ඒත් දැන් ඌට මොනා වෙයිද?
මං හිටියෙ පට්ටම අවුලෙන්.
මොනවා වුනත් ජීවිතේ අමාරුම කාලෙදි මගේ ලඟින්ම හිටපු එකානෙ ඌ.
ඒ නිසා කරදරේක වැටුනම අහක බලන්නෙ කොහොමද?
මං ඉන්නෙ අවුලෙන් කියලා අයියට තේරුනා.
ඉතින් එයා එයාගෙ ASP අයියා කෙනෙක් ඉන්න යාළුවාටම ආයෙත් කතා කලා.
මීරා ගැන විස්තරයක් හොයාගන්න පුළුවන් වුනොත් කියන්න කිව්වා.
හැබැයි ඉතින් අපි දැනටම දන්න විස්තරේ ඇරෙන්න වෙන ලොකු දෙයක් නම් දැනගන්න ලැබුනෙ නෑ.
මීරා වරද පිළිගත්ත නිසායි,
මේක ආත්මාරක්ශාව වෙනුවෙන් කරපු දෙයක් නිසයි,
මීරට ලොකු දඬුවමක් ලැබෙන එකක් නෑ කියලා තමයි කිව්වෙ.
බොහෝ විට අවුරුදු දහයකට විතර ඇතුලට යන්න වෙයි කිව්වා.
කොහොමත් මැරිච්ච මිනිස්සු දෙන්නම රටටම එපා කරපු උන් දෙන්නෙක්නෙ.
උන් දෙන්නව මැරුවට මීරට හරි නම් වීර පදක්කමක් දෙන්නයි ඕන.
ඒත් මගේ හිතට අවුල්.
මේ හැමදේම තාම හීනයක් වගේ.
කා එක්කවත් රණ්ඩුවට නොයන,
කියන ඕන දෙයක් කරගෙන බල්ලෙක් වගේ ඉන්න මීරා මිනිස්සු දෙන්නෙක්වම මැරුවා කියද්දි.
ඒකත් තනියෙම්ම!
හිතාගන්නවත් බෑ.
මීරගෙ සිද්දිය සම්බන්දෙන් අපිට කරන්න දෙයක් ඉතුරු වෙලා නෑ කියලා තමයි අයියගෙ යාළුවා කිව්වෙ.
මීරා හැමදේම පිළිගත්ත නිසා, නඩුව කොහොමත් ඉක්මනට ඉවර වෙනවලු.
Lawyer කවුරු වුනත් ඒකෙන් ලොකු බලපෑමක් වෙන්නෙ නෑලු.
කොහොමත් එක එක දේවල් ඔප්පු කරගන්න ඕන වුනාමනෙ lawyersලා හොය හොයා දඟලන්න ඕනෙ.
මේකෙ එහෙම දේවල් නෑනෙ.
ඒත් ඉතින් දුකට සැපට හැමදේටම මාත් එක්ක හිටපු යාළුවට මෙහෙම කරදරයක් වුනාම මට කරන්න දෙයක් කොහොමත් නෑනෙ කියලා අතෑරලා දාලා ඉන්නෙ කොහොමද?
ඌ හොඳින් ඉන්නවද?
කතාබහ කරලා හිත හදන්නවත් කවුරුත් ඉන්නවද කවුද දන්නෙ.
ඒත් එහෙමයි කියලා අයියවත් ඇදගෙන ඕවවල ගිහින් එයාට කරදරයක් වෙන්න දෙන්නත් බෑ.
මේවා හිතලා හිතලම මගේ ඔළුව යකාගෙ කම්මල වගේ වුනා.
කිසිම දෙයක් කරගන්න ඔළුවට නිදහසක් නැති වෙලා ගියා.
අන්තිමේදි අයියා මං කරන පිස්සු වැඩ බලාගෙන ඉන්න බැරුවද කොහෙද කිව්වා මීරාව බලලා එන්න යමු කියලා.
