Zindagi ka har ek mor aap ko heran kar deta hai. Aap ko samjh nahi aati aur aap ki puri zindagi badal jaati hai. Shaadi shayad aap ki zindagi ka sab se bara aur ehem mor jisse takriban har koi guzarta hai aur agar aap ko acha humsafar mil jae to woh safar beyhad asaan ho jata hai. Aaj Nawfal Khawar Khan apni muhabbat apni Rayah ko apni biwi ke tor per qabool karne jaa raha tha. Lekin kya woh theek kar raha tha? Kitna kuch tha jo Rayah nahi jaanti thi uske baare me kitne ehsasaat aur haqeeqaten thi jo usse chupi huin thi. Kya yeh dhoka nahi...?
Uljhane khushi khouf najane kitne ehsasaat the us waqt.
Rayah aur Nawfal ki khuwaish thi ke shadi saadgi se ho koi bhi shor sharaba na ho to usi ke mutabik nikaah ki takreeb bhi saadgi se Haweli me hui thi aur mehmaan bhi zada nahi the. Nawfal sofey per betha hua tha jab sab andar kamre me Rayah ke paas nikah ke liye gaye the. Woh beyhad nervous tha jab use mehsoos hua ke uske saath koi aa betha tha.
"Kya baat hai? Chehre ka rang kyun ura hua he?"
Azaan uske kareeb araam se beth gaya tha aur ab uski shakal dekh kar bola tha.
"Dar lag raha hai."
Uski is saafgoi per Azaan ne kafi herani se use dekha aur phir halka sa muskura diya.
"Bhaag ja"
Nawfal ne us khush shakal nojawan ko dekha tha jo ke bamushkil apni hasi rouke hue tha.
"Bakwas nahi kare ga to pait kharab nahi ho jae ga tera..!?"
Usne ghoora tha aur ab Azaan ne use muskura kar dekha.
"To aisi baat hi kyun kar raha hai ? Nikah kar rahe ho kisi jang per nahi jaa rahe."
"Jang pe jana zada asaan lag raha hai is waqt. Ek larki ki puri zindagi ki zimedari lene jaa raha hun Azaan. Yeh koi choti baat to nahi hai."
Usne sanjeeda sa kaha aur Azaan ke chehre per narmi ayi thi. Uske bhai ka dil sach me bohat saaf tha woh ab bhi apne liye nahi Rayah ke liye pareshan tha.
"Wese yahan aya me Rayah ka bhai ban kar tha lekin tere in ilfazo ne mujhe mutmaeen kar diya. Jinko apni zimedari ka ehsaas ho na Nawfal unke liye hume pareshan nahi hona parta. I know tum sab sambhal lo ge. Muhabbat to tum Rayah se karte ho uski izzat aur hifazat bhi karo ge."
Azaan ne uska kandha thapkaya tha aur use apne gale se laga liya tha.
"Arrey phir emotional scene mere bagair?"
Palwasha jo unke samne khari thi usne mu phula kar kaha.
"Tum aa jao kabab me haddi."
Azaan ne kaha to usne aur mu phulaya. Aur Nawfal ke paas aa khari hui.
"Wese Mubarak ho lala aap ki takreeban ho chuki biwi ne qabool kar liya aap ko!"
Usne muskura kar kaha tha aur tabhi piche se qazi sahab aur baki sare bare aa rahe the. Azaan Nawfal ke saath se uth gaya aur Palwasha ke saath jaa khara hua.
_____________
Nikah ho chuka tha aur sab mehmaano ne unhe mubarikbaad bhi de din thi. Ab Rayah ko bahir laa kar Nawfal ke saath bitha diya gaya tha woh dono is kadar nervous the ke ek dusre se baat karna to door dekha tak nahi tha.
Kuch kuch dee baad mehmaan aa kar unse mil rahe the jab ek khatoon unke paas ayi thin.
"Bohat bohat mubarak ho Zalah tumne apni beti ki shadi naa sahi nawasi ki to dekh hi li!"
Woh aurat yaqeenan unki koi rishtedaar thi jo ke 26-27saal purani baat ko ghasit layin thi.
Rayah ne yak dam us aurat ko dekha tha. Bibi jaan khamosh si un khatoon ko dekhti rahi jab Haider Khan aage bare the aur unho ne us aurat ko araam se kaha tha.
YOU ARE READING
Faasla-e-Deewar
Romance"Woh muskurahat bhool hi nahi paata main,woh chehra mere samne se hat ta hi nahi..." "Mohabbat ho gai he usse?" "Nahi. lekin agar phir woh muskurahat mere samne ayi to lagta he ke ho jae gi...." __________ "Itni jaldi haar gai usse?" "Usse nahi hari...
