لعبة الكذب

١٨

انتي ما حتمشي شغلك تاني ؟ 

خلاص يا تراجي ، ابوي مات ربنا يرحمه ، لازم تواصلي في حياتك بالطريقه الكان بيتمني يشوفك بيها دايماً ،، تابعي طريقك

* ههه دا ابوي يا تقوي ، هي بقت فيها حياة

_لا دي سنة الحياة كلنا لها ، الحزن ما بيرجع الراح ، حاليا هو محتاج لي لدعاكي 

*بدعي ليهو والله ما غاب عن بالي لحظة

_عشان كدا ارجعي تراجي البحبها ابوي ،
انحنا زاتنا لازم كلنا نشتغل ، و نساعد معز في شغل ابوي دا اسي هو بقا محمول ،
مقسوم نصين بين شغله وشغل ابوي الله يرحمه ...

*اكيد يا تقوي بأذن الله كل الامور حتتيسر 

_ ايوة كدا 

*بس انا من بكرة حنزل اشوف لي صيدليه تانيه اشتغل فيها 

_اجي ! ليه ؟

*كدا بس 

_حاصل شي انا ما بعرفه ؟

*لا بس م حابة اشتغل فيها 

_لالا ما اقنعتيني يا تراجي ، دا ما كلامك الزمان ، في شي حصل صح ، احكي

*تقوي قلت ليكي مافي حاجه ، مرتبهم ضعيف اقعد اتدعك اليوم كلو عشان 1700ج

_معاكي حق .. خلاص باقي يومنا دا ننزل نفتش اصلا م عندنا شغله 

*مالي مزاج

_استغفر الله ما انتي كل يوم ما عندي مزاج وين الجد، بالله قومي 

*طيب ...

_توجا ، صراحه عندي سوال من بدرب

* اهااا

_صراحه في تالتة ابوي شفتا بلال في العزا وكان بيخدم مع اخواني زي البيعرفهم 

*فعلا شفتو والموضوا دا شاغلني ومحيرني

_طيب ما سألتيهو ؟

*يا تقوي انتي سفتيني فضيت لتلفون والله من وقتها مجدوع في شنطتي 

_حرام بيكون قلقان عليكي والله بتبالغي اتصلي اطمني عليهو وشوفي الحاصل 

*طيب ...

_قوماكي خلينا نجهز ...

الكلام دا كان الساعه 3:00 عصر ..

المهم قبل اطلع شلت تلفوني ، بعد ركبنا حتي فتحتو ، طبعا كمية مكالمات و رسايل كلها من المسكين بلال ، زعلت من نفسي بس كمان انا وضعي يحنن ،، م قدرت اصبر طوالي رجعت ليهو ،، اقسم بالله قبل الجرس يتم ، فصل فيني ورجع لي هو ... سلام ما سلم علي قالي لازم الاقييكي اسي ، قلت ليهو اسي صعب م بعرف تقوي عرفت كيف داير يلاقيني ،
خطفت مني التلفون ، قالت ليهو انحنا في الحته الفلانية نستناك وين ؟ 

اتفقت معاهوو ، و من طريقنا داك كملنا للمكان القالتو ، كان قبلنا قاعد منتظر ، بالجد لمن يتوفي ليك زول غالي و عزيز عليك ، تحس انك حرام تحب حرام تشتاق حرام تطلع حتي من البيت ،، انا رغم شوقي ليهو ولهفتو الشايفاها لي الا اني بحاول ادس مشاعري ... قعدنا في طاوله .. 

بلال__ ازيك تراجي

انا * حمدلله بخير 

تقوي_ عن ازنكم اخدو راحتكم ( قبل نرد هي كانت قامت من جمبنا ) .. 

*وشك ما بتفسر يا بلال

شوية ظروف 

*خير ، حاصل شنو ؟

دا ما وقتو انتي براكي الفيكي مكفيكي

*لا انا في احسن حال حمدلله ، احكي لي

شوية مشاكل بس و في حاجه منفسنه بي

* انا كمان في حاجه شاغلاني من عزا ابوي

معناتو نفس الحاجه 

*ايوة ، هي : الجابك عزا ابوي شنو ؟

شنوووووووو !!

انا ما بعرف بيتكم اصلا ي تراجي و عزا ابوكي دا عرفتو من اصحابك في الفيس 

*كيف يعني انا شفتك بعيوني يا بلال 

ااي نعم موت ابوي هزاني و كسرني لكن ما خرب لي نظري 

_ تراجي لا اله الا الله ، كدي براحه فهميني

* طيب الشي الشاغلك ومنفسن بيك شنو ؟

_ دا موضوع في الشغل وف البيت اسي انا داير افهم ، كيف يعني شفتيني في عزا ابوكي

* بلال اقسملك بالله انا شفتك ، دقيقه انادي ليك تقوي هي زاتا شافتك والله وسالتني 

___ انتي دايرة تجننيني يا تراجي ؟؟

( في جانب تاني )

اقسم بالله الا اضبحا ، كمان بتصل بي بكل سهوله ، هو قايل نفسه منو ، والله اوريكي يا تقوي .. 

هوي يا راجل مالك بتكلم نفسك ،، جنيت انت ؟ 

الكلب ، الكلب دا متصل بي و بقول لي اختك عندنا و هي اسي بقت مرتي ،،

وووووب ووووب ووووب 

دا كلام سنو ، و هو دا منو و مرت منو ،، سجمي يا عثمان ، نعلا تقصد تقوي احتك الفلتانة ! 

ااااي ياها فلتانة السجم ، قال عرست قال 

.. عرست !! واخوي 

مش اختك دي يا عثمات انا كان ما جبتها ليك تحبي تبوس رجليك ما ابقي صفيه ،،

شوفي يا صفيه امورك ديك انا ما بتنفع معاي ، وكون البت اتلمت علي راجل بالحلال دي نهائي ما مشكلتي ، بس تعرس من غير علمي و تبيت الايام الفاتت دي كلها برا البيت ، هنا انا بكسر رقبتااا ..

مششششيم راجل السجم والبجم ، بالله عليك دا الهاميك اسي ،، اخا تقدر توريني الراجل دا جابتو من وين و لا عرفتو وين ؟

ولا الليالي الكانت بايتاها براا دي كانت بايتاها وين ؟ عامله فيها الشريف الرضي 

لا و كمان ما هاميك ضربها لي ،، صفيه 

الفيني مكفيني ،،، ااي الفيك مكفيك فعلا لانك ما عندك شخصيه م قادر تلم اختك ، ما عامله حساب لي وجودك تسرح و تمرح علي كيفاا ، ما عامله ليك قيمة انك مكان ابوها .. كدي وريني الزول الاتصل بيك دا قال دايرك في شنو ؟؟ 

استككانة😑~~

يتبع .....