"Rayah Nawfal tum dono ka aage ka kya program he?"
Subha nashte ki table per Haider khan ke puchne per un dono ne sar utha kar dekha tha.
"Koi program nahi hai bas wapis jana hai office hai!"
"Arrey kahin ghoomne nahi jao ge..?"
Bibi jaan ne unse pucha to Rayah ne kuch harbara ke nazre churai. Nawfal ne ek nazar apne saath bethi Rayah ko dekha tha aur phir ahista se bola.
"Is sab ki koi zaroorat nahi hai abhi Bibi jaan"
"Kyun beta abhi nayi nayi shadi hui he tum dono ki apni biwi ko time do bachey"
Bibi jaan ne kaha to Nawfal ne sar jhuka liya.
"Bibi jaan Nawfal sahi keh raha he. Wese bhi office me Nawfal ki zada zaroorat hai."
Rayah ne baat ko sambhal na chaha tha aur yaqeenan kamiyaab bhi ho gayi thi.
"Tum batao khotey ab tumhare liye bhi larki dhunde?"
Daa ji ne araam se nashta karte hue Azaan ko dekh kar kaha to Azaan ke halak me jese niwala hi phas gaya tha aur woh zor se khans ne laga.
"Daa ji meri nazar me to already hai ek-"
Palwasha foran boli thi aur Azaan ne mu saaf karte hue use ghoora aur foran bola.
"Palwashey khana khate hue bolte nahi hain!"
Azaan ne yak dam kaha aur samne bethi Raima ko ek nazar dekha tha jo bazahir be talluk si apni plate me pare omelet se khel rahi thi.
"Wah meri behen ki speed dekhen! Palwasha baad me mujhe bata dena"
Nawfal ne apna qehqa roukte hue Palwasha ko ankh mar kar kaha tha. Daa ji aur Bibi jaan nashta kar ke andar jaa chuke the jab dining room me Alishba dakhil hui thi.
"Assalamu alaikum!"
Woh andar ayi to Azaan use dekh kar kuch thitka.
Woh pichle kuch dino se ayi hui thi aur Azaan ke israar ke bawajood woh wahan ek hotel me theri hui thi. Woh shaadi ke bhi sare function me shareek hui thi aur sab se bohat hi ache se ghul mil gayi thi.
"Walaikum assalaam tum yahan? I mean itni subha subha!"
Azaan ne pucha to uske chehre per kuch manikhez muskurahat ayi. Isse pehle ke Alishba kuch aur kehti Raima apni jagah se uth kar apna bag utha ker bahir jane lagi jab Azaan ne use uljh kar dekha.
"Raima kahan jaa rahi ho?"
Nawfal ne usse pucha tha.
"Lala hospital jaa rahi hun kafi chuttiyan ho gayi hain"
Usne kaha aur halka sa muskura kar murne lagi jab Ke is baar Azaan ki awaaz ne use rouka tha.
"Lekin tumne to mere saath jana tha."
Uske paas khari Alishba bohat hi dilchasbi se kabhi Azaan to kabhi Raima ko dekh rahi thi.
"Nahi aap Alisha ko waqt den. Main khud manage kar sakti hun"
Usne sanjeeda chehre se kaha aur bahir nikal gai thi. Azaan use dekhta hi reh gaya tha.
_________
"Tumne packing kar li he?"
Nawfal ne shaam ko kamre me aate hi pucha tha.
"Han kar li hai. Kal subha nikal na haina?"
Rayah ne pucha to usne sar khaam kiya aur almari se apne kapre nikalne laga.
"Wese tumhe itna saaf inkaar nahi karna chahiye tha Bibi jaan ko."
YOU ARE READING
Faasla-e-Deewar
Romance"Woh muskurahat bhool hi nahi paata main,woh chehra mere samne se hat ta hi nahi..." "Mohabbat ho gai he usse?" "Nahi. lekin agar phir woh muskurahat mere samne ayi to lagta he ke ho jae gi...." __________ "Itni jaldi haar gai usse?" "Usse nahi hari...
