فصلية لظالم وحش

29

#فصلية_لظالم_وحش
ﺍﻟﺴﻼﻡ ﻋﻠﻴﻜﻢ
ﻓﺼﻠﻴﻪ ﻟﻈﺎﻟﻢ ‏( ﻭﺣﺶ ‏)
ﺑﻘﻠﻤﻲ ﺳﻘﻴﻦ ﺍﻟﺸﻤﺮﻱ
ﻻ ﻳﺴﻤﺢ ﺍﻭ ﻳﺤﻠﻞ ﻧﺸﺮ ﺍﻟﻘﺼﻪ ﺑﺪﻭﻥ ﺫﻛﺮ ﺍﺳﻤﻲ
&
.............
ﺯﻣﺮﺩ : ﺷﻐﻠﺖ ﺍﻟﺴﻴﺎﺭﻩ ﻭﻃﻠﻌﺖ ﺑﻜﻞ ﺳﺮﻋﺘﻲ ﻭﻫﻮ ﺍﺟﻰ ﻳﺮﻛﺾ ﻳﺮﻳﺪ ﻳﻔﺘﺢ ﺑﺎﺏ ﺍﻟﺴﻴﺎﺭﻩ ﺍﻭ ﻳﻮﻛﻔﻬﺎ ﻭﻳﻨﺰﻟﻨﻲ
ﻋﺎﺩ ﺧﻠﻴﺖ ﻭﻃﻠﻌﺖ ﺩﺍﺭﻭﺡ ﻟﺒﻴﺖ ﺟﺪﻭ ﻭﺍﻟﻲ ﻫﻮ ﺑﻴﺘﻨﻪ ﻭﺳﺎﻛﻨﻴﻦ ﺑﻲ ﺍﻧﻲ ﻭﻣﺎﻣﺎ ﻭﻫﻮ ﺑﺎﻟﻜﺮﺍﺩﻩ ﻭﺍﻟﻤﺴﺘﺸﻔﻰ ﺍﻟﻲ ﺍﻧﻲ ﺑﻴﻬﺎ ﺑﻌﻴﺪﻩ ﻋﻦ ﺍﻟﻜﺮﺍﺩﻩ ﻳﻌﻨﻲ ﺍﺫﺍ ﻟﺤﻜﻮﻧﻲ ﻣﺎﻝ ﺍﻭﺍﺩﻡ ﻭﺍﻟﻠﻪ ﺑﺎﻭﻋﺖ ﺑﺎﻟﺠﺎﻣﺔ ﻣﺎﻝ ﺍﻟﺴﻴﺎﺭﻩ ﻭﻟﻦ ﺻﺪﻙ ﻃﻠﻌﺖ ﺳﻴﺎﺭﻩ ﺍﺑﻦ ﻋﻤﺔ ﻟﻔﻬﺪ ﻟﺤﻜﺘﻨﻲ ﻭﺑﻴﻬﺎ ﻓﻬﺪ ﻭﺍﺑﻦ ﻋﻤﺔ ﺍﻭﻳﻠﻲ ﺭﺑﻲ ﺑﺲ ﻻ ﻳﻠﺤﻜﻮﻥ ﺑﻴﻪ ﻛﻤﺖ ﺍﻣﺸﻲ ﺳﺮﻳﻊ ﻭﻫﻤﺔ ﻭﺭﺍﻳﻪ ﻭﻛﻞ ﺷﻮﻱ ﻳﻮﺻﻠﻮﻧﻲ ﻭﺍﻧﻲ ﺃﺩﻭﺱ ﺑﺎﻧﺰﻳﻦ ﺭﺩﺕ ﺍﺗﻴﻬﻢ ﻣﺎﻛﻮ ﺍﻧﻮﺏ ﺍﺭﻳﺪ ﺍﻭﺻﻞ ﺳﻴﻄﺮﻩ ﻭﺍﻧﺰﻝ ﺑﻴﻬﺎ ﻳﺨﻠﺼﻮﻧﻲ ﻫﻢ ﻣﺎﻛﻮ ﻛﺎﻡ ﻳﺘﻘﺮﺏ ﺑﺎﻟﺴﻴﺎﺭﻩ ﻋﻠﻴﻪ ﻭﺍﻟﻲ ﺟﺎﻥ ﻳﺴﻮﻕ ﻓﻬﺪ ﻳﻌﻨﻲ ﻫﺴﻪ ﺍﺫﺍ ﺭﺍﺩ ﻳﻠﺰﻣﻨﻲ ﻣﻴﻠﻜﻮﻥ ﺍﺻﻼ ﺟﺜﺘﻲ ﻣﺎ ﺍﻧﻜﺮ ﺍﻟﺨﻮﻑ ﺟﺎﻥ ﻣﺎﻟﻴﻨﻲ ﺑﺲ ﻫﺎﻱ ﻓﺮﺻﺘﻲ ﺍﻟﻮﺣﻴﺪﺓ ﻭﺍﻧﻲ ﻣﺨﻄﻄﻪ ﻣﻦ ﺍﻭﻝ ﻳﻮﻡ ﺍﻧﻬﺰﻡ ﻓﺘﻘﺮﺏ ﻋﻠﻴﻪ ﻭﻋﺒﺮﺕ ﺍﻝ١٨٠ ﻭﻫﺎﻱ ﺃﻭﻝ ﻣﺮﺓ ﺍﺳﻮﻕ ﻫﻴﺞ ﺳﺮﻋﻪ ﺑﺴﺒﺒﻪ ﺟﻨﺖ ١٤٠ ﺍﻭ ١٦٠ ﺑﺎﻟﻨﺎﺩﺭ ﻋﺎﺩ ﺿَﻞ ﻳﻼﺣﻜﻨﻲ ﻭﺍﻟﻠﻪ ﺟﻨﺔ ﻓﺎﺭﻩ ﻭﺑﺰﻭﻥ ﺿﻠﻴﺖ ﻧﺺ ﺳﺎﻋﻪ ﻋﻠﻰ ﻫﺬﺍ ﺍﻟﺤﺎﻝ ﻭﻫﻮ ﻳﺄﺷﺮ ﻣﻦ ﺍﻟﺴﻴﺎﺭﻩ ﻭﻳﺼﻴﺢ ﻭﻳﻌﻴﻂ ﻭﻣﺎﻛﻮ ﻓﺎﻳﺪﻩ ﺍﻧﻲ ﺍﺭﻳﺪ ﺑﺲ ﺃﻧﻔﺬ ﺑﺮﻭﺣﻲ ﻭﺍﻟﻠﻪ ﺟﺎﻧﺖ ﺍﻛﻮ ﺳﻴﻄﺮﻩ ﻗﺮﻳﺒﻪ ﺑﺲ ﻣﻮ ﻛﻠﺶ ﻋﺎﻟﻜﺮﺍﺩﻩ ﺷﻔﺘﻬﺎ ﻭﺟﺎﻥ ﺃﺩﻭﺱ ﺑﺎﻧﺰﻳﻦ ﻭﺃﻭﺻﻞ ﺍﻟﺴﻴﻄﺮﻩ ﻫﻤﺔ ﺗﻔﺎﺟﺆﻭ ﺍﻧﻮ ﺳﻴﻄﺮﻩ ﺻﺎﺭﺕ ﻛﺪﺍﻣﻲ ﻭﻫﻴﺞ ﺩﺍﺳﻮﻕ ﺻﺮﺕ ﺑﺼﻒ ﺍﻟﺴﻴﻄﺮﻩ ﻭﻧﺰﻟﺖ ﺍﺭﻛﺾ ﻭﺍﻋﻴﻂ ﺍﻟﺤﻜﻮﻟﻲ ﻓﺪﻭﺓ ﻓﻬﺪ ﺭﺃﺳﺎ ﺻﻒ ﺍﻟﺴﻴﺎﺭﻩ ﻭﻧﺰﻝ ﺑﺲ ﺻﺎﻳﺮ ﺑﻤﻌﻨﻰ ﺍﻟﻜﻠﻤﺔ ﻭﺣﺶ ﻣﺎ ﺷﻔﺘﻪ ﻣﺮﻋﺐ ﻃﻮﻝ ﺍﻟﻔﺘﺮﺓ ﺍﻟﻲ ﺍﻧﻲ ﻭَﻳَﺎ ﺑﻴﻬﺎ ﺑﻜﺪ ﻣﺎ ﻫﺴﻪ ﺻﺎﻳﺮ ﺣﺘﻰ ﻳﺨﻮﻑ ﺍﻫﻞ ﺍﻟﺴﻴﻄﺮﻩ ﺭﺃﺳﺎ ﺍﺟﻮﻱ ﻳﺮﻛﻀﻮﻥ ﻛﺎﻟﻮ ﺧﻴﺮ ﺍﺧﺘﻲ ﻛﺘﻠﻬﻢ ﻓﺪﻭﺓ ﺍﻟﺤﻜﻮﻟﻲ ﺭﺍﺡ ﻳﻤﻮﺗﻨﻲ ﻫﺬﺍ ﻓﻬﺪ ﺍﺟﺎ ﻳﺮﻛﺾ ﻋﻠﻴﻪ ﻻﻥ ﺣﺠﻴﺖ ﻭﻳﺔ ﺍﻟﺰﻟﻢ ﻭﻧﺰﻟﺖ ﺑﻨﻄﺮﻭﻥ ﻭﺑﺪﻱ ﻭﺑﺪﻭﻥ ﺷﺎﻝ ﻭﻓﻮﻛﺎﻫﺎ ﺣﺠﻴﺖ ﻋﻠﻴﻪ ﺍﺟﺎ ﻳﺮﻛﺾ ﻋﻠﻴﻪ ﻳﺮﻳﺪ ﻳﻠﺰﻣﻨﻲ ﻭﺍﺑﻦ ﻋﻤﺔ ﻭ٢ ﻣﻦ ﺍﻟﺠﻨﻮﺩ ﻻﺯﻣﻲ ﺻﺎﺭ ﻋﻴﺎﻁ ﻭﻓﻬﺪ ﻳﻜﻮﻝ ﺍﻟﻴﻮﻡ ﻣﻦ ﺻﺪﻙ ﺍﻣﻮﺗﺞ ﺧﻼﺹ ﻭﺝ ﺗﻨﻬﺰﻣﻴﻦ ﻣﻨﻲ ﻭﺝ ﻫﻴﺞ ﺗﺴﻮﻳﻦ ﺻﺎﺭﺕ ﻓﺪﻧﻮﺏ ﻭﺍﻟﺴﻴﺎﺭﺍﺕ ﺍﺟﻤﻌﺖ ﺗﺮﻳﺪ ﺗﻔﻮﺕ ﻧﺎﺩﻭ ﺑﺎﻟﺠﻬﺎﺯ ﻋﻠﻰ ﺿﺎﺑﻂ ﺍﻟﻨﻘﻄﻪ ﻋﻠﻤﻮﺩ ﻳﻄﻠﻊ ﻭﻛﺎﻟﻮ ﺣﺎﻟﻪ ﻃﺎﺭﺋﺔ ﻭﺟﺮﻭ ﻓﻬﺪ ﻋﻠﻰ ﺻﻔﺤﺔ ﻭﺍﻧﻲ ﻭﻛﻔﺖ ﻋﻠﻰ ﺻﻔﺤﺔ ﻋﻠﻤﻮﺩ ﺗﻔﻮﺕ ﺍﻟﺴﻴﺎﺭﺍﺕ ﻭﺍﻟﻠﻪ ﺍﺟﻰ ﺍﻟﻀﺎﺑﻂ ﻭﺟﺎﻥ ﺷﺎﺏ ﺑﻌﺪﻩ ﺑﺲ ﻣﻮ ﺻﻐﻴﺮ ﻛﻠﺶ ﻣﻦ ﺫﻭﻟﻲ ﺍﻟﻜﻴﻜﻴﺔ ﻳﻌﻨﻲ ﻭﻓﻬﺪ ﻳﺮﻳﺪ ﺑﺲ ﻳﻠﺰﻣﻨﻲ ﻭﺍﻧﻲ ﺣﺴﻴﺖ ﺑﺎﻷﻣﺎﻥ ﺷﻮﻱ ﻣﻦ ﺧﻠﺼﻮﻧﻲ ﻣﻨﺔ ﺷﻮﻱ ﻛﺎﻝ ﻫﺎﻱ ﺷﻜﻮ ﺑﺎﻭﻉ ﻋﻠﻴﻪ ﻭﻃﻮﻝ ﺑﻨﻀﺮﻩ ﻭﺭﺩ ﺑﺎﻭﻉ ﻋﻠﻰ ﻓﻬﺪ ﻛﻠﺔ ﻓﻬﺪ ﻣﺎﻛﻮ ﺷﻲ ﺳﻴﺪﻱ ﺑﺲ ﻣﺮﺗﻲ ﺷﻮﻱ ﻋﺪﻫﺎ ﺧﻠﻞ ﺑﻌﻘﻠﻬﺎ ﻭﺍﻧﻬﺰﻣﺖ ﻣﻦ ﺍﻟﻤﺴﺘﺸﻔﻰ ﻭﺍﻧﻲ ﺍﺟﻴﺖ ﻭﺭﺍﻫﺎ ﺍﺭﻳﺪ ﺍﻟﺰﻣﻬﺎ ﺑﺎﻭﻉ ﻋﻠﻴﻪ ﺍﻟﻀﺎﺑﻂ ﻛﺘﻠﻪ ﻭﺍﻟﻠﻪ ﺟﺬﺍﺏ ﻭﺭﻭﺡ ﺑﺎﺑﺎ ﺟﺬﺍﺏ ﻫﺬﺍ ﻭﺣﺶ ﻳﺮﻳﺪ ﻳﻤﻮﺗﻨﻲ ﻓﺪﻭﺓ ﺧﻠﺼﻮﻧﻲ ﻣﻨﺔ ﻓﻬﺪ ﻛﺎﻝ ﺯﻣﺮﺩ ﺗﻌﺎﻱ ﺍﻣﺸﻲ ﺍﺻﻌﺪﻱ ﻟﺘﺴﻮﻳﻦ ﻣﺸﺎﻛﻞ ﻭﻳﻜﺰ ﻋﻠﻰ ﺳﻨﻮﻧﻪ ﻛﺘﻠﻪ ﺣﻘﻴﺮ ﺍﻟﻠﻪ ﻻ ﻳﻮﻓﻘﻚ ﻛﻮﻥ ﺍﻧﺸﺎﻟﻠﻪ ﺍﺧﺮ ﻣﺎ ﺑﺪﺭ ﺑﻴﺪﻙ ﺳﻮﻳﺘﻨﻲ ﻣﺨﺒﻠﻪ ﻭﻟﻜﻢ ﻳﺎ ﻧﺎﺱ ﻳﺎ ﻋﺎﻟﻢ ﻫﺬﺍ ﻭﺍﺣﺪ ﻣﺘﻮﺣﺶ ﺃﺧﺬﻧﻲ ﻓﺼﻠﻴﻪ ﻭﻳﺮﻳﺪ ﻳﻤﻮﺗﻨﻲ ﻫﻮ ﺑﺲ ﻳﺮﻳﺪ ﻳﻔﻠﺖ ﻣﻨﻬﻢ ﺩﻳﺠﻲ ﻋﻠﻴﻪ ﺭﺩ ﺍﺑﻦ ﻋﻤﺔ ﻛﺎﻝ ﺧﻴﺘﻲ ﺯﻣﺮﺩ ﺟﻔﻲ ﺍﻟﺸﺮ ﻭﺗﻌﺎﻱ ﺭﺟﻌﻲ ﻭﻳﺎﻧﻪ ﻛﺘﻠﻪ ﺣﻠﻢ ﺑﻠﻴﺲ ﺑﺎﻟﺠﻨﻪ ﺍﺭﺟﻊ ﻭﻳﺎﻛﻢ ﻳﻌﻨﻲ ﺍﺭﺟﻊ ﻟﻠﻤﻮﺕ ﺑﻴﺪﻱ ﻓﻬﺪ ﻛﺎﻡ ﻳﻌﻴﻂ ﻭﻛﺎﻝ ﺗﺮﻩ ﺻﺒﺮﻱ ﺑﺪﻩ ﻳﻨﻔﺬ ﻋﺎﻁ ﺑﻲ ﺍﻟﻀﺎﺑﻂ ﻛﻠﻪ ﻫﻲ ﺷﻨﻮ ﺗﺮﻳﺪ ﺗﺴﻮﻱ ﻳﻌﻨﻲ ﻣﺜﻼ ﺑﺎﻟﻠﻪ ﻭﻓﻬﺪ ﺗﺨﺒﻞ ﺷﻠﻮﻥ ﺍﻟﻀﺎﺑﻂ ﻋﺎﻁ ﺑﻲ ﻭﻫﻴﺞ ﺳﻮﻩ ﺑﺲ ﺍﻟﺤﺮﺍﺱ ﻻﺯﻣﻴﻦ ﻓﻬﺪ ﻋﺎﺩ ﺍﻧﺪﺍﺭﻟﻲ ﺍﻟﻀﺎﺑﻂ ﺑﺲ ﻫﻮ ﺷﻠﻮﻥ ﺿﺎﺑﻂ ﺣﻴﺎﺗﻲ ﻛﻠﻬﺎ ﻣﺸﻔﺖ ﻫﻴﺞ ﺿﺎﺑﻂ ﻛﺎﺭﻳﺰﻣﺎ ﻭﺷﻜﻞ ﺍﻛﺜﺮ ﺣﺘﻰ ﻣﻦ ﺣﻠﻮ ﻭﺷﺨﺼﻴﻪ ﻭﻫﻴﺒﻪ ﻭﻛﺸﺎﺥ ﻭﻣﻦ ﻛﻠﻬﻦ ﺟﺪ ﻳﻌﻨﻲ ﺑﻤﻌﻨﻰ ﺍﻟﻜﻠﻤﺔ ﺭﻭﻋﻪ ﻣﺜﻞ ﺫﻭﻟﻲ ﺍﻟﻲ ﻳﻨﺸﺮﻭﻫﻢ ﻋﺎﻟﻨﺖ ﺍﻭﻳﻠﻲ ﻳﻤﻮﺕ ﺻﺎﻙ 😁 ﻭﺭﺑﻲ ﻛﻠﻤﻦ ﺗﺸﻮﻓﻪ ﺗﺘﺨﺒﻞ ﻣﻦ ﻛﺪ ﺟﻤﺎﻟﻪ ﻭﺍﻧﻮﺏ ﺍﻟﺰﻱ ﺍﻟﻌﺴﻜﺮﻱ ﺯﺍﻳﺪﻩ ﺟﻤﺎﻝ ﻛﺎﻝ ﻓﻬﻤﻴﻨﻲ ﺷﻨﻮ ﺍﻟﺴﺎﻟﻔﻪ ﻓﻬﺪ ﻛﺎﻝ ﺯﻣﺮﺩ ﺍﻥ ﻓﻜﻴﺘﻲ ﺣﻠﻜﺞ ﻗﺴﻢ ﺑﺎﻟﻠﻪ ﺍﻃﻠﻊ ﺑﺮﻭﺣﺞ ﻋﺎﻁ ﺑﻲ ﺍﻟﻀﺎﺑﻂ ﻛﻠﺔ ﻭﻟﻚ ﺷﻮ ﺍﻧﺘﻪ ﺑﺲ ﺗﺼﻠﺦ ﻭﺗﺬﺑﺢ ﺷﻨﻮ ﻣﻮ ﺑﻌﻴﻨﻚ ﺍﻧﻲ ﻭﺍﻛﻒ ﺍﻟﺼﻢ ﺣﻠﻜﻚ ﻻ ﺍﺷﻮﻓﻚ ﺷﻲ ﻣﻴﻌﺠﺒﻚ ﺍﻟﻨﺎﺱ ﺑﺪﺕ ﺗﻠﺘﻢ ﻭﻛﻠﻬﺎ ﺗﺒﺎﻭﻉ ﻋﻠﻴﻨﻪ ﻳﺮﺑﻲ ﻓﻀﻴﺤﺔ ﻭﺍﻟﻠﻪ ﺍﻟﻠﻪ ﻻ ﻳﻮﻓﻘﻚ ﻓﻬﺪ ﻋﺎﺩ ﺍﻟﻀﺎﺑﻂ ﺍﺧﺬﻧﻪ ﻟﻠﻨﻘﻄﺔ ﻣﺎﻝ ﺍﻟﺴﻴﻄﺮﺓ ﻟﻤﻜﺘﺒﻪ ﻭﺩﺧﻠﻨﻪ ﻳﻤﺸﻲ ﺑﺼﻔﻲ ﻋﻠﻤﻮﺩ ﻳﺤﻤﻴﻨﻲ ﻣﻦ ﻓﻬﺪ ﻻﻥ ﺍﺫﺍ ﺣﻠﻮ ﻓﻬﺪ ﻳﻤﻜﻦ ﻣﻴﺴﺘﻐﺮﻕ ﺩﻗﻴﻘﻪ ﻭﻳﻄﻠﻊ ﺑﺮﻭﺣﻲ ﻋﺎﺩ ﻃﺒﻴﻨﻪ ﻭﺍﻧﻲ ﺍﺭﺟﻒ ﻛﻌﺪﻧﻪ ﻛﺎﻝ ﺍﻟﻀﺎﺑﻂ ﺳﻮﻟﻔﻮ ﺷﻨﻮ ﺷﺒﻴﻜﻢ ﺟﺎﻥ ﺗﺮﻛﻴﺰﻩ ﺍﻛﺜﺮ ﺷﻲ ﻋﻠﻴﻪ ﺑﺲ ﻫﻮ ﻋﺒﺎﻟﻪ ﻣﺜﻼ ﺍﻧﻲ ﻣﺴﻮﻳﻪ ﻣﻜﺴﻮﺭﻩ ﺍﻭ ﻛﺬﺍ ﻋﺎﺩ ﺳﻮﻟﻔﺘﻠﻪ ﻛﺘﻠﻪ ﻓﻬﺪ ﻫﺬﺍ ﺃﺧﺬﻧﻲ ﻓﺼﻠﻴﻪ ﺗﻘﺮﻳﺒﺎ ﺻﺎﺭ ٨ ﺍﺷﻬﺮ ﻭﻧﺺ ﻭﻋﺬﺑﻮﻧﻲ ﻫﻮ ﻭﺍﻫﻠﻪ ﺑﻤﻌﻨﻰ ﺍﻟﻜﻠﻤﺔ ﻳﻌﻨﻲ ﺑﺴﺒﺒﻬﻢ ﺍﻛﺜﺮ ﻣﻦ ٤ ﻣﺮﺍﺕ ﺩﺧﻠﺖ ﻣﺴﺘﺸﻔﻰ ﻭ٣ ﻣﺮﺍﺕ ﺩﺧﻠﺖ ﻋﻤﻠﻴﻪ ﻭﺣﺘﻰ ﻗﺒﻞ ﻛﻢ ﻳﻮﻡ ﺍﻧﻲ ﻭﻛﻒ ﻛﻠﺒﻲ ﻭﺣﻤﻠﺖ ﺑﺘﻮﻡ ﻭﺛﻨﻴﻨﻬﻢ ﻣﺎﺗﻮ ﺑﺴﺒﺒﻬﻢ ﻭﺯﻭﺝ ﻋﻠﻴﻪ ﻭﻣﺮﺗﻪ ﺯﺍﺩﺕ ﺗﻌﺬﻳﺒﻲ ﻭﺍﻧﻲ ﻣﺎ ﻋﻠﻴﻪ ﺑﻴﻬﻢ ﺍﺻﻼ ﺍﻧﻲ ﻣﻨﺎ ﻣﻦ ﺑﻐﺪﺍﺩ ﺑﺲ ﺍﻫﻞ ﺑﺎﺑﺎ ﻣﻦ ﺍﻟﺠﻨﻮﺏ ﻭﺍﺑﻦ ﻋﻤﻲ ﻛﺎﺗﻞ ﺍﺧﻮ ﻭﺃﺧﺬﻭﻧﻲ ﻓﺼﻠﻴﻪ ﻭﺍﻧﻲ ﻛﻞ ﻫﺬﺍ ﻣﺎ ﺍﺩﺭﻱ ﺧﺎﺑﺮﻭﻧﻲ ﺍﻫﻞ ﺑﺎﺑﺎ ﺭﺍﺩﻭ ﺍﺭﻭﺡ ﺍﻟﻬﻢ ﺯﻳﺎﺭﻩ ﻋﺎﺩﻳﻪ ﻭﺭﺣﺖ ﻭﺑﻴﻮﻡ ﺍﻟﻲ ﺃﺧﺬﻭﻧﻲ ﻓﺼﻠﻴﻪ ﻳﻠﻪ ﺩﺭﻳﺖ ﻭﺣﺠﻴﺖ ﺷﻠﻮﻥ ﺻﺎﺭ ﺍﻟﺤﺪﺙ ﻭﺷﺴﻮﻭ ﻭﻛﺘﻠﻪ ﺍﻧﻲ ﻣﻮ ﻣﻦ ﺟﻤﺎﻋﻪ ﻗﺎﻧﻮﻥ ﺍﻟﻌﺸﺎﻳﺮ ﺍﻧﻲ ﻣﻦ ﺟﻤﺎﻋﺔ ﺍﻟﺪﻭﻟﻪ ﻭﺍﻟﻘﺎﻧﻮﻥ ﻭﺣﺒﺴﻮﻧﻲ ﺑﺎﻟﺒﻴﺖ ﺣﻴﺼﻴﺮ ٩ ﺍﺷﻬﺮ ﻣﺎ ﻃﻠﻌﺖ ﻏﻴﺮ ﺑﺲ ﻟﻠﻤﺴﺘﺸﻔﻰ ﻭﺇﻻ ﻣﺠﺒﻮﺭﻳﻦ ﻳﻮﺩﻭﻧﻲ ﻭﻣﺮﻩ ﺣﺎﻭﻟﺖ ﺍﻧﻬﺰﻡ ﻭﻛﻤﺸﻨﻲ ﻫﻮ ﻭﻛﺴﺮﻧﻲ ﺗﻜﺴﺮ ﻣﺨﻠﻪ ﺷﻲ ﺑﺠﺴﻤﻲ ﺻﺎﺣﻲ ﻭﺣﺠﻴﺖ ﺍﻟﻪ ﻛﻞ ﺍﻟﺤﺠﻲ ﻛﻠﺸﻴﺖ ﺣﺠﻴﺖ ﺍﻟﻪ ﻋﻠﻤﻮﺩ ﻳﻌﺮﻑ ﺷﻨﻮ ﺍﻟﺴﺎﻟﻔﻪ ﺗﺤﻮﻝ ﻭﺟﻬﻪ ﻟﻐﻀﺐ ﻭﻛﻠﺔ ﺑﺮﺑﻚ ﺍﻧﺘﻪ ﻫﻢ ﻣﺤﺴﻮﺏ ﻋﺎﻟﺰﻟﻢ ﻫﻮ ﻛﺎﻝ ﻫﻴﺞ ﻭﻫﺠﻢ ﻓﻬﺪ ﻋﻠﻴﻪ ﻳﺮﻳﺪ ﻳﻀﺮﺑﻪ ﻭﺍﻟﻀﺎﺑﻂ ﺗﺨﺒﻞ ﻃﻠﻊ ﻫﻢ ﺍﻋﺼﺎﺏ ﻳﻌﻤﻲ ﻳﺠﻠﻂ 😅 ﻫﻴﺒﻪ ﻣﻮ ﺿﺎﺑﻂ ﻳﺴﻄﺮ ﺳﻄﺮ ﻭﺍﻟﺤﺮﺍﺱ ﻛﻤﺸﻮ ﻓﻬﺪ ﻭﺿﺮﺑﻮ ﺑﻮﻛﺲ ﻭﻫﻮ ﺗﺨﺒﻞ ﻭﻛﺎﻡ ﻳﻌﻴﻂ ﺻﺎﺭ ﻋﺒﺎﻟﻚ ﺍﺳﺪ ﻭﻳﺮﻳﺪ ﻳﻔﺘﺮﺳﻨﻲ ﻳﻤﺔ ﺍﺫﺍ ﺍﻭﻛﻊ ﺑﻴﺪﻩ ﻫﺴﻪ ﺍﻻ ﻛﺒﻞ ﻟﻠﻨﺠﻒ ﺻﺎﺭﺕ ﻫﻮﺳﻪ ﺷﻜﺒﺮﻫﺎ ﻭﺍﻧﻲ ﺟﺴﻤﻲ ﻛﻠﻪ ﻛﺎﻡ ﻳﺮﺟﻒ ﻋﺎﺩ ﺣﻮﻟﻨﻪ ﻟﻠﻤﺮﻛﺰ ﺑﺲ ﺍﺟﺔ ﺍﻟﻀﺎﺑﻂ ﻭﻳﺎﻧﻪ ﻭﺭﻛﺒﻨﻲ ﻭَﻳَﺎ ﺑﺎﻟﺴﻴﺎﺭﻩ ﻭﺍﻟﺴﺎﻳﻖ ﻳﺴﻮﻕ ﻭﻫﻮ ﺑﺎﻟﺼﺪﺭ ﻭﺍﻧﻲ ﻭﺭﻩ ﺍﻧﻮﺏ ﻓﻬﺪ ﺗﺨﺒﻞ ﻛﺎﻡ ﻳﺸﻴﻞ ﻭﻳﻠﻂ ﺑﺮﻭﺣﺔ ﻭﺷﻠﻮﻥ ﺍﻧﻲ ﻣﺮﺗﻪ ﺍﺭﻭﺡ ﻭﻳﻪ ﻏﺮﺑﻪ ﻭﺍﺻﻌﺪ ﻭﻳﻪ ﺯﻟﻢ ﺑﺎﻟﺴﻴﺎﺭﻩ ﻭﻛﺎﻡ ﻳﻌﻴﻂ ﻋﺎﺩ ﺍﺑﻦ ﻋﻤﺔ ﻫﺪﺍﻩ ﻛﻠﻪ ﺍﻧﻲ ﺍﺭﻭﺡ ﺍﺭﻛﺐ ﻭﻳﺎﻫﻢ ﻟﺘﺨﺎﻑ ﺍﻟﻤﻬﻢ ﺻﻌﺪﻧﻪ ﻭﻭﺻﻠﻨﻪ ﻟﻠﻤﺮﻛﺰ ﻭﺩﺧﻠﻨﻪ ﻭﺍﻟﻀﺎﺑﻂ ﺍﻭﻝ ﺑﺄﻭﻝ ﻭﻳﺎﻧﻪ ﻭﻓﻬﺪ ﺍﺑﺪ ﻣﺎ ﺃﻭﺻﻒ ﺷﻜﻞ ﻓﻬﺪ ﺑﺬﺍﻙ ﺍﻟﻴﻮﻡ ﺍﺑﺪ ﻻﻥ ﺍﺻﻼ ﻣﻴﻨﻮﺻﻒ ﻋﺎﺩ ﺩﺧﻠﻨﻪ ﻟﻀﺎﺑﻂ ﺍﻟﻤﺮﻛﺰ ﻛﻠﻪ ﻭﻫﻢ ﺷﺮﺣﺖ ﺍﻟﺴﺎﻟﻔﻪ ﻭﻗﺪﻣﺖ ﺷﻜﻮﺓ ﻋﻠﻴﻬﻢ ﻛﻠﻬﻢ ﺣﺘﻰ ﺍﻟﻨﺴﻮﺍﻥ ﻋﺎﺩ ﺍﺑﻦ ﻋﻤﺔ ﺗﻮﺳﻞ ﺑﻴﻪ ﻛﺎﻝ ﺧﻴﺘﻲ ﻟﺨﺎﻃﺮﻱ ﻋﻮﻓﻲ ﺍﻟﻨﺴﻮﺍﻥ ﺭﺑﺞ ﻳﺎﺧﺬ ﺣﻘﺞ ﻣﻨﻬﻢ ﻛﻠﻬﻢ ﺑﺲ ﺻﻌﺒﻪ ﻧﺴﻮﺍﻧﻪ ﺗﺪﺧﻞ ﺍﻟﻤﺮﺍﻛﺰ ﺍﺷﺘﻜﻴﺘﻲ ﻋﺎﻟﺰﻟﻢ ﻋﻮﻓﻲ ﺍﻟﻨﺴﻮﺍﻥ ﺗﺪﺭﻳﻦ ﻫﺴﻪ ﻫﺎﻱ ﻫﻨﺎﻙ ﺑﻘﺮﻳﺘﻨﻪ ﺷﻜﺒﺮﻫﺎ ﺭﺍﺡ ﺗﺼﻴﺮ ﻣﻦ ﻳﺪﺭﻭﻥ ﺣﺘﻰ ﺳﻤﻌﺘﻬﻢ ﺭﺍﺡ ﺗﺮﻭﺡ ﻛﺘﻠﻪ ﻃﺒﻬﻢ ﻣﺮﺽ ﻛﺎﻝ ﻟﺨﺎﻃﺮﻱ ﺍﺫﺍ ﻋﻨﺪﻱ ﺧﺎﻃﺮ ﻳﻤﺞ ﺷﻮﻱ ﺧﻮﻳﻪ ﻓﻬﺪ ﺷﻴﺎﻃﻴﻦ ﺍﻷﻧﺲ ﻭﺍﻟﺠﻦ ﻛﺎﻣﺖ ﺗﺘﻄﺎﻓﺮ ﻛﺪﺍﻣﻪ ﺍﺷﺘﻜﻴﺖ ﻋﻠﻴﻪ ﻭﻋﻠﻰ ﺟﺪﻩ ﻫﺬﺍ ﻋﺠﻮﺯ ﺍﻟﺒﻴﻦ ﺍﻟﻲ ﺩﻣﺮﻧﻲ ﻭﺣﺘﻰ ﺑﻴﺖ ﺍﻫﻞ ﺑﺎﺑﺎ ﻗﺪﻣﺖ ﺷﻜﻮﺓ ﻋﻠﻴﻬﻢ ﻫﺠﻤﺘﻬﻢ ﻫﺠﻢ ﺑﺲ ﻭﻟﺪ ﻋﻤﻪ ﻣﺎ ﺍﺷﺘﻜﻴﺖ ﻋﻠﻴﻬﻢ ﻻﻥ ﺍﺑﺪ ﻣﺎ ﺍﺫﻭﻧﻲ ﻭﺟﺎﻧﻮ ﺯﻳﻨﻴﻦ ﻭﻳﺎﻱ ﻭﻓﻬﺪ ﻫﺠﻢ ﺍﻟﻤﺮﻛﺰ ﻫﺠﻢ ﻋﺎﺩ ﺑﻌﺪ ﻣﺎ ﻛﻤﻠﻨﻪ ﻛﻠﺸﻴﺖ ﻭﺧﻠﺼﺖ ﺍﻹﺟﺮﺍﺀﺍﺕ ﻭﻛﻠﺖ ﻟﻠﻀﺎﺑﻂ ﻳﺼﻌﺪ ﺍﻟﺸﻜﻮﻩ ﻟﻠﻤﺤﻜﻤﺔ ﺩﺍﺷﻮﻓﻬﻢ ﺍﻟﻘﺎﻧﻮﻥ ﺷﻴﺴﻮﻱ ﻋﺎﺩ ﺧﻠﻴﺖ ﻭﻃﻠﻌﺖ ﻭﻓﻬﺪ ﺣﺠﺰﻭ ﻭﺍﺧﺬﻭ ﻟﻐﺮﻓﻪ ﺍﻟﺤﺠﺰ ﻭﻳﺒﻮ ﺷﺴﻮﻩ ﻋﻮﺩ ﻣﻦ ﻛﻤﺖ ﺩﺍﻃﻠﻊ ﻭﻛﻤﺰ ﻋﻠﻴﻪ ﺧﻨﻜﻨﻲ ﺧﻠﺺ ﺭﻭﺣﺔ ﻣﻨﻬﻢ ﻛﻠﻬﻢ ﻭﻛﻤﺰ ﻋﻠﻴﻪ ﻛﻠﻬﻢ ﻃﻔﺮﻭ ﻋﻠﻴﻪ ﻳﺠﺮﻭﻥ ﺑﻲ ﺣﺘﻰ ﺍﻟﻀﺎﺑﻂ ﺍﻟﻲ ﺟﺎﻥ ﺑﺎﻟﻨﻘﻄﻪ ﻭﺍﻟﻀﺎﺑﻂ ﺍﻟﺠﺒﻴﺮ ﻛﺎﻡ ﻳﻌﻴﻂ ﻛﻠﻠﻬﻢ ﺭﺃﺳﺎ ﻟﻠﺴﺠﻦ ﺣﺘﻰ ﻣﻮ ﻟﻠﺤﺠﺰ ﻋﺎﺩ ﻣﻦ ﻫﺪﻭﻧﻲ ﻣﻨﻪ ﺍﺧﺘﻨﻜﺖ ﻻﻥ ﺁﺫﺍﻧﻲ ﻭﺍﻧﻲ ﺑﻌﺪﻧﻲ ﻣﺎ ﺻﺤﻴﺖ ﻛﻠﺶ ﺑﻌﺪﻧﻲ ﺷﻮﻱ ﻣﻮ ﺯﻳﻨﻪ ﻋﺎﺩ ﻛﻌﺪﺕ ﻟﻠﻜﺎﻉ ﺍﺧﺘﻨﻜﺖ ﻭﺍﻟﻀﺎﺑﻂ ﺍﺟﻪ ﻳﺮﻛﺾ ﻭﺷﺒﻴﺞ ﻭﺷﺒﻴﺞ ﻛﺎﻡ ﻳﻄﺐ ﻋﻠﻰ ﺿﻬﺮﻱ ﻭﺍﻧﻲ ﻣﺎﻛﻮ ﻭﻫﻮ ﻣﻴﺪﺭﻱ ﻋﻨﺪﻱ ﺭﺑﻮ ﻭﺿﺎﺑﻂ ﺍﻟﻤﺮﻛﺰ ﺍﺟﺔ ﻫﻢ ﻭﻳﺼﻴﺢ ﺑﺎﺑﺎ ﺷﺒﻴﺞ ﻭﺷﺠﺮﺍﻟﺞ ﻋﺎﺩ ﺍﺑﻦ ﻋﻤﺔ ﻟﻔﻬﺪ ﻛﻠﻠﻬﻢ ﻋﺪﻫﺎ ﺭﺑﻮ ﻭﻫﻴﺞ ﻳﺼﻴﺮ ﻣﻦ ﺗﺘﻌﺮﺽ ﻟﻬﻴﺞ ﺣﺎﻟﻪ ﻭﺑﻌﺪ ﺣﺎﻻﺕ ﻋﺎﺩ ﻃﻠﻌﻨﻲ ﺍﻟﻀﺎﺑﻂ ﺭﻛﺾ ﻭﺍﺑﻦ ﻋﻤﺔ ﻟﻔﻬﺪ ﺑﻘﻰ ﺑﺎﻟﻤﺮﻛﺰ ﻭﺧﺎﺑﺮ ﻋﻠﻰ ﺃﻫﻠﻪ ﻭﺍﺻﻼ ﺍﺫﺍ ﻣﺎ ﺍﺟﻮ ﻫﻤﺔ ﻳﺮﻭﺣﻮﻥ ﻋﻠﻴﻬﻢ ﻻﻥ ﻗﺪﻣﺖ ﺷﻜﻮ ﻭﺑﻘﻰ ﻳﻢ ﻓﻬﺪ ﻭﺃﺧﺬﻧﻲ ﺍﻟﻀﺎﺑﻂ ﺍﻟﻲ ﻟﺤﺪ ﺍﻻﻥ ﻣﺎ ﻋﺮﻓﺖ ﺍﺳﻤﻪ ﻟﻠﻤﺴﺘﺸﻔﻰ ﻭﻫﺎﻟﻤﺮﺓ ﺳﺎﻕ ﻫﻮ ﺑﺴﺮﻋﻪ ﻗﻮﻳﻪ ﻭﺍﻟﺴﺎﻳﻖ ﻛﻌﺪ ﺑﺼﻔﻪ ﻭﺻﻠﻨﻪ ﻟﻠﻤﺴﺘﺸﻔﻰ ﻭﺍﻧﻲ ﻫﻢ ﻣﺎ ﺗﺤﻤﻠﺖ ﺍﺧﺘﻨﻜﺖ ﻛﻠﺶ ﻣﻨﺎ ﺧﻮﻓﻪ ﻭﺭﻫﺒﻪ ﻭﻣﻨﺎ ﻫﻮ ﺧﻨﻜﻨﻲ ﻭﺑﺴﺒﺐ ﺍﻟﻲ ﺻﺎﺭ ﻋﺎﺩ ﺑﺲ ﺷﺎﻓﻮ ﺿﺎﺑﻂ ﻭﺩﺧﻞ ﺭﺃﺳﺎ ﺍﺟﻮ ﻳﺮﻛﻀﻮﻥ ﻭﻳﻤﻜﻦ ﻳﻌﺮﻓﻮﻩ ﻭﺳﻴﺪﻱ ﻭﺳﻴﺪﻱ ﻋﺎﺩ ﺻﺎﺡ ﻛﻠﻠﻬﻢ ﺭﺑﻮ ﻣﺰﻣﻦ ﻭﻣﺨﺘﻨﻜﺔ ﺑﺴﺎﻉ ﺍﺗﻼﺣﻜﻮﻫﺎ ﺃﺧﺬﻭﻧﻲ ﻟﻠﻄﻮﺭﺍﺉ ﻭﺧﻠﻮﻟﻲ ﺍﻭﻛﺴﺠﻴﻦ ﻧﺺ ﺳﺎﻋﻪ ﺷﻮﻱ ﺍﺭﺗﺎﺣﻴﺖ ﻭﺃﻧﻄﻮﻧﻲ ﻋﻠﺒﻪ ﺻﻐﻴﺮﻩ ﻫﻴﻪ ﻣﺜﻞ ﺍﻻﻭﻛﺴﺠﻴﻦ ﻣﺎﻝ ﺭﺑﻮ ﻛﺎﻟﻮ ﺧﺎﻑ ﺣﺎﻟﻪ ﻃﺎﺭﺋﻪ ﻭﻣﺘﻜﺪﺭﻳﻦ ﺗﺠﻴﻦ ﻟﻠﻤﺴﺘﺸﻔﻰ ﻭﻫﺎﻱ ﺍﺻﻼ ﻟﻼﺧﺘﻨﺎﻕ ﺍﻟﺒﺴﻴﻂ ﻭﻻﻥ ﻣﻮ ﺯﻳﻦ ﻭﻣﻮ ﺩﻭﻡ ﺍﻛﺪﺭ ﺍﺧﻠﻲ ﺍﻭﻛﺴﺠﻴﻦ ﻋﺎﺩ ﻧﻄﻮﻧﻴﺎﻫﺎ ﻭﺭﻩ ﺍﻗﻞ ﺍﻟﺴﺎﻋﻪ ﺑﻌﺪ ﻣﺎ ﻛﻤﻠﻨﻪ ﻃﻠﻌﻨﻪ ﻋﺒﺎﻟﻲ ﺭﺍﺡ ﻳﻌﻮﻓﻨﻲ ﻭﻳﺮﻭﺡ ﻛﺎﻝ ﻻ ﺍﻭﺻﻠﺞ ﻟﺒﻴﺘﻜﻢ ﻛﺘﻠﻪ ﺧﺎﻑ ﺯﺣﻤﺔ ﻛﺎﻝ ﻻ ﺭﺣﻤﺔ ﻭﺍﻟﻠﻪ ﺻﻌﺪﺕ ﻭﺭﻛﺒﺖ ﻭﺩﻟﻴﺘﻪ ﻣﻜﺎﻥ ﺑﻴﺘﻨﻪ ﻃﻠﻊ ﺍﻟﺴﺎﻳﻖ ﻟﻠﻜﺮﺍﺩﻩ ﻭﺻﻠﻨﻪ ﻟﺒﻴﺖ ﺟﺪﻭ ﻧﺰﻟﺖ ﻭﺗﺸﻜﺮﺕ ﻣﻨﺔ ﻫﻮﺍﻱ ﻛﺎﻝ ﻣﺎ ﻋﺮﻓﺘﻴﻨﻪ ﻛﺘﻠﻪ ﺍَﻱ ﺻﺢ ﻛﺎﻝ ﻳﻮﺳﻒ ﻳﻮ ﺍﻧﻲ ﺍﻋﺸﻖ ﺍﺳﻢ ﻳﻮﺳﻒ ﻭﻫﻮ ﻃﻠﻊ ﺃﺳﻤﺔ ﻳﻮﺳﻒ ﺍﻭﻑ ﺩﻣﺎﺭ ﻳﺎﺑﻪ ﺩﻣﺎﺭ 😂 ﻛﺘﻠﻪ ﺯﻣﺮﺩ ﺿﺤﻚ ﻛﺎﻝ ﺍَﻱ ﺳﻤﻌﺘﻪ ﻣﻦ ﻫﺬﺍ ﺣﺸﺎﺝ ﺍﻟﻤﻄﻲ ﺿﺤﻜﺖ ﻛﺘﻠﻪ ﺍَﻱ ﻟﻌﺪ ﻟﻴﺶ ﺗﺴﺎﻝ ﻛﺎﻝ ﻫﻴﺞ ﺑﺲ ﻣﻮ ﺍﻧﺘﻲ ﻣﺎ ﻋﺮﻓﺘﻲ ﺍﺳﻤﻲ ﻛﺘﻠﻪ ﻭﻫﺴﻪ ﻋﺮﻓﺘﻪ ﻛﺎﻝ ﺍﻧﺘﻲ ﺍﺳﻢ ﻋﻠﻰ ﻣﺴﻤﻰ ﺷﻮ ﻫﺬﺍ ﺟﺮ ﻣﻴﺎﻧﻪ ﻭﺍﻧﻲ ﺑﻄﺒﻌﻲ ﻣﻮ ﻟﻠﻜﻞ ﺍﻧﻄﻲ ﻣﻴﺎﻧﻪ ﺧﺠﻠﺖ ﺧﺮﺏ ﺑﺒﻠﻴﺴﻪ ﺿﺤﻚ ﻛﺎﻝ ﻣﺎ ﺍﺭﻭﺡ ﺍﻻ ﺩﺧﻠﻴﻦ ﻟﻠﺒﻴﺖ ﺿﺤﻜﺖ ﻛﺘﻠﻪ ﺍﻟﻴﻮﻡ ﻫﻢ ﺑﻠﻴﺘﻚ ﻭﻫﻢ ﺗﻌﺒﺘﻚ ﻛﺎﻝ ﻳﺎ ﺭﻳﺖ ﻳﻮﻣﻴﻪ ﺍﺗﻌﺐ ﻫﻴﺞ ﺗﻌﺐ ﺍﻟﺴﺎﻳﻖ ﺿﺤﻚ ﻋﺎﺩ ﺍﺳﺘﺤﻴﺖ ﻭﻫﻮ ﻃﻮﺥ ﺍﻟﻤﻴﺎﻧﻪ ﺷﻮﻱ ﻓﻜﻠﺖ ﺧﻠﻲ ﺍﺩﻙ ﺍﻟﺒﺎﺏ ﻭﻳﻔﺘﺤﻮﻫﺎ ﻭﺍﻃﺐ ﺍﺣﺴﻦ ﻣﻦ ﻭﻛﻔﺘﻲ ﺭﺩ ﻛﺎﻝ ﺻﺪﻙ ﺷﻜﺪ ﺧﺒﻴﺜﻪ ﺍﻧﺪﺍﺭﻳﺖ ﻋﻠﻴﻪ ﻭﻛﺘﻠﻪ ﻟﻴﺶ ﻛﺎﻝ ﺑﺎﻟﺠﺬﺏ ﻛﻮﻟﻲ ﺍﻧﺰﻝ ﺍﺷﺮﺏ ﻣﻲ ﺟﺎﻱ ﺍﺷﻜﺮﻳﻨﻲ ﺑﻴﻬﻦ ﻟﻮ ﺑﺲ ﺗﺮﻳﺪﻳﻦ ﺗﺨﻠﺼﻴﻦ ﺿﺤﻜﺖ ﺑﻔﺸﻠﻪ ﻛﺘﻠﻪ ﺍﺳﻔﻪ ﻭﺍﻟﻠﻪ ﻧﺴﻴﺖ ﻭﺍﻟﻨﺒﻲ ﻣﻮ ﺑﺎﻟﻲ ﺍﻋﺬﺭﻧﻲ ﺑﺲ ﺣﻘﻲ ﻋﻘﻠﻲ ﻣﺸﻮﺵ ﺍﻧﺰﻟﻮ ﻛﺎﻝ ﻻ ﻻ ﺧﺎﻑ ﻃﺮﺩﻳﻨﻪ ﺿﺤﻜﺖ ﻛﺘﻠﻪ ﻣﺎ ﻋﺎﺵ ﺍﻟﻲ ﻳﻄﺮﺩﻛﻢ ﻋﻠﻴﻚ ﺍﻟﻠﻪ ﺍﻧﺰﻟﻮ ﻋﺰﻣﺘﻜﻢ ﺑﻌﺪ ﻛﺎﻝ ﻳﻠﻪ ﻫﻢ ﻧﺴﻠﻢ ﻋﺎﻟﻮﺍﻟﺪﻩ ﻭﺍﻷﻫﻞ ﻭﻧﺘﻌﺮﻑ ﻋﻠﻴﻬﻢ ﻛﺘﻠﻪ ﺃﺗﺸﺮﻑ ﻧﺰﻟﻮ ﻋﺎﺩ ﻭﺩﻛﻴﺖ ﺍﻟﺒﺎﺏ ﻣﺮﻩ ﺛﺎﻧﻴﻪ ﺑﺲ ﻳﺎ ﺗﺮﻯ ﺍﺫﺍ ﺷﺎﻓﻮﻧﻲ ﺷﺤﻴﺴﻮﻥ ﻣﺎﻣﺎ ﺷﻨﻮ ﺭﺩﻩ ﻓﻌﻠﻬﺎ ﻭ ﻫﻤﺔ ﻛﻠﻬﻢ ﻭﻣﻌﻘﻮﻟﺔ ﻫﺴﻪ ﺍﻧﻲ ﺧﻠﺼﺖ ﻣﻦ ﻓﻬﺪ ﻭﻣﻦ ﺫﺍﻙ ﺍﻟﺴﺠﻦ ﻳﻌﻨﻲ ﻫﺴﻪ ﺍﻧﻲ ﺣﺮﻩ ﻃﻠﻴﻘﻪ ﻳﻌﻨﻲ ﺍﻧﻲ ﻫﺴﻪ ﺑﻐﺪﺍﺩ ﻭﻭﺍﻛﻔﻪ ﺑﺎﺏ ﺑﻴﺘﻨﻪ ﻣﻦ ﺣﻮﺍﻟﻲ ٩ﺍﺷﻬﺮ ﺍﻻ ﺍﻭﻑ ﻣﺪﺍ ﺍﺻﺪﻙ ﺍﺧﺎﻑ ﺍﻧﻲ ﺩﺍﺣﻠﻢ ﻭﺍﻓﺰ ﻭﻫﺬﺍ ﻛﻠﻪ ﻳﺮﻭﺡ ﺩﻛﻴﺖ ﺍﻟﺒﺎﺏ ﻣﺮﻩ ﺛﺎﻟﺜﻪ ﻭﻣﺪﺭﻱ ﺍﺿﺤﻚ ﻣﺪﺭﻱ ﺍﺑﺠﻲ ﻋﺎﺩ ﺳﻤﻌﺖ ﺻﻮﺕ ﺑﺎﺏ ﺍﻟﻤﻄﺒﺦ ﺍﻧﻔﺘﺢ ﻋﺮﻓﺖ ﺍﺣﺪ ﻃﻠﻊ ﺍﻭﻱ ﻛﻤﺖ ﺍﺭﺟﻒ ﺣﺘﻰ ﺍﻟﻀﺎﺑﻂ ﻳﻮﺳﻒ ﺣﺲ ﻋﻠﻴﻪ ﺍﻧﻔﺘﺤﺖ ﺍﻟﺒﺎﺏ ﻭﻃﻠﻌﺖ ﺑﻴﺒﻲ ﺑﺲ ﺍﺑﺪ ﻣﻮ ﺑﻴﺒﻲ ﺑﺸﺮ ﺛﺎﻧﻲ ﺻﺎﻳﺮﻩ ﻭﻫﻴﻪ ﺷﺎﻓﺘﻨﻲ ﻭﺍﺗﺨﺒﻠﺖ ﻭﻋﺎﻃﺖ ﺯﻣﺮﺭﺭﺭﺭﺩ ﻭﺣﻀﻨﺘﻨﻲ ﻭﻛﻤﻨﺔ ﻧﺒﺠﻲ ﺳﻮﻩ ﺍﺛﻨﻴﻨﻪ ﻋﻠﻰ ﺣﺲ ﺍﻟﻌﻴﺎﻁ ﻃﻠﻊ ﺧﺎﻟﻮ ﺟﺎﻥ ﻣﻮﺟﻮﺩ ﻭﺗﻔﺎﺟﺄ ﻭﺍﻧﺼﺪﻡ ﻭﺃﺟﺎ ﻳﺮﻛﺾ ﻭﺑﻴﺒﻲ ﻓﻘﺪﺕ ﻭﺗﻠﺰﻡ ﻭﺟﻬﻲ ﻭﺗﻜﻮﻝ ﻫﺎﻱ ﺻﺪﻙ ﺍﻧﺘﻲ ﺯﻣﺮﺩ ﺍﺟﻴﺘﻲ ﻭﻟﺞ ﺷﺠﺎﺑﺞ ﻫﺎﻱ ﺷﺠﺮﺍﻟﺞ ﻭﻟﻴﺶ ﻫﻴﺞ ﺷﻜﻠﺞ ﺻﺎﻳﺮ ﻭﺑﻌﺪ ﺣﺠﻲ ﺭﺩ ﺧﺎﻟﻮ ﺳﻠﻢ ﻋﻠﻰ ﻳﻮﺳﻒ ﻭﺳﻮﻟﻔﻠﻪ ﻋﺎﺩ ﻛﺎﻟﻮ ﻃﺒﻮ ﺟﻮﻩ ﻋﺎﺩ ﻭﺧﺮﺕ ﻣﻦ ﺑﻴﺒﻲ ﻭﺣﻀﻨﻲ ﺧﺎﻟﻮ ﻭﺑﺎﺳﻨﻲ ﻭﻛﺎﻝ ﺗﻮﻫﺎ ﻧﻮﺭﺕ ﺑﻐﺪﺍﺩ ﺑﻴﺞ ﻃﺒﻴﻨﻪ ﺟﻮﻩ ﻭﺍﻧﻲ ﺍﺳﺎﻝ ﻋﻠﻰ ﻣﺎﻣﺎ ﺧﺒﺼﺘﻬﻢ ﻭﻫﻤﺔ ﻭﺍﺣﺪ ﻳﺒﺎﻭﻉ ﻋﺎﻟﺜﺎﻧﻲ ﻃﺒﻴﻨﻪ ﻟﻼﺳﺘﻘﺒﺎﻝ ﻭﻛﺎﻟﺖ ﻛﻌﺪﻭ ﺍﺟﻴﺐ ﺍﻟﻜﻢ ﻣﻲ ﺍﺳﺘﻐﺮﺑﺖ ﻣﺎﻣﺎ ﻣﻤﻮﺟﻮﺩﻩ ﺷﻨﻮ ﺷﻮ ﻟﺤﺪ ﺍﻻﻥ ﻣﺎ ﻃﻠﻌﺖ ﺳﺌﻠﺖ ﺧﺎﻟﻮ ﻣﺎ ﺭﺩ ﻃﺒﺖ ﺑﻴﺒﻲ ﺷﺎﻳﻠﻪ ﺍﻟﻤﻲ ﻗﺪﻣﺖ ﻭﺭﺩﻳﺖ ﺳﺎﻟﺖ ﻋﻠﻰ ﻣﺎﻣﺎ ﻛﺎﻟﺖ ﻫﺎ ﺍَﻱ ﻫﺴﻪ ﺍﺷﺮﺑﻲ ﺍﻟﻤﻲ ﺷﺮﺑﺖ ﻭﺭﺩﻳﺖ ﺳﺎﻟﺖ ﻻﻥ ﻗﻠﻘﺘﻨﻲ ﻛﺎﻟﺖ ﻭﺍﻟﻠﻪ ﺑﻴﺒﻲ ﺍﻣﺞ ﻣﻮ ﺯﻳﻨﻪ ﺑﻘﻠﻖ ﺍﻧﺮﻋﺒﺖ ﻛﺘﻠﻬﺎ ﺧﻴﺮ ﺷﺒﻴﻬﺎ ﺍﻳﺪﻱ ﻛﺎﻣﺖ ﺗﺮﺟﻒ ﺟﺎﻥ ﺗﻜﻮﻝ ﺍﻣﺞ ﺩﺍﺧﻠﻪ ﺑﻐﻴﺒﻮﺑﺔ ﻣﻦ ﻳﻮﻡ ﺍﻟﻲ ﺭﺣﺘﻲ ﺑﻲ ﺍﻧﺘﻲ ﻭﺧﻠﺖ ﺃﻳﺪﻳﻬﺎ ﻋﻠﻰ ﻭﺟﻬﺎ ﻭﻛﺎﻣﺖ ﺗﺒﺠﻲ ﺍﻧﺼﺪﻣﺖ ﻭﻭﻛﻊ ﻛﻼﺹ ﺍﻟﻤﻲ ﻣﻦ ﺍﻳﺪﻱ ﻭﺗﺒﻠﻠﺖ ﻣﻼﺑﺴﻲ ﻋﻄﺖ ﺷﻨﻮ ﻛﺎﻝ ﺧﺎﻟﻮ ﺍﻫﺪﻱ ﺑﺎﺑﺎ ﺍﻫﺪﻱ ﻛﻤﺖ ﻟﺤﻴﻠﻲ ﻭﺭﺩﻳﺖ ﻋﻄﺖ ﻛﺘﻠﻪ ﺷﻨﻮ ﺍﻫﺪﻩ ﻭﺷﻠﻮﻥ ﺍﻫﺪﻩ ﻛﻤﺖ ﺍﺑﺠﻲ ﻭﺍﻋﻴﻂ ﻭﺍﻛﻮﻟﻠﻬﻢ ﻭﻳﻨﻬﺎ ﻣﺎﻣﺎ ﻫﺴﻪ ﻭﻳﻨﻬﺎ ﻫﻴﻪ ﺑﺲ ﻛﻮﻟﻮﻟﻲ ﺣﺘﻰ ﻳﻮﺳﻒ ﻛﺎﻡ ﻭﻛﺎﻝ ﺍﻫﺪﻱ ﺧﻠﻲ ﻧﻔﺘﻬﻢ ﻛﻤﺖ ﺍﺑﺠﻲ ﺑﻬﺴﺘﻴﺮﻳﺎ ﻭﺍﻋﻴﻂ ﺭﺟﻌﺖ ﺍﺧﺘﻨﻜﺖ ﻋﺎﺩ ﺭﺃﺳﺎ ﻳﻮﺳﻒ ﻧﻄﺎﻧﻲ ﺍﻟﺒﺨﺎﺥ ﻭﺑﻴﺒﻲ ﺗﺨﺒﻠﺖ ﻋﻠﻴﻪ ﻭﺗﺒﺠﻲ ﺑﻌﺪ ﻣﺎ ﺭﺟﻌﺖ ﺃﺗﻨﻔﺲ ﺷﻮﻱ ﻛﺘﻠﻬﺎ ﺑﻴﺒﻲ ﻓﺪﻭﺓ ﺑﺲ ﻛﻮﻟﻲ ﻭﻳﻨﻬﺎ ﻣﺎﻣﺎ ﻟﻴﺶ ﻣﺘﺤﺠﻴﻦ ﻛﺎﻟﺖ ﺑﺎﻟﻤﺴﺘﺸﻔﻰ ﻣﻨﻮﻣﻴﻬﺎ ﻛﺘﻠﻬﺎ ﻳﺎﻫﻮ ﻳﺎ ﻣﺴﺘﺸﻔﻰ ﻛﺎﻝ ﻣﺴﺘﺸﻔﻰ ﺍﻝ ..... ﺍﻷﻫﻠﻴﻪ ﻛﻤﺖ ﻛﺘﻠﻬﺎ ﻫﺴﻪ ﺍﺭﻭﺡ ﻋﻠﻴﻬﺎ ﻛﺎﻟﺖ ﺍﻧﺘﻀﺮﻱ ﻳﻤﺔ ﺍﺭﺗﺎﺣﻲ ﻭﺭﻭﺣﻲ ﻫﻴﻪ ﺩﺍﺧﻠﺔ ﺑﻐﻴﺒﻮﺑﺔ ﺷﺘﺸﻮﻓﻴﻦ ﻣﻨﻬﺎ ﻛﺘﻠﻬﺎ ﺣﺘﻰ ﻟﻮ ﻻﺯﻡ ﺍﺭﻭﺡ ﺍﻧﻲ ﺣﺴﻴﺖ ﻭﻋﺮﻓﺖ ﻣﺎﻣﺎ ﺑﻴﻬﺎ ﺷﻲ ﻻﻥ ﻣﺴﺘﺤﻴﻞ ﺗﻌﻮﻓﻨﻲ ﺭﺩﻳﺖ ﻛﺘﻠﻬﺎ ﺟﺪﻭ ﻭﻳﻦ ﺷﻮ ﻣﺎﻛﻮ ﺑﺠﺖ ﻛﺎﻟﺖ ﺟﺪﺝ ﻣﻦ ﺳﻤﻊ ﺍﻟﺼﺎﺭ ﺑﻴﺞ ﻭﺩﺭﻩ ﺑﻮﺿﻊ ﺍﻣﺞ ﺿﺮﺑﺘﻪ ﺟﻠﻄﻪ ﺭﺃﺳﺎ ﻭﻫﺴﻪ ﻣﺸﻠﻮﻝ ﺑﺲ ﻫﺴﻪ ﺍﺣﺴﻦ ﻋﺎﻟﻌﻼﺝ ﺷﻮﻱ ﻳﺘﺤﺮﻙ ﻭﻧﺎﻳﻢ ﺑﺎﻟﻐﺮﻓﺔ ﺗﺨﺒﻠﺖ ﻫﺬﺍ ﻛﻠﺔ ﺻﺎﻳﺮ ﻭﺍﻧﻲ ﻣﺎ ﺍﺩﺭﻱ ﻛﻤﺖ ﺍﻟﻄﻢ ﻋﻠﻰ ﻭﺟﻬﻲ ﺯﻟﻐﺖ ﺧﺪﻭﺩﻱ ﻭﻋﻴﻄﺖ ﻛﺎﻝ ﺧﺎﻟﻮ ﻋﻠﻰ ﻛﻴﻔﺞ ﺑﺎﺑﺎ ﺍﻧﺘﻲ ﻣﻮ ﺯﻳﻨﻪ ﻣﻦ ﺷﻜﻠﺞ ﻟﻴﺼﻴﺮ ﺑﻴﺞ ﺷﻲ ﺍﻟﺤﻤﺪﻟﻠﻪ ﻋﻠﻰ ﻛﻞ ﺣﺎﻝ ﺟﺪﺝ ﺯﻳﻦ ﻭﺍﻣﺞ ﻭﺿﻌﻬﺎ ﺍﺣﺴﻦ ﺩﺍﺧﻠﻪ ﻏﻴﺒﻮﺑﻪ ﺑﺲ ﻭﺿﻌﻬﺎ ﻣﺴﺘﻘﺮ ﻛﻤﺖ ﺑﺴﺎﻉ ﺭﺣﺖ ﻟﻐﺮﻓﻪ ﺑﻴﺒﻲ ﻭﺷﻔﺖ ﺟﺪﻭ ﺷﺎﻓﻨﻲ ﻭﺑﺠﺔ ﺑﺲ ﻛﻮﺓ ﻳﺤﺠﻲ ﻳﺠﺮ ﺑﺎﻟﺤﺠﻲ ﺑﺲ ﺯﻳﻦ ﺷﻮﻱ ﻳﺤﺮﻙ ﺍﻳﺪﻳﻪ ﺭﺣﺖ ﺍﺭﻛﺾ ﻋﻠﻴﻪ ﻭﺣﻀﻨﺘﻪ ﻭﻛﻤﺖ ﺍﺑﺠﻲ ﺑﺼﻮﺕ ﻋﺎﻟﻲ ﻛﺘﻠﻪ ﺟﺪﻭ ﻫﻴﺞ ﺻﺎﻳﺮ ﺑﻴﻚ ﻭﻛﻞ ﻫﺬﺍ ﺻﺎﻳﺮ ﻭﺍﻧﻲ ﻣﺎ ﺍﺩﺭﻱ ﺟﺪﻭ ﺩﻣﺮﻭﻧﻲ ﺟﺪﻭ ﺍﻟﻤﻴﺨﺎﻓﻮﻥ ﻣﻦ ﺍﻟﻠﻪ ﺟﺪﻭ ﻣﻮﺗﻮﻧﻲ ﻛﺎﻡ ﻳﺒﺠﻲ ﺑﺼﻮﺕ ﻋﺎﻟﻲ ﻃﺒﺖ ﺑﻴﺒﻲ ﻭﺗﺒﺠﻲ ﻭﻳﺎﻧﻪ ﻋﺎﺩ ﺑﺴﺘﻪ ﻛﺘﻠﻪ ﺍﻋﺬﺭﻧﻲ ﺭﺍﺡ ﺍﺷﻮﻑ ﻣﺎﻣﺎ ﻭﺍﻋﻮﻓﻚ ﺑﺲ ﺟﺪﻭ ﻛﻠﺒﻲ ﻧﺎﺭ ﻋﻠﻴﻬﺎ ﺣﺠﻰ ﻭﻛﻮﺓ ﻓﻬﻤﺖ ﺣﺠﻴﻪ ﻛﺎﻝ ﺭﻭﺣﻲ ﺑﺎﺑﺎ ﺭﻭﺣﻲ ﻋﻠﻰ ﺍﻣﺞ ﻣﺤﺘﺎﺟﺘﺞ ﺍﻧﺪﺍﺭﻳﺖ ﻋﻠﻰ ﺑﻴﺒﻲ ﻛﺘﻠﻬﺎ ﻣﻼﺑﺴﻲ ﺍﻟﻲ ﻫﻨﺎ ﺑﻌﺪﻫﻦ ﻛﺎﻟﺖ ﺍَﻱ ﻳﻤﺔ ﻛﻠﺸﻴﺖ ﻧﻔﺴﻪ ﻣﺜﻞ ﻣﺎ ﻋﻔﺘﻲ ﻭﺭﺣﺘﻲ ﻣﺎ ﺷﻠﺖ ﻭﻻ ﺷﻲ ﻭﺍﺣﺪ ﺑﺲ ﺍﻧﻀﻒ ﻏﺮﻓﺘﺞ ﻭﺍﻃﻠﻊ ﻛﺘﻠﻬﺎ ﺍَﻱ ﺍﺭﻳﺪ ﺍﺑﺪﻝ ﻛﺎﻟﺖ ﺭﻭﺣﻲ ﻳﻤﺔ ﺻﻌﺪﻱ ﺭﺩﻳﺖ ﻛﺘﻠﻬﺎ ﺯﻳﻦ ﻣﻨﻮ ﻭﻳﺔ ﻣﺎﻣﺎ ﻛﺎﻟﺖ ﺧﺎﻟﺘﺞ ﻳﻤﻬﺎ ﻭﺧﺎﻟﺞ ﺍﺣﻨﻪ ﻣﺘﻨﺎﻭﺑﻴﻦ ﻣﺮﻩ ﺍﻧﻲ ﻣﺮﻩ ﺧﺎﻟﺘﺞ ﻭﺧﻮﺍﻟﺞ ﻫﻢ ﻳﺮﻭﺣﻮﻥ ﺑﺲ ﻣﻦ ﻳﺼﻴﺮ ﻋﺪﻫﻢ ﺷﻲ ﻳﻄﻠﻌﻮﻥ ﻻﻥ ﺗﻌﺮﻓﻴﻦ ﺩﻭﺍﻣﺎﺕ ﻫﺰﻳﺖ ﺭﺍﺳﻲ ﺻﻌﺪﺕ ﻟﻐﺮﻓﺘﻲ ﻓﺘﺤﺖ ﺍﻟﺒﺎﺏ ﻭﻃﺒﻴﺖ ﺍﺣﻴﺮ ﺷﻨﻮ ﺍﻛﻤﺶ ﻣﻦ ﻏﺮﺍﺿﻲ ﻭﺷﻨﻮ ﺍﺣﻀﻦ ﺍﺷﺘﺎﻗﻴﺘﻠﻬﺎ ﻟﻐﺮﻓﺘﻲ ﻛﻠﺶ ﺣﺘﻰ ﻫﺪﺋﺖ ﺷﻮﻱ ﻓﺘﺤﺖ ﻛﻨﺘﻮﺭﻱ ﻭﻣﻼﺑﺴﻲ ﺑﻌﺪﻫﺎ ﻧﻔﺴﻬﺎ ﻭﺑﻤﻜﺎﻧﻬﺎ ﻃﻠﻌﺖ ﺍﻟﻲ ﺑﺴﺎﻉ ﻻﻥ ﻣﻮ ﻣﺎﻝ ﺍﻃﻮﻝ ﺑﻨﻄﺮﻭﻥ ﻭﺑﺪﻱ ﻭﻣﻼﺑﺲ ﺩﺍﺧﻠﻴﻪ ﻃﺒﻴﺖ ﻟﻠﺤﻤﺎﻡ ﻣﺎﻟﺘﻲ ﺍﻟﻲ ﺑﻐﺮﻓﺘﻲ ﺑﺴﺎﻉ ﺳﺒﺤﺖ ﺣﺘﻰ ﺍﻟﺤﻤﺎﻡ ﻧﻔﺴﻪ ﻣﻤﻐﻴﺮﻳﻦ ﺑﻲ ﺷﻲ ﺳﺒﺤﺖ ﺑﺲ ﻣﺎ ﻏﺴﻠﺖ ﺷﻌﺮﻱ ﻣﺎ ﺍﻟﺤﻚ ﺍﻧﺸﻔﻪ ﻛﻤﻠﺖ ﻭﺑﺪﻟﺖ ﻭﻟﻤﻴﺖ ﺷﻌﺮﻱ ﻭﺳﻮﻳﺘﻪ ﻋﻠﻰ ﺷﻜﻞ ﻛﻌﻜﻪ ﻭﺭﺗﺒﺘﻪ ﻻﻥ ﻣﻤﺸﺴﻮﺭ ﻭﻣﻨﻔﻮﺵ 😬 ﻭﻃﻠﻌﺖ ﻣﺎﻛﻮ ﺧﻤﺲ ﺩﻗﺎﻳﻖ ﻃﻮﻟﺖ ﺑﺎﻟﺴﺒﺢ ﻋﺎﺩ ﻟﺒﺴﺖ ﺗﺮﺍﻧﺸﻮﺯ ﻭﻧﺰﻟﺖ ﺳﻤﻌﺖ ﺻﻮﺗﻬﻢ ﺑﺎﻻﺳﺘﻘﺒﺎﻝ ﻃﺒﻴﺖ ﺍﻟﻬﻢ ﻳﻮﺳﻒ ﺿَﻞ ﺻﺎﻓﻦ ﻋﻠﻴﻪ ﺍﺑﺪ ﻣﻨﺰﻝ ﻋﻴﻮﻧﻪ ﺍﺳﺘﻐﺮﺑﺖ ﺑﻌﺪﺓ ﻣﻮﺟﻮﺩ ﻣﺎ ﺭﺍﻳﺢ ﻭﺟﺪﻭ ﻫﻢ ﺟﺎﻳﺒﻴﻨﻪ ﻭﻣﻜﻌﺪﻱ ﻋﺎﻟﻜﺮﺳﻲ ﺍﻟﻤﺘﺤﺮﻙ ﻋﺎﺩ ﻛﻠﺖ ﻟﺒﻴﺒﻲ ﺍﺭﻳﺪ ﺳﻮﻳﺞ ﺍﻟﺴﻴﺎﺭﻩ ﻣﺎﻝ ﺟﺪﻭ ﺭﺍﺣﺖ ﺩﺟﻴﺒﻪ ﻳﻮﺳﻒ ﻛﺎﻝ ﺍﻧﻲ ﺍﻭﺻﻠﺞ ﻛﺘﻠﻪ ﻻ ﺗﺴﻠﻢ ﺗﻌﺒﺘﻚ ﻫﻮﺍﻱ ﺍﻧﻲ ﺍﺭﻭﺡ ﻛﺎﻝ ﺗﻌﺒﺞ ﺭﺍﺣﺔ ﻣﺮﺩﻳﺖ ﺑﻌﺪ ﻋﺎﺩ ﺃﺟﺖ ﺑﻴﺒﻲ ﻭﺃﺧﺬﺕ ﺍﻟﺴﻮﻳﺞ ﻭﻃﻠﻌﺖ ﻟﻠﻄﺮﻣﺔ ﻓﺘﺤﺖ ﺍﻟﺒﺎﺏ ﺍﻟﺨﺎﺭﺟﻲ ﻭﻫﻤﺔ ﻛﻠﻬﻢ ﻃﻠﻌﻮ ﻭﻳﺎﻱ ﺑﺲ ﺟﺪﻭ ﺑﻘﻰ ﺑﺎﻻﺳﺘﻘﺒﺎﻝ ﺧﺎﻟﻮ ﻛﺎﻝ ﻋﻮﺩ ﺍﻧﻲ ﺍﺟﻲ ﺑﻠﻴﻞ ﻫﺴﻪ ﻻﺯﻡ ﺍﻭﺩﻱ ﺟﺪﺝ ﻟﻠﻌﻼﺝ ﺍﻟﻔﻴﺰﻳﺎﺋﻲ ﻫﺰﻳﺖ ﺭﺍﺳﻲ ﺑﺎﻱ ﻧﺐ ﻳﻮﺳﻒ ﻭﻛﺎﻝ ﺍﻧﻲ ﺍﺟﻲ ﻭﻳﺎﺝ ﺍﻟﺤﻜﺞ ﺑﺴﻴﺎﺭﺗﻲ ﺑﺎﻭﻉ ﻋﻠﻴﻪ ﺧﺎﻟﻮ ﺃﺩﺍﺭﻙ ﺍﻟﻮﺿﻊ ﻛﺎﻝ ﻋﻠﻤﻮﺩ ﺃﻭﺻﻲ ﻋﻠﻴﻬﺎ ﺑﺤﻜﻢ ﻣﻌﺮﻓﺘﻲ ﻭﺍﺧﻠﻴﻬﻢ ﻳﻜﺜﺮﻭﻥ ﺍﻋﺘﻨﺎﺀﻫﻢ ﺑﻴﻬﺎ ﺑﻴﺒﻲ ﺗﺸﻜﺮﺕ ﻣﻨﻪ ﻭﺧﺎﻟﻮ ﻛﻠﺔ ﻣﺘﻘﺼﺮ ﺧﻮﻳﺔ ﺍﻧﻲ ﺍﺻﻼ ﻣﺮﺩﻳﺖ ﺭﺃﺳﺎ ﺭﻛﺒﺖ ﺍﻟﺴﻴﺎﺭﻩ ﻭﺷﻐﻠﺘﻬﺎ ﻭﻃﻠﻌﺘﻬﺎ ﻟﻠﺸﺎﺭﻉ ﻓﺘﺤﺖ ﺍﻟﺠﺎﻣﻪ ﻭﻛﻠﺖ ﻟﺨﺎﻟﻮ ﻭﺑﻴﺒﻲ ﺳﺪﻭ ﺍﻟﺒﺎﺏ ﻣﺴﺘﻌﺠﻠﺔ ﻛﺎﻟﻮ ﺭﻭﺣﻲ ﻋﻴﻨﻲ ﺍﺣﻨﻪ ﻧﺴﺪﻫﺎ ﻳﻮﺳﻒ ﻫﻢ ﺭﺃﺳﺎ ﺭﺍﺡ ﻟﺴﻴﺎﺭﺗﻪ ﻣﻨﺘﺼﺮﺕ ﺍﺻﻼ ﻳﻜﻤﻠﻮﻥ ﺍﻟﺤﺠﻲ ﻃﻠﻌﺖ ﺑﺴﺮﻋﻪ ﻭﺳﻘﺖ ﻫﻢ ﺳﺮﻳﻊ ﺍﺭﻳﺪ ﺑﺲ ﺍﻭﺻﻞ ﺍﺣﺲ ﻛﻠﺒﻲ ﻣﺨﻠﻲ ﺑﻨﺺ ﻧﺎﺭ ﻛﺪ ﻣﺎ ﻣﺤﺘﺮﻙ ﻋﻠﻰ ﺍﻣﻲ ﺍﺭﻳﺪ ﺑﺲ ﺃﻭﺻﻠﻬﺎ ﻭﻳﻮﺳﻒ ﻳﻤﺸﻲ ﻭﺭﺍﻱ ﻃﻠﻌﺖ ﺍﻟﻜﺮﺍﺩﻩ ﻭﺗﻮﺟﻬﺖ ﻟﻠﻤﺴﺘﺸﻔﻰ ﺍﻟﻲ ﺑﻴﻬﺎ ﻣﺎﻣﺎ ﻭﻛﻠﺖ ﻫﺬﺍ ﺷﻌﺪﻩ ﻟﺰﻙ ﻫﺴﻪ ﺳﺎﻋﺪﺗﻨﻲ ﻣﺸﻜﻮﺭ ﻭﻣﺎ ﻗﺼﺮﺕ ﺑﺲ ﻟﻴﺶ ﻣﺘﺮﻭﺡ ﻭﻟﺰﻛﺖ ﻭﺻﻠﺖ ﻟﻠﻤﺴﺘﺸﻔﻰ ﻭﺻﻔﻴﺖ ﺍﻟﺴﻴﺎﺭﻩ ﻭﻧﺰﻟﺖ ﺑﺴﺎﻉ ﻭﻣﺎ ﺍﻧﺘﻀﺮﺕ ﺣﺘﻰ ﻳﻮﺳﻒ ﻳﻮﻛﻒ ﻭﻳﻨﺰﻝ ﻭﻧﺴﻴﺖ ﺣﺘﻰ ﻓﻬﺪ ﻭﻣﺎ ﺍﺟﻰ ﻋﻠﻰ ﺑﺎﻟﻲ ﺳﺎﻟﻔﻪ ﻣﺎﻣﺎ ﻧﺴﺘﻨﻲ ﻓﻬﺪ ﻭﻋﺸﻴﺮﺗﻪ ﻭﻣﺤﺎﻓﻈﺘﻪ ﻃﺒﻴﺖ ﻟﻼﺳﺘﻌﻼﻣﺎﺕ ﻭﺳﺎﻟﺖ ﻋﻠﻴﻬﺎ ﺩﻟﻮﻧﻲ ﺑﻴﺎ ﻏﺮﻓﻪ ﻃﺐ ﻳﻮﺳﻒ ﻳﺮﻛﺾ ﺷﺎﻓﻨﻲ ﻭﺍﺟﻰ ﻋﻠﻴﻪ ﺭﺃﺳﺎ ﻣﺸﻴﺖ ﻭﻟﺤﻜﻨﻲ
ﻳﺘﺒﻊ ........
ﻟﻠﻤﺮﻩ ﺍﻷﻟﻒ ﻭﺍﻟﻤﻠﻴﻮﻥ ﺍﻟﻘﺼﻪ ﺣﻘﻴﻘﻴﻪ
ﻭﺗﺮﻩ ﺍﺧﺘﺼﺮﺕ ﻫﻮﺍﻱ ﻣﻦ ﺗﻌﺬﻳﺒﻬﺎ ﺑﺴﺒﺒﻜﻢ ﻻﻥ ﺗﻜﻮﻟﻮﻥ ﺗﺒﺎﻟﻎ
ﺑﺲ ﻫﺎﻱ ﺍﻟﺤﻘﻴﻘﻪ ﻭﺣﺘﻰ ﺯﻣﺮﺩ ﻣﻘﻬﻮﺭﻩ ﻣﻨﻜﻢ ﺗﻜﻮﻝ ﻟﻴﺶ ﻣﻴﺼﺪﻛﻮﻧﻲ
ﻟﻮ ﻋﺎﻳﺸﻴﻦ ﺍﻟﻲ ﻋﺸﺘﻪ ﻭﺷﺎﻳﻔﻴﻦ ﺍﻟﻲ ﺷﻔﺘﻪ ﺟﺎﻥ ﺻﺪﻛﺘﻮ
يتبع