بعد جدو طلع من الصيدليه ..
- بعده ب نص ساعه-
_ الوو
* ايوة يا ماما
_اها لسه ما خلصتي ؟
*انا بجهز في شنطتي كدا انتي اتصلتي
_يلا عشان بعد بكرة حنة نجلاء دايراكي تمشي معاي السوق عايزة انقي لي توب وكم حاجه كدااا ...
*سمح يا امي ، بس بالله عليكي م تجبريني امشي معاكي ، انا ممكن احضر العرس بس،،
_يعني يا تراجي امشي براي انتي ترضيها لي و بعدين من ناس عمك ديل جو ، بيسألو منك نفسهم يشوفوكي
*يشوفو لي شنو يا ماما عليكي الله هما بيعرفو لي شنو ، خلاص بس اصل البيت ونتم كلامنا ، انا بس منتظرة خالد يجي ويستلم مني الوردية
_سرعه، يلا مع السلامة ..
ركبت لي ركشه ،، و اتحركنا ، من ركبت لقيتو مشغل اغنية لمصطفي سيد احمد ،، و دا ادماني وعشقي لدرجة ما بسمع لغيرو ، طلبت منه يعلي الصوت ، لمن استغربني ،، انطربت طول السكة لمن وصلني البيت ..
قبل ادخل شفت عربية ابوي واقفه برااا ، كانت غريبه لان دي ما مواعيد ابوي يجي ،، دخلتا ،،
لقيت معز اخوي و معمر قاعدين و دييك ليها امي قاعده في الكرسي ، سلمت عليهم ، و لقيتهم زي الكانو بتكلمو في موضوع وانتهو منو ، يعني م قفلو لمن انا جيت ،، سالت امي ، قالت لي مشاكل في الشغل ابوكي جا زهجان بس ،، قلت ليها طيب انا يادوبك الحق اصلي العصر ،، مشيت استحميت و صليت و غيرتاا ،( بقلم/سحر سمير )
مسافة امي تجهز الغداء ، مشيت لابوي ، قلت ليهو :
* شنوووو يا حاج محمد
_شنو يا بت حاج محمد ، اتقول صاحبك
*وشك شاحب يا ابوي ، انت ذهنياً كدا مرهق،
طيب اخد اجازة ريح نفسك يا ابوي ، انت ليك سنين بتشتغل ما حصل شفتك ماخد اجازة ..
_ي بت انا كويس ، بس شويه مشاكل في الشغل
*طيب مشاكل زي شنو كداا ؟ نتفاكر سوا
_يعني زي اني خسرت زبايني ،، كلهم اشتكو من آخر بضاعه ، القماش م اصلي و دافع فيهو دم قلبي و متدين ، م عارف المشكله وين بالضبط
*اجي ! دا كلام شنو يا ابوي ! البضاعه دي مش بتاخدوها من مصنع معين ؟ وقبل البيعة تتم مش بيرسلو ليكم عينة كدااا !!
_ شوفي يا توجه ال .....(امي قاطعتنا للغدا)مشينا اتغدينا وابوي ذهنو شارد ،، مشيت اللبس عشان اطلع مع امي ،، سمعت صوت رسايل ،، م ركزتا و تميت لبسي ...
لمن طلعنا ، انا حتي اتزكرت اشوف تلفوني
لقيت رسايل من رقم غريب ،، عاينت ليها و طلعت من الواتساب ، و رجعت تلفوني في الشنطة ،، لمن طلعنا انا و امي بعد وصلنا نص الشارع ابوي جا لاحقنا ، قالينا انا بوديكم ، انتظرناهو لمن دور عربيتو واتحركنا ،، فتحت شنطتي علي اساس حأتصل علي تقوي انو تلاقينا وكداا ، لقيت الرسايل القبيل ديك ، دخلت عليها ،، لقيت فيها السلام عليكم ،
رديت ليهو ، طوالي رد علي ، قالي انا اسف بس حبيت اتاكد من الرقم ، قلت ليهو لا عادي بس انت منو ؟ قالي انا بلال .. استغربت الاسم م عارفه ليه يمكن عشان م صادفني زول في حياتي بالاسم دا
، قلت ليهو بلال ! قالي ايوة انا سيد المحل بتاع الملابس في ال( ...) ،، قلت ليهو ايوااااه
اتزكرتك ، اها قدرت توفر لينا البلوزة ؟
قالي انا طلبتها وبكرة جاياني بضاعه بتمني تجو و كلمي صحبتك ،، قلت ليهو تمام ،، اها في اللحظة دي ، سمعت امي بتقول لابوي : ودينا المول ال (... في سوق ...)
انا لمن قمت ناطه م عارفه ليه ، قلت ليها امي نمش المحلات ديك الجمب (...) قالت لي لا ، دا فيهو حاجات راقيه ،، اها سكت، ف كل الاحوال انا شنو بخليني اعترض ....
وصلنا ، وابوي فات ،، ياهو اخدنا لفتنا و قومي يا امي خشي المحل زاتوو ، و كان قاعد برا و معاهو واحد ، انا م عارفه ليه رجلي بقت تقيله كدا و مدنقرة ف الارض نظام م منتبهه ،، امي دخلت و هو قام معاها و صحبو البرا دا بعاين فيني ، قلت انا موقفني برا شنو ، و اساسا دا محل طقمات و حاجات بناتيه ،، لكن أمي عندها شنو هنا !!
دخلت ليهاا ، لقيت السلام حار قدامي ،، استغربتا ! اصلو م اتكلمتا ، امي قالت ليهو عندك كارينا انناسي ، قاليها دي الالوان الموجودة و لو ما مستعجله بكرة جاياني بضاعه ممكن م تستعجلي ، وتلقي حاجتك فيها ،،، و بعاين لي و مبتسم
و انا بزح نظري منو ، انا بالجد م عارفه البحصل داا شنو بالضبط ، ( دايما لمن بكون في زي احساس كدا م مفهوم بتحسوهو انتو الاتنين بس ماف واحد فيكم بتكلم ، بكون نظرات ، و بتحس بجواك ف توتر في شي م عادي ، المهم توتر و بتكون حذر ف تصرفاتك لانو بطرف عينك بتكون عارف ان الزول دا متابعك ،، يلا دا احساسي تجاه بلال دا )نهائي م اتكلمتا و لا قلت شي ، ولا هو ، امي الوحيدة البتتكلم ، وهو عين مع امي و عين معاي ،،، وانا عامله فيها عبيطه ، بس حسيت ( نظام اني من دقايق كنت بتكلم معاكي واتساب ، مالك ما وريتيني انك جايه عندي )
المهم ، امي خلصت حاجاتا و شبكتني الا تشوفي حاجه وانا رفضت اساسا الجديد الاشتريتو لحد اسي بي ورقتو ف الدولاب دا غير الهدايا البتجيني ، طلعنا من تحت المول اخدنا امجاد ، وصلتنا خشم بابنا ،،
والاغرب من كدا من طلعنا من المحل انا بقيت داخله مارقه علي الواتساب ، والمحيرني منتظرة رسالتو عديل و من جواي متوقعا وصولها ف اي لحظه ،،
دخلت البيت خلصت اموري العاديه ، عندي كتاب كدا بقراهو مع كورة الضغط بتاعت التوتر ، بتريحني ... لمن نعست ختيت الكتاب و الكورة في يدي ، و عيني ف التلفون ، م رسل اي حاجه لمن نمته ، قمته الصباح زهجانه ما طاييقه رووحي ...
قاعده منتظرة ابوي يجي يوديني ، امي قالت لي نايم ما حبيت اصحيهو ، دبري نفسك او شوفي واحد من اخوانك يوصلك بعربيه ابوك ،، قلت ليها غريبه ابوي ينوم لحد الوقت دا
و يدوك يوم من شغله ، غايتو ربنا يريح بالوو ، انا بمش بالمواصلات ..
فعلا طلعتا ، بعد مشيت ، معتمر صفر لي ،
اتلفت ، قالي انتظري ،، وقفت
لمن جاب المفتاح من ابوي ، وجا علي ، ركبتا .. صبحته عليهو وسكتا
قالي بترجعي الساعه كم ؟
قلت ليهو م عارفه والله لكن ع الاغلب برجع 3:300 ، قالي تعالي بدري الليله جايننا ضيوف ،، قلت ليهو منو جاي امي ما كلمتني ؟ قال لي والله م عارف لكن نصرالدين ، اتصل علي وراني ،، قلت ليهو نصر الدين منو ؟
قالي ولد عمك حسين ، قلتا ليهو اممممم
يشرفو .. وسكت علي كدا ...
فجأة بطني دي مسكتني الم الم الم مبالغ فيهو ، بقيت م عارفة بطني ولا جمبي ، بس بصرخة واااااحدة لمن معتمر دا وقف العرييه
اتخلع عديل ، ماسكني و انا بس بتآوه من شدة الالم ، بس بقيت اقوليهو رجعني البيت سرعه ، سرعه يا معتمر ، وهو يقول لي مالك ، و انا يا الله والجلاله بقدر اجر نفسي ....يتبع ......
![](https://img.wattpad.com/cover/128865829-288-k733155.jpg)
YOU ARE READING
لعبة الكذب
Romanceمن عمق المجتمع ( حقيقيه ) ، انا البعرفو انحنا اتولدنا عشان نتمرمط في حياتنا دي ..بس قدر معرفتي بالحاجه دي الا اني مدركة ان ما كل حاجه حابنها حتكون حقتنا لان لو حصلنا علي كل حاجه حابنها بسهوله م حتبقي دنيا ، بالدارجي كدا رغم مرمطتي دي انا مؤمنه بفرج...