فاعل خير (الجزء الثاني)

بارت 8

#فاعل خير الجزء الثاني
#بقلمي طيبة الربيعي
البارت الثامن

(للكاتبة طيبة الربيعي)
نبأ ...باوعتلة صفح ودرت وجهي
فوكاهة، يمة هيج وارجعلك😍
بعد بيتي، بس الة اضوكك المر واخليك
تتمنة ولو بخيالك تتقربلي لو تشم عطري
اوف شكد مشتاقتلة يا الهي بس انتة تعلم
بقدر اشتياقي ولهفتي عليه
كام: يلة اني اروح، باجر اجيب السيد نعقد ومناك نروح للمحكمة
نبأ بتكبر: انشاءلله
سامر ...بسيطة تهون اني الج
بوست كَمرة وطلعت، رغم شروطهة
بس حسيت انولدت من جديد خليهة كدام عيني
وابيتي ولا بعيدة، كلشي ماريد بس يصيرن
ثنينهن كدام عيني، بووية هيج واشبع بكَمرتي؟
ويومية انومهة بحضني؟ يرادلهة ذبيحة وعلي
رديت للبيت الشروط شالة حركتي
تلكتني امي(للكاتبة طيبة الربيعي)
ام سامر: ها يمة بشر
سامر: باجر نعقد انشاءلله
كامت تهلهل اجتي مرة صالح والولد وياهة
يضحكون ويصوفرون
ضحكني المنظر، ثاني يوم خابرتهة
سامر: يلة حضري شوية ونجي
نبأ: ماشي
صالح اخذ امي ومرتة واني رحت جبت عمهة
والسيد، شوية واجو اخوتهة
عقدنة، ههه رجعتج لو لا، زوج اليطلك بعد
نبأ ...جان بداخلي خوف وفرح يعني مشاعر
متناقضة، توترت كلش خاصة من عقدنة
حسيت بتوتر مو طبيعي ولزمتني خوفة
شلون راح اتحمل يمك ومانام بحضنك(للكاتبة طيبة الربيعي)
صعبة بس اجتازيت الأصعب مو جديدة
عمتي فرحانة اكثر مني
بوستني وكالت: عمة البيت والولد مشتاقيلج بس مو بكدي، بنيتي انتي مشتاقة الاكلج لهندامج لنضافتج، بيني وبينج هاي الزركة كلة بالغرفة تذبهة علة صالح تكول هو ميخليني اطلع، بس هية عرمة ادور حجج
يمة متت ضحك مرة صالح ملتهية بالمطبخ
همزين متسمعنة، مبينة سوالف الجنة والعمة
بيناتهن، مرة صالح من جابت الجاي قدمت العمتي
اعتقد جانت متعمدة تخليلهة شكر زايد
لان عمتي خزرتهة وسكتت شاورتني(للكاتبة طيبة الربيعي)
ام سامر: شفتي نذلة تعرف السكر الهواي موزين علية تتعمد تحطلي
يمة متت ضحك وناسة والله
فطوم وكَمرة رايحات بغير عالم يلعبن
وضاربات الدنيا بعرض الحايط
اوف ياريتني ارجع طفلة، مادري بالدنيا شيصير
وشميصير، لميت غراضي ساعدتني تقى (مرة صالح)
عمي راح واخوتي همينة بس سامر وصالح وعمتي
بقو ينتظروني اخلص تحضير، اسمعهم يسولفون
وسامر بوسة واصل ليهنا، يبوس بكَمرة
وهية فاطسة من الضحك وفطوم تعيط عليه
تريدة يعوفهة، الله مشتاقة للبوس هففف
بس مو بكد ما مشتاقة الغرفتي والسريري
هواي شغلات هواي(للكاتبة طيبة الربيعي)
خلصت وبقة بس الاثاث
سامر كال: باجر اني والولد انقلة، بس خلي المفتاح يمي حتة اطلع من غبشة
نبأ: ماشي
طلعمة قفلت الباب ودعت ذكرياتي المؤلمة
وراح ابدي صفحة جديدة وياريت متطلع عقبة بطريقنة
اني وسامر، غير شروطي اكيد ههه
بس فرحانة لان سامر متركني وتمسك بية
علمود ارجع، ثبتلي شكد يحبني وكل الصار بيناتنة
مجرد غباء وطيش، بس بعدهة الخوفة بية
بعدهة بلكي تروح بمرور الايام(للكاتبة طيبة الربيعي)
بس عاجبني اكليك علة نار هادئة اشوف صبرك
ليومين وينفذ، ليوين يا سموري واطكَ بوجهي
احبة من يعصب بس مو لدرجة يهيني
اوف انسي يا نبأ شطلعت متكوليلي
وصلنة للبيت نزلنة والولد نزلو الغراض
تلكاني لؤي
لؤي: هلا والله بالمشمش
بوستة فدوة الكلبة(للكاتبة طيبة الربيعي)
باوعت لسامر خزرني، درت وجهي بتكبر
يعني مالك دخل، خايفة لا انكتل
عبالك اجيت للجنة ياربي شكد مشتاقة لهل لمة
من اكعد العصريات اشرب جاي وية عمتي
وتحجيلي عن ايام زمان، انسولف ونتناقش
عمتي امي الثانية، الله يرحمج يا يوم شكد مشتاقة
الريحتج والكلامج الحلو
دمعت عيني من دخلنة
ماعرف لان اذكرت امي واخوية لو لان فرحانة
برجعتي
ام سامر: يلة عوفي كلشي وروحي ارتاحي، رتبي غراضج شوفي غرفتج، عوفي كَمرة يمي
نبأ: ماشي(للكاتبة طيبة الربيعي)
اخذت جنطتي وصعدت، بعدين عود اصعد الباقي
فتحت الباب هبت نسمة ريح طيبة بوجهي
عبالك الغرفة ترحب برجعتي، مشيت بيهة
رغم صغيرة بس بعيني واسعة واشوف بيهة
كل راحتي، مداابالغ بس هل غرفة تجمع
ذكرياتي وية الانسان الي متت علمود اصير الة
المعاناة العانيتهة ميعلم بيهة غير ربي سبحانه
احسهة وصخة يرادلهة تنضيف لان غبار
وتراب عالكومدي، التفتت من سمعت صوتة وراية
سامر ...فرحان برجعتهة كلش عبالك روحي ردتلي
من وصلنة للبيت سلمت علة لؤي بوستة
واني شكم مرة متوبهة من هل سالفة
يلة اليوم سماح ماصدمج من اولهة
دخلنة لمحت الدمعة واكفة بطرف عينهة
ماعرف اذا من الفرحة لو لان اذكرت اهانتي الهة
صعدت هية امي اخذتني علة صفحة
ام سامر: اياني اياك تتعارك وياهة لان بوست اخوك، لطفشهة من اول يوم عوفهة(للكاتبة طيبة الربيعي)
عرفت بداخلي شنو الوالدة، مصيبة
سامر: لا ماسوي شي، بس انبهة بعد متعيدهة
ام سامر: ديلة وعود ارتاحو علمود ترحون للمحكمة
سامر: انشاءلله
اخذت نص الغراض وصعدت، شفتهة تتلمس
الغراض وتصفن
سامر: نورتي بيتج وغرفتج
نبأ: منور البيت باصحابة، ممغير بيهة شي شعجب
سامر: منتظرج نغير سوة
نبأ: رجاءا سامر بلة هل كلام، شتفقنة
سامر: شبيج شحجيت قابل، درتاحي وبدلي حتة نولي للمحكمة
اجتي كَمر تركض جلبت برجلة
كَمر: بابا اريد ايباد
شالهة: شتسوين بي(للكاتبة طيبة الربيعي)
كَمر: العب بي حباااب
سامر: تدللين باباتي شعندي غيرج
اخذهة وطلع، اني رتبت ملابسي بالكنتور
وملابس كَمورة بكنتورهة
ممسويلهة غرفة وحدهة تنام يمنة
لان حتة لو سوينالهة مراح تنام بيهة
احسن مو وحدهة كدام عيونة كلشي يصير
نضفت الغرفة وبدلت الفرشات والعصر رحنة
للمحكمة، خلصنة الاجراءات واخذنة سامر
للمطعم جبنة سفري علمود نتعشة بي
صار المغرب رجعنة، صليت وحضرت العشة
وية تقى، استغربت وائل ماكو
نبأ: لعد وائل وينة(للكاتبة طيبة الربيعي)
تقى: بيني وبينج مو تحجين لأحد، زعلان ورايح البيت عمة، صارلة يومين بايت هناك
نبأ: ياا ليش
تقى: سامر شايفة فوك بالسطح، طافر علة جيرانة يريد يحاجيهة والبنية تبجي تريدة يعوفهة بس الأخ مجلب بيهة
شهكت: عزةةة، اكيد تشاقين!
تقى: لا وادعة صالح، لج لتحجين بيهة سامر صاير اعصاب من ورة هل سالفة وكلة متدخل البيت بعد
تخبلت هاي شصاير، لازم اكلمة لوائل لويش هيج
مو من طبعة ابد اني اعرفة فد مؤدب
نبأ: عندج رقمة؟(للكاتبة طيبة الربيعي)
تقى: لا والله عند صالح، شتسوين بي
نبأ: دبريليا اريدة
تقى: من عيني
ورة العشة انطتنيا، ركضت صعدت
كتلهة تلهيهم عني تكللهم تسبح لو اي شي
رديت الباب مقفلتة علمود ميشكون
اخذت فوني ودكيت عليه
جاوبني ورة كم دكة
وائل: الو
نبأ: الو وائل اني نبأ(للكاتبة طيبة الربيعي)
وائل: هلو نباوي، عاش من سمع صوتج وين هل غيبة
نبأ: تعيش قلبي، لك فهمني وينك
وائل: ابيت عمي، انتي وين
نبأ: اني ابيتكم، رجعنة اني وسامر
وائل: لا بربج؟؟
نبأ: والله
وائل: هلا بيج والله فرحتيني
نبأ: وبيك قلبي، لك شصاير ليش ابيت عمك
وائل: اوهوو سالفة طويلة، بعدة سامر مايرضة ارجع مو؟
نبأ: ماعرف اني توني دريت بالسالفة، احجيلي ولك مشتاقتلك موت(للكاتبة طيبة الربيعي)
ماحسيت الة وسامر دخل، رغم خفت
بس محبيت ابين خوفي ويفتهم غلط
سامر ...ورة العشة شفتهة صعدت، سألت تقى
كلتلي راحت تسبح، هلو يابة اجتك الفرصة سموري
شدددد، غافلتهم وصعدت
بس تبسمرت بمكاني من سمعتة تكول
"مشتاقتلك موت"
تخبلت منو هذا، وشفتهة خافت
سامر بعصبية: ويامن تحجين
نبأ: بعدين اكلمك وائل
وائل: ماشي(للكاتبة طيبة الربيعي)
تقدمت فاير: منيلج رقمة
نبأ: اخذتة من تقى، شبيك
سامر: خيولي لاتحاجينة بعد!
نبأ: ماخذ منك الأذن وية منو احجي ووية منو لا
نبأ ...اجيت اطلع جرني وذبني عالسرير
وصار فوكاية
ادفع بية: ابعد سامر تخبلت!
سامر ...مشتاقلهة نسيت وائل ونسيت الأمة كلهة
سامر: لدفعين ليش صايرة عنيفة(للكاتبة طيبة الربيعي)
نبأ ...طبعا اني ادفع بي بس بداخلي ميتة عليه
ياريتة يبقة يصارعني وميتركني
نبأ: سامر وخر كتلك شمتفقين ليش تخليني اتندم رجعتلك
نزل علة ركبتي باسهة، انتهيت
ورجع باوع بعيني: وشبيج خدرتي، بعدني مامسوي شي ترة
صحيت علة نفسي ودفعتة: وخر سااامر
اجتي كَمر طفرت عالسرير وتضحك
دفعتة وكمت
كَمر: بابا سويلي اني همين
يبوو عزة العزاج شنو سويلي اني همين
طالعة عينهة هل بنية ياربي(للكاتبة طيبة الربيعي)
سامر ضحك: بابا دخل اسوي الامج بالأول، العرمة ماتنطي مجال
باوعتلة صفح ودخلت للحمام
خليت ايدي علة كلبي يدك اسرع من ما يكون
لا هاي هية طبقتي الشروط نبية
اذا انتي ملزمتي نفسج شلون هو يلزم نفسة
لا لازم اشوفلي جارة مو حالة هاي
سامر ...دخلت للحمام واني الشعور البية
كوة متحكم بي، صراع بيني وبينة
خرب بيج ماخلتني اطفي اشتياقي
اوف شلون ركبة عبالك ركبة طفل
بعدهة نفس الريحة ونفس الترافة
ضليت كَمرة اطفر عالسرير يمي
الاعبهة بس بالي يم امهة الهسة ماطلعت
صحت: يلة شنو شماكلة(للكاتبة طيبة الربيعي)
ضحكت دصبريلي لا ما كلسع احرجج
نبأ ...عزة شكد فشلة، طلعت
نبأ: يلة ماما كَمر تعاي ابدلج
كَمر: ماا
سامر: كومي بابا لتعاندين
كَمر: ماشي
يلة بقت عليج ام اعطوب
بدلتلهة نزلت تلعب وية فطوم
افيش شكد مشتاقة الفطومة
اريدهة تنام يمنة اليوم(للكاتبة طيبة الربيعي)
واريد اطفش سامر بلكي ينام جوة
صح مشتاقتلة واتمنى ينام يمي
بس مراح ارتاح اعرف بنفسي
اعدل بالكنتور والمحة من المراية شلون
متمدد وحاط رجل علة رجل ويباوعلي
نبأ: شنو ماعندك شغلة عملة مكابلني وكاعد
سامر: سكتي لا اكوملج
نبأ: عشنة وشفنة
كام يمة ختلت ورة الكنتور: سامر بلة شقة
ضحك: شبيج اخنلستي، اذا مو كدهة ليش اجازفين
نبأ: لانك مو راحة
تقرب اكثر يريد يحصرني بالزاوية
عطت: عمةةةة(للكاتبة طيبة الربيعي)
سد حلكي بيدة: اشش خرب شبيج!
عضيت ايدة وركضت نزلت
ام سامر: ها عمة شبيج شكو
نبأ: لا عمة ماكو شي شفت صرصرة خفت
ام سامر: نسوان تالي وكت
ضحكت: فطوم كَمرة يلة تعالن فوك
ركضن ثنينهن، اخذتهن وصعدت
شفت سامر انصدم
سامر ...اراقبهة شلون معدلة، بس ابالي افكار
الة بشدة، من حجت عبالك صوتهة
يكلي تعال، بعدني ماكايل بسم الله عاطت
وانوب عضتني وركضت، عود شنو ماكدر اركض وراهة؟(للكاتبة طيبة الربيعي)
واجيبهة سحل؟ بس كلت سماح هل يومين
شسوي مداكدر الزم نفسي نعلة اعلة خشمهة اليابس
حيل صايرة اتعب، من صعدت ووراهة
رية وسكينة تخبلت، بس لا تنوم فطيم هنا
بلة كَمرة طفلة تنام وماتحس علة نفسهة
بس فطيم طبعهة كلسع تفز
خاف لا تشوفني اسوي شي واني ماناوي اكعد راحة
بهل ليل، انتظرت شوية كلت اشوف
تخليهة تنام هنا لو بس تلعب وبعدين تنزل
شو هاي فرشت لنفرين جوة
سامر: خير المن ذني(للكاتبة طيبة الربيعي)
نبأ: الية ولفطوم، وكَمر يمك
سامر: خاف ماترضين؟ دشيليهن لا اشمرج من البلكونة هسه، بسرعة شيليهن
نبأ: يووه شعليك انتة
سامر بعصبية: شيليهن اكلج!
نبأ: ماشيلهن
سامر: شيليهن
نبأ: ماشيلهن معليك

يتبع...🌺🌺🌺
حبايبي اشكركم جميعاً علة تعليقاتكم الحلوة نورتوني فديتكم نفر نفر اموت بيكم❤
هذا البارت مابي حزن ملينة
واعذروني داقصر وياكم بس والله بديت دوام وماكو داعي اكول الوقت شلون ضيق