قالت ليهو ..مدثر انا حاسة بي نفسي استعجلت في قراري ده .. والمفروض ندي نفسنا مساحة اكتر .. عشان اتعرف عليك وتتعرف علي .. فعشان كدا ارجوك .. انا ماعايزاك تعمل اي خطوة في الوكت الراهن ..
قال ليها ده كلام شنو يارفيدة؟ .. هسي انتي كل يوم بتقول لي انا مشتاقة ليك.. ومستعجلة انو موضوعنا يخلص بي سرعة .. ولمن قلت ليك ابوي مستعجل فرحتي فرحة شديدة ..
لالالا .. لازم في حاجة غيرت رايك .. انا غلطت عليك بي حاجة؟ احتمال اكون قلت كلمة او اتصرفت تصرف ما منتبه ليهو ..
رفيدة قالت ليهو ابدا والله مافي حاجة من البتقول فيهو ده .. بس ماعارفة .. خايفة اكون اتسرعت في الموضوع .. المهم بس انت اديني فرصة اعيد التفكير . وان شاء الله لو في قسمة ربنا يتمها ..
قال ليها طيب يارفيدة .. انتي في زول غير رايك .. يعني اتعرفتي على زول في يوم الليلة ده ..؟
قالت ليهو ابدا والله ربنا يعمي عيوني .. غيرك تاني ماشفت ..
قال ليها خير اخدي راحتك .. وفكري واخدي وقتك وانا منتظرك وخليك عارفة اني انا بقيت راهن حياتي وسعادتي بوجودك فيها .. قالت ليهو جدا مافي مشكلة ربنا يسوي الفيها خير .. بس ما اظن الموضوع يظبط معاي ..
والله بس في حاجات كدا انت ماعارفها ..انا واقفة لي في طريقي .
قال ليها خير يازولة .. البسويهو الله انا راضي بيهو .
وانتهت المكالمه والليلة ديك مدثر كان في اكتر حالات التوتر والضيق ولو كان يعلم الغيب المفروض يحتفل .. اها رفيدة اتصلت طوالي على لبنى الشفاتية وقالت ليها لبنى انا عايزاك ضروري وكلامي ماينفع في التلفون ..
قالت ليها خلاص بكرة تعالي غاشياني وانتي راجعة من الشغل .. قالت ليها جدا كويس انتظريني ماتطلعي ..
وفعلا باكر جات غاشياها من الشغل ..ولبنى شافت رفيدة مقلقة ومتوترة وماكويسة كلو كلو ..
قالت ليها مالك يابت في شنو؟
قالت ليها والله يالبنى انا شايفة نفسي بغلط في غلط العمر .. والله يا لبنى انا اتعرفت بي مدثر عن قرب.. والله ده راجل زيو مالاقني..
والله يالبني عقيل مابجي في نعال دكتور مدثر .. والله انا شايفة نفسي بضيع في اجمل هدية ربنا ساقها لي في مكاني ..
لبنى قعدت تعاين ليها .. مستغربة .. قالت ليها ده اليوم الانا كنت عاملة حسابو ..
يعني هسي التعب والجرجرة دي كلها الانا تعبتها معاك ما القى فيها غير تلاتة مليون.؟؟. وانتي تعرسي الدكتور وانا اقعد خشمي ملح ملح ؟ .. طيب على الاقل قرارك ده خليهو شهر شهرين ..
لغاية ما يسلمنا العشرة التانية وبعد كدا عرسيهو بي راحتك ..
قالت ليها لالا .. مابقدر اشيل منو قروش تاني .. خلاص لحدي هنا كفاية .. لازم انا امشي انهي موضوعي مع عقيل.. اول حاجة باي طريقة كانت .. وبعدين ممكن ابدا مع مدثر في علاقة جادة .. ولو الله ما كتب لي معاهو قسمة.. بفضل احترمو كافضل رجل لاقاني في حياتي ..
قالت ماحتقدري .. لازم تنفذي البقول ليك عليهو بالحرف .. ولا على كيفك .. غصبا" عنك .. انتي هبلة ولاشنو؟ .. انتي ناسية انو تلفوني بسجل المكالمات تسجيل تلقائي ؟
ومكالماتك معاي مسجلة بالدقة العالية .كلها .. وانا مستعدة انشرها في صفحتي في الفيسبوك .. واعمل اشارة لي صفحتك وصفحة محمود وصفحة رحاب ومدثر ..
ولي صفحة عقيل كمان .... انتي هبلة ولاشنو قايلاني حأسكت ليك ؟
اساسا" انتي من البداية مدخلاني في الموضوع ليه..خليتيني اعيش على امل ..
نحن ياكافي البلا لانلقى عرس لانلقى قروش ..
قالت ليها حرام عليك يا لبنى ..دي انا صاحبتك الوحيدة تعملي فيني كدا ..
قالت ليها صحبة اية يا حلوة انتي ؟ ..الزمن ده الخوة ذاتها بقت قروش ودولارات ..
طبعا رفيدة دي خافت لغاية ما حست بي مصارينها ماصنها .. وكرعيها مشن موية ..
قالت ليها طيب طيب يالبنى انا ممكن اديك القروش المعاي كلها . اصلا فضل فيها .خمسة مليون ..لكن خلاص نقيف من الموضوع ده لحدي هنا عشان خاطري ..
لبنى قالت ليها اتفقنا .. بكرة جيبي لي الخمسة .. وتاني نشوف الفي الكتاب .. الخمسة ماكتيرة على .. مادام انتي حتربحي الجولة كاملة وتعرسي الدكتور ..
وهنا رفيدة عرفت انو وقعت في شر اعمالها ..وقعة شديدة .. وبقت خسرانة من كل الجوانب .. ولازم تواصل في
(السف) عشان تدي لبنى وتصم ليها خشمها ..
لانو لو وقفت السف ..لبنى ممكن تبوظ عليها اي حاجة .. ولو وزعت المكالمات المسجلة .. كان في الفيس كان في الواتساب .. معناها رفيدة حتخسر مدثر .. وحتخسر عقيل . وحتخسر شغلها .. وتخسر احترامها في المجتمع ..
لكت رفيدة فكرت في حاجة تضرب بيها لبنى ضربة معلم . ماعارف .. لمن وصلت البيت ضربت ليها تاني ..
قالت ليها الو يالبنى .. عايني انا فكرت في كلامك كويس .. ولقيت مصلحتي في اني اواصل الشفط في الدكتور .. ومعاك لي اخر المدى يا فردة ..
لبنى قالت ليها ايواااا انتي كدا فهمتي يا حيوانة ..
مدثر طبعا" في اسوء احواله ومحطم وعامل فيها داخل مأساة وبتاع .. وكل مرة يقطع .ورقة من الدفتر ويكتب شعر .. وتاني يشرط الورقة وياكلا..ومن ما كتب
يارفيدة الزوقها عالي ..
عندي ليك يالغالية ريده .
تملأ كل الكون تدفق.
كم سهرت ايام عديدة ..
ليلي مازي ليك رفاقتي.
الشجون قاسية وعنيدة.
والدموع بالشوق تدفق.
روحي بيك مشحون وريده.
كيف يهون لك تبقي جافية.
وتنسي ريدتنا الفريده ..
وتنسى كيف قلبك عشقني.
وكيف وعودك كان اكيده..
المهم في الامر ظاهر على مدثر انو حس بي نفس العملية العملا في نوسة قبل كدا ..
بالنسبة لي دكتورة غادة .. في المستشفى لاحظت انو مدثر ما على بعضو .. طبعا هي في الفترة دي كانت بتقصد تتباعد منو .. من الموقف الحصل منو اول يوم .. مع انو لاقاها مرة وسلم عليها عادي .. لكن هي سلمت عليهو بي غيظ شديد ..
اها وكت الليلة شافتو كدا ماياهو .. قالت ليهو مدثر هل لي الحق اسألك انت مالك بالضبط؟
انت لو متضايق من تعاملي معاك.. دي كانت رة فعل عادية من تصرفاتك معاي ..
قال ليها غادة انتي بتتكلمي عن شنو؟ تعاملك مالو؟ وتصرفي ياتو؟ .. انتي مافاهمة اي حاجة والله .. اول حاجة انا شايف تعاملك عادي معاي وطيب جدا ..
ماتوسوسي ساي .. ولو انا اتصرفت معاك اي تصرف لايليق بي مقامك .. بكون من غفلتي وانشغالي.. واصلو اللوم بجي بالغفلات.. انتي والله مابتستحقي الا كل خير ربنا يكرمك ..
قالت ليهو طيب هل لي الحق اسألك انتي مالك متضايق من امس؟ شايفاك ماطبيعي ..
قال ليها والله مشكلة خاصة كدا ..غير قابلة للاعلان .. بس دعواتك ..
قالت ليهو ايوااا .. خلاص كدا عرفت انو مالي الحق اتدخل في خصوصياتك .. ولايهمك يادكتور ..
هو طبعا" بقى يعاين ليها مستغرب من كلامها ..
وسبحان الله مدثر راحت من راسو حكاية انو يوم قال للدكاترة كلامو العوير داك .عن ارتباطو بي غاده .. يومو الكان منفعل .. ولا خاتي في راسو انو الكلام يكون وصلا واحيا جواها امال قدر الجبال ..
غادة طبعا" اتغاظت شديد من جواها .. وبقت تتسأءل الف سؤال..
وهو حس بانه محرج شديد من نفسو .. لانو ماقادر يوريها الحاصل عليهو شنو ..
ومشت غاده من جنبو .بعد اخدت ليها كم خطوة منو. جاتو راجعة..
قالت ليهو انا مبسوطة شديد يادكتور .. وفرحانة ..
قال ليها ربنا يديم البسط . فرحينا معاك ..
قالت ليهو لمن انا كنت في مدني .. انت نصرتني بي وراي .وريت الناس انو بيني وبينك في علاقة جادة .. انا طبعا" بقدر مافرحت بي الكلام ده .. بقدر ماحزنت بي مقابلتك لي .. وتهميشك لي ..
فانا هسي عايزاك تحدد لي بالضبط انا شنو في حياتك ..وهل كنت بتكذب في كلامك القلتو للناس داك .. ولا الناس كذبو علي ..
بالجد انا ماقادرة استوعب الحاصل .. وريني بالضبط الحاصل شنو؟ ..
طبعا مدثر اتخلع من الكلام خلعة شديدة خلاص.. لانو زي ماقلت ليكم ما مكان متذكر .وماعارف الكلام وصل ليها ..
قال ليها لا اله الا الله ..الناس ديل اصلو ما بتنبل الفولة في خشومهم ده القالو ليك منو؟ ..
انا والله طبعا بصراحة الكلام ده انا قلتو في لحظة زعل .. لكن ده مابيعني اني انا ماعايزك ..نحن موش كان بينا كلام .. وقلنا ننتظر ؟
قالت ليهو انا كنت منتظرة وساكتة..بس انت براك مشيت تتكلم وخليت الناس يجو يباركو لي ..
قال ليها هههههه هي وصلت درجة المباركة؟ والله دي قصة دي ..
طبعا" ياجماعة .انا يتخيلي مدثر ده عندو هدف .. ماقدرت افهمو .. شكلو كدا داير يخت غادة بدل فاقد .. ويكون مثبتن الاتنين .. البتجلي فيهن تقبض معاهو التانية .. ولو ده فهمو تبقى مصيبة ..
لكن غادة استاءت منو جدا" من الموقف ده .. قالت ليهو انا عشان اريحك وما تتحسس من علاقتي بيك.. وعشان تاخد راحتك في حياتك.. بدون مايكون في زول منتظرك .. انا صرفت النظر يا دكتور .. ربنا يبارك لك في حياتك.. ويبارك لي في حياتي .. واي زول ربنا كريم عليهو.. يديهو قدر نيتو .. والقسمة بيد رب العالمين .
بس ياريت تفهم الناس ديل كلهم انو البيني وبينك انتهى ..
وكبت ليها دمعتين حاراااات واتحركت ..
الى اللقاء ..
ESTÀS LLEGINT
مزاد السعادة .. طارق اللبيب
Ficcióالواطه صباح قدام مستشفى بحري التعليمي . والناس داخلة ومارقة . وفي الشارع هناك يادوب ستات الشاي يرمن في اللقيمات . وناس الاكل غير الصحي بالقرب من المؤسسات الصحية .وناس ماشة وناس جاية ..بس لسه الوكت بدري . وجوة المستشفى بدن الفرّاشات في حركة الصباح بت...
