مهووس ميساء

part 86

سمية: دخل اولدي متبقاش فالباب حتى نقوليهم يطلعو ليك ليڤاليز لبيتك راه وجدتو ليك كيف كتبغي

نضال: علاش عدبتي راسك اسمية انا كنت غنجي نشوفكم و نرجع لوطيل راني مريزيرڤي

سمية عقدات حجبانها: الله يهديك قالاك لوطيل مالي انا شنو كندير غتبقى هنا هي غتبقى هنا سالينا و دابا دخل راه وجدت ليك داكشي لي كتبغي

المختار نطق بمزاح: صافي دابا والله لا مشيتي لوطيل غتلسقك تبقا

سمية: ياااااك دابا انا وليت لسقا

نضال جر سمية معنقها نجب وهوما داخلين: لا اسمية نتي راك تيتيز ديال تيتيز

سمية بضحكة انثوية: يخليك ليلي

وصلو لاصال امونجي لي فيها ما لذ و طاب عامرة من راس حتى الراس بكاع شهيوات لي يطيحو ليك على البال و كانو كالسين ابتسام و ماجدة حدا بعضياتهم كيهضرو حتى ماجدة هزات عينيها لي جات نيشان على نضال قلبها تسارعو دقاتو و حطات يديها على فخض ابتسام قارساها حتى قفزات و نطقات بألم وهي كتحك فالبلاصة لي قرساتها منها: تي مالك جهلتي

ماجدة عينيها غير على نضال: ياختي شحال فن

ابتسام بتساؤل: اويلي شكون

تبعات عينيها فين كيشوفو و ضارت حتى هي كتشوف حتى شافت نضال و نطقات بلا متحس بصوت خافت: صراحة زوييين واش هدا هو ولد خت لالة سمية

ماجدة باقا حالة فيه فمها: يمكن هو

فيقهم من سهوتهم غير صوت سمية لي موجهة لنضال الهضرة: كنقدم ليك ابتسام و ماجدة، البنات كنقدم ليكم نضال ولد ختي

نضال ببتسامة و إحترام: مشرفين

ابتسام و ماجدة فدقة وحدة: شرف لينا

سمية: كلس اولدي

كلس المختار مترأس الطابلة و كلس حداه نضال من الجهة اليمنى، نطقات سمية: بنتي ابتسام سيري كلمي ميساء راه فجردة كتلعب مع تواب

ابتسام حركات راسها بالإيجاب و ناضت خارجة الجردة كتعيط على ميساء غير من بعيد ما فيها لي يخرج فهاد الشموشات: ميساااااااء

ميساء ضارت لعندها محركة يديها بمعنى شنو

ابتسام: اجي تغداي

ميساء شدات فيدين تواب و تمشات تجاه ابتسام: يلاه زيدي

ابتسام: ياختي مشفتيش داك تيتيز ولد خت سمية شحال فن

ميساء بلا مبالاة: سكتي عليا حنا مالنا و مالو

ابتسام ميقات فيا: يخليها فيا قعيدة كنجي نعاود ليك

دخلو حتى وصلو لاصال امونجي و ناضت سمية بفرح معنقة ميساء جنب و نطقات بحنان: وهادي الزوينة ديالنا ميساء

نضال كيف سمع سميتها هز عينيه فوجها الملائكي لي خدودها فحال المشيميشات وهوما حمرين بشمس وعويناتها الخضرين القتالين و زاد عليه صوتها الجوهري الرقيق: مشرفين

نضال ببتسامة ساحرة: شرف ليا

تواب كانت غير كتشوف بعويناتها فنضال بحكم مكتعرفوش حتى كتنطق سمية: وهادي تواب

نضال ناض متوجه لعندها كلس على ركابيه حتى وصل المستواها و نطق: مال التوت مباغيش يهضر معانا

تواب هزات راسها فميساء و نطقات بطفولة و صوت خافت: مامي نهضر معاه

نضال كيف سمع ديك مامي حس براسو تزير و عضلاتو تشنجو بتاسم فوجه تواب و ناض راجع كالس فبلاصتو وهو كيحرك رجليه بعصبية متوقعهاش تكون بنتها

ميساء بهمس: حشومة احبيبة مكنتجاهلوش ناس

سمية محاولة تلطف الجو: خليها ابنتي على خاطرها و دوزي تكلسي

ميساء: غنمشيو غير نغسلو يدينا و نرجعو....

يتبع.....البنات لي كيسولو واش رواية باقا طويلة راه مبقاش بزاف البنات صبرو الله يرضي عليكم و نهاية راه غتكون زوينة متخافوش انا بغيت نمشي دقة دقة مبغيتش زربة اما راه فيا ما يزرب و صافي نسالي رواية من غدا ❤️