The True Conqueror [Complete]

Chapter16

Unicode

လီချန်းယုံသည် ပန်းသစ်တော်သီး၏ မျက်နှာကြောင့် လင်းမိုကို အဆောင်သို့ ခေါ်ဆောင်လာလေသည်။ အဆောင်သို့ရောက်သောအခါ လီချန်းယုံက ပန်းသစ်တော်သီးများကို လှီးပေးရန် အစေခံတစ်ယောက်အားစေခိုင်းလေသည်။

"ဒါတွေပဲ သန့်စင်ခဲ့...ပြီးရင် မလှှီးနဲ့''
လင်းမို၏ စကားကြောင့် လီချန်းယုံက ဘာလို့လဲဆိုသော သဘောဖြင့် မျက်ခုံးပင့်ပြသည်။ လင်းမိုကမူ လီချန်းယုံ၏ အမူအရာကို မသိဟန်ဆောင်ကာ အိပ်ဆောင်ဆီသို့ ဦးတည်သွားလေသည်။

လီချန်းယုံ၏ နန်းဆောင်သည် အိမ်ရှေ့စံ၏ အဆောင်ပီသစွာပင် ခမ်းနားထည်ဝါစွာရှိပြီး အလွန်ကျယ်လေသည်။ သို့ပေမယ့် ခြုံငုံကြည့်လျှင် အိပ်ဆောင်မှာ ရိုးရှင်းစွာရှိပြီး အဆောင်အယောင်များများ မရှိပေ။ အဖြူရောင်နှင့်အပြာရောင်ရောယှက်ထားသည့် သားမွှေးကြီးကို ခင်းထားသည့် အိပ်ရာ၊ ဝံပုလွေမာန်ဖီနေပုံကို ခေါင်းရင်းတွင် ထွင်းထုထားသည့် ခုတင်၊ အိပ်ရာဘေးတွင်တော့ ဆီးမီးအိမ်တင်သည့် စားပွဲပုလေးတစ်ခုံရှိလေသည်။ စားပွဲပုလေးတွင် ဆီးမီးခွက်လေးများအစီအရီရှိပြီး ထွန်းညှိထားလေသည်။ နေ့ခင်းတွင် ထွန်းညှိထားသည်ကို ကြည့်ရသည်မှာ ထိုဆီးမီးခွက်လေးများသည် အမွှေးနံ့သက်သက်ရအောင်သာ ရည်ရွယ်ထားခြင်းဖြစ်လိမ့်မည်။ ထို့ကြောင့် လီချန်းယုံ၏ နန်းဆောင်မှာ မွှေးရနံ့တစ်မျိုး သင်းပျံ့နေခြင်းဖြစ်သည်။ အမွှေးရနံ့သည် ထုံအီသော ရနံ့မျိုးမဟုတ်ပဲ သဘာဝဆန်ဆန်ပန်းရနံ့တို့ပေါင်းစပ်နေသော အနံ့ုဖစ်သည်။ တစ်နည်းအားဖြင့် ဆိုသော် လီချန်းယုံ၏ ကိုယ်သင်းရနံ့........

လင်းမို၏ စူးစမ်းသမျှကို လီချန်းယုံက လက်လျှော့ထားဟန်နှင့် အေးအေးသာသာ လက်ပိုက်ကြည့်နေလေသည်။

လီချန်းယုံ၏ အိပ်ဆောင်နံရံတွင်နေရာယူထားသည်ကတော့ အရွယ်အစားမျိုးစုံရှိသည့် လေးနှင့်မြှားများဖြစ်လေသည်။ အိပ်ဆောင်၏ နေရာတော်တော်များများကိုလည်း စာအုပ်များကို စီရီစွာတင်ထားသည့် စာအုပ်စင်တစ်ချို့က နေရာယူထားလေသည်။ ထိုအရာများမှ လွဲ၍ ထူးခြားသည့်အရာမရှိ...