Naked Words ✔️

NW Chapter: 37

Kinabukasan, kabadong naglakad papasok sa St. Lewis Funeral Home si Raffaella kasama si Mamu Penny. Matapos niyang matanggap ang malungkot na balita mula kay Hideo, ay hindi na siya nagdalawang isip pa na puntahan ito.

Habang papalapit siya sa puting kahita, ay hindi mapigilan ni Raffaella na mapaluha dahil sa kalungkutan. Sa konting panahon na nakilala't nakasama niya ang ginang ay talagang napalapit na ito sa kanyang puso. Dahil na rin sa kawalan niya ng matatawag na Nanay, ay itinuring na rin niya ito na parang isa niyang tunay na Ina.

Nang tuluyang makalapit ay dahan-dahang sinilip ni Raffaella ang nakahimlay na ginang. Nakita niya roon si Madam Matilde na taimtim na nakapikit na animo'y natutulog lamang. Mababatid ang lungkot at paghihirap sa itsura nito, ngunit hindi naman maitatago ang kagandahang taglay nito.

"Hello Madam," Mahina niyang bati rito. "Madam, ang daya niyo naman po. Umalis kayo ng walang paalam. Akala ko po ba mamamasyal pa tayo? Ipapasyal pa po natin si Chowy 'di ba?" At sa puntong iyon ay tuluyan nang napaluha si Raffella sa kanyang mga naisambit.

Mabilis niyang pinalis ang tumakas na luha sa kanyang pisngi, "Pero Madam... Alam ko po ngayon kahit papaano ay mababawasan na po ang mga alalahanin niyo. Hindi na po kayo makakaramdam ng sakit sa lahat ng bigat at pasakit na kinakaharap niyo. Mami-miss po kita, Madam. May you rest in peace."

Matapos noon ay tuluyan nang tinalikuran ni Raffaella ang puting kahita, bago naupo sa katabing upuan kung saan naroon si Mamu Penny.

Dumaan ang buong araw ngunit hindi man lang nasilayan ni Raffaella ang bulto ni Lucas. Nakilala na niya ang mga kapatid nitong sina Matt at David, at kahit papaano ay naka-kwentuhan at nakapagpalagayan loob niya ang mga ito, lalo na ang binatang si Matt na siyang todo kung mag-asikaso sa kanila.

"Uhmmm... Deo, mauuna na kami ni Mamu. Baka kasi gabihin kami sa biyahe." Pamamaalam ni Raffaella rito.

"T—teka... Hindi mo na ba..." Hindi na nito itinuloy ang nais niyang sasabihin. "Haaayyy... Tara hatid ko na kayo..." Anito habang naglalakad sila papalabas.

"Naku, hindi na... Abot pa naman kami sa biyahe ng bus. Kaya okay lang..."

Nasa ganoong pag-uusap sina Raffaella at Hideo, nang bigla nilang makasalubong ang binatang si Matt, "Hey, Raffy... Where are you going?"

"Ahh... Matt, uuwi na po kami. Balik na lang kami sa last day ng wake ni Madam."

"Hindi mo na hihintayin si Lucas?" Pagtatanong nito. "I'm sure, he'll be here any minute." Saad pa ni Matt bago tumingin sa kanyang wristwatch.

Sandaling nagtinginan sina Mamu Penny at Raffaella, "Ahh... hindi na siguro Matt," Aniya bago ito binalingan. "Kailangan na talaga naming umuwi, maaga pa kasi ang pasok ko bukas." Alanganin niyang turan bago ikinawit ang kamay sa braso ni Mamu Penny.

"I understand," Napapatangong usal nito." Let's go, I will bring you home. Baka malintikan pa kami kay Luke, kapag nalaman niyang hinayaan ka naming bumiyahe pauwi."

"Ay! H-hindi na Matt, kasama ko naman si Mamu Penny kaya okay lang... Thank you na lang sa offer." Pagtanggi ni Raffaella sa kagustuhan nito.

"I insist, Raffy..." Wika ni Matt bago hinila ang kamay nito papalabas ng Funeral Homes.

Wala namang nagawa si Raffaella, dahil mukang desidido ang binata sa gusto nitong mangyari. Bigla niyang naalala ang pagkakapareho ng ugali ni Matt sa ugali ni Lucas, na kapag may ginusto ay hindi ka na makakatanggi pa. Kaya naman nagpadala na lang ang dalaga rito, kasunod sina Deo at Mamu Penny.