عالعموم .. فد يوم شفت ابو البدالة يم بيتهم وابو البدالة جان بيني و بينه بس سلام .. جان عنده بيك اب عليها درج و هو المسوول عن مربعنا يعني على (خطوط التلفونات ) اذا صار مشترك لو اذا انكطع .. الولد اسمه ناصر … من شفته يمهم و ديصلح تلفونهم بقيت انتظره لحد ميكمل .. بس كمل وركب السيارة وكفته و جلبت بي الا اعزمة على ببسي و نساتل .. و طبعا الدنيا حارة كيف هو عالببسي البارد .. و كالي اي شي يصير بتلفونكم بس خابرني و كتبلي رقم بيتهم الارضي .. زين اني كل الي سويته بصراحة علمود احصل منه رقم بيت البنية جوارينه .. لان همه ماعدهم علاقات بالمنطقة وردت افوتلها بس عن طريق الاتصال بالتلفون … سالفة اوكفلها بالركن لو الحكها تخوف جانت لان بيها مشاكل جبيرة تصير اذا البنية حجت لأهلها …لو احد من المنطقة شافني ..
المهم .. توقع كمت اني اخرب خط تلفوننا حتى بس اخابر ناصر و يجي يصلح التلفون .. يعني مره بسجينه كطعت الخط و رحت خابرته من تلفون ثاني بأسواق ثانية كلتله تلفون المحل مكطوع و داخابرك من اسواق يرحم والديك تعال باجر … و اجه ثاني يوم صلح التلفون و خليت امي بوقتها تسويله غده و انطيته فلوس بيده هم لأن بسرعة اجه … كلت خلص ثالث مره افتحله الموضوع …
ثالث مرة هم سويت هالسالفة و حتى هو من اجه تعجب كالي شنو السالفة .. كلتله يمكن احد عنده عداوه ويانه هو ديكص خطنا .. و بيومها فتحتله الموضوع ورى مكمل شغلة .. كلتله ناصر انته تعرف ارقام المنطقة كلها مو ؟؟
كال طبعا غير ضمن اختصاصي .. كلتله زين اريد اطلب منك شي بس بشرفك لا تاخذها بغير نظره .. كال كول أأمرني .. كلتله اني اريد اتزوج و اكو بنية معجب بيها بس ماعرف هي مخطوبة اخاف وهي صح بمنطقتنا بس تعرف ماعرف اروح مباشرة اسألها .. واخاف من المشاكل …
و لان انته صديقي اريد اطلب منك رقمهم و انت اصلا قبل فترة صلحت خطهم جان عطلان هذولة شبيك النازلين جدد ..
اشو هذا كام وكف على حيله كالي ششايفني كوا؟؟؟ (مكرم القارئ) وكالي انته متستحي و اصلا عوف المستحى هاي السالفة بيها سجن و لك انته شدتخرط .. طبعا بيومها اني فد خفت كمت اطكطك .. و كام راح ركب سيارته وراح … اني بيومها منمت من التفكير و الخوف .. كلت هذا اخاف يروح يسويلي مشكلة و سديت الموضوع كله بس البنية براسي … بقيت اباوع عليها و حتى كمت اكتب عليها شعر …و جنت اتخيل بيوم من الايام راح اتزوجها و اشوفها كل الشعر الي كتبته عليها … وراحت ايام وجتي ايام و اني بعدني ممحاجيها بس بيني و بينها نظرات .. الى ان فد يوم اني وكاعد برى شفت هوسة يم باب بيتهم … وعبالي كرايبهم يمهم .. و ورى فترة ثانية سمعت موسيقى وطبل عرفت البنية تزوجت … هنا جانت الصدمة .. حسيت بروحي ضعت حتى بجي بجيت لان متسبعت ورحت حاجيتها لو رحت كلت لأهلي و خطبتها .. صح اني محجيت وياها ولا هي حجت وياي بس المفروض اتقوى و اصير رجال و اروح لو احجي وياها لو اطلب ايدها .. ضاعت من ايدي بيومها شككت كل اوراق الشعر الي كتبتها عليها و حتى تمرضت و ضعفت و لحيتي طولت … من رحت حجيت هالحجي لابوك هو الوحيد الي هون عليا السالفة .. و هذا ابوك كاعد حي يرزق جان هو الوحيد صديقي و الي اثق بي و اصلا كل هالحجي هو مجان يعرفه و اني محجيتله ورى متزوجت رحت حجيتله … ابوك بوقتها هون عليا السالفة و طلعت من ذيج المرحلة … وراها كلت اني بعد بحياتي ما احب شوف شكد فطير جنت ..
جنت حاس الي بيني و بين هالبنية حب مع العلم اني كلمة محاجي وياها … وابوك جان يعرف اني داخرط و اصلا ماكو حب بالموضوع بس جان يهون عليا السالفة و يكلي عادي تصير … وراها مشت سنة و ثنين و توقع حتى ورى متزوجت البنية اني بقيت انتظرها تجي هي و رجلها للبيت حتى بس اشوفها … و ثالث سنة البنية تطلكت بسبب هي ميصير عدها جهال و رجلها جان يريد جهال … هالشي عرفته صدفه عن طريق امي … و طلبت من امي تخطبها الي و امي بوقتها كالتلي هم مطلكة وهم ميصير عدها جهال انته مخبل .. كلتلها اي مخبل و حاربوني اهلي واني حاربتهم ابوية وامي ٤ اشهر ميحجون وياي … و حتى امي تمرضت بوقتها تكلي اني اريد اشوف جهالك وانته تريد تاخذ وحدة عاقر .. و بقيت مصر اخر شي ابوية وامي قبلو لان شافوني قافل عالموضوع .. اهل البنية بوقتها رادو بس يمشون قسمة بنتهم لان برأيهم همه محد ياخذها بعد .. بس اخذتها و تزوجتها و حجيتلها كلشي بس حرامات الشعر كله شككته .. جنت يوميا اكلها لو موجودة الاوراق جان قريتهم الج ههههه .. هي تكلي اني جنت كلشي احس وجنت اشوفك من تباوع عليا و حتى بيوم عرسي من فتنا من يم المحل ردت اشوفك بس مجنت موجود .. كلتلها اي جنت ورى المحل كاعد ابجي … و هي شبعت بجي بيومها من سولفتلها … و سنة ورى سنة ابوية وامي توفو و احنا كبرنا واخوية استشهد بأنفجار و بقيت بس اني وياها بهل البيت …. صح ماعندي جهال بس والله من يوم فاتت بيتي اني اعاملها مثل الطفلة .. احسها بنتي مو بس زوجتي … من الاخير المكتوب الك مكتوب .. وخلي ببالك ابوك حجالي كلشي … البنية الي جنت تحبها و كشفت خيانتها لو الك وقدرها مكتوب وياك .. لو تحترك الدنيا كلها تجي و بالاخير تصير الك .. واذا ممكتوب قدرها وياك تروح خلص .. وتجي غيرها .. و احتمال غيرها و غيرها بس بالاخير اكو وحدة مسجلة و مكتوب قدرها الك .. هاي متعرف شلون و شوكت راح تلتقي بيها … بس بالاخير راح تكملون حياتكم سوى .. فلا تنقهر و لا تضوج ولا تتوجع … المكتوب الك يجيك … يجيك بعد سنة سنتين يجيك .. كل واحد بينا عنده نص ثاني بمكان ثاني يجوز بدولة ثانية بس بالاخير راح يصير الك … (ابو غايب)
انتهى
اخوكم ابو بغداد سايق التكسي
#ابوـبغداد
ابو غايب
Start from the beginning
