Ghost writer - អ្នកនិពន្ធខ្មោច

ភាគ២ បុរសចម្លែក

បើរម្លឹកថយក្រោយវិញលោកតាអក្ខរាគាត់បានបាត់បង់ប្រពន្ធ​ជាទីស្រលាញ់​តាំងពីគាត់អាយុជាងសាមសិបឆ្នាំមកម្ល៉េះ ដោយពេលនោះលោកយាយ​វតីមានកូនទីពីរ ​​ប៉ុន្តែចំពេលមានជំងឺជាប់ខ្លួនផងក៏ត្រូវអស់ជីវិតទាំងម្ដាយទាំងកូនមិន​អាច​​សង្គ្រោះ​បាននៅកំឡុងពេលសម្រាល។ ក្រោយមកទៀតឈានចូលដល់វ័យកាន់តែទ្រុឌទ្រោមលោកតាក៏ត្រលប់មករស់នៅទីនេះម្នាក់ឯងទោះកូនចៅអង្វរឱ្យទៅរស់នៅជាមួយក៏គាត់មិនព្រមដែរមូលហេតុគឺគាត់មិនចង់ចេញចោលផ្ទះនៃទឹកដីកំណើតរបស់ភរិយា​ជាទីស្រលាញ់របស់គាត់។ ផ្ទះនៅបាត់​ដំបងនេះជារឿយៗប៉ាម៉ាក់​ប្រាថ្នានិង​នាងមក​លេងតែពេលមានពិធីបុណ្យទៀនដូចជា ចូលឆ្នាំខ្មែរ បុណ្យភ្ជុំបិណ្ឌ ឬបុណ្យ​អ៊ុំទូក​តែ​ប៉ុណ្ណោះ ហើយជាក់ស្ដែងប្រាថ្នាខានមក​ទី​នេះដល់ទៅបីឆ្នាំ មួយឆ្នាំរវល់នឹង​កិច្ចការ​មុខ​ជំនួញខ្លាំងឯពីរឆ្នាំទៀតព្រោះរវល់រៀនបន្តនៅ​ក្រៅប្រទេសដល់គាប់ជួន​ត្រឡប់មក​ស្រុកខ្មែរ​វិញមិនដល់មួយឆ្នាំផងលោកតាក៏លាចាក​លោក​នេះតែម្ដង។

ប្រាថ្នាអង្គុយចុះលើកៅអីដែលមានតម្រៀបដាក់ក្នុងបន្ទប់សៀវភៅនេះទំនង​ជា​ទុកដើម្បីងាយអង្គុយអានសៀវភៅ ដ្បិតថាពេលនេះលែងមានវត្តមានលោកតាតែ​បន្ទប់នៅតែស្អាតគ្មានធូលីប្រហែលម៉ែចាន់ជាអ្នកនៅថែផ្ទះនេះចូលមកសម្អាតរៀងរាល់ថ្ងៃ។ ដៃស្រឡូនលូកទាញសៀភៅមួយក្បាលដែលនៅលើតុក្បែរកៅអី នាង​អង្គុយចុះ ម្រាមដៃតូចៗចាប់បើកទំព័រសៀវភៅស្រាលៗ ភ្លាមនោះនាងស្រាប់តែ​ប្រទះភ្នែក​នឹងរូប​​​ថតមួយ​សន្លឹក។

ក្នុងរូបមានកំលោះសង្ហាបីនាក់ឈរកៀកគ្នាយ៉ាង​ជិតស្និទ្ធិអ្នកខាងស្ដាំញញឹមស្រស់ដោយដោះអាវធំមកកាន់នៅនឹងដៃបង្ហាញត្រឹមអាវសដៃវែងពីក្នុងដែលមានអាវកាក់ពីក្រៅអមជាមួយបូណឺមេអំបៅពណ៌ខ្មៅ ឯខោវែង​ពណ៌ខ្មៅ​ដូច​​គ្នា​​​យ៉ាង​​​​សង្ហា។ រីឯកំលោះកណ្ដាលញញឹមបែបខិលដៃម្ខាងកាន់កែវ​ទំនងជាកែវស្រានិងដៃម្ខាងទៀតដាក់ចូលហោប៉ៅខោស្លៀកឈុតគ្រ័រហ្ស៊េមិនខុសពីកំលោះស្ដាំដៃដែរតែតាមរយៈរូបនេះ ប្រាថ្នាអាចសម្គាល់បានយ៉ាងច្បាស់ថាអ្នកកណ្ដាលនេះប្រាកដជាជីតានាងកាលពីនៅកំលោះមិនខុសទេ។ ក្រឡេកមកកំលោះ​ឆ្វេងដៃសម្បុរសជ្រះ​ជាងគេបន្តិចរូបរាងដូចកូនកាត់ ទឹកមុខមាំសង្ហាចង្កាព្រែក ច្រមុះ​ស្រួច អមនឹងវ៉ែនតា​ពាក់ជាប់ផង ប៉ុន្តែគេ​ងាកក្រសែភ្នែកទៅទិសណាផ្សេងមិនមើល​មកកាមេរ៉ាឡើយ។ ក្នុងរូបកំលោះទាំងបីនេះទំនងសុទ្ធតែលាបកាយ៉ង់ទីន(ប្រ៊ីយ៉ងទីន) ហើយព្រោះ​សក់វែកភ្លីឡើងរលើបសង្ហាមិនចាញ់គ្នាទេសមនឹងកម្ពស់ក៏ខ្ពស់ប្រហាក់ប្រហែលគ្នាទៀតនោះ បុរស​ទាំងបីពិតជានិយមន័យនៃភាពស្រស់សង្ហាយ៉ាងពិតប្រាកដ។ នាង​ត្រលប់រូបមកខាង​ក្រោយ នៅក្រោយរូបថតមានឈ្មោះនៃកំលោះទាំងបី ៖