The True Conqueror [Complete]

Chapter 56

လီချန်းယုံ နေ့လယ်စာစားပြီးမှ လင်းမိုက မြောက်ပိုင်းက ပို့လိုက်သော သဝဏ်လွှာအကြောင်းပြောပြသည်။

လီချန်းယုံ သဝဏ်လွှာကို ဖွင့်ဖတ်လိုက်သောအခါ ပြန်လာရန် ဘုရင်ကြီးလီက မှာကြားခြင်းဖြစ်ကြောင်း ဖြစ်ကြောင်း တွေ့လိုက်ရသည်။

လီချန်းယုံ၏ မျက်နှာအမူအရာအရ စာထဲမှ အကြောင်းအရာကို လင်းမို ခန့်မှန်းမိသွားချေသည်။

"ချန်းယုံ. . .ပြန်လာခိုင်းတာလား''

"အင်း''

လီချန်းယုံက သက်ပြင်းချပြီး ခေါင်းညိတ်ပြသည်။

လင်းမို၏ မျက်နှာအမူအရာက ပြောင်းလဲမှုမရှိ။ သူက လီချန်းယုံ၏ လက်ကို ခပ်တင်းတင်း ဖျစ်ညှစ်ပြီး ဆုပ်ကိုင်လိုက်သည်။

"ဆွေဟိုင်း နန်းတော်က ပြီးဖို့လိုသေးတယ်၊ ဒါပေမယ့် အဲ့ဒီမတိုင်ခင် ငါမြောက်ပိုင်းလာခဲ့မယ်''

ထိုသို့ ပြောလာသည့်အခါ လီချန်းယုံက လင်းမိုကို ပြုံးပြီး စိုက်ကြည့်သည်။ သူ့ကို ကြည့်ရသည်မှာ တစ်စုံတစ်ရာကို သဘောကျသွားဟန် ရှိသည်။

"လင်းမို. . . မင်းနဲ့ ငါနဲ့ ဒီလို တောင်ပိုင်းနဲ့မြောက်ပိုင်း အသွားအပြန် လုပ်နေရင်တော့ နန်းရွှေ့ပြောင်းရေးတွေက မြန်မြန်ပြီးတော့မှာပဲ''

လင်းမိုက လီချန်းယုံ၏ ပါးကို ဖျစ်ညှစ်လိုက်ပြီး -

"ငါ. . . မင်းနဲ့လချီပြီး မခွဲနိုင်ဘူး''

"မင်းတကယ်လိုက်လာမှာလား''

"အင်း''

လီချန်းယုံက သူ၏ လက်သန်းကို လင်းမိုရှေ့သို့ ထိုးပေးသည်။ ကတိပြုရအောင်ဆိုသော အထိမ်းအမှတ်ပင်။

"ချန်းယုံ. . .အဲ့ဒါ ကလေးတွေလုပ်တာ''

လင်းမိုက ထိုသို့ပြောသော်လည်း သူသည် ဝံပုလွေဖြူလေးခိုင်းသည့် အရာကို မလွန်ဆန်ရဲ။ သူ၏ လက်သန်းကို လီချန်းယုံ၏ လက်သန်းနှင့် ချိတ်ပြီး လက်မချင်း ဖိနှိပ်လိုက်သည်။

"ကတိနော်''

လီချန်းယုံက ထပ်ဆင့်အတည်ပြုသည်။