالعائلة نسأل رزان وهي اتحلها حتى بابا وابو جود هم يرجعون ويستشيرونها اذا واجهتهم مشاكل سواء بالشغل او بالبيت.
مرام گالت بذهول:
_واااااو شنو من ذكاء شايلة عين الباردة عليها راح اسألها منا وجاي اذا واجهتني مشكلة معرفت احلها.
اني گلتلها:
_انتي هم محامية مثلها هم اتحلين بعض مشاكلنا لو نسيتي؟😉
هي ضحكت وگالت:
_ما نسيت بس مرات اتواجهني مشاكل ما اعرف احلها واستشير كيان وايساعدني بس منا وجاي اسأل رزان.
وكملنا هيج لحد ما عمر گلي:
_هند روحي صيحي كيان يجي للأستقبال بسرعة.
اني هبطت كان كلش متوتر وجدي سأله شكو هو گال:
_ماكو شي شيخ لتخاف بس احتاج كيان بموضوع.
باوعت على مرام كانت خايفة واتباوع على عمر اني رحت ركض اصيح كيان طلعت للحديقة وشفت عصافير الحب كيان حاضن رزان نص حضن ورزان تلعب بأيده ويسولفون وگلت بيني وبين نفسي:
_شگول عليك يا عمر اتريدني اخرب هاذا الجو الرومنسي اوووي ايخبلون 😍 اصحي ولج هند عمر منتظر لا اتخلي يتعصب اكثر 😡 اوك اوك 😅 شهيق زفير شهيق زفير ولج اتحركي يا رجلي اتحركي 😤 .
ورحتلهم ركض مثل الثور الهايج وكيان باوعلي بصدمة و رزان بأستغراب وگال كيان:
_اتنفسي هند ليش حابسة انفاسج وجهج صار احمر.
هسة انتبهت اني حابسة انفاسي اجگد ثولة يا فشلة 😳 وگلتله بعد ما اتنفست:
_شيخ عمر ايريدك بالأستقبال بسرعة وكان متوتر من سأله جدي شكو گال ماكو شيء وايريدك بموضوع ودزني اصيحك.
گلت هذا الكلام بنفس واحد وكيان ورزان گاموا ايضحكون اني خجلت وصحت عليهم وگالت:
_لا اتضحكون 😤.
كيان ابتسم وگال:
_ماشي اهدي لا تنفجرين من الخجل راح اشوف عمر انتي ساعدي رزان حتى اتفوت جوة الجو صار حار.
اني ابتسمت واومأت له وهو راح لعمر واني ردت اساعد رزان حتى اتگوم هي مقبلت وگالت وهي تبتسملي:
_خلينا هنا ما اريد افوت جوة خنگة .
اني ابتسمتلها وگعدت ابصفها اشوية واجن مرام وفاتن وفاطمة گعدن ابصفنا وبقينا انسولف واندردش ومرام گالت بعد فترة:
_عمر كان متوتر من طلب كيان خايفة لا صاير شيء.
رزان گالت وهي تبتسم حتى تهدء مرام:
_لتخافين ماكو شيء واذا اكو راح نعرف بعدين لا تتوترين.
مرام هدأت وفاطمة گالت لرزان:
_اشوكت يبدي الدوام بأي شهر بالضبط؟
رزان گالت:
_بعد 3 اشهر ليش اتسألين؟
فاطمة گالت:
_ما حسينا بالعطلة وهذا الشهر راح انكمل تجهيزات عرسج يبقى گدامنا شهرين نرتاح ونرجع للضيم 😑.
فاتن گالت:
_ليش متحبين الجامعة؟
فاطمة گالت:
_لا احبها بس اكره گعدة الصبح ما اطيقها.
كلنا ضحكنا عليها وهي اتباوع علينا مصدومة وگالت:
_شنو گلته ايضحك؟
رزان گالت:
_وشنو فرق الدوام عن هسة انتي حتى بالأيام العادية ادگعدين من الصبح يا ذكية.
هي خزرت رزان وگالت:
_مو انتي ادرسين طب اسنان وتعال يامخي العزيز اتقبل الوجوه البشعة تتغزل بيك من الصبح وتكرهك بعيشتك.😒
ضحكنا عليها وفاتن گالت:
_ولا انت يادكتورة الدرسين تصميم الأزياء وكل يوم واخزة اصابيعج بالأبر والاستاذ الصاك ايرزلج بنزاكة ويگلج خيطي الملابس مو اصبعج يا حلوة.😂
وخربنا ضحك على كلام فاتن ما افتهمنا هي تتغزل لو تتذمر واني گلتلهن:
_ولچن انتن لا شيء مقارنة بالأمر بي كل يوم اتخيلن دكتورة طب عام وبهيبتي اتأخر على محاضرتي الأولى واطر اركض للقاعة ولازم اصطدم بالصاكين واوگع غراضهم وبعد 10 دقايق ضاعت بالأعتذار وهو يتغزل بجمالي ايحصله راجدي امعدل ولا گانه اني لكنت اعتذر قبل لحضات.
البنات خربن ضحك ومرام گالت:
_والله انتن ارحم من وحدة محامية وكل يوم 10 اشخاص بالقليل يعترفون بحبهم ويتغزلون بيج وتعال يا گلبي اتحمل الصاكين واسكت.
كلنا ضحكنا عدا رزان شفناها مصدومة وفجأة سمعنا اصوات ادگول:
_منو اليتغزل بيج من الصبح ما سمعت زين؟
_ومنو الأستاذ الصاك ليگول لتخيطين اصابيعج يا حلوة؟
_ومنو يصطدم بالصاكين ويحصلة 10 دقايق يتغزلون بي؟
_ومنو العشر اشخاص بالقليل يعترفوله ويتغزلون بي وهو عاجبه الوضع وساكت؟
فاطمة گالت لسالم:
_مو اني لتخاف صديقتي كنت احجي عليها.😅
وفاتن گالت لكيان:
_اكيد مو اني يا اخي الحبيب ليش اتجرأ اباوع بعيون الأستاذ اصلا حتى اعرفة صاك؟ 😅
واني گالت لجود:
_لا مو اني اكيد فهمت كلامي غلط كنت اقصد صاحبتي الثولة دائما تصطدم بالصاكين واضيع الوقت.😅
ومرام گالت لعمر:
_مو اني حبيبي ليش هو اني شعندي غيرك طاغي على كل الصاكين بحياتي. 😅
ورزان ابتسمت وگالتلنا:
_بدال ما تكحلنها عميتنها ياسيدات المجتمع الراقي.😂
احنا البنات صحنا عليها وگلنا:
_اسكتي انتي كله من وراج .😡
وهي ضحكت علينا والشباب هم ضحكوا واني والبنات مصدومات مرام گالت:
_ليش اضحكون؟😳
عمر گرصها بأيدها وگال:
_هاي حتى بعد متباعين على احد غيري.
وكيان لوة اذان فاتن وگال:
_حتى مترفعين عينج على الولد بعد.
واني حصلت خزرة وما حجة شي وحضن رزان وگعد يلعب بأيدها ويتغزل بيها واني متت غيرة اووووف و فاطمة حصلت بوسة على خدها من سالم وگال:
_فديت العاقلة الله يساعد اعيونج من الوجوه البشعة.
وهي ضحكت والشباب گعدوا ويانا جود يم رزان وظهرهم على الشجرة واني والباقين گدامهم وكيان گعد بصفي وبصف فاتن وعمر يم مرام وسالم يم فاطمة وگالت رزان لعمر:
_بشنو حچيتوا من طلبت كيان صاير شيء؟
كيان جاوب وگال:
_موضوع ايخص الشغل لتخافين ماكو شي خطير.
رزان ما لحت بالسؤال وسكتت وعمر گال لكيان:
_اشوكت اتكمل تجهيز البيت لشتريته ماكو گدامك بس هذا الشهر.
كيان گال وهو يبتسم لرزان:
_راح يوصل الأثاث بعد اسبوع والبيت جديد ما بي بس كم شغلة بسيطة انكملهن قبل ليوصل الأثاث لتخاف.
ومرام گالت لرزان:
_وانتي اشوكت اتكملين حجز على البدلات وباقي التجهيزات.
رزان ابتسمت وگالت:
_كلشي جاهز اني مكملة غراضي وحاجزة كلشي لتخافين.
مرام فرحت واحنا هم.