The True Conqueror [Complete]

Chapter 21

ငါပြန်လာခဲ့မယ်ဆိုတော့ ချန်းယုံဘယ်သွားတာလဲ

လင်းမိုက နန်းဆောင်အပြင်မှာ အသင့်စောင့်ဆိုင်းနေသော အစေခံများကို တွေ့လိုက်သောကြောင့် မေးလိုက်သည်။
"ချန်းယုံ ဘယ်သွားတာလဲ''

"မှန်လှပါအရှင်...အိမ်ရှေ့စံက မကြာမီ မွေးနေ့မင်္ဂလာအတွက် လျှို့ဝှက်စစ်ရေးလေ့ကျင့်မှု သွားရောက်ပြုလုပ်ပါတယ်...မြောက်ပိုင်းမှာ အိမ်ရှေ့စံမင်းသားက သူရဲ့ မွေးနေ့မင်္ဂလာတိုင်းမှာ ကြွရောက်လာတဲ့ ပြည်သူတွေနဲ့ ဧည့်သည်တော်တွေကို ချီးမြှောက်တဲ့အနေနဲ့ အထူးစစ်ရေးပြကွက်တွေစွမ်းရည်ပြကွက်တွေ ကိုယ်တိုင် ပြသလေ့ရှိပါတယ်''

အထိန်းတော်ကြီးက လင်းမိုကို ရိုသေစွာ လျှောက်ထားလေသည်။ အမှန်ဆို သူ၏ရှေ့တွင် ရပ်နေသော တောင်ပိုင်းက ဘုရင်ကြီးမှာ မည်သည့်အကြောင်းကြောင့် အိပ်ရှေ့စံနန်းဆောင်တွင် ကပ်ပြီးနေနေမှန်းမသိရသော်လည်း မြောက်ပိုင်းဘုရင်ကြီးထက်ပို၍ ကြောက်ရမည့်သူမှန်းနားလည်ထားသောကြောင့် အလွန်ရိုကျိုးနေခြင်းဖြစ်သည်။

"လျှို့ဝှက်စစ်ရေးလေ့ကျင့်မှုက ဘယ်နားမှာလဲ''

ငယ်ရွယ်ပြီးချက်ချာသော အစေခံမလေးက ကမန်းကတန်းဝင်ပြောလေသည်။
"အရှင်ကလည်း လျှို့ဝှက်စစ်ဆင်ရေးက နန်းတော်ထဲမှာ ဘယ်သူမှ မသိတဲ့ နေရာမှာ အိမ်ရှေ့စံနဲ့ သူရဲ့ ကိုယ်ရံတေယ်ကိုးယောက် အတူတူလေ့ကျင့်ကြတာ...အချိန်မတိုင်ခင် လေ့ကျင့်မှုတွေကို မြင်မှာစိုးလို့ ဘယ်နေရာမှာမှန်း မသိကြဘူး''

လင်းမို၏ မျက်ခုံးနှစ်ဖက်က အံ့အားသင့်သွားဟန်နှင့် အနည်းငယ် မြင့်တက်သွားသည်။ ပြီးမှ သူက မြောက်ပိုင်း၏ ထူးခြားသောအလေ့များကို သတိရမိပြီး ပြောလိုက်သည်။
"ကိုယ်တော်နားလည်ပြီ''
အေးဆေးတည်ငြိမ်သော လေသံဖြင့် ပြောလိုက်ခြင်းဖြစ်သော်လည်း လင်းမို၏ မျက်နှာထက်မှာ သူပြုံးနေကျ မထီတရီ အပြုံးတို့ရှိနေလေသည်။ လင်းမို၏ စိတ်ထဲတွင် မည်သည့်အရာကို တွေးနေသည်ဆိုသည်မှာ သူသာသိပေလိမ့်မည်။

လင်းမိုက မနက်စာသုံးဆောင်ပြီးသွားသောအခါ လီချန်းယုံ၏ များပြားလှသော စာအုပ်များကို တင်ထားသော စင်မှ ရှန်နိုင်ငံ ၏ ပထဝီဝင်အနေအထားအကြောင်းကို ရေးထားသောစာအုပ်တစ်အုပ်ကိုထုတ်ယူလိုက်သည်။ လင်းမိုခန့်မှန်းသည့်အတိုင်းပင် ထိုစာအုပ်ထဲတွင် ရှန်နိုင်ငံနန်းတော်၏ မြေပုံပါလေသည်။ အသေးစိတ်ဆွဲထာခြင်းမဟုတ်သော်လည်း မည်သည့်နေရာတွင် မည်သည့်အဆောင်ရှိသည်ကိုတော့ သိနိုင်လေသည်။