The True Conqueror [Complete]

Chapter 47

မိမိကစိုးရိမ်စွာဆူပူနေပါသော်လည်း အနမ်းတို့ဖြင့် ဖြေသိမ့်ခံလိုက်ရသော တောင်ပိုင်းဘုရင်ကြီးမှာ ထပ်ပြီးဆူပူခွင့်မရတော့ပဲ ဝံပုလွေဖြူလေးဆွဲခေါ်ရာနောက်သို့သာ ပါလာသည်။

ဟန်ယန်းတောအစပ်တွင် ယာယီရွက်ဖျင်တဲကြီးများထိုးထားသည်။ ကြွရောက်လာမည့်ဘုရင်နှင့် အကဲဖြတ်ပေးမည့်စစ်သူကြီး၊ သိုင်းပညာရှင်၊ ဆေးသမားတော်တို့အတွက် စီစဉ်ထားခြင်းဖြစ်သည်။ ဆေးသမားတော်ပါဝင်သည့်အကြောင်းမှာ တာဝန်ပြီးမြောက်သည့် စစ်သည်တော်တို့ သိုင်းပညာနှင့် အတွင်းအားကို ထုတ်သုံးထားခြင်းရှိမရှိစစ်ဆေးခြင်း ဖြစ်သည်။

ပါဝင်မည့် စစ်သည်တော်မှာ အယောက်ရှစ်ဆယ်ခန့်ရှိပြီး တူညီဝတ်စုံများဖြင့် ရွက်ဖျင်တဲများရှေ့တွင် စီတန်းနေရာယူထားကြသည်။ လင်းမိုနှင့် လီချန်းယုံရောက်လာချိန်တွင် အကုန်လုံးက အရိုအသေပေးကြသည်။ လင်းမိုက အကဲဖြတ်အဖွဲ့ရှိရာသို့ လျှောက်သွားပြီး လီချန်းယုံကတော့ ပြိုင်ပွဲဝင်များနှင့်အတူ နေရာယူလိုက်သည်။

ပထမဦးစွာ ပြိုင်ပွဲကိုတာဝန်ယူစီစဉ်ထားသည့် အမတ်ကြီးက ပြိုင်ပွဲ၏ စည်းကမ်းချက်များကို ဖတ်ပြသည်။ လီချန်းယုံက မြောက်ပိုင်းသား ထိုပြိုင်ပွဲနှင့် မရင်းနှီးသော်လည်း လင်းမိုက သူ့ကို စည်းကမ်းချက်များအကြောင်းပြောပြပြီး ဖြစ်သည်။ သို့ကြောင့် တော်တော်များများမှာ သူသိပြီး ဖြစ်သည်။

ထို့နောက် စစ်သူကြီးချင်က ပြိုင်ပွဲဝင်များအား စားပွဲရှည်ကြီးပေါ်တွင် ခင်းကျင်းထားသော လက်နက်များထဲမှ နှစ်သက်ရာကို ရွေးခိုင်းသည်။

လီချန်းယုံက အမျိုးအစားစုံလင်သော လက်နက်များကိုကြည့်လိုက်သည်။ အရည်အသွေးကောင်းသော သံထည်များဖြင့် ပြုလုပ်ထားသည်မှအပ ထိုလက်နက်များသည် သာမန်မုဆိုးများကိုင်ဆောင်လေ့ရှိသည့် လက်နက်မျိုးဖြစ်သည်။

အများစုက ဓားရှည်နှင့် လှံတံများကို ရွေးချယ်ကြသည်။ လီချန်းယုံအတွက်ကမူ လက်နက်သည် ထွေထွေထူးထူးစဉ်းစားစရာ မလိုပေ။ ငယ်စဉ်ကတည်းက လေးနှင့်မြှားကို အထူးလေ့ကျင့်ခဲ့သည်ဖြစ်သောကြောင့် လေးနှင့်မြှားကိုသာ ရွေးချယ်လိုက်သည်။ မြှားကျည်တောက်တစ်ခုကိုလည်းပေးထားပြီး မြှားတံများကို စိတ်ကြိုက်ရွေးချယ်ကာ သယ်ဆောင်ခွင့်ပေးထားလေသည်။