مزاد السعادة .. طارق اللبيب

الحلقة العاشرة

مدثر قال ليهو ،، اها بتعرفها يامزمل؟؟
قال ليهو ياخي كيف مابعرفها ؟ والله دي ،، بس نار الله الموقدة .. اتاريك يادكتور ماك هين .. انت عارف ،، انا اي سفرية بمشي اقدم بواسطة ناس محمود ،، عشان اشوفها مرة واحدة .. لكن بعد كدا خلاص ،، مادام ح تبقى مراة اخوي .. ربنا يتم ليك على خير .. والله زولة ظريفة وخدومة وكريمة شديد ..
قال ليهو طيب كويس ،، دام انت ذاتك بتعرفها .. انا غايتو الحمد لله كل يوم بطمئن ليها .. اول حاجة معرفة محمود اللصيقة بيها .. تانيا رحاب اختي ،، عرفتها عن قرب ،، وشافت بيتهم واتعرفت على اسرتها وحبتها جدا ،، وهسي بقو اصحاب .. وانت كمان اثنيت على الموضوع ،، والله معناها الموضوع ماشي في توفيق الهي ..
اها يا مزمل الموضوع المهم جدا ،، انا ياخي محتاج لي قروش عاجلة ..
مزمل قال ليهو اها جينا للعرس وصرف القروش؟؟ .. قبل يومين موش استلمت عشرة مليون .. قال ليهو والله هسي قرش مافيها ..
طيب انت موش ابوي كلفك بي مصروف لي انا ؟ اديني مصروف الشهر الجاي .. هو ابوي قال ليك كم .. ؟؟
مزمل قال ليهو ياها العشرة ،، مكفياك ،، عشان نقدر نجهز ليك ..
قال ليهو هسي والله برضو محتاج لي عشرة ،، أشوف لو بتجهز البت للمقابلة . بتكون دايرة تجهز روحها بي حاجات بسيطة ..
هسي بس اديني عشرة ،، وبعدين بتصل عليك اشوف الحاصل .. دايرين نتلمة يامزمل ،، خلاص زهجنا من العزوبية دي ..
مزمل طلع الدفتر وكتب ليهو العشرة .. باكر مدثر شال الشيك في جيبو ،، ومشى صرفو وختا القريشات في شنطتو ومشى المستشفى ..
اليوم ده غادة كان جات من مدني ،، وطبعا" الدنيا بي وراها كلها مقلوبة ،، وهي ماجايبة خبر .. ومالاقت مدثر شافتو جاي من على عنبر العظام ،، واتضارت بقت تعاين ليهو من بعيد .. غايتو جنس شي ..!!
طبعا متذكرين ريان بت الحلفاية .. لاقت غادة .. كانت منتظراها بي فرق الصبر .. قالت ليها مبروك ياغادة ،، والله عجبني ليك ..
قالت ليها في شنو ياريان .. قالت ليها ما تعملي لي فيها مافاهمة ،، مبروك العلاقة الجادة البينك وبين دكتور مدثر ..
قالت ليها بس والله لسه ،، مافي حاجة واضحة يا ريان .. والمشكلة الكبيرة ياريان .. انا محمد يوسف بقا لي عارض ،، هسي مدثر مفتكر انو لو اتقدم لي ، بكون خان صاحبو .. واناقلت ليهو يامدثر ، اصلا ماكان بيني وبين محمد حاجة ، بس هو مامصدق ..
ريان قالت ليها ، وين انتي يا المسكينة ، ماعارفة الحصل بي وراك؟؟
انا كنت قايلة مدثر كلمك .. قالت ليها مدثر مابيني وبينو اي اتصال ..
قالت ليهو مدثر ياغادة اتكلم قدام كل الدكاترة ..وقال ليهم انا عايز غادة ومتفقين انا وهي .. والماعجبو يقع البحر ..
قالت ليها عليك الله ياريان صحي .. عليك الله ماتغشي علي ..
انا ماناقصة حريق اعصاب ..
ريان قالت ليها اقسم بالله العظيم .. وصحبتك نوسة عاملة خلطة سويسرية مع محمد اظنها ردة فعل ليس الا..
انتي موسرتي محمد . ومدثر موسر نوسة ، هههه غايتو انتو .. ده شنو الدقش ده ياملائكة الرحمة ؟..
ريان زولة نكتة خلاص ، وظريفة شديد ، رقيقونة كدا .. وبتلبس نظارات ، وعاملة تقويم في اسنانها .. زولة حربية خلاص ..
ومدثر طبعا" ماعارف غادة جات .. لغاية العصر ..
وطول اليوم بتصل على رفيدة.. وتلفونها مقفول ، لامن الزول ده قلق عديل ....
اها في موقف حصل لفت انتباهنا برضو ..
العصرية كدا في المستشفى ، مدثر لاحظ انو في كمية ناس جايين لزيارة واحد .. كمية كبيرة شديد من الناس .. عدد مهول .. جلاليب وعمم وسداري .. وناس شايلين عصي .. وغايتو امة لا اله الا الله ..
مدثر فات قال انا لازم اخش ، اشوف الناس ديل جايين زيارة لي منو.؟
لقاهم جايين لي عمك كبير عندو ضمور في الكلية .. ومعاهو بتو وولدو ومرتو .. سلم عليهم .. والظاهر عليهم حالتهم المادية سيئة شديد ..
والولد لافي العنابر زي المجنون ، ماعارف يعمل شنو.. مع كية الناس ديل ..
مدثر بقى متابع للمسرحية الغريبة دي ..
نادى الولد ..قال ليهو الناس ديل منو؟؟
قال ليهو ديل اهلنا وقرايبنا .. ناس جايين من البلد ..وناس ساكنين هنا .. جو يشوفو ابوي . عندو فشل .
قال ليهو وهسي انت بتتحاوم كدي مالك ؟
قال ليهو والله ماعارف اعمل شنو؟ .. حق الحلاوة البقدما ليهم ماعندي .
وما اكرمتهم باي حاجة .. وديل ناس شيالين حال .. وانا العلاجات خلتني على الحديدة .. والله ديون يادكتور ، تستغرب فيها .. وماخليت زول ما اتدينت منو..
قال ليهو دقيقة ، انا والله الليلة اصلو مابخليهم ناسك ديل ..
مشىعليهم طبعا متلملمين متبطحين في النجيلة ، واحدين جمب الكفتريا ، واحدين في البرندات .. المهم شاف اكبر كوم منهم ، وجاهم ..
قال ليهم السلام عليكم يا جماعة .. قالو ليهو عليكم السلام ، يادكتور .. اها يادكتور بشرنا .. بلولة ماشي كيف؟
قال ليهم بلولة كويس الحمد لله ، لكن انا جيتكم في موضوع .. وشورى ، داير اسمع رايكم فيها ..
اول حاجة انا بسأل هسع الناس ديل كلهم.. الجايين زيارة لي بلولة ديل .. بلولة الراجل المسكين ده .. الماقادر يوفر حق العلاج .. الناس ديل اكان قعدو في بيوتهم ..ورسلو رصيد في تلفون الزين ود بلولة .. ما كان احسن؟؟
.. انتو ما عارفين البلولة راجل محتاج؟ . والعلاجات غالية . اي حاجة في العلاجات بقت بالشي الفلاني .. هسع الزين ده يعالج ابوهو.. ولا يكرم الزوار الكتار ديل؟ ..
انا بقول .. انتو لمن ترجعو البلد ، اعملو اجتماع .. واتفقوعلى انو اي زول يرقد مستشفى .. بدل ماتتكبدو مشاق السفر . وتوقفو مشاغلكم ..وتصرفو قروش كتيرة ..ماشين وجايين .. رسلو قروش لي اهل المريض . والله بحس بيها افيد من تجي تشوفو .. والله ممكن تنقذو من الموت .. لكن جيتكم ليهو لابتشتريلو الدوا ولا بتعمل ليهو الفحوصات ..
اها دي شورتي رايكم فيها شنو ؟
في واحد قال ليهو والله يادكتور كلامك سمح ، علا كان ماجينا ، البلولة قومتو من المرض بلومنا ..
قال ليهم لمن تكونو متفين كلكم على الحكاية دي ..زول بلوم زول مافي .. كدي انتو اتشاورو في فكرتي دي.. ووصلوها ناس البلد .. والبتتفقو عليهو يبقى خير .. ودعتكم الله ..
ومشى خلاهم يورجغـو .. واحدين يقولو ده ولد خرطومي وهمان ساي .. واحدين يقولو والله كلامو صاح وعين الحقيقة .. هسع الخسرناهو في السفرية دي ، كان جمعناهو ورسلناهو للزين ماكان اخير؟؟ ..

مدثر من هناك مشى طوالي على الولد الاسمــو الزين ده ، وقطع فيهو خمشة امات خمسين ..من القروش الماشه على السف دي ..
وربك رب الخير ، خلا تلفون رفيدة مقفول طول اليوم .. والا كان البلولة ما بشوف منها قرش ..
بالنسبة لي غادة ، اليوم ده كلو كانت بترجف .. ومنهارة من كلام ريان حق الصباح .. وماعارفة الحقيقة شنو ، وماقادرة تٍسأل زول ..
في النهاية غلبها الصبر .. مشت وقفت في طريق مدثر ، عشان يجي يشوفها ويسلم عليها ، ومن خلال مقابلتو بتستشف ، اذا كلام ريان حقيقة ولاكذب ..
وفعلا جا ماشي بي نفس الممر اللهي واقفة فيو .. هو ماشي كدا عاين لي غادة واقفة هناك ، جا ماشي عليها .. ويتبسم .. وهي فرحت شديد ، وحست في لحظة انو كل امنيات القلب اتحققت ..
فجأة كدا مدثر تلفونو ضرب قبل مايصل لي غادة .. وعاين للشاشة لقاها .. مكتوب فيها (رفيدة تتصل بك) ..
طوالي فتح الخط ، وغير خط سيرو .. وطلع لابره على الحوش ..
والله غادة دي اصيبت بخيبة امل .. زي الراجل الكان مابيلد وفي اول حمل لي مرتو ..قالو ليهو مراتك اجهضت .. وقالت في سرها .. والله فعلا" ده انسان بارد وقلبو حجر ..
مدثر رد علي رفيدة بت السلمة .. وين يابت؟؟ ، انا من الصباح بضرب ليك ، تلفونك مقفول ، والله قلقلتي بي .. وبقيت ماعارف اتصرف كيف ..
انتي ماعارفة انا مابعرف اتنفس بدون وجودك ..
قالت ليهو معليش حبيبي ، طلعنا عزا ، ونسيت تلفوني في الدولاب مقفول ..قال ليها ولايهمك ، انتي كويسة يعني؟؟
قالت ليهو الحمد لله تمام التمام بس فاقداك شديد ..
قال ليها والعجيب انا ماقادر اعمل اي حاجة .. طيب خلاص انا برجع ليك اوكي؟
جاء راجع عشان يسلم على غادة لقاها فاتت .. فتش ليها سما وارض مالقاها ..
بقى يسوي ..يالطيف ، هسي دكتورة غادة تكون اتحسست ، تقول اهملني عشان تلفون . وهي ماعارفة التلفون ده انا منتظرو من الصباح ..
وغادة فعلا قلبها اتحرق حريق من تصرف مدثر الغريب ده .؟
وبقت تقول ..طيب كيف ريان تقول لي قال وقال ..
انا لازم اتأكد من زول تاني غير ريان .. ريان دي ياربي قصدها شنو ؟
والله البنات ديل بقن اصلو مامفهومات ..
في النهاية قررت انها تتعامل مع الموضوع عادي .. زي المافي حاجة .. طلعت قبل المغرب بشوية مشت البيت ..
ومدثر اليوم داك كان بايت في المستشفى .. في الفترة دي الدكاترة بدو يتكلمو معاهو حبة حبة .. بعد ماكانو بعاينو ليهو كدا بالجنبة ..
وريان الاصيلة هي العمرت .. الخراب الخربتو نوسة .. ونوسة بقت شخصية مهمشة .. واي زول بخاف منها ومن سواطتها ..
الزول الوحيد الاستعصى ورفض يسمع لي ريان اي كلام عن مدثر هو محمد يوسف ..
وطالع نازل مع نوسة .. كان دايرين يراجعو فائل مريض ساي ساي يراجعوهو سوا ..
في نفس اليوم ده بالليل مدثر اتصل على رفيدة .. وقال ليها ..
اها الخبر شنو ؟ والاحتياجات المطلوبة ..
قالت ليهو خلاص بس انت وريني يوم تكون اوف .. نجي نمشي السوق مع بعض نشتري الاحتياجات اللازمة ..
قال ليها والله المشكلة انا اليومين ديل مدروش درشة عجيبة ، وعندي الف وستمية شغلانية ..
انتي شوفي رحاب ، او اي زول يمشي معاك السوق ، انا بديكم القروش البتكفيكم .. اشتري بي راحتك ومزاجك وعلى ذوقك .. وبالنسبة لي انا ، اي شي تلبسيهو بشوفو فوقك لايق ..
سكتت مساااااافة .. وحست بي حاجة في قلبها .. كدا ماطبيعية .. من حنية الزول ده ، وكرمو ، واخلاقو ، وطعم كلامو .. عمرو عقيل الجوكي ماسمعها ليهو .. قالت ليهو .. مدثر؟؟
انا عايزة اقول ليك كلام ، وماعارفة اقولو ليك كيف ، وماعارفة ردة فعلك حتكون شنو؟
.. قال ليها قولي ساي يا رفيدة ، اي كلام منك انتي بكون على قلبي بردا وسلام..
نشووووووووووف ..
الى اللقاء ..