الفصل الاول
الجزء 13
كربلاء-العراق
الجمعة
في الصباح يحلى الجوهيجي وكت بعد صلاة الفجر
تكثر الناس بالشوارع
وزحمة المسافرين تملا الكراجات قبل الضحى
بس تخطي ساعة ثنتين تصيرالشمس اقوى والحرارة ماتنحمل
حضرة العباس عليه السلام مزدحمة على طول
طبعا مساحتها قبل اصغر من هسه بهواية
وعلى كد الحضرة بناء وكبال الساحة كله تراب للكراج
الناس تمد فرشها وتكعد جوة اي فية تلكاها على التراب ...
الي يكب وية اقل هوية تعج على الزوار
ساعتها الناس تصل على النبي و تلم الفراش وتروح تبسط ليغاد وهكذا
لا الناس تتذمر والعجاجة تعوفهم بحالهم
النسوان متربعات على شكل حلقات ودوائر ويكعد على جنب العجوز والشايب والشباب رايحة جاية بدشاديشهم البيضة المتربنة والجهال داير مدايرهم يلعبون بملاعيب بلاستيكية رخيصة اغلبها طلقات لو خراخشات
نسوانا هم فرشن الجودليات وطلعن الجدورة وبدن يصبن الاكل
فخرية بيومها جانت مسوية نواشف كبة وكباب عروك وياها الطماطة والخيار بماعون وحد فوكاه سجينة صغيرة ملفوفات حيل بجيس نايلون بوحد...
واول مانفتحت العلاكة عطت ريحة العروك منها
العائلة الي كاعدة بصفهم ظلت تعاين عليهم من بعيد لبعيد بابتسامة وفضول
ويكولون عليهم هذول اهل بغداد
صاح ابو غازي على عبد الكريم يركض يروح يجيبلهم بارد
راح ركض جاب بطالة المشن من ابو العربان واجى
ام غازي ظلت تجر بوحها جر جانت جايبة دجاجة مكليتها ومكطعتها
بس اللحم يم العظم مامستوي
فعرفت فخرية المرة مالها خلك ولا واهس حتى الغدة مبين كوة مسويته
بينما ام كاطع جانت تشيل الخبزة تحط بيها كومة خضورات ونص كباية وطماطة وتلفها زين وتوزعها عليهم
وتاخذ هي لكمة وتعيط على ميلاد وعهود لايرحن بعيد
ادنت فخرية من ام غازي وسالتها
شبيها هلكد تبجي وعيونها حمر ؟!
شهكت المرة ونزلت دموعها وكوة كامت تحجي ...ابو غاذي يعاين عليها من بعيد لايكون تحجيلها حجاية وتفضحهم بس هي مااهتمت ...خرطت الاكو والماكو...
---ام سعد شحجيلج الله وحده العالم بحالي يكون ابا الفضل العباس يفك ضيجي ...
---والله گلبي تكطع على بجبيج حجية احجي شبيج؟!
---دادة غازي هالمرة بالتوقيف صارله اسبوعين حتى زيارة ماخلولاحد
وولاحتى ابوه كدر يشوفه!
وانه كلش قلقانه عليه هو مريض وصحته مو شي بس لايرجعونه اليه ميت!!
_اسم الله عيني لاتكولين هيجي ام غازي كولي يالله!
لا لايظل بالج هسه يطلعوهم
تدرين احنا هم......
ونصت صوتها فخرية حتى كاطع مايسمع ولمت عبايتها عليها اكثر....
---احنا هم ياعيني نسيبنا هذاك اليوم جانوا حابسينا واخوية علاء طلعه هيجي بالكوة همه شويه شادين على الوادم هالايام مااعرف شبيهم ...
_يمه وهم يجيني تتكحل عيني بشوفته يمه غازي غدت روحي لايبة عليك
...اوف شحجي وشرد اكول تدرين ام سعد
من جان بالكلية هو شالع گلبي ...يومية حجز وتوقيف يوم منشورات ويوم تحريف ويوم ماادري منين يطلعهن هالسوالف
_قصدج تحريض خالة جاوبتها رحاب على كيف وراسها يمهم ..
يمه شمدريني تحريف تحريض اني ادري بالهسوالف كلشي ماريد كون بس ابني يبات بالبيت ...بحضن امه
_الله يسلمه هو شكد عمره؟!
_سبعة وعشرين اي خية اتذكر حنان كالتلي
حنان يمه اخوج مو سبعة وعشرين ؟!
---اي يمه اي
_زين ليش ممزوجته لحد الان مو جبير وانتو ماشا الله خير من الله !
_ام سعد اتوسلت بيه وهياته ابوه يشهد عليه ابوس ايده ورجله يمه اتزوج خلي جهالك بحضني مايرضى شسوي حتى جبر جبرته عافني وهج ...
يمه انه اريدن ابني يرجعلي عيوني غدن دم عليه
خلصت الزيارة والمرة عيونها مانشفت ...
ليما رجعوا للبيت وفخرية تفكر يكون سعودي من يكبر هم هيجي يسوي بيها !!
---هههه يله خل هو يكبر ازوجه وعمره خمسطعش سنة اي لعد شلون هذا المدلل على تلاث بنات هههه...
بعدها فخرية ماسمعت خبر من كاطع على بيت ابو غازي طلع لا
بس جانت تكول ويه روحها لو طالع جانوا ذبحوله ذبيحة وعزموا الناس كلها
خلال الشهرين الي مضت جوري بت سهيلة الجبيرة ولدت ...
هواية اذاها الحمل وزوجها بعد اكثر!!
جان كلش نحس وعشرته صعبة وهي هم مطيقه ...
جانت يوم ا بيت رجلها واسبوع يم خالها وامها ...
بدلت فخرية من الصبح ولبست سعودي وميلاد احلى هدومهم وعافت رحاب يم عمتها
ووعهود اتوسلت بيها تاخذها ماقبلت هاي تفتن وماتبقى بحلكها حجاية كالت لعمتها رايحة تودي نذر لسيد محمد وترجع على السريع ...قبل ما يرجع كاطع ...
وصدك ركضت لبيت سهيلة اول شي اخذت امانة للكراج ومن الكراج راحتلهم تكسي
جانت جوري باقية يم امها اداريها
اول ماطبت هلهلت وهنت وسلمت على الكل
بس سهيلة وجهها ثكيل وبالكوة ردت السلام نرجس هم جانت موجودة
كامت فخرية شالت زوج تراجي ناعمات لبت جوري سموها رزان وزوج ثاني لنرجس مرة اخوها لبتها ...يعني تحاول تصالحها بيه ...
الله يعلم شلون لمت فلوسهن فلس فلس
وبقت شي ساعة ورجعت ...مارتاحت بكعدتها
وبالرجعة الطريق كله جانت تبجي ...ماقدروها وجان وجههم ثكيل عليها ...
ياربي اني شعلية ! قابل انه دفعت علاء يتزوج عليها شو كلها تدري الا انه...
رجعت على السريع وتكول بالجذب ماانطو مصقولة بيد ميلاد ...
يالله هم حقهم گلبهم محروك على بتهم
المهم انه سويت الواجب تامحد يعيب عليه ..
أنت تقرأ
نساء مخمليات للكاتبة ليان عيسى
Romanceانشر لكم الرواية الجديدة باسم نساء مخمليات وهي رواية تحكي عن مجموعة من النساء من خمسينات القرن الماضي والى وقتنا الحاضر تحكي عن واقع هذه الشخصيات عن احلامهن عن الحب وعن القسمة والنصيب عن مواجهتهن لاصعب المواقف والخروج من اشد الازمات .... عن ال...
