The True Conqueror [Complete]

Chapter 20

လီချန်းယုံက သူ၏မျက်လုံးကို ထောင့်ကပ်ပြီး လင်းမိုကိုအကဲခတ်နေသည်။ လင်းမိုပြောသည်က အနည်းငယ်အဓိပ္ပါယ်ရှိလေသည်။ ကိုယ့်ဘာသာနာကျင်အောင်လုပ်မည့်အစား အနှီမကောင်းဆိုးဝါးကိုပဲ ကိုက်ပစ်သင့်သည်။

အနှီမကောင်းဆိုးဝါး၏နှုတ်ခမ်းမှာ ထူလည်းမထူ ပါးလည်းမပါး ပိရိသေသပ်နေသည်။ တစ်နည်းအားဖြင့် ဆွဲကိုက်ချင်စရာကောင်းသည်။

လင်းမိုက သူ၏ ဝံပုလွေဖြူလေးမှာ ဦးနှောက်ကိုအပြည့်အဝအသုံးမချသည့် ကလေးပေါက်စသာသာ တွေးခေါ်တတ်သူမှန်းသိထားသော်လည်း သူ့ကို တကယ်လာကိုက်မည်ထင်မထားပေ။

လီချန်းယုံ၏ ချယ်ရီသီးလို နီရဲရဲနှုတ်ခမ်းလွှာလေးက လင်းမို၏ မကောင်းဆိုးဝါးဆန်ဆန်ပြုံးတတ်သော အောက်နှုတ်ခမ်းကို ဖိကပ်ထားသည်။ လီချန်းယုံက ဒေါသကြီးသော ကလေးလို လင်းမို၏ အောက်နှုတ်ခမ်းကို အတင်းဆွဲကိုက်လေသည်။ သူ၏ ချွန်ထက်ထက်သွားဖြူဖြူလေးတွေက ယခုမှ ရန်ရှာရမည့်သူအစစ်ကို တွေ့သွားပုံရသည်။ အတင်းဖိကိုက်နေလေသည်။

လင်းမိုကမူ သူအမြဲစားသုံးချင်နေခဲ့သော ချယ်ရီသီးလေးက သူ့ပါးစပ်ထဲ ခုန်ဝင်လာသောကြောင့် အလွန်အမင်း စိတ်လှုပ်ရှားသွားသည်။ လီချန်းယုံ၏ စိုစွတ်စွတ် နီရဲရဲ နှုတ်ခမ်းဖူးလေး၏ အထိအတွေ့က သူ့ကို ရူးသွပ်သွားစေဖို့ လုံလောက်သည်။ သူ့ကိုနာကျင်အောင် ကြံရွယ်ပြီးကိုက်နေပါသော်လည်း လင်းမိုသည် နာကျင်မှုအစား သာယာမှုအလုံးအရင်းကိုသာ ခံစားနေရသည်။ သူက ရန်ရှာနေသော ဝံပုလွေဖြူလေး၏ ခါးကို အလိုက်သင့်ဆွဲဖက်ထားပြီး သူ၏ နှုတ်ခမ်းကို လီချန်းယုံစိတ်တိုင်းကျစားသုံးစေသည်။

လီချန်းယုံက စိတ်တိုင်းကျကိုက်ပြီးတော့ လင်းမိုကို လွှတ်ပေးလိုက်သည်။ သူလင်းမိုကို ကြည့်လိုက်မိသည်။ လင်းမိုက အရှိန်းညီးညီးတောက်လောင်နေသော မီးလျှံလို မျက်ဝန်းများနှင့် လီချန်းယုံကို စိုက်ကြည့်နေကြောင်းတွေ့ရသည်။ တပ်မက်ခြင်းဆန္ဒတို့ကို အဓိပ္ပါယ်မဖွင့်တတ်သော လီချန်းယုံက လင်းမိုသည် သူ့ကို စိတ်ဆိုးပြီး ထိုသို့ကြည့်နေကြောင်း ထင်မိသွားရှာလေသည်။