منزل بلا ابواب

ماضِ جميل

#منزل_بلا_ابواب

البارت ◣1

لــ ازهار ذابله

ــ بيوتنا القديمه ولمتنا الحلوه ع صينية الجاي العصر ... سوالف امي وهي تخبز وجارتنا تكعد يمها ويسولفن ... الجيران ولمتهم وركضتهم لـ جارهم بس يحتاجهم طيبتنا القديمه وحجاياتنه الدافيه كلها صارت من الماضي ..

مثل الرذاذ الذهبي الي بالقصص الخياليه لمع ذهبي يترس المكان اشوف مشاهد قديمه جدااا قبل ولادتي بقرن ...

شهر ديسبمر 1970م.

البيت يضج بالناس وكلها فرحانه والبنات الاصغار تركض ويهلهلن ويقلدن امهاتهن وعماتهن وخالاتهن .. والولد بالشارع يتراكضون ويهوسون ومسوين واحد منهم عريس ويهوسله ويتباركوله

صار العصر اجو اهل العريس الي هو ابن عم العروس وجيرانهن الباب بالباب .. جان شاب عمره نهاية العشرين اسمر وملتحي وشعره طويل ملابسه اخر موديل البنطرون من جوه عريض والقميص ضيق وستره طويله الا شويه توصل لركبته ...

وجماعته فرحانين واسنانهم بارزه اتكول اعلان معجون اسنان ..

العروس ملتمات عليها البنات والعجايز ينصحن ويحشن براسها وهي لابسه فستان ابيض بسيط كله كراكش وبي لمعه فضيه اشبه بالثوب العادي بس ابيض ومغطيه راسها بقماش شفاف ابيض وشعرها مهدود اسود فحم وبي كسره مو سرح وطويل مغطي ظهرها ..

طلعت العروس من بين النسوان و وصلت لـ غيدان وهي فرحانه ... عمرها كله خمس عشر سنه وغيدان حيدخل بالثلاثين ...

اخذوا سليمه لبيت عمها و الكل فرحان ... والهوسات والهلاهل والجكليت يطشر بكل مكان والجهال اتجمع وتضحك ..

بعد ساعات خلص كل شي وكلمن رجع لبيته وساد الصمت خلص العرس وكلها ارتاحت كـ انه جان هم وانزاح من ع صدرهم ..

اهل سليمه ضايجين يحسون اكو نقص بالبيت .. وهذا حال اي عائله اتزوج بنتها يصير عدهم فرق بس اول ايام وبعدين يتعودون ..

مرت الايام بسرعه وغيدان وسليمه عايشين بحب وتفاهم صح اكو مشاكل وخلافات بس سليمه عاقله واتحلها بسرعه وتتحمل وتعرف مرت عمها مره صعبه اتسايرها ..

بعد سنه صار عدهم اول طفل جانت ابنيه حلوه سموها وسن ومن صارت وسن غيدان صار شغله بغير دوله وقرر يستقر بيها واخذ سليمه و وسن وسافر للكويت ..

شغله اهناك معلم لغه عربيه ... واستاجر بيت وراتبه زين وعاشوا اهنا وهم سليمه خلصت من المشاكل .. بس اتظل الغربه ماتنحمل ..

بعد سنتين صار عدهم ولد سموه صباح وعجبتهم العيشه بالكويت ظلوا اهناك وجهالهم كبروا صباح صار عمره ست سنوات واخته اثمانيه وسليمه ضايجه لان بعيد عن اهلها وهم ما جابت بعد كعدت بس ولد وبنت ..