حسن صحى بدري ....هبوية حبيبتي اصحي الشمس طلعت ....
هبه: ياخ دقيقة خليني انوم شوية ....
حسن: الصلاة فاااتتنا
هبة قامت بي تكاسل من السرير و مشت اتسوكت و اتوضت و صلت ....
حسن: حرما حبيبة ....
هبه: جمعا يارب
مشت هبة على المطبخ و بدت تعمل في الشاي ...حسن جاها وقف وراها و ضماها ....حبيبتي معليش اسف على الحصل امس ...
هبه: ياخ بتبالغ حرام عليك يا سنسوني انا مبسوووطة مامتضايقة
حسن: اتشرينا لكن لانو ناس مصعب ديل اساسا مواسير من يومهم انتظرناهم و تخيلي لقيت منو مكالمة الساعة 2*صباحا
هبه: و قال ليك شنو
حسن: هو انا كان فيني عقل ارد عليهو ؟ انا كنت غمران عديل من سهرة امبارح
هبه: اول مرة و اخر مرة تاني ننتظر اصحابك ديل ياخ مواسير ....كبت الشاي و بدو يتونسو ....
حسن: هبوية الليلة بطلع المساء
هبه: ليه ياخ انا ما بقدر اقعد براي
حسن: حبيبي اصبري بس انا عندي قروش عند عمك معتصم دا و بتفك الزنقة أن شاء الله ....
ختت هبة الكباية و عاينت لي حسن بي تمعن ....قالت ليهو ....حسن انا ماقلت ليك نفك اجار البيت دا والله كل امورنا بتسلك
حسن: لالا و نمشي وين ؟
هبه: ما قلت ليك نقعد في الصالون مع ناس امي و الله عااادي زي الزبادي
حسن: لالا لا ياخ معقولة اقعد مع نسابتي
هبه: اسي لو كانو ناس ابوك هنا في الخرطوم كان ممكن لكن قدر الظروف مرتبك دا نحنا بنحاحي فيهو بي جاي بي جاي عشان يتم مصاريف المعيشة
حسن: هبة عليك الله اصبري معاي و الله كلو بهون بس ألقى لي شغل تاني
هبه: طيب بس نقعد مع ناس امي مسافة تلقى الشغل التاني دا
حسن: لالا ياخ ....
هبة بقت شغالة نقة في حسن عشان تقنعو يسكن معاهم في البيت و في الاخر اقتنع لانو الاجار بشيل نص مرتب حسن و ما قادرين يوفرو من الباقي حاجة ....
هبة اتبسطت جدا لكن حسن وافق على مضض بس هبة طوالي اتصلت بي اهلها و كلمتهم بالحاصل ابوها قال ليها انا من الاول قلت لي حسن لكن ما سمع كلامي الصالون فاضي و بيتنا مفتوح في أي وقت تشرفو ....فعلا في غضون اسبوع لملمو حاجاتهم الاساسا ما كتيرة و ودوها بيت ناس هبة و لقو الصالون اساسا مهيأ ليهم و نضيف و ادوهم المفتاح
هبة عندها اخو واحد اسمو صالح و هو شخصية طيبة جدا و اجتماعي و بونس حسن و شغال عسكري بدا الجامعة و ما خلصها و رغم مجال شغلة خشن هو كان طيب و اخلاقو عالية و عندها اخت واحدة اسمها هيام و هي اصغر منها سنا بس في الشكل اطول منها شوية ما كتير بس نفس الحجم و اللون و سبحان الله الناس بقولو تومات بس هم ما تومات ....هيام بتحب هبة جدا و بدل هبة هناك كانت بتقعد براها هنا هيام بقت مونساها و بتعدي اليوم كلو مع ناس امها بي جاي و بتمشي بي غادي لمن حسن يجي من الشغل . ..
في يوم من الايام حصلت حاجة غريبة جدا هبة ودعت امها و هيام و قالت ليهم خلاص مواعيد جية حسن جات انا ماشة. قالو ليها خلاص مع السلامة هبة مشت على الصالون حست بي حركة وراها اتلفتت ما لقت زول ....مشت عادي قالت بكون يتهيأ لي الواطة ضلمة دخلت لقت حسن جا و ملص جزمتو جرت عليهو و قعدت فى رجلو قالت ليهو متين جيت ....
حسن: اووول شي البوسة حقتي وين ....باستو ...
حسن: تاني ....
هبه: لالا ماف ....
حسن: كويس
حست بي حركة تاني برة اتخلعت مرقو هي و حسن يشوفو في شنو ما لقو حاجة بس هبة حاسة في زول مراقبهم أو حاجة قالت لي حسن ماشة اجيب شي و اجي مرقت لقت هيام ماشة
هبه: هيام ؟؟ ...
ما ردت و مشت سريع ....
هبه: هيام عايزة شي؟ ....
اتلفتت متوترة لالا ما عايزة شي كنت جاية اسالك لكن خليهو بكرة ما دام راجلك جا ....
هبة: خلاص تصبحي علي خير حبيبة ....
هيام: و انتي من اهلو
هيام مشت واصلت طريقها عادي و بقت بتفكر في حسن و هبة و كيف كانت ماشة تسال هبة من الكبابي اذا في غرفتها بس سمعت صوت راجلا جا ما حبت تخش بس سمعت الكلام ما قدرت تقاوم الفضول بتاعها و تاوقت بي القد الفي الشباك ....
يتبع....
