من جنا نلتم طلاب و طالبات نكعد نسولف .. كل واحد بينا بداخله كومه احلام يسولفها بالكعدة .. بس الاحلام كلها مرتبط بشي واحد .. الشهادة و التخرج .. يعني ماكو واحد من الكاعدين راسه مابي حلم .. حلم صغير حلم جبير مو مهم .. المهم اكو براسه حلم و هدف … اني صوتي جان مميز .. جنت مرات اغني بالمناسبات مال الكلية لذلك جنت مشهور (بنص الطلاب و الكليه بس) .. يعني عندي شعبية .. و اغلب الطلاب و الطالبات جانو يكولولي ورى كل مشاركة اليا بالكلية (ليش متحاول تطلع بالتلفزيون) بذاك الوكت جان اكو بس قناتين .. قناة العراق والشباب .. بصراحة رحت و حاولت بس كل محاولاتي انتهت بالفشل من باب القناة …
و بذاك الوكت مجان اكو انترنت واحد يعرض بي موهبته ولا اكو كومة قنوات مثل هسه .. ولا حتى اكو برامج مسابقات للصوت .. عالعموم انقتلت الموهبة بداخلي .. ياريت لو بس عالموهبة هاي الي انقتلت .. بمرور الوكت هواي اشياء انقتلت جواي .. حياتي صارت عبارة عن احلام و اهداف توكع وحدة ورى وحدة .. طبعا هالحجي اني اخذت الشهادة و اول شي صار وياي تعيين رمزي .. تعينت بوظيفة رمزية .. راتبها تعبان كلش كلش … كمت اشتغل ورى الدوام سايق كوستر .. ارجع من الوظيفة مباشرة للكراج .. حتى البيت ماشوفه .. استلم الكوستر من صاحبها و اطلع بيها على باب الله .. و مرات اروح بالكوستر اعراس و زيارات و لعبات مال طوبة يعني فرق شعبية يأجروني .. ومرات هم اروح سفرات شبابية للحبانية لو للجزيرة .. وبيوم من الايام جنت طالع بعرس .. واكو بنية ورايا كاعدة بالضبط شكلها كلش حلو .. الطريق كله اباوع عليها بالمرايا وهي ولا حست بيا … و وصلنا للفندق بوقتها جانت الكروه اخذهم من الطوبجي للقاعة و راها بعدين نروح للشيراتون و ارجع بيهم بالنهاية للطوبجي … بالقاعة اني كعدت جوى .. اكو سواق اربعة وياي هم جايين بكوسترات و حتى تكسيات .. كعدنا على ميز واحد و جابولنا اكل … اكلنا و ماعرف شلون التفت لكيت نفس البنية تباوع عليا … ضحكت بوجها هي هم رجعت ضحكتلي .. والله الموقف بذاك اليوم جان موقف يوكف الكلب …موقف ميصير ولا راح يصير بحياتي .. لان حسيت روحي مشدوده الها … اشرتلها و طلعت اني برى و هي لحكتني .. جان تكلي انت مو فلان ؟
اني صفنت منين عرفت هاي اسمي .. كلتلها اي ؟؟؟
كالت شبيك ناسيني مو .. كلتلها والله ماعرف منو انتي .. كالت انت جنت مشهور بوكت الكلية و جنت تغني و اني شبيك جنت بفلان قسم بس جان شكلي مختلف هسه تغيرت بس سبحان الله انته بعدك بس شوية سمنان .. كلتلها وين ذكريني ويامن .. جان تعدد طلاب كلهم اعرفهم و تذكرتها بس كلش متغيره واني اصلا بذاك الوكت شايفها بس ممركز عليها … و كمنا نتذكر مواقف وهي كالت ليش متصعد انته تغني وكالت العرس هذا عرس بنت خالتي … كلتلها وين يمعودة اني بطلت صوتي صار خشن هسة من الجكاير .. ضحكت .. وبقينا نحجي و كلتلها اريد ابقى احجي وياج عادي اخذ رقمج .. كالت لا حتى يكتلوني اهلي ههههه انته انطيني رقمك و كلي من شوكت لشوكت تكون بالبيت … اتفقنا ورى ١١و نص يوميا نحجي .. و كمل العرس و الطريق كله بالرجع تباوع عليا و اني اباوع عليها و رجعنا و بذيج الفترة اكدر اكول جان احلى فترة بحياتي … والله والله والله .. اني اطلع من صباحيات الله و ارجع الظهر من الوظيفة للكراج و للعركات مال كراجات و النفرات والهوسة و ارجع بليل منتهي و ميت من التعب … بس احجي وياها كل التعب يطير … واحس روحي منولد من جديد … زين … حبيتها كلش و حبتني و يومنا صار عبارة عن تفكير بالمستقبل و نكون سوى و بنفس البيت … و كدرت اقنع امي ان اتزوج رغم ما جان الزواج كلش صعب واني عندي ٣ خوات … بذاك الوكت جانت غرف النوم جهنم اسعارها .. بس اكو نجارين يسوون صناديق الجاي المستورد غرف نوم … بأسعار مناسبة .. المهم لزكتها منا و منا و تزوجت … بس طلعت روحي لحد ملزكت السالفة تلزيك … حتى وكت للتفكير مجان عندي .. لان بس اريد يكمل كلشي على خير و اخذها … تزوجتها و سعادتي اكتملت … عشت وياها مرتاح … جانت تحب شغلات كلش كلش بسيطة … بس محد ميشوف سعادتها من اجيبلها كوجه خضره … خطية جان يومها كله محصور بشغل البيت و التنظيف … و تنتظرني برى بالحديقة يوميا ساعة ١١ … اول متسمع صوت الباب تكوم توكف … و امي تكلها اجى حبيبج و تضحك … خطية جانت تخجل من امي وخواتي … بس بمرور الوكت صارو ميانة .. سعادتها من اكون وياها .. و الله رزقنا بحسوني … اول طفل النا جان … ما انسى شكلها لحد هل اللحظة بصالة الولادة .. لزمت ايدي قوي و تبجي … واني ابوس راسها و خطية كصتها كلها قطرات مال عرق من التعب .. و اجانا حسوني و التهت بي .. و بيوم من الايام رجعت للبيت لكيت امي وخواتي وحدهم بالحديقة … كلتلها يمه وين زينه ؟؟؟
كالت يمه مالها خلك فوك نايمة … جانت اول مرة تسويها … حتى بأيام الحمل جانت تنتظرني برى .. صعدت ركض فوك كالت حبيبي مابيا شي و كامت تحضرلي الاكل بس لازمه خاصرتها … ثاني يوم اخذت موعد بالسعدون و رحنا للدكتور لأن الليل كله تتكلب يمنى يسرى و متريد تفززني المسكينة واني افز و ابوس ايدها .. واكلها خلي نروح للمستشفى متقبل تكلي هيج نغزات خفيفة .. رحنا و طلع عدها مشكلة بالكبد .. طبعا الي يقرأ الاحرف مو مثل الي يعيشها .. لان متأكد الي يعيش هيج حاله و يكعد يصفن و يتذكرها .. روحه تنعصر عصر و الخنكه و الدمعه توكف بطارف العين … حاولنا نلم الموضوع بس مفاد .. كالو زرع و طبعا اني بذيج الفترة الديون اكلتني اكل بسبب المراجعات للدكاترة … كل يوم اسمع عن دكتور و اروح و كشفيتهم غالية كلش .. و كل واحد يكتب علاج شكل بس كله ميفيد اذا مو زرع .. بذيج الفترة الزرع ردنا نسوي بعمان .. و هي متقبل تكول مابيا شي .. لحد ما فد يوم طالع اني على باب الله و طبعا اخر فترة كامت متكعد برى يم امي .. رجعت فتت وشفت امي وحدها مكعدة حسوني بحضنها و زينه ماكو .. رحت يم امي كلتلها ها شلونها .. امي كامت تبجي كالت مريتك تعبانة و لو هالبيت ملك والله جان بعته علمودها … كلتلها يمه تنحل ان شاء الله .. وصعدت لكيتها لا حس ولا نفس … اكول تخبلت ؟؟؟
اكول صرت جاهل بعمر ٤ سنوات اخذو امه وابوه منه و كتلوهم كباله ؟؟؟
اكول بجيت ؟؟
اكول لطمت مثل النسوان على وجهي ؟؟؟
اكول صوتي وصل لسابع جار بأسمها (زينه) ؟؟
اكول الناس الي التمو من شافوني هيج ابجي كلهم كامو يبجون على وضعي ؟؟
ماعرف شصار بيا … اني اسمع و اقرأ عن خروج الروح من الجسد يكون بيها وجع مو طبيعي .. و اسمع عن الولادة وشفت بعيني الوجع مال زينه من جابت حسوني … و سامع عن اوجاع الكيمياوي للمريض من يحقنوه بي … بس وجعي بذيج الدقيقه اقوى اقوى اقوى اقوى .. روحي طلعت جسمي …. و انحقنت بوجع بس دائمي لحد هاللحظة بداخلي … بقيت عايش جسم بلا روح … و اروحلها كل ما احتصر للمقبره ابجي هناك واحضن الطابوك مال الكبر .. و امسح عيوني بيدي من الدمع و امسح الدمع بالطابوك … عمري بذاك الوكت عبر للتسعين سنه .. بلحظة عبر …
حسيت روحي رجل متروس امراض هرم جبير .. بس الي صبرني حسوني وخواتي وامي … عشت علمودهم وبس .. المسكين جدته ربته … جانت اصعب لحظات اعيشها الي تخلي الشريط كله يرجع براسي هي لحظات دخولي للبيت و اشوف امي وحسن كاعدين بالحديقة … وزينه وينها مموجودة .. ماكو زينه .. و مر الوكت و حسوني كبر و خواتي تزوجو .. بس المسكينة امي الي جانت تنتظرني هم راحت .. يعني من الاخير بقيت وحدي .. موت امي كسر الباقي بيا ورى زينه .. الناس بالمنطقة ينقهرون عليا بلي مريت بي واشوف هالشي بعيونهم … من اوكف يسلمون عليا يطلعون مواضيع من جوى الكاع حتى بس يغيرون وجهي الحزين لو يحاولون يزرعون ابتسامه بوجهي … و كبر حسوني و صار لاعب مال طوبه مشهور و عنده جمهور .. و اني بكل لعبة اروح اشجعه .. الشي الوحيد بهل الدنيا الي يخليني اضحك وابتسم هو حسن .. حسن اشتهر كلش .. و كلش محبوب بالمنطقة .. وضعي المادي تغير و تركت السياقة .. الوظيفة راتبها حاليا جبير و عندي قطعتين كاع و بيت صغير ملك .. و سيارة عندي و سيارة عند حسن … و الحقير من يريد شي يكلي بداعة زينة بداعة امك هههه و يضحكني الوحيد من بين كل العالم هو يضحكني … يضحكني لدرجة ادمع من الضحك .. اشوف بي زينه و اشوف بي امي .. و اني حاليا عايش مرتاح وياه بالبيت و شوية كمت اطلع هواي … يعني عندي اصدقاء من الوظيفة و من المنطقه يجون يمي و اني مرات اروح يمهم … يعني الحمدلله ..
و مكاطع روحتي لزينه و لأمي ميعدي شهر اذا ما اروحلهم اني و حسن و مرات اروح وحدي … بس الي اتمناه هسه .. هو ميطبق و لا راح يصير … بس اتمنى وضعي المادي الحالي نفسه نفسه من جانت زينه موجوده يجوز جان كدرت اسوي شي .. و امي خطيه توفت و هي تتمنى نملك بيت .. ليش ليش من يجي الشي الزين و الوضع يتغير نباوع يمنى يسرى نلكه نفسنا وحدنا … حتى الي نريدهم يرتاحون مراح نلكاهم .. الحمدلله والله يخليلي حسوني .. هو الي يضحكني بهل الدنيا و من كبر تغير وجهي علموده .. بس ماعرف ليش بيا خوفه عليه .. حتى مرات هالشي يضوجه بس ميبنلي هالشي .. لان اتصل بي كل شويه .. ها ابني وين انته … يكلي مو كتلك بفلان مكان و مرات انسى ههههههه ارجع اتصل بي ورى عشر دقايق … حبيبي هو يعرف اخاف عليه … عالعموم .. كل واحد بينا يتمنى شي بس اكو امنيات متصير .. امنيتي شي واحد بس .. زينه وامي يجون وياي يشوفون حسن شلون يلعب بالساحه و شلون الناس تشجعه وكلها تصيح بأسمه .. هاي امنيتي وبس … الف رحمه على روحكم احبكم والله و مرايحين من بالي لحظة .. و الف رحمه على اموات الكل …
(راحو)
انتهى
اخوكم ابو بغداد سايق التكسي
#ابوـبغداد
