In Love With The Sinner (Sinner Series 01)

Chapter 6

Chapter 6

Tahimik lang na nagbabasa ng notes niya si Ella sa isang bench ng tabihan siya si Hanna at abutan siya ng ice cream. Napansin din naman niyang kumakain ito kaya mabilis niya iyong tinanggap.

"Salamat. Sinong manliligaw mo ang nagbigay?"

"Bastos, libre ko yan sayo. Mukha ba akong si palibre lang?" anito at inirapan lang siya.

Nagkatinginan sila at sabay na nagtawanan. Mula ng mawala ang daddy niya tuwing kasama lang niya si Hanna at si Jarred, doon lang niya nararamdaman na maging masaya. Natigilan naman siya ng maalala ang mommy niya. Halos ilang araw na rin mula ng tumira sa bahay nila si Roi. Naguguluhan siya sa mga kilos ng lalaki. Hindi niya malaman kung nagmamasid ba ito sa kanya. Tuwing huhulihin naman niya kung nakatingin ito sa kanya ay hindi naman niya makita dahil busy ito sa sariling ginagawa.

Napahugot pa siya ng paghinga at ipinagpatuloy ang naudlot na pagkain ng ice cream.

"Ang lalim noon ah. May problema ba? Akala ko ba okay na kayo ni Jarred tapos ngayon napansin kong hindi mo na suot ang kwintas pero nasa daliri mo na ang singsing. May nangyari ba sa inyo? Naku tatawagan ko na ba ang driver namin at susugurin ko iyong si Jarred mo," akmang kukunin ni Hanna ang cellphone nito ng pigilan niya.

"Ang war freak mo. Maayos ang relasyon namin ni Jarred. Busy siya sa trabaho, kahit hindi kami nagkikita ay palagi niya akong tinatawagan sa gabi hanggang sa makatulugan na namin ang isa't-isa."

"Ganoon naman pala, ang happy naman pala ng puso mo. Pero bakit mukha kang problemado. Kanina ko pa yan napapansin noong pagpasok natin. Hindi na lang ako nabigyan ng pagkakataong magtanong ng magsimula na ang klase."

"Si mommy kasi."

"O anong mayroon kay tita? Mag-aasawa na ulit? Sabi ko naman sayo may asim pa si Tita Elizabeth. Sa ganda ng mommy mo maraming magkakandarapa na ligawan si tita," biro ni Hanna na ikinatawa nito.

Palagi siyang binibiro ng kaibigan na hayaan na niyang mag-asawa ang mommy niya kung mayroon man itong manliligaw lalo na at bata pa rin naman ito. Pero sa nakikita niya kay Hanna akala siguro ng kaibigan ay biro lang talaga ang sinabi nito sa mga oras na iyon.

"Mag-aasawa na nga si mommy. Ipinakilala na niya sa akin noong isang araw ang boyfriend niya."

"Wait! What! Nagbibiro lang ako Ella."

"Pero hindi biro ang katotohanang magpapakasal ngang muli si mommy, at sa bahay na siya nakatira. Hindi ko alam kung magaan o mabigat ang pakiramdam ko sa lalaking iyon. Ngunit hindi ko kayang hadlangan ang kasiyahan ni mommy. Ngayon ko lang ulit nakita na ganoong kasaya ang mommy ko. Huli kong nakita na masaya siya ay noong kasama pa namin ang daddy."

"Alam ba ni Jarred? I mean nakwento mo na? Syempre ako bilang kaibigan mo ay naninibago rin ako, na hindi na lang kayo ng mommy mo ang magkasama sa bahay ninyo. Dapat malaman din ni Jarred."

"Sasabihin ko rin naman. Wala pa lang akong pagkakataon. Busy daw si Jarred. Para sa future namin," aniya ng kurutin siya ni Hanna sa tagiliran niya.

Masama namang tinitigan ni Ella ang kaibigan. Mapanakit talaga ito minsan lalo na pagkinikilig.

"Sorry na carried away lang ang beauty ko. Alam mo naman isa si Jarred sa crush ko. Tapos boyfriend na ng best friend ko. Kaya sinong hindi kikiligin. Pero ingat lang palagi Ella ha. Isipin mong bata pa tayo. Ang boyfriend dapat boyfriend lang at gawing inspirasyon. Hayaan mong ikaw ang maging mundo niya at hindi siya ang maging mundo mo."

"Ang lalim. Pero alam po ni Jarred ang limitasyon namin. Lalo na at mas bata ako sa kanya. Kaya wag kang mag-alala iyon ang dahilan kung bakit mahal na mahal ko ang isang iyon."