In Love With The Sinner (Sinner Series 01)

Chapter 10

Chapter 10

Halos magtilian ang ilang babaeng estudyante sa pagpasok ng tatlong lalaki na talaga namang mga walang tulak kabigin. Ang iba sa mga estudyante ay kilala ang tatlo, ngunit ang karamihan ay masasabing bagong tagahanga ng tatlo kung tutuusin.

Nandoon sila para sana bisitahin ang practice ng graduation ng batch na iyon. Tuloy-tuloy lang sila sa paglalakad, at hindi naman binibigyan ng pansin ang mga babaeng nagpapakita ng interest sa kanila.

Pagpasok nila sa hall kung saan nagaganap ang practice ay iilang estudyante na lang ang kanilang nakita?

"Tapos na ba?" tanong ni Nald sa isang lalaking estudyante na dumaan sa kanilang tabi.

"Hindi pa, break time lang," anito at iniwan na sila.

Nilibot nila ang tingin hanggang sa mamataan nila si Hanna. Tinungo naman nila kaagad ang pwesto ng dalaga na naglalakad.

"Si Ella."

Nagulat naman si Hanna ng bigla na lang may sumulpot sa tabi niya at nagsalita. Bigla naman siyang napatigil sa paglalakad.

"Papatayin ba ninyo ako sa gulat?" reklamo pa ng dalaga. Nakahawak pa rin si Hanna sa dibdib ng tumingin siya kay Jarred.

"Sus kayo lang pala ang sinasabing gwapo na dumating dito. Iba ang karisma ninyo. Aba ay abot na doon sa dulo ang tsismis tungkol sa inyo eh."

"Sandali wala naman akong pakialam sa tsismis na sinasabi mo. Nasaan si Ella? Gusto ko sanang surpresahin siya ngayon. Aayahin ko sana siyang magdate after ng practice ninyo," ani Jarred habang inililibot pa rin ang paningin at hinahanap ang dalaga.

"Hindi ba kayo nagkakausap?"

"Bakit? Anong ibig mong sabihin?"

"Wala naman. Kaya lang nitong nakaraan palagi kong napapansin ang pananahimik ni Ella. I mean hindi naman sobrang tahimik pero may pagbabago. Sa totoo niyan, matagal ko ng napapansin ang bagay na iyon. Ngunit hindi ko magawang magtanong," paglalahad ni Hanna.

Napaisip naman si Jarred sa sinasabing iyon ni Hanna. Ngunit wala naman siyang napapansin sa dalaga.

"Wala naman akong napapansin. Ganoon pa rin naman siya. Sweet at maalaga kahit hindi kami palaging magkasama."

"Nagniningning ang mga mata, basta si Ella ang usapan," sabat naman ni Teo.

Kinalabit naman ni Nald si Jarred at itinuro ang pwesto ni Ella. Hindi nila alam kung saan galing ang dalaga. Ngunit mula sa paglalakad ay naupo ito sa may bench malapit sa isang puno. May hawak itong notebook. Titingin sa kawalan bago muling titig sa hawak na wari mo ay kinakabisado.

Hahakbang na sana si Jarred ng pigilan siya ni Hanna. Naguguluhan namang tumingin ang una sa dalaga.

"Hay alam kung hindi mo rin lang titigilan si Ella kasi alam kung curious ka sa sinabi ko. Wag mong sasabihin kay Ella na sinabi ko sayo."

"Ano ba iyon? Kinakabahan naman ako eh," reklamo pa ni Jarred sa mga pabitin ni Hanna.

"Nakakuha kasi ng mababang grade si Ella sa Calculus. Sa katunayan sa lahat ng subject namin doon pa siya bumagsak. Hindi naman nahabol ng Algebra kasi kahit doon ay laglag ang lola mo. Iyon talaga ang problema ni Ella. Pag hindi siya nakapasa sa remedial exam maiiwan siya sa senior high. Ayaw kasi siyang payagang magtake ng summer class. Ang gusto agad ng head ng school ay magtake siya ulit ng one year sa Grade 12."

Para namang kinurot ang puso ni Jarred sa narinig. Akala niya ay walang problema sa mga aralin ang kasintahan. Minsan sinabihan siya nito na magrereview ito. Pero naging mapilit siya dahil sa namimiss na niya ang dalaga ay sinundo niya ito sa bahay ng mga ito para maidate.