الفصل الثاني
16
طريق الموت آت ....
شتاء عام 1980
الدنيا جانت باردة حيل بشهر كانون الثاني ...والرياح اللي جانت تعصف بالمدينة باب باب وخصوصا ابواب الفقراء اللي ختلوا باخر زاويه بالبيت محتمين بابسط وسائل التدفئة حيث ارتفقعت اسعار المحروقات
وقليل مجنت تشوف الناس تطلع بالشوارع وخصوصا بالليل
والكهاوي صارت سنطة ...مو مثل قبل جانت مليانة وازدحام وهوسة
قبل جنت تكدر تسمع صوت استكاين الجاي طك على المواعين والبولي اللي يضرب الطاولة باعلى حسه ويصيح دوشيش ...
هسه يدوبك كم واحد كاعد وصافنين يحركون بجكايرهم كانما يحركون بايام عمرهم ...
انتجى علاء على الكرويتة لابس البالطو الاسود مالته واللفاف الرصاصي على ركبته ...
شعل اخر جكارة بالباكيت ...وغمض عينه وجر نفس ورة نفس...ويتامل بانفاسه وهي تتطايربالهواء ممزوجه بالدخان
الحيرة والقلق والخوف ...جان شاغلة عن اي شعور اخر ...وما ان فتح عينه لمح زهير يجيه يمشي سريع ...يتكمز حتى لايمس بالطين
سلم وكعد ...
_شبيك ابو سمير شو دايخ ...شكالولك الجماعة اللي دزيتك عليهم !
صفن سمير وبلع ريكه كوة
زهير جماعتك حجيهم يكسر الظهر
_وتالي
_خايف عليهم لايترحلون الجهال شلون بهالبرد!
_ماسوولك شي يعني!
_ماكو بس كالو الحل انه اطلكها قبل الترحيل ..حتى تضمن يبقون الجهال يمك
المصيبة انه هي ........؟؟؟؟
_اي هاهيه طلكها!
_شبيك زهير صدك تحجي بابا هاي مرتي شنو اطلكها شلون اعوفها وحدها
_علاء ..لا انت قابل تعوفها تروح وية الجهال ولا قابل تروح وياهم ولا قابل اطلكها وتبقي الجهال يمك وهنه بس هذني الحلول شتريد لعد ؟! مع انه اللي سمعته انه المراءة اللي متزوجة عراقي تخير اما ان تبقى بالعراق تبعية او تروح ويه اهلها
سكت علاء وكانه يعرف شي وماحجى
يااخي لعد اكو شي ابالك روح وفضها
_ماتكولي اروح وياهم شلون شسوي بإيران؟!واني عراقي اصلا مايقبلون الترحيل الا اسقط الجنسية واذا اني سقطتها يتاءذون البنات هم ويايه فخرية وبدرية ...
شلون اروح مكان مااعرف شنو مصيرنا هناك ؟!
_خلاص لعد اني اشوف طلكها وبقي الجهال يمك هسه.
لحد مانشوف ربك شلون يحلها
يجوز الشغلة هينه وكلها اقل من سنة سنتين بالزايد وروح رجعها شتكول مو احسنلك ؟!
انت حجيت ويه امل بهذا الشي
_اي حجيت وماعدها مانع ...
وظلت تقنعني وتخوفني على الجهال بارده والحدود ثلوج اخاف الجهال يتمرضون لو يضيعون من عدنه ساعتها شسوي!!
أنت تقرأ
نساء مخمليات للكاتبة ليان عيسى
Romanceانشر لكم الرواية الجديدة باسم نساء مخمليات وهي رواية تحكي عن مجموعة من النساء من خمسينات القرن الماضي والى وقتنا الحاضر تحكي عن واقع هذه الشخصيات عن احلامهن عن الحب وعن القسمة والنصيب عن مواجهتهن لاصعب المواقف والخروج من اشد الازمات .... عن ال...
