مزاد السعادة .. طارق اللبيب

الحلقة الأخيرة

لو اي انسان فكر بي العقل والمنطق .. ما كان اعتدى على حقوق الاخرين .. لاننا مأمورين بتحري الحلال .. فان الحرام سحت سحيق .. يمحق البركة .. ويصيب باللعنة .. بالاضافة للفضيحة يوم القيامة .
والخسارة العظيمة . والحمل التقيل بين يدي الله ..
ومرة قال اللبيب..
حق الناس ملاعن وللعمــر محـّاق.
بحوطك بالبلا ويصـل الحفـيد لحـّاق.
أكان كسبك قليل فوق التعب ماحـاق.
حذاراك من تسلفق فالحـرام سحّاق.
..
الشاطر الفهيم والجاهل المغشــوم..
مسطّر ما يصيبهم في كتاب معـلوم .
مادام الله أجواد والرزق مقســوم..
مجازفة الحــــرامات مافي ليها لزوم..
..
المهم في الامر مدثر ما انضر بي القروش الضاعت منو..
بالعكس احتسبها ورفع امره لله .. بقت تجيهو شهرية من حلالو وحق ابوهو ..
. والنية الطيبة والعمل الصالح صرفه من الانسانة المبتليه . والاسرة المنهارة . ربنا يحسن نوايانا ..
في كم يوم كدا ومدثر كلم ابوهو واخوانه ومشو يطلبو غادة من اهلها بعد الاتفاق والمواعيد وكل شي ..
ابوها عميد طيار معروف مافي داعي نجيب اسمو .. رجل على دين واخلاق وشو منور .. وعلامة الصلاة فوق وشو .. واستقبل الناس ديل استقبال يعجز القلم من تسطيره .. والاسرتين فرحو بي بعض فرح عجيب .. ابو غادة قال ليهم والله ياجماعة انا كنت خايف من زواج بتي .. والنسب ماحاجة ساهلة . لكن بعد شفتكم وعرفتكم . والله ماقادر اركز من الفرحة .. ربنا يديم المعروف بينا .
عمك عباس قال ليهو والله انا برضو طول عمري بقول دكتورمدثر ولدي زول مسكين . وبرئ . وخايفو يقوم يناسب ليهو ناس كدا ولاكدا . لكن والله هسع . اختاركم اختيار بعناية.. زي ما انا اخترت اخوالو .. ونسابتي .. والله فرحنا بيكم فرح ماتتخيلو ..
وناس مدثر وغادة بدو يجهزو في زواجهم خلاص ويشترو في المستلزمات .. وكلها ايام قلايل وتم والحمد لله المراد . واتزوجو احسن واسعد وابرك زواج .. وسكن في المغتربين في بحري . في وسط حي المغتربين .
الحب الاتكون بين غادة ومدثر بعد الزواج ..
كبر واتضاعف وكان اقوى.. واطهر واعظم
تناسب عجيب . واحساس عالي . ونفسيات في السماء ..
وطبعا" ياجماعة الاختيار اصلا اختيار رب العالمين ..
مافي زول بختار شريك حياتو ..الحقيقة انو انت بتختار .. وربنا بختار .. والبحصل هو اختيار ربنا . نسأل الله يختار لنا الخير .. عشان كدا نحن مأموؤين بالاستخارة ..
لانو لو كان العبد بعلم الغيب ..
ماكان اصلا مدثر فكر في رفيدة بت الوكالة ..
ورفيدة اليومين ديل بتعيش اسوأ مرحلة من حياتها .. وقاعدة في البيت .. محمود كلم رحاب قال ليها .. بتتذكري البت الكانت شغالة معاي الاسمها رفيدة.
قالت ليهو طبعا" دي بقدر انساها؟
قال ليها والله ليها اكتر من اربعة شهور عيانة وعايشة حياة صعبة خلاص .. والله لو شفتيها ماتعرفيها .قبل كم يوم مشيت ليهم في البيت .
امها اتصلت علي . قالت لي محتاجين لعلاجات .. لغاية ما ترجع رفيدة للشغل ..
انا حسيت انو فعلا في مشكلة في البت . لانو الديون كترت ..
مشيت ليهم في البيت لقيتها بقت هزيلة .. وتعبانة ماقادرة تتحرك .
وقاعدة في بيت ناس امها ..
وعندها حساسية في جسمها لدرجة مبالغ فيها .. جبهتها فوق كدا شايلة قشور قشور ..
انا والله دايرك تمشي ليها الزولة دي صاحبتك .. ماصح نحن نتخلا عنها في الظروف دي ..
يازول المهم رحاب رحبت بالفكرة ومشت لي رفيدة في البيت ..
اول ما رحاب شافتها دي انقدت بالبكا .. ومالك رفيدة.؟
كر علي الحصل ليك شنو؟ ده شنو ده وجاك متين ده .. والله العظيم دي العين الماصلت علي النبي .
رفيدة قالت ليها والله يا رحاب تعبت وقربت اجن . ماخليت علاج .
ماخليت دكتور . وناس الاعشاب .
قالت ليها كان تمشي لي شيخ تشوفي الحاصل عليك ده شنو؟
قالت ليها مشينا قالو مافي اي حاجة . والدكاترة برضهم ماعرفو ده شنو؟ دي بس امتحان من ربنا الحمد لله غايتو ..
وعقيل زوجي ليهو شهر ونص ماعارفة عنه خبر وتلفونو مقفول . واهلو في البلد ذاتهم ماعارفين عنو حاجة .
وكيف دكتور مدثر ؟
قالت ليها الحمد لله دكتور مدثر كويس طبعا" اتزوج دكتورة معاهو وهسي ساكنين في المغتربين في بحري .
رفيدة قالت ليها نفس تلفونو القديم ؟
انا عايزة اتصل عليهو ابارك ليهو .. قالت ليها ايوة نفس تلفونو القديم . اتصلي عليهو بالنهار .. مرتو اسمها غادة غيورة اعملي حسابك. ههه
قالت ليها تغير عليهو من شنو ؟ كان شافتني بقتنع .. وبدل ماتغير مني .. بتقرف مني ..
رحاب كملت ونستها وزيارتها واتصلت على محمود جاها ورجعت .
وكانت طول الطريق بتبكي على رفيدة الكانت متل قطعة القشطة
بقى جسمها زي جسم التمساح . وتعبانة ومهلوكة . وظاهر انها ما كويسة كلو كلو ..
ورحاب كلمت دكتور مدثر بي مرض رفيدة .. بس قال ليها ربنا يشفيها . وما اهتم بالموضوع كتير .. ولا ركز فيهو ..
بالاختصار رفيدة بقت كل يوم ماشة في السالب والتدهور .. وحست بي انو دي النهاية .. وانها ح تموت .. بس ربنا من فضلو ورحمتو هداها لي حاجة .. وربنا دايما كريم ورحيم بي عباده ..
وامكن المرض ده كان لي خير ليها ..
يوم الصباح شالت التلفون ..واتصلت على مدثر .. وطبعا من ايام العرس كسرت شريحتها القديمة .. المليانة بي الصداقات الما نافعة ديك .. كسرتها خوف من عقيل .. وعشان تفتح صفحة جديدة في حياتها ..
بس ربنا ما اراد ليها سعادة .لانو في حياتها في مظلوم .. وحق المظلوم مابضيع ..
اها لمن الرقم الغريب جا لي مدثر . فتح الخط وقال الو ..
قالت ليهو السلام عليكم دكتور مدثر..
سكت مسافة .. وعرف صوت رفيدة طوالي .. قال ليها عليكم السلام والرحمة ..
قالت ليهو مبروك يادكتور .. ان شاء الله ربنا يسعدك ..
قال ليها الله يبارك فيك .. مرحب بيك .. كيف انتو ؟؟ وكيف ناس البيت .. وكيف عقيل؟ ..
قالت ليهو كويسين الحمد لله ..
مدثر طبعا" انا عارفاك متضايق مني.. ونفسك تقفل الخط في وشي .. لكن اخلاقك مابتسمح ليك تحسسني بي كدا .. انا عارفاك كويس ..
بس انا عندي منك طلب واحد ..
قال ليها اتفضلي .
..
قالت ليهو انا قبل كدا طلبت منك قروش ..وقلت ليك ابوي مطالب .
ومديون .. انا يامدثر دي ماكانت الحقيقة ..
الحقيقة انو ابوي ماعندو اي ديون .. بس ده اتفاق جهل بيني وبين لبنى .. وانا هسي اتصلت عليك .. اكلمك بالموضوع ده ..
لاني عيانة شديد .. وماعارفة احتمال ده الموت ..
وبوعدك لو ربنا مد في عمري .. بسددها ليك على داير المليم . ولو انا مت في الايام دي.. تعفي لي يامدثر .. عشان العشرة الكانت بينا ..
قال ليها ولايهمك يا رفيدة .. انا عافي ليك.. واعتبريها هدية مني ..ومساهمة في زواجك .. وعمارة بيتك .. وان شاء الله ربنا يشفيك .
معليش يارفيدة.. انا مضطر اقفل الخط .. لاني انا في المستشفى وبندهو علي .. الظاهر في مريض تعبان .. مع السلامة ..
وتيت تيت تيت .. قفل الخط ودي كانت اخر مكالمة مع رفيدة ..
فعلا مدثر كان منزعج ومشغول .. وهو ماعارف انو بالمكالمة .. كانه اجري عملية جراحية ناجحة ..
رفيدة بعد قفلت الخط .. فرحت فرح كبير .. وكانو كان في جبل فوق راسها وانزاح ..
اليوم ده ذاتو كانت عندها خالتها جاية من العمرة .. قالت ليها ياخالتي ماجبتي معاك موية زمزم؟ امكن ربنا يكتب لي فيها الشفاء.
قالت ليها والله جبتها .. بعدين برسلا ليك ..
وسبحان الله ..كانت موية زمزم المجانية هي مفتاح الفرج لي رفيدة .. بالرغم انو اغلى العلاجات لادخلت لامرقت ..
ولانها اتحللت من الظلم .. لو ماعفى ليها الدكتور العظيم .. حبيب قلوبنا .. كان الحرام اهلكها ..
رفيدة مع زمزم بدت تحس بي راحة في جسمها .. والكاروشة وقفت . بعد يومين فقط من الكلام ده عقيل جاء..
قال كان في الغرب ومشى لانو استحى من الفلس . ومشى يشوف ليهو رزق ..
واخيرا ربنا فتح ليهو باب تجارة ..
وقال ليها ابشرك يارفيدة . انا تبت من المصايب ديك . وبقيت صلواتي الخمس مابفرط فيها .. وحأقيف معاك لامن تبقى كويسة .. وكل يوم رفيدة ماشة احسن من القبلو .. وربنا من عليها .بالشفاء .
رفيدة بس شغالة تدعي لي دكتور مدثر بالعافية ..
وتدعي على لبنى بالشر ..
وماعارفة انو لبنى المسكينة برضو باعت سعادتها . وصحتها في نفس المزاد العلني للسعادة . والان ليها شهرين بتغسل في مركز الكلى في بحري .
ربنا يشفيها . ويهديها ..
نسأل الله العافية من الحرام .. اللهم لاتبتلينا .. اللهم اعصمنا من حق الناس .. وابعدنا من كل شبهة ..
وازرع القناعة في قلوبنا بماتقسمه لنا ياكريم ..
حبايب قلبي ليكم التحية والاجلال .
وتقبلو محبتي واحترامي .