ငါ့တပည့်တွေက ဘုရင်တွေ

အပိုင်း 92

ဤပုဂ္ဂိုလ်က ယဲ့ချိုးပိုင်၏ဆရာလေလား။

တစ်ဖက်တွင်မူ ဟွမ်းထျန်းမင်နှင့်ကျန်လူများ၏အမူအရာမှာ မှုန်မှိုင်းသွားရှာလေသည်။

အထိန်းတော်မင်မှာ ပို၍ပင်ထိတ်လန့်သွားပေသည်။

တစ်ဖက်လူသည် သူ၏အင်အားအကောင်းဆုံးတိုက်ခိုက်မှုကို လက်ချောင်းတစ်ချက်လှုပ်ရုံမျှဖြင့် ဖယ်ရှားလိုက်သတဲ့လား။

ဤသည်မှာ မည်သို့သောခွန်အားမျိုးလေလဲ။

လုချန်ရှန်းက အခြားလူများကိုလျစ်လျူရှုထားသည်။ သူက ယဲ့ချိုးပိုင်ကိုကြည့်ပြီး မည်းမှောင်နေသောအမူအရာဖြင့်ပြောလိုက်သည်။

"ငါ ဒီကိုတပည့်လက်ခံဖို့ရောက်လာတာ"

"တပည့်လက်ခံဖို့လား"

ယဲ့ချိုးပိုင် ပြောလိုက်၏။

"ကျွန်တော် ဂျူနီယာညီလေးညီမလေးတွေထပ်ရပြီပေါ့"

လုချန်ရှန်းခေါင်းညိတ်ပြလိုက်သည်။ ထို့နောက် သူက အထိန်းတော်မင်နှင့်အခြားလူများကိုကြည့်ပြီး သာမန်ကာလျှံကာမေးလိုက်သည်။

"သူတို့က နေမဝင်အင်ပါယာကပဲလား"

ယဲ့ချိုးပိုင် ခေါင်းညိတ်ပြလိုက်သည်။

ထိုအခြင်းအရာကိုမြင်သော် လုချန်ရှန်း၏အမူအရာမှာ သုန်မှုန်သွားချေသည်။

တစ်ဖက်လူသည် သူ့တပည့်၏အသက်ကိုသတ်ရန် အကြိမ်ကြိမ်ကြိုးစားခဲ့၏။ သူ ဒေါသမထွက်ဟုဆိုလျှင် လိမ်ရာကျပေလိမ့်မည်။

တစ်ဖက်လူသူ့အိမ်တံခါးဝအထိရောက်လာခဲ့စဉ်က လုချန်ရှန်းတိုက်ခိုက်ရန်ဟန်ပြင်ခဲ့သေးသည်။

သို့သော် ယဲ့ချိုးပိုင်က ထိုကိစ္စကို သူ့ဘာသာကိုင်တွယ်မည်ဟုဆိုလာသည်။

သူက နေမဝင်အင်ပါယာကို သူ့ခြေနင်းကျောက်တုံးတစ်ခုနှယ် သဘောထားခဲ့သည်။

သူ့လက်နှင့် ကိုယ်တိုင်ကိုယ်ကျဖျက်ဆီးမှသာ သူ့ရင်ထဲကကြိုးထုံးကို ‌ဖြည်ချနိုင်မည်ဖြစ်၏။

ထို့ကြောင့် လုချန်ရှန်း ဘာမှမလုပ်ခဲ့ပေ။ ထိုအစား အရိပ်လုပ်ကြံရေးမဏ္ဍပ်ဆီကိုသာ အပြေးသွားပြီး ဖျက်ဆီးပစ်ခဲ့၏။