The True Conqueror [Complete]

Chapter 21

ထိုမြေပုံကို စားပွဲပေါ်တွင်တင်ပြီး လင်းမိုသည်သူ၏ နေရာရှာဖွေရေး အစီအစဉ်ကို စတင်လေသည်။ နန်းတော်၏ မြေနေရာမဆိုထားနှင့် အဆောင်များ၏ မြေဧကများပင် အတော်ကျယ်ဝန်းလှပေသည်။ လီချန်းယုံအပါအဝင် ဆယ်ယောက်သော စစ်သည်တို့ စစ်ရေးလေ့ကျင့်နေသည့် နေရာမှာ ထိုမြေဧကအကျယ်ကြီးနှင့် များစွာသော နန်းဆောင်တို့တွင် မည်သည့်နေရာမဆို ဖြစ်နိုင်သည်။

သို့သော် လင်းမိုသည် လင်းမိုသာဖြစ်သည်။ သူ၏ များပြားလှသော စစ်ရေးအတွေ့အကြုံနှင့် ထက်မြက်လှသော ဉာဏ်ရည်တို့ကို အသုံးချပြီး ကျွမ်းဝင်မှုမရှိသော ရှန်းနန်းတော်တွင် ဝံပုလွေဖြူလေး ရှိနေနိုင်မည့်နေရာကို ခန့်မှန်းရှာဖွေနေခြင်းဖြစ်သည်။

အချိန်အတော်ကြာသည်ထိ စားပွဲပေါ်တွင်တင်ထားသော မြေပုံတွင် မှတ်သားရာတစ်ချက်မျှမရှိပေ။ လင်းမို၏ တွက်ချက်မှုမှာ သူ့ဦးနှောက်သပ်သပ်ကိုသာ အလုပ်ပေးသော တွက်ချက်မှု ဖြစ်သည်။ သူစိမ်းလူတစ်ယောက်သာ လင်းမို၏ အသွင်အပြင်ကို မြင်ပါက အေးအေးလူလူထိုင်နေသည်ဟုသာ ထင်လိမ့်မည်။

"ဟမ်း....''
လင်းမိုသည် အဖြေရှာတွေ့သွားဟန်နှင့် ကျေနပ်အားရစွာ ပြုံးလိုက်သည်။ သူ၏ အလွန်ထက်မြက်လှသောဉာဏ်ရည်နှင့် လီချန်းယုံကို အလွန်အမင်းတွေ့လိုသော ဆန္ဒတို့က လျှို့ဝှက်စစ်ဆင်ရေးနေရာကို အတိအကျ ရှာဖွေပေးနိုင်အောင် ကူညီပေးလေသည်။

ရှန်နိုင်ငံ၏ ရှေးဘုရင်တို့နှင့် တော်ဝင်မျိုးနွယ်တို့၏ အရိုးပြာများကို ထားရှိပူဇော်သော ဘိုးဘေးဘီဘင် ခန်းမဆောင်သည် နန်းတော်၏ အနောက်ဘက်အကျဆုံးပိုင်းတွင်တည်ရှိနေလေသည်။ ကျယ်ဝန်းသော မြေနေရာနှင့် သီးသန့်ခန်းမဆောင်အပြင် အခြား ခန်းမဆောင်နှစ်ဆောင်လည်း ရှိလေသည်။ ထိုနေရာသည် မြင့်မြတ်သော မြေနေရာအဖြစ် သတ်မှတ်ထားသောကြောင့် အခွင့်မရှိဘဲ ဝင်ခွင့်မရှိပေ။ အမှန်ပင် ထိုခန်းမဆောင်နှင့် တွဲလျက် ခန်းမဆောင်၊ တလင်းပြင်တို့တွင် လီချန်းယုံနှင့် ကိုယ်ရံတော် ကိုးယောက်သည် အပြင်းအထန် စစ်ရေးလေ့ကျင့်နေကြသည်။