مزاد السعادة .. طارق اللبيب

الحلقة التاسعة عشر

في خلال ايام بسيطة . ريان مشت اتكلمت مع غادة .. وسألتها من الموضوع والحاصل بينها وبين مدثر .غادة مادست عليها .. وحكت ليها كل الجواها . وسبب الرفض واي شي ..
بس ريان زولة ذكية شديد .. قالت ليها ياغادة انا عايزة اسألك .
لو في واحد كان متزوج . وبحب زوجتو شديد. قامت زوجتو ماتت .. يتزوج تاني وللاممنوع ؟ .. قالت ليها يتزوج تاني ..
قالت ليها البتقبل بيهو منو؟. وهو كان بحب ليهو واحدة قبليها؟ معناها اي واحدة تقبل بيهو دي اتصرفت غلط؟؟
قالت ليها ابدأ انا ماقلت كدا ..
قالت ليها طيب .. لو في واحد متزوج .. واختلف مع زوجتو .. وطلبت الطلاق .. او طلقها بي ارادتو .. تاني مايتزوج؟
قالت ليها يتزوج ماقلنا حاجة ..
قالت ليها طيب الزول العندو علاقة مع واحدة وكان بحبها . وما اتفقو .. واتخلو عن بعض .. تاني مايفكر يرتبط؟ .. ومافي واحدة ترتبط بيهو؟
قالت ليها بس بفرق .. انا مدثر كان بعرفني من قبل مايفترقو ..
قالت ليها طيب .. على حد حكايتك .. انو كان عندو معاها علاقة قبل ما تدخلي انتي في حياتو صح ؟
قالت ليها نعم ..
ريان قالت ليها عليك نوووور .. انتي عارفة تصرف مدثر انو يرفضك في الاول وهو مرتبط .. ده بدل على وفاء .. في الزمن ده ماموجود .
والله انتي لو فكرتي بي عقل .. وختيتي نفسك في محلو . تلقيهو ارجل راجل .. لكن تفكيرك في اللحظة دي مقفول على كرامتك والعباطة البتعملي فيها دي .. غادة سكتت سااااي .. مسافة خمسة دقايق .. وريان تعاين ليها .. وغادة سارحة في الارض ..
قامت قالت ليها ياريان فرضنا هسي انا وافقت بيهو .. كيف ارجع من كلامي .. تاني مابحترمني نهائي ..
قالت ليها انتي متأكدة انو بحبك وعايزك؟ .. قالت ليها ايوة في الفترة الاخيرة .. من خلال رسايلو المابتنقطع .. بالرغم اني مابرد عليهو ..
وكل مايشوفني في حتة يقعد يتبسم . ويسلم علي بي بشاشة شديدة . يعني من ناحية بحبني دي ماعندي فيها شك؟
ريان قالت ليها وانتي متأكدة انك بتحبيهو ومابتتمني زول غيرو؟
قالت ليها وااااااي ياريان انتي ماعارفة العلي ساي ..
ريان مستهبلة قالت ليها كرعلي يايمة من العذاب ههه .. خلاص يازولة اعتبري الموضوع منتهي ..
قالت ليها منتهي كيف؟ .. قالت ليها مدثر ح يجي يتكلم معاك تاني .. بس بتوعديني تاني ماتصديهو ..
غادة قالت ليها مابصدو والله .. خلاص انا غلبني كتر علي .. نفسي بس اقعد اتكلم معاهو ساي .. ان شاء الله دقيقتين .. ماقادرة .. ياريان ماقادرة ..
طوالي يازول من الحتة ديك ريان مشت كايسة لي مدثر .. لقتو الليلة اوف .
واليومين ديل مشغول مع نهاية الخدمة .. والاستعداد للمرحلة الجاية من حياتو المهنية .. ونايب اخصائي وكدا ..
وانتظرتو لغاية اليوم التاني بي فارق الصبر .. اتكلمت معاهو كتير ولقتو معذب عذاب السنين .. قالت ليهو هي كلمة واحدة يا مدثر ..
انت عايز غادة ولا ماعايزها؟؟
قال ليها طبعا والله بتمناها لي حياة الى الابد .. قالت ليهو امشي اتكلم معاها واطلب منها كدا ..
قال ليها بس هي رفضتيني .. وقالت لي تاني ماتفتح السيرة دي ..
قالت ليهو المرة دي مابتقول ليك .. على مسؤليتي .. لو قالت ليك كدا ولا كدا .. تاني ماتصدقني في حاجة ..
قال ليها هي وين هسي ..؟ قالت ليهو قاعدين كلهم في مكتب دكتور عادل . وانا عايزاك تتكلم معاها قدام الناس ..
الظاهر ياجماعة .اظنو الدكاترة كلهم كاشفين الحكاية . ومتحضرين للحظة دي ..وماعارف هدفهم شنو .. بي انو مدثر يطلب يد غادة قدام زملاها ..
قال ليها بس قدام الناس الاحراج حار ياريان .. لو احرجتني المرة دي ماعارف اعمل شنو؟
قالت ليهو ياود انت دكتور شنو ياخي ؟ امشي عليك الله واتعلم المجازفة مرة ةاحدة في حياتك .. شوفها لذيذى كيف..
طوالي قام على حيلو .. وقال .احم احم. وصلح اللياقة بتاعة البالطو .. ومشى طوالي .. ظت ظت ظت .. بي مشيتو السريعة ديك .. ريان دي لاحقاهو لامن نفسها قام .. والتقويم قرب يطير هه
مشى لقاهم كلهم قاعدين .. وغادة قاعدة في اخر الكنبة وفي كرسي فاضي .. قال ليهم السلام عليكم ورحمة الله .. كلهم قالو ليهو عليكم السلام .. اتفضل الكرسي ده حقك ..
قال ليهم محمد يوسف وينو؟ ..
قالو ليهو يهداك جاي وراك .. وصننن الناس سكتو .. ومنتظرينو يتكلم ..
قال احم احم .. ياجماعة مالكم ساكتين كدي حسستوني بي معاينة امتحان الجدارة وكدا .. هههه
وبرضو ساكتين .. ومحمد يوسف دخل سلم وقعد .. والحتة دي مليانة اظن زي اربعة دكاترة وتلاتة دكتورات ..
طوالي مدثر استعدا وقوى قلبو وعاين لي غادة كدا وابتسم بي خجل . وقال ليها غادة ..
Please marry me
(يعني فضلا" تزوجيني .. )
قالت ليهو ..
I refuse ..)
Speak in Arabic)