منزل بلا ابواب

الجزء الثامن

مساء الورد

اسفه ع التاخير ..

وشي ثاني بنات تفاعلكم مايسوي واهس يعني مو هيج اذا القصه بيها شي محلو احجولي ..

اريد اقتراحاتكم امشي ع نفس الطريقه بالكتابه لو اغير الاسلوب ... تعجبك هاي الطريقه لو اتحسونها ممله استقبل ارأكم بكل رحابة صدر ..

#منزل_بلا_ابواب

الجزء الثامن

لـ ازهار ذابله

ان لم تجدني داخلك، لن تجدني ابدا.
فأنا معك منذ بدء التكوين.

جلال الدين الرومي ..

بس فتحت الشباك شفت امي طالعه بالباب وشيخه وياها وبنفس اللحظه خلف الباب اكو ظيوف انصدمت من شفتهم ..

شيخه..

وصلت ام عثمان للباب وبس طلعت انصدمت وجه بوجه خالد ... ظليت متسمره ماعرفت شسوي ولا عرفت اتصرف ومجان وحده وياه لبنا وابن عمي الثاني وزوجته ..

خالد ... الحمدلله ع سلامتج شيخه..

ظليت ساكته مااكدر اجاوب ولا اكدر اتصرف بس اباوع عليهم ومااعرف شصار بحالي ... بعدين لبنا حضنتني وسلمت عليه وظلوا همه بالباب واني دخلت ويه البنات ومن شافهن صباح عرف همه وياهن وركض للباب وگبت الهوسه ..

ركضنا وراه وانشوفه لازم خالد ويضرب بي شبعه كتل .. اخوه اخذه واخذوا نسوانهم وراحوا ..

اني ماحجيت شي بس صباح جان متعصب منه لدرجه اني ظليت حايره يعني كوه يزوجني مايردني عادي ابراحته ..

حجيت ويه صباح واحاول اهدي بس ماكو فايده ..
ــ صباح كافي مو كلتلك لا تحاجي ترا اني احس بنفسي السبب مااريد انذل اكثر ..

ــ شنو الكوة ولج هذا واحد كلب قبل شهر يكول بنت عمي واريدها متروح للغريب ومن اروحله واحجي وياه يكول غيرت رٲي شنو لعبه عده اني؟

ــ ميخالف لهنا وكافي لازم عنده اسبابه يجوز يحب وحده يجوز مااعجبه هو حر اني اصلا مااريد اتزوج تعرف بابه والبنات محد الهن ...

ـــ ايييي اني علامة ببسي.

ــ لا حشاك بس انت هم عندك مسؤوليه وجهال وزوجه مااتلحك عليهم وحدك ..

ــ سدي هذا الموضوع بس يجي واحد يخطبج انطيج اعناد بيهم..

ــ بس اني مااتزوج بالعناد اني مو جاهل.

ــ كلتلج سدي الموضوع وخلص الي تردي يصير بس الي ابالي اذا طلع صح اوصيج ادوريلي مره ثانيه ..

ــ لا ليش ..

ــ هسه بعدين اتعرفين .. يله روحي اخذي علاجج وارتاحي ..

رحت اطمنت ع بابه وبعدها ع اخواتي وبعدين رحت لغرفتي ..

ظليت كاعده وممصدكه كل الي صار بثواني وبالحظات ادمر كلشي والجان حلمي صار كابوسي... خايفه وضايعه واحس نفسي ماعندي شي اسند حالي عليه لا ام اشتكيلها ولا اب ابجي بحضنه اني احس نفسي ضعيفه ومدمره بس لازم ابينلهم العكس لان اخواتي وبابه محتاجيني لازم اتشجع ...