هيام من الصباح حكت لي صحبتها ....انتي ما عارفة حسن بعامل هبة كيف زي الملكات ياخ انا بس عايزة راجل زي حسن دا
صحبتها: يا بت حسن عشان كان بحب اختك تلاتة سنين قبل اتزوجها و عينو طلعت عشان يدوها ليهو مايعاملها كدا
هيام: لالا يا بتي الرجال ديل حتي لو كان بحبها عشرة سنة بعد العرس بفتري عليها لكن حسن دا حاجة تانية ....
جات هبة من هناك سلمت على امها و هيام قفلت من صحبتها سريع قالت ليها بكلمك بعدين ....
هبة: اها شنو الكنتي عايزة تسالي منو امس؟
هيام: اهااا كنت عايزة اسالك من الكبابي معاكم بي غادي
هبه: ياخ وأنا قلت الموضوع كبير تقولي لي كبابي انا العدة بجيبها اول بي اول ياختي
هيام: لالا تمام
قعدت هبة اتونست مسافة مع امها و اختها و ساعدتهم في شغل البيت و نهاية اليوم كالعادة مشت غرفتها بس حسن اليوم اتاخر شديد و ما جا هيام جات تتسحب براااحة الفضول عايز يقلتها وعايزة تحضر الفلم الهندي البين هبة و زوجها الرومانسي ....وقفت جنب الشباك حسن جاء لقاها واقفة جنب الشباك و في الضلام افتكر انها دي هبة اداها ضربة بي ورا قال ليها منتظرة شنوووو....هيام اتخلعت لمن نطت و حسن لمن ركز اتخلع شديد لمن عرقو اتصبب قال ليها .....ه ه ه ه ه هبة ؟ هيام اقصد معليش والله افتكرتك هبة هيام اتخلعت و بلعت ريقها قالت ليهو لالا ما مشكلة و جرت سريع مشت بي غادي ....
لاقاها صالح شايل الابريق ياداب جا البيت قال ليها هيام ؟ ....اتخلعت قالت ليهو و قلبها في يدها ....صصص نعم ....
صالح: كنتي وين بي جاي ؟
هيام: ك ك ك نت مع هبة
صالح: بتسوي معاها شنو للوقت دا ؟
هيام: لالا ما بسوي حاجة راجلها زاتو ياداب جا
صالح: هيام رجاء ما تمشي زي الوقت دا لي هبة لانو راجلها براهو متعقد عايزين نديهو راحتو و انتي كدا بتضايقيهو
هيام: لالا ما بمشي ليها بس لو عندها عدة ولا كدا
صالح: العدة شيليها الصباح اسمعي كلامي
هيام: حاضر خلاص كويس ....
مشت هيام و يديها برجفو و مخلوعة اسي حسن يقول شنو الموقفها هناك شنو ....حسن دخل غرفتو لقا هبة قاعدة في التسريحة تسرح في شعرها جاها براحة
هبه: شايفاااك
باسها في راسها ....و قومها من المقعد و دور بيها شوية قال ليها ....مفاجأة ....
هبه: اها شنو شنو قول
حسن: لقيت الشغل الاضافي
هبه: الحمدلله الحمدلله
حسن: خلاص كدا مشاكلنا كلها اتحلت
هبه: الحمدلله
حسن: خلاص نرجع بيتنا قبل ما زول ياجرو غيرنا لانو البيت ياخ عشنا فيهو اجمل ايام حياتنا انا عايزو هو و بس
هبه: حسن لالا ياخ خلينا هنا
حسن: ليه حبيبتي ؟
هبه: اولا نحنا ما عندنا اثاث و ما عملنا حاجة خلينا نلم لينا قريشات نعمل حاجة
حسن: لكن يا هبة كدا عصرتي على
هبه: ولا عصرت عليك ولا شي و بعدين انت بي شغلك الاضافي دا حتجي الساعة كم ان شاء الله انا حأقعد براي لوقت متاخر احسن هنا
حسن: لكن انا هنا ما مرتاح ياخ
هبه: في زول ضايقك و لا شي
حسن: لالا والله بس ياخ اخير نكون برانا
هبه: حبيبي هاااانت خلاص بس نعمل لينا خميرة كويسة و نمشي
حسن: طيب الله يعين بس ما قلتي لي دا شنو العاملاهو في شعرك دا
هبه: ياخ دا استايل جديد
حسن: استايل بتاع شنو ياخ و كلكها من بطنها ....صرخت بصوت عااالي ....حسن اتضايق و سكت ....قالت ليهو اسفة اسفة والله ....
حسن: أسي يقولو شنو والله انا خجلان عديل كدا
هبه: لالا ياخ. مافيها حاجة راجل مع مرتو
حسن: ياها راجل مع مرتو دي زاتها
هبه: ياخ افرد وشك خلاص قلنا معليش
حسن: انتي ما حاسة بالخصوصية يعني شنو
هبه: حبيبي خلاص الموضوع انتهى
حسن: كويس
هبه: اها ما قلت لي بتجي الساعة كم
حسن سرح مع وقفة هيام و مستغربها جدا بس ما قادر يقول ليها انا ضربتها على اساس دي انتي و كدا و محتار
هبه: هي سونسون وين انت سارح انا بتكلم معااك
حسن: قلتي شنو هبويتي
هبه: قلت ليك حتجي الساعة كم
حسن: ايوا يمكن لحدي 10 او 11 كدا بالكتير
هبه: لا حولااا شفت متاخر ياخ و قالت ليهو بي دلع يعني انا ما حاشوفك إلا بعد 11؟؟
حسن: قال ليها بي مكر و هو جاي عليها و انتي عايزة تشوفيني ليه
هبه: ههههههه ياخ بطل عبط
حسن: عبط بوريك انا العبط اسي دي و هجم عليها و هي حاولت تكتم صوت الضحك عشان حسن مايتعقد
الصباح بدري حسن طلع و هيام كانت طالعة ماشة بتعمل في خدمة وطنية وقفت برة لحدي ما شافتو جاي من بعيد مشت في الشارع جا سلم عليها قال ليها ليها كيفك ان شاء الله كويسة و عينو ما رفعها عليها و هي اتغاااظت بس مشت وراهو ....
يتبع ....
