The True Conqueror [Complete]

Chapter 9

"သခင်လေး ချန်းယုံက တစ်ခါတစ်လေ ကျွန်တော့်ဆီလာတတ်တယ်...အဲ့ဒါကြောင့်... ''

လင်းမိုခေါင်းငြိမ့်ပြလိုက်ပြီး ရထားလုံးအတွင်းက ပစ္စည်းတွေကို လိုဏ်ဂူအတွင်းသို့ ရွှေ့ပြောင်းလေသည်။ မည်မျှကြာနိုင်မည်မသိသည့်အတွက် လင်းမိုက ရိက္ခာခြောက်အတော်များများသယ်ယူခဲ့လေသည်။

ရှောင်ချိုနှင့် လင်းမို လိုဏ်ဂူအတွင်းပြင်ဆင်သင့်သည်များကို ပြင်ဆင် သွားသောအခါ သူတို့မှာ လုပ်စရာတစ်ခုပဲ ကျန်တော့သည်။ ရထားလုံးအတွင်းက မေ့မြောနေသော လီချန်းယုံကို လိုဏ်ဂူအတွင်း ရွှေ့ပေးဖို့ ဖြစ်သည်။ ရှောင်ချိုက ရထားလုံးတံခါးကို ဖွင့်ပြီး သခင်လေးချန်းယုံကို ပွေ့ချီမည်အပြု ပြင်းထန်သော အားတစ်ခုက သူ၏လက်ပေါ်ကျလာသည်။

ရှောင်ချိုလန့်သွားပြီး နောက်ဆုတ်လိုက်သည်။ အရှင်လင်းမိုက သူ့လက်ကို ဖြတ်ရိုက်ချလိုက်ခြင်းဖြစ်သည်။ လင်းမိုက အတွင်းအား မသုံးဘဲ ရိုက်လိုက်ခြင်းဖြစ်သော်လည်း သူ၏ ပင်ကိုအားကပင် သာမန်လူတစ်ယောက်ဆို အရိုးကျိုးသွားနိုင်လေသည်။

"မင်းကို ပစ္စည်းတွေသယ်ဖို့ပဲ ပြောတာ ဘယ်သူက လီချန်းယုံကို ပွေ့ခိုင်းတာလဲ''

ရှောင်ချိုမှာ နာသွားသော လက်ကို ပွတ်နေလေသည်။

"အရှင်ကလည်း သခင်​လေး ချန်းယုံကို စောင့်ရှောက်ဖို့က ကျွန်တော့် တာဝန်လေ...ဘာလို့ အသားလွတ်ကြီးလာရိုက်တာလဲ''

လင်းမိုက မျက်မှောင်ကြုတ်ပြီး ရှောင်ချိုကို ကြည့်လိုက်သည်။

"မင်းစောင့်ရှောက်တာက အသားထိဖို့ လိုလို့လား''

ပြောရင်းလင်းမိုက လီချန်းယုံကို ပွေ့ချီပြီး လိုဏ်ဂူထဲဝင်သွားလေသည်။ ရှောင်ချိုမှာတော့ ကျိုးကြောင်းမဆီလျော်သော သူကို သခင်အဖြစ်တော်ထားရသည့် မိမိကံကြမ္မာကို သာ အပြစ်တင်မိတော့သည်။

လိုဏ်ဂူအတွင်း လီချန်းယုံကို နေရာရွှေ့ပြီးနောက် လင်းမိုနှင့် ရှောင်ချိုသည် လုပ်ဆောင်စရာအချို့ ကျန်ရှိနေ သေးလေသည်။ လီချန်းယုံ၏ ခန္တာကိုယ်တွင်ရှိနေသော အဆိပ်ကိုဖြေရန် ဆေးတစ်မျိုးဖော်စပ်ရမည်ဖြစ်သည်။ ဆေးဖော်စပ်ရန် ရေခဲကျောက်ဆောင်တွင် ပေါက်တတ်သော အပင်တစ်မျိုးကို ရရန်လိုလေသည်။ ထိုတာဝန်ကတော့ သေချာပေါက် ရေခဲပြင်တွင် ကျင်လည်သော ရှောင်ချို၏ တာဝန်ဖြစ်သည်။ ရှောင်ချိုက သူမသွားခင် သူ့သွေးအနည်းငယ်နှင့် ဆေးတစ်မျိုးကို လီချန်းယုံအားတိုက်သွားလေသည်။